1. Eaha ta tatou e tiaturi papu?

 EI TAVINI na Iehova, ua ite tatou e mea here na ˈna ia tatou e te hinaaro ra oia ia oaoa noa tatou. (Roma 8:35-39) Ua papu ia tatou e e faufaahia tatou a faaohipa ˈi i te mau aratairaa Bibilia. (Isa. 48:17, 18) Eaha râ to tatou huru a faaruru ai i te mau fifi manaˈo-ore-hia?

2. Eaha te fifi ta tatou e faaruru ra e eaha te mau uiraa te fa mai i roto i to tatou feruriraa?

² O te mau tavini atoa a Iehova te faaruru ra i te fifi. Ei hiˈoraa, e haamauiui mai paha te hoê mero utuafare. Aore ra no te maˈi, eita tatou e nehenehe faahou e rave hau atu no Iehova. E roo-atoa-hia paha tatou i te ati natura aore ra te hamani-ino-raa no to tatou faaroo. I mua i teie mau fifi e ui paha tatou: ‘No te aha vau e faaruru ai te reira? Eaha hoi ta ˈu i rave? Te auraa anei e aita Iehova e haamaitai ra ia ˈu?’ Aita anei outou i manaˈo aˈenei mai tera? Mai te peu e e, eiaha e toaruaru, e rave rahi hoi tavini na Iehova tei faaruru i te hoê â mau tupuraa.​—Sal. 22:1, 2; Hab. 1:2, 3.

3. Eaha te haapii mai i te Salamo 34:19?

³ A taio i te Salamo 34:19. Teie e piti haapiiraa faufaa ta tatou e huti mai i teie Salamo: (1) E faaruru te feia parau-tia i te fifi. (2) E faaora Iehova ia tatou i te ati. E nafea ïa? Hoê ravea, o te tautururaa ïa ia tatou ia faatupu i te hoê manaˈo tano i nia i to tatou oraraa i roto i teie nei ao. Ua fafau Iehova e oaoa tatou i te tavini ia ˈna, aita  râ oia i parau e eita roa tatou e faaruru i te fifi. (Isa. 66:14) Te faaitoito mai ra oia ia tiatonu i nia i to tatou tiaturiraa e ora e a muri noa ˈtu. (Kor. 2, 4:16-18) A tiai noa ˈi, e tauturu oia ia tatou ia tamau i te tavini ia ˈna.​—Oto 3:22-24.

4. Eaha ta tatou e hiˈopoa i roto i teie tumu parau haapiiraa?

⁴ I roto i teie tumu parau haapiiraa, e hiˈopoa tatou i te hiˈoraa o te tahi mau tavini haapao maitai a Iehova, i tahito ra e i to tatou tau. E ite tatou e e faaruru iho â tatou i te fifi manaˈo-ore-hia. Ia turui râ tatou i nia ia Iehova, eita oia e faarue ia tatou. (Sal. 55:22) A hiˈopoa ˈi i teie mau hiˈoraa, e ui anaˈe ia tatou iho: ‘E nafea vau i roto i tera mau tupuraa? E nafea teie mau hiˈoraa e haapuai ai i to ˈu tiaturi ia Iehova? E nafea ia faaohipa i teie mau haapiiraa i roto i to ˈu oraraa?’

5. Eaha te mau fifi ta Iakoba i faaruru no te huru o Labana? (A hiˈo i te hohoˈa i te api matamua.)

⁵ I te tau Bibilia, ua faaruru te mau tavini a Iehova i te fifi manaˈo-ore-hia. O Iakoba te tahi. Ua faaue to ˈna metua tane ia ˈna ia faaipoipo i te hoê tamahine a Labana, te hoê fetii o te haamori atoa ra ia Iehova. Ua haapapu to ˈna metua tane ia ˈna e e haamaitai rahi Iehova ia ˈna. (Gen. 28:1-4) E faaotiraa maitai ïa ta Iakoba i rave. Ua faarue oia i Kanaana no te haere i ǒ Labana. E piti tamahine ta Labana, o Lea raua Rahela. Ua here Iakoba i te teina, o Rahela, e ua farii oia e tavini ia Labana e hitu matahiti no te faaipoipo ia ˈna. (Gen. 29:18) Aita râ i tupu mai ta Iakoba i manaˈo. Ua punu Labana ia Iakoba ma te horoa ia Lea ta ˈna matahiapo ei vahine faaipoipo na ˈna. Hoê hebedoma i muri aˈe, ua faatia Labana ia faaipoipo Iakoba ia Rahela ia tavini o ˈna ia ˈna e hitu atu â matahiti. (Gen. 29:25-27) I muri aˈe, ua faaau Labana i te hoê parau ia Iakoba, aita râ oia i tapea i ta ˈna parau. Ia numerahia, e 20 matahiti to Labana punuraa ia Iakoba!​—Gen. 31:41, 42.

