1-2. Eaha te rave a tiai noa ˈi te ao apî?

 MEA faufaa no tatou te parau fafau a Iehova, oia hoi e monohia teie ao ino i te hoê ao apî e te parau-tia. (Pet. 2, 3:13) Noa ˈtu aita tatou i ite afea te reira e tupu ai, te vai ra te haapapuraa e ua fatata roa.​—Mat. 24:32-34, 36; Ohi. 1:7.

² A tiai noa ˈi i tera mahana, e tia ia tatou paatoa ia haapuai i to tatou tiaturi i tera parau fafau, noa ˈtu ehia maororaa tatou i roto i te parau mau. No te aha? No te mea e nehenehe te faaroo puai e paruparuhia. Inaha, ua parau te aposetolo Paulo no nia i te ereraa i te faaroo, o “te hara [ïa] e faataupupu ohie ia tatou.” (Heb. 12:1) Ia ore to tatou faaroo ia paruparuhia, e tia ia tatou ia hiˈopoa tamau i te haapapuraa e fatata roa te ao apî i te tae mai.​—Heb. 11:1.

3. Eaha ta tatou e hiˈopoa i roto i teie tumu parau haapiiraa?

³ I roto i teie tumu parau haapiiraa, e hiˈopoa tatou e toru ravea o te nehenehe e haapuai i to tatou tiaturi i te parau fafau a Iehova no nia i te ao apî: (1) te feruriruriraa i nia i te hoo, (2) te faahiahiaraa i te mana o Iehova e (3) te rohiraa i roto i te mau ohipa pae varua. I muri iho, e hiˈo tatou e nafea te poroi a Iehova ia Habakuka e haapuai ai i to tatou faaroo i teie mahana. Na mua râ, e hiˈo anaˈe i te tahi mau tupuraa e titauhia ˈi te tiaturiraa papu e e tae mai iho â te ao apî.

 TUPURAA E TITAUHIA ˈI TE FAAROO PUAI

4. I roto i teihea tupuraa e titauhia ˈi te faaroo puai?

⁴ I te mau mahana atoa, e farerei tatou i te tupuraa e titauhia ˈi te faaroo puai. Ei hiˈoraa, e titauhia ia rave i te faaotiraa no nia i te mau amuimuiraa, te mau faaanaanataeraa, te haapiiraa, te ohipa, te faaipoiporaa e te fanauraa anei i te tamarii. E tia ïa ia ui ia tatou iho: ‘Te faaite ra anei ta ˈu mau faaotiraa e ua papu ia ˈu e fatata roa teie ao i te monohia i te ao apî a te Atua? Aore ra te pee ra anei au i te faaotiraa a te taata o te ore e tiaturi ra i te ora mure ore?’ (Mat. 6:19, 20; Luka 12:16-21) E rave tatou i te faaotiraa tano ia haapuai tatou i to tatou tiaturi e fatata roa te ao apî i te tae mai.

5-6. No te aha e titauhia ˈi te faaroo puai i te taime ahoaho? A horoa i te hiˈoraa.

⁵ E faaruru atoa tatou i te fifi e titauhia ˈi te faaroo puai, mai te hamani-ino-raa, te maˈi tamau e te tahi atu fifi e toaruaru ai tatou. I te haamataraa, e noaa iho â paha ia tatou i te faaoromai i te reira. Ia maoro râ, e titauhia te faaroo puai no te faaoromai tamau e no te tavini noa ia Iehova ma te oaoa.​—Roma 12:12; Pet. 1, 1:6, 7.

⁶ A faaruru ai i te fifi, e nehenehe tatou e manaˈo eita roa ˈtu te ao apî a Iehova e tae mai. Te auraa anei râ e ua paruparuhia to tatou faaroo? E ere. Teie te hoê hiˈoraa. Mai te peu ua topa te ûa e rave rahi hebedoma te maoro, e nehenehe tatou e manaˈo eita te mahana e maitai faahou mai. Tera râ, e maitai mai iho â te mahana. Oia atoa ia toaruaru roa tatou, e nehenehe tatou e manaˈo eita roa ˈtu te ao apî e tae mai. Mai te peu râ e faaroo puai to tatou, ua papu ia tatou e tupu iho â te mau parau fafau a te Atua. (Sal. 94:3, 14, 15; Heb. 6:17-19) Maoti teie tiaturiraa e faaite noa ˈi tatou e o te haamoriraa a Iehova te mea faufaa roa ˈˈe i roto i to tatou oraraa.