6. Eaha ˈtu â ta Iakoba i faaruru?

⁶ Ua faaruru Iakoba i te tahi atu mau fifi. E utuafare rahi to ˈna, eita râ ta ˈna mau tamaiti i afaro te tahi i te tahi. Ua hoo roa ratou i to ratou taeae ia Iosepha ei tîtî. Ua hopoi mai e piti o ta ˈna tamaiti, o Simeona raua Levi, i te haama i nia i to ˈna utuafare e ua vahavaha i te iˈoa o Iehova. Hau atu, ua pohe ta ˈna vahine here, o Rahela, i to ˈna fanauraa i te piti o ta raua tamarii. E no te oˈe rahi, ua titauhia ia Iakoba ia haere e ora i te fenua Aiphiti, noa ˈtu ua paari roa o ˈna.​—Gen. 34:30; 35:16-19; 37:28; 45:9-11, 28.

7. Mea nafea Iakoba i te fanaˈoraa i te farii maitai a Iehova?

⁷ Noa ˈtu teie mau tamataraa atoa, aita Iakoba i ere noa ˈˈe i to ˈna tiaturi ia Iehova e i ta ˈna mau parau fafau. Ei haamaitairaa, ua fanaˈo Iakoba i te farii maitai a Iehova. Ei hiˈoraa, noa ˈtu ua punu Labana ia ˈna, ua faarahi Iehova i te faufaa a Iakoba. Eaha atoa râ paha Iakoba i te mauruuru ia Iehova i to ˈna farerei-faahou-raa ia Iosepha, te tamaiti ta ˈna i manaˈo na e ua pohe! No to ˈna auhoaraa piri e o Iehova i nehenehe ai Iakoba e faaoromai i teie mau tamataraa. (Gen. 30:43; 32:9, 10; 46:28-30) No reira, ia vai piri noa tatou ia Iehova, e noaa atoa ia tatou ia faaoromai i te mau fifi manaˈo-ore-hia.

8. Eaha ta te arii Davida i hinaaro e rave?

 ⁸ E rave rahi ohipa ta te arii Davida i opua i te rave no te tavini ia Iehova. Aita râ ta ˈna i nehenehe e faatupu pauroa. Ei hiˈoraa, ua hinaaro roa Davida e patu i te hoê hiero no to ˈna Atua. Ua faaite oia i te reira i te peropheta Natana. Ua pahono Natana ia ˈna: “Te mau mea atoa ta oe e hinaaro ra e rave, a rave ïa, tei ia oe hoi te Atua mau.” (Par. 1, 17:1, 2) Papu maitai, ua itoitohia Davida i teie mau parau. Eita e ore e i reira iho to Davida faanahoraa i teie tapura ohipa iti rahi.

9. Eaha te huru o Davida i te taeraa mai te parau a Iehova?

⁹ Aita râ i maoro, hoˈi maira te peropheta Natana no te faaite ia ˈna i te parau a Iehova. “I tera iho â po,” ua parau Iehova ia Natana e ere na Davida e patu i te hiero, na te hoê râ o ta ˈna tamaiti. (Par. 1, 17:3, 4, 11, 12) Eaha te huru o Davida i mua i tera poroi? Ua faatano oia i ta ˈna fa. Ua haaputu oia i te moni e te taihaa no ta ˈna tamaiti ra o Solomona, inaha na ˈna e patu i te hiero.​—Par. 1, 29:1-5.

10. Mea nafea Iehova i te haamaitairaa ia Davida?

¹⁰ I to Natana iho â faaararaa ia Davida e ere na ˈna e patu i te hiero, faaau ihora Iehova i te hoê faufaa ia ˈna. Ua fafau Iehova ia Davida e e riro hoê o to ˈna huaai ei Arii e a muri noa ˈtu. (Sam. 2, 7:16) I roto i te ao apî, e oaoa roa paha Davida i te ite e te fanaˈo ra oia i te ora mure i raro aˈe i te faatereraa e tausani matahiti a Iesu, te hoê arii no roto mai i to ˈna huaai. Te haapii mai ra te reira e noa ˈtu aita tatou i rave i te mau mea atoa ta tatou i opua e rave no Iehova, e haamaitairaa ê atu ta ˈna no tatou.

11. Mea nafea te mau Kerisetiano matamua i haamaitaihia ˈi noa ˈtu aita te Faatereraa arii i tae mai i te taime ta ratou i manaˈo? (Ohipa 6:7)

¹¹ Ua faaruru te mau Kerisetiano matamua i te tupuraa manaˈo-ore-hia. Ei hiˈoraa, ua hinaaro ru ratou ia tae mai te Faatereraa arii a te Atua, aita râ ratou i ite afea te reira e tupu ai. (Ohi. 1:6, 7) Eaha ïa ta ratou i rave? Ua tamau ratou i te ohipa i roto i te taviniraa. A parare ai te parau apî oaoa, ua ite ratou i te haapapuraa e te haamaitai ra Iehova i ta ratou mau tutavaraa.​—A taio i te Ohipa 6:7.

12. Eaha ta te mau Kerisetiano matamua i rave a tupu ai te tahi oˈe?

¹² I te hoê taime, ua tupu te oˈe rahi i “te fenua taatoa.” (Ohi. 11:28) Ua faaruru atoa te mau Kerisetiano matamua i te reira. A feruri na i to ratou tupuraa. Ua haapeapea te mau upoo utuafare e nafea ratou e faatamaa ˈi i to ratou utuafare. Peneiaˈe ua opua te tahi mau Kerisetiano apî e apiti atu â i roto i te taviniraa. No te oˈe rahi râ, ua titauhia paha ia ratou ia faanuu i ta ratou opuaraa. Noa ˈtu to ratou tupuraa, ua rave te mau Kerisetiano i te tahi mau faatanotanoraa. Tera râ, ua tamau ratou i te poro e ua tufa i ta ratou faufaa i to ratou mau hoa Kerisetiano no Iudea ma te aau tae.​—Ohi. 11:29, 30.

13. Mea nafea te mau Kerisetiano i te haamaitairaahia a faaruru ai ratou i te oˈe?

¹³ Mea nafea te mau Kerisetiano i te haamaitairaahia a faaruru ai ratou i te oˈe? Ua ite roa ratou mea nafea Iehova i te tautururaa ia ratou. (Mat. 6:31-33) Eita e ore e ua piri atu â ratou i to ratou mau hoa Kerisetiano tei afai mai i te tauturu. Area tei pûpû atu i te ô aore ra tei  tauturu na roto i te tahi atu ravea, ua oaoa ïa ratou no te mea ua horoa ratou i tei maraa ia ratou. (Ohi. 20:35) Ua haamaitai Iehova ia ratou paatoa no te mea ua rave ratou i te tahi mau faatanotanoraa ia au i te tupuraa.

14. Eaha tei tupu no Baranaba e te aposetolo Paulo, e eaha te faahopearaa? (Ohipa 14:21, 22)

¹⁴ Pinepine atoa te mau Kerisetiano matamua i te hamani-ino-hia, oia atoa i te taime manaˈo-ore-hia. A feruri na i tei tupu no Baranaba raua te aposetolo Paulo a poro ai raua na Lusetera. I te haamataraa, ua farii-maitai-hia raua. I muri iho râ, ‘faahuehuehia aˈera tera rahiraa taata’ e te feia patoi, e pehi roa ˈtura vetahi o ratou ia Paulo i te ofai e ua fatata roa oia i te pohe. (Ohi. 14:19) Ua tamau râ Baranaba raua Paulo i te poro i te tahi atu vahi. Eaha te faahopearaa? “Faariro atura raua vetahi ei pǐpǐ” e ua riro ta raua mau parau e to raua hiˈoraa ei faaitoitoraa no to raua mau hoa Kerisetiano. (A taio i te Ohipa 14:21, 22.) E rave rahi tei faufaahia i to raua hiˈoraa no te mea ua mau papu raua i mua i te hamani-ino-raa. No reira, e haamaitaihia tatou a rave noa ˈi tatou i ta Iehova i ani mai.