7. Teihea huru feruriraa te tia ia tatou ia vai ara?

⁷ E titau-atoa-hia te faaroo puai i roto i te ohipa pororaa. E rave rahi taata ta tatou e poro nei o te manaˈo e moemoeâ noa te “parau apî oaoa” a te Atua no nia i te ao apî. (Mat. 24:14; Ezk. 33:32) E ara ïa tatou eiaha roa to ratou huru feruriraa ia pee i nia ia tatou. No reira, e titauhia ia haapuai i to tatou faaroo. E hiˈo anaˈe e toru ravea no te na reira.

A FERURIRURI I NIA I TE HOO

8-9. E nafea te feruriruriraa i nia i te hoo e haapuai ai i to tatou faaroo?

⁸ Te hoê ravea e haapuai ai tatou i to tatou faaroo, o te feruriruriraa ïa i nia i te hoo. E haapapuraa te hoo e e tupu iho â te mau parau fafau a te Atua. Ia feruri maite tatou mea nafea Iehova i te horoaraa mai i te hoo, e puai atu â to tatou tiaturiraa e ora e a muri noa ˈtu i roto i te hoê ao maitai aˈe. No te aha hoi?

⁹ Mea nafea Iehova i te horoaraa mai i te hoo? Mai te raˈi mai, ua tono oia i ta ˈna Tamaiti otahi, to ˈna hoa piri roa ˈˈe, i te fenua ia fanauhia oia ei taata tia roa. I reira, ua faaruru Iesu i te fifi e rave rau. E i te hopea, ua haamauiuihia oia hou a haapohehia ˈtu ai. Auê ïa ô faufaa roa ta Iehova i ineine i te horoa mai! Eita roa ˈtu to tatou Atua î i te here e faatia ia haamauiuihia e ia haapohehia ta ˈna Tamaiti ia maitai to tatou oraraa  no te hoê noa taime poto. (Ioa. 3:16; Pet. 1, 1:18, 19) Inaha ua pûpû roa mai Iehova i ta ˈna Tamaiti otahi, e haapao maitai ïa oia ia fanaˈo tatou i te ora mure ore i roto i te ao apî.

A FAAHIAHIA I TE MANA O IEHOVA

10. Ia au i te Ephesia 3:20, eaha ta Iehova e nehenehe e rave?

¹⁰ Te piti o te ravea e haapuai ai tatou i to tatou faaroo, o te faahiahiaraa ïa i te mana o Iehova. E mana to Iehova no te faatupu i te mau parau fafau atoa. Parau mau, no e rave rahi taata, e moemoeâ noa te parau fafau e ora e a muri noa ˈtu i roto i te hoê ao apî. Pinepine râ Iehova i te fafau i te faatupu i te ohipa ta te taata e ore e nehenehe e faatupu. O ˈna hoi te Atua Manahope. (Ioba 42:2; Mar. 10:27) Eita ïa tatou e maere ia fafau oia i te faatupu i te ohipa faahiahia mau.​—A taio i te Ephesia 3:20.

11. Eaha te tahi mau parau fafau faahiahia mau a te Atua? (A hiˈo i te tumu parau “ Te tahi mau parau fafau faahiahia tei tupu.”)