15. Eaha te haapii mai i te hiˈoraa o taeae Macmillan?

¹⁵ Hou te matahiti 1914, ua manaˈo te nunaa o Iehova e e ohipa te tupu. Teie te hiˈoraa o taeae Macmillan. Mai e rave rahi i tera ra tau, ua manaˈo taeae Macmillan e fatata o ˈna i te fanaˈo i ta ˈna haamaitairaa i nia i te raˈi. I roto i te hoê oreroraa parau ta ˈna i horoa i Tetepa 1914, ua parau o ˈna: “Teie paha ta ˈu oreroraa parau hopea.” E ere roa ˈtu râ. I muri aˈe, ua papai oia: “Peneiaˈe, ua hinaaro vetahi o tatou e haere oioi i te raˈi.” Ua papai atoa oia: “I teie nei, e tia ia tatou ia tamau i roto i te taviniraa a te Fatu.” Ua na reira iho â taeae Macmillan. E taeae itoito mau o ˈna i roto i te taviniraa. Ua faaitoito oia e rave rahi taeae tei tapeahia no to ratou tiaraa amui ore. Aita atoa o ˈna i mairi i te mau putuputuraa, noa ˈtu te matahiti rahi. A tiai noa ˈi i ta ˈna haamaitairaa i nia i te raˈi, ua faaohipa maitai taeae Macmillan i to ˈna taime. Hou a pohe ai i 1966, ua papai o ˈna: “E nehenehe ta ˈu e parau e faaroo puai to ˈu i teie mahana.” E hiˈoraa maitai mau o ˈna no tatou, i te mau taime iho â râ e manaˈo ai tatou e mea maoro tatou i te faaruru-noa-raa i te fifi.​—Heb. 13:7.

16. Eaha te tupuraa manaˈo-ore-hia ta Herbert Jennings e ta ˈna vahine i faaruru? (Iakobo 4:14)

¹⁶ E rave rahi tavini a Iehova tei roohia i te maˈi. I te faatiaraa taeae Herbert Jennings b i to ˈna aamu, ua faataa oia e ua tonohia raua ta ˈna vahine i Ghana ei mitionare e ua oaoa raua i ta raua taviniraa. I te hoê râ mahana, ua itehia mai e maˈi ino to ˈna, no reira to ˈna huru e tauiui noa ˈi. Mea au na taeae Jennings e faahiti i te Iakobo 4:14 no te faataa i te huru o to ˈna maˈi. (A taio.) Ua papai oia: “No teie tupuraa, ua titauhia ia mâua ia vaiiho i ta mâua taviniraa i Ghana e oia atoa e rave rahi hoa piri no te hoˈi i Kanada [ia rapaauhia vau].” Ua tauturu Iehova ia taeae Jennings e ta ˈna vahine ia tamau i te tavini ia ˈna noa ˈtu te tupuraa manaˈo-ore-hia ta raua i faaruru.

17. Mea nafea te mau taeae e tuahine i itoitohia ˈi i te hiˈoraa o taeae Jennings?

 ¹⁷ Ua itoito-roa-hia vetahi a taio ai i te aamu o taeae Jennings. Ua papai hoê tuahine: “Ua putapû roa vau i to ˈu taioraa i teie tumu parau. . . . No te maˈi, ua titauhia ia taeae Jennings ia vaiiho i te vahi i tonohia ˈi oia no te rapaau ia ˈna. Maoti teie aamu, ua noaa ia ˈu te hoê hiˈoraa aifaito o to ˈu tupuraa.” Ua papai atoa hoê taeae: “Ua tavini au ei matahiapo e ahuru matahiti. I muri iho, ua titauhia ia ˈu ia vaiiho i ta ˈu taviniraa no te mea ua roohia vau i te hoê maˈi o te haafifi i to ˈu feruriraa. Ua haafaufaa ore roa vau ia ˈu e no te rahi o to ˈu hepohepo, pinepine eita e haere ia ˈu ia taio i te aamu o te mau taeae e tuahine. . . . Ua itoito-roa-hia râ vau i te aamu o taeae Jennings.” Te haamanaˈo ra te reira ia tatou e, ia faaruru tatou i te ati manaˈo-ore-hia, e nehenehe tatou e tauturu ia vetahi ê. E ua rahi roa anaˈe to tatou fifi, e nehenehe â vetahi ê e pee i to tatou faaroo e faaoromai tamau.​—Pet. 1, 5:9.