¹¹ Teie te tahi o te mau ohipa maere mau ta Iehova i fafau i to ˈna nunaa i tahito ra. Ua haapapu oia ia Aberahama raua Sara e e fanauhia mai ta raua te hoê tamaiti i to raua paariraa. (Gen. 17:15-17) Ua fafau atoa oia ia Aberahama e e fatu to ˈna huaai i te fenua o Kanaana. I te mea e e rave rahi matahiti to te huaai o Aberahama, te ati Iseraela, faatîtîraahia i Aiphiti, e nehenehe e manaˈohia eita roa teie parau fafau e tupu, ua tupu râ te reira. Te tahi atu hiˈoraa, ua fafau Iehova e e fanau Elisabeta i te hoê tamarii noa ˈtu ua paari roa o ˈna. Ua fafau atoa oia ia Maria, tei ore i taoto aˈenei i te hoê tane, e fanau oia i ta ˈna iho Tamaiti. Ua tohuhia to ˈna parau i roto i te ô i Edene a tausani matahiti na mua ˈtu, te tahi atu â ïa parau fafau tei tupu.​—Gen. 3:15.

12. E nafea te Iosua 23:14 e te Isaia 55:10, 11 e tauturu ai ia tatou ia tiaturi i te mana o Iehova?

¹² Ia feruri tatou i te mau parau atoa ta Iehova i fafau e i faatupu, e ite maitai tatou e e mana rahi to ˈna. E haapuai ïa te reira i to tatou tiaturi i ta ˈna parau fafau no nia i te ao apî. (A taio i te Iosua 23:14; Isaia 55:10, 11.) Na te reira e tauturu ia tatou ia taa e ere te parau fafau no nia i te ao apî i te moemoeâ. Na Iehova iho i fafau no nia i te raˈi apî e te fenua apî: “E parau papu hoi teie e te parau mau.”​—Apo. 21:1, 5.

A ROHI NOA I ROTO I TE MAU OHIPA PAE VARUA

13. E nafea te mau putuputuraa e haapuai ai i to tatou faaroo? A horoa i te hiˈoraa.

¹³ Te toru o te ravea e haapuai ai tatou i to tatou faaroo, o te rohiraa ïa i roto i te mau ohipa pae varua. E hiˈo anaˈe e nafea tatou e faufaahia ˈi i te mau putuputuraa. Te na ô ra o Anna, hoê tuahine mea maoro i roto i te taviniraa taime taatoa: “E puai noa to ˈu faaroo maoti te mau putuputuraa. Noa ˈtu e ere te taeae e vauvau ra i te tumu parau i te mea aravihi roa e noa ˈtu aita e haapiiraa apî ta ˈu e faaroo ra, te vai noa ra te hoê manaˈo o te tauturu ia ˈu ia taa maitai atu â i te hoê parau mau Bibilia. Na te reira e haapuai i to ˈu faaroo.” b E puai tu â to tatou faaroo maoti te mau pahonoraa faaitoito a te mau taeae e tuahine.​—Roma 1:11, 12; 10:17.

14. E nafea te pororaa e haapuai ai i to tatou faaroo?

 ¹⁴ E puai-atoa-hia to tatou faaroo ia apiti tatou i te pororaa. (Heb. 10:23) Te na ô ra Barbara, hoê tuahine tei tavini noa na ia Iehova hau atu i te 70 matahiti: “Ua puai-noa-hia to ˈu faaroo ia apiti au i te pororaa. Rahi atu â vau i te faaite i te taata i te mau parau fafau faahiahia a Iehova, rahi atu â ïa to ˈu faaroo i te puai.”

15. E nafea ta tatou iho haapiiraa e haapuai ai i to tatou faaroo? (A hiˈo atoa i te mau hohoˈa.)

¹⁵ E nehenehe atoa ta tatou iho haapiiraa e haapuai i to tatou faaroo. Mea au na te tuahine Susan e faanaho atea i ta ˈna iho haapiiraa. Te na ô ra o ˈna: “I te Tapati, e faaineine au i ta ˈu Pare Tiairaa no te hebedoma i mua. I te Monire e te Mahana piti, e faaineine au i ta ˈu putuputuraa no te hebedoma. I te toea o te hebedoma, e rave au i ta ˈu iho haapiiraa.” Ma te rave tamau i ta ˈna haapiiraa i te mau hebedoma atoa, ua haapuai noa Susan i to ˈna faaroo. Ua tavini te tuahine Irene i te pu rahi e rave rahi matahiti. Ua puaihia to ˈna faaroo a hiˈopoa ˈi oia i te mau parau tohu Bibilia. Te na ô ra oia: “E faahiahia roa vau a ite ai e e tupu noa te mau parau tohu a Iehova.” c