18. Mai ta te mau hohoˈa e faaite ra, eaha te haapii mai i te hiˈoraa o te hoê vahine ivi no Nigéria?

¹⁸ No te maˈi pee COVID-19, e rave rahi fifi ta te mau tavini a Iehova i faaruru. Ei hiˈoraa, mea iti te maa e te moni a te hoê vahine ivi no Nigéria. I te hoê poipoi, ua ani ta ˈna tamahine eaha ta raua e amu ua tunu anaˈe raua i ta raua auˈa raiti hopea. Ua parau to tatou tuahine i ta ˈna tamahine e ua pau anaˈe ta raua maa e ta raua moni, e tia ïa ia raua ia pee i te hiˈoraa o te vahine ivi no Zarephate. Ua tunu ïa raua i ta raua auˈa raiti hopea a tiaturi atu ai ia Iehova. (Arii 1, 17:8-16) Aita â raua i feruri atura e nafea raua e tamaa ˈi i taua avatea ra, afai mai nei te tahi mau taeae e tuahine i te maa na raua. E navai roa ïa raua no e piti hebedoma e hau atu. Ua parau te tuahine e a tahi ra oia i ite ai  e te faaroo noa ra Iehova ia ˈna i paraparau i ta ˈna tamahine. Oia mau, ia turui tatou i nia ia Iehova, e riro atoa te mau fifi manaˈo-ore-hia ei ravea no te faafatata ˈtu â ia ˈna.​—Pet. 1, 5:6, 7.

19. Eaha te hamani-ino-raa ta Aleksey Yershov i faaruru?

¹⁹ Aita i maoro aˈenei, e rave rahi taeae e tuahine to tatou tei hamani-ino-hia. Teie te hiˈoraa o Aleksey Yershov, te hoê taeae no Rusia. I te bapetizoraahia taeae Yershov i 1994, ua nehenehe noa â te nunaa o Iehova e rave i ta ratou taviniraa. I muri mai râ, taui ihora te tupuraa i Rusia. I 2020, ua tomohia e ua paheruhia te fare o taeae Yershov e te mutoi e e rave rahi taihaa ta ˈna tei tapeahia. E rave rahi avaˈe i muri mai, ua pari te hau fenua ia ˈna i te ohipa ino. Te mea ino roa ˈtu â, no roto mai ta ratou haapapuraa i te hoê video tavirihia e te tahi taata tei haavare e ua anaanatae oia i te haapii i te Bibilia. Ua hau i te hoê matahiti to ˈna faaineineraa i teie video. Tera mau te taiva!

20. Mea nafea taeae Yershov i piri atu â ˈi ia Iehova?

²⁰ Eaha tei noaa mai i te hamani-ino-raahia taeae Yershov? Ua piri atu â oia ia Iehova. “Pinepine aˈe mâua ta ˈu vahine i te pure amui,” o ta ˈna ïa e faatia ra. “Ua taa ia ˈu e eita e maraa ia ˈu aita anaˈe te tauturu a Iehova.” Te na ô atoa ra oia: “Na ta ˈu haapiiraa i tauturu ia ˈu ia faaruru i te toaruaruraa. E feruri au i nia i te hiˈoraa o te mau tavini haapao maitai i tahito ra. E rave rahi aamu i roto i te Bibilia o te faaitoito mai ra ia vai hau noa e ia tiaturi ia Iehova.”

21. Eaha ta tatou i haapii mai i roto i teie tumu parau haapiiraa?

²¹ Eaha ta tatou i haapii mai i roto i teie tumu parau haapiiraa? E faaruru iho â tatou i te tupuraa manaˈo-ore-hia i roto i teie ao. Noa ˈtu râ, e tauturu noa Iehova i ta ˈna mau tavini ia turui ratou i nia ia ˈna. Mai tei parauhia i roto i ta tatou irava tumu, “mea rahi te ati o te taata parau-tia, te faaora nei râ Iehova ia ˈna i taua mau ati atoa ra.” (Sal. 34:19) E tamau anaˈe i te tiatonu i nia i te puai faaora o Iehova, eiaha râ i nia i to tatou mau fifi. E nehenehe ïa tatou e parau mai te aposetolo Paulo: “E puai to ˈu ia faaruru i te mau mea atoa maoti tei horoa mai i te puai.”​—Phil. 4:13.