“E TUPU MAU Â TE REIRA”

16. No te aha o tatou atoa te faufaahia i te haapapuraa ta Iehova i horoa ia Habakuka? (Hebera 10:36, 37)

¹⁶ Mea maoro to vetahi mau tavini a Iehova tiairaa i te hopea o teie nei ao. No vetahi, mea taere teie parau tohu i te tupu. Ua ite râ Iehova i te huru aau o ta ˈna mau tavini. Ua haapapu oia i te peropheta Habakuka: “No to ˈna tau faataahia  hoi teie orama, te haere ru nei i to ˈna hopea e eita te reira e haavare. Ia taere noa ˈtu te reira, a tamau â i te tiai atu! No te mea e tupu mau â te reira. Eita te reira e taere!” (Hab. 2:3) O Habakuka noa anei te faufaahia i teie haapapuraa a te Atua? Aore ra o tatou atoa? I raro aˈe i te aratairaa a te varua moˈa, ua faaue Iehova i te aposetolo Paulo ia faaohipa atoa i teie mau parau no te mau Kerisetiano tei tiai ru i te ao apî. (A taio i te Hebera 10:36, 37.) Noa ˈtu no tatou e mea taere teie parau fafau i te tupu, e nehenehe tatou e papu e “e tupu mau â te reira. Eita te reira e taere!”

17. Mea nafea to te hoê tuahine faaohiparaa i te aˈoraa ta Iehova i horoa ia Habakuka?

¹⁷ E rave rahi tavini a Iehova tei faaohipa i te aˈoraa a Iehova ia “tamau â i te tiai.” Ua tiai vetahi e rave rahi matahiti. Ei hiˈoraa, ua haamata Louise i te tavini ia Iehova i 1939. Te na ô ra oia: “I tera matahiti, ua manaˈo vau e tae mai Aramagedo hou a hope ai ta ˈu tau haapiiraa, aita râ. A mairi ai te tau, ua tauturu rahi te aamu Bibilia o Noa, Aberahama, Iosepha e vetahi atu ia ˈu ia tamau i te tiai i te haamaitairaa ta Iehova i fafau. Ma te tamau i te tiaturi e e tupu taua mau parau fafau ra, ua tauturu te reira ia ˈu e ia vetahi ê ia papu iho â e te fatata mai ra te ao apî.” Te tu atoa ra te manaˈo o e rave rahi atu tavini a Iehova mea maoro i roto i te parau mau.

18. E nafea te mataitairaa i te mau mea poietehia e haapuai ai i to tatou tiaturi i te ao apî?

¹⁸ Parau mau, aita te ao apî i tae mai atura. A feruri na râ i te mau fetia, te mau tumu raau, te mau animara e te mau taata ati aˈe ia tatou. Aita hoê aˈe e feaa ra e mea mau te reira, noa ˈtu e i te hoê taime, aita â ratou i poietehia ˈtura. Tei reira ratou no te mea ua poiete Iehova ia ratou. (Gen. 1:1, 26, 27) Ua fafau atoa Iehova e haamau i te hoê ao apî e e faatupu oia i te reira. I roto i te ao apî, e fanaˈo te taata i te ora mure ore e te ea maitai. I te taime ta te Atua i faataa, e tae mai iho â te ao apî mai ta ˈna i faaoti.​—Isa. 65:17; Apo. 21:3, 4.

19. E nafea outou e haapuai ai i to outou faaroo?

¹⁹ I teie nei â, a imi i te mau ravea atoa no te haapuai i to outou faaroo. A haafaufaa i te ô o te hoo, a faahiahia i te mana o Iehova e a rohi i roto i te mau ohipa pae varua. Ma te na reira, e taio-atoa-hia outou i roto i “te feia e fatu i te mau parau fafau no to ratou faaroo e to ratou faaoromai.”​—Heb. 6:11, 12; Roma 5:5.