TUMU PARAU HAAPIIRAA 15
HIMENE 124 E taiva ore anaˈe
A haapuai i to mauruuru no ta Iehova faanahonahoraa
“A haamanaˈo i te mau aratai i rotopu ia outou, o tei parau ia outou i te parau a te Atua.”—HEB. 13:7.
MANAˈO FAUFAA
Mea faufaa ia haapuai i to tatou mauruuru e faatura no ta Iehova faanahonahoraa.
1. I te senekele matamua, mea nafea Iehova i te faanahoraa i ta ˈna mau tavini?
IA HOROA Iehova i te tahi ohipa i ta ˈna mau tavini, e hinaaro oia ia faanaho-maitai-hia te reira. (Kor. 1, 14:33) Ei hiˈoraa, e hinaaro oia ia porohia te parau apî oaoa ati aˈe te fenua. (Mat. 24:14) O Iesu ta ˈna i maiti no te aratai i teie ohipa e ua haa Iesu ia haapaohia te reira ma te naho. I te senekele matamua, ua faatoroahia te mau matahiapo ei aratai i roto i te mau amuiraa haamauhia i tera e tera vahi. (Ohi. 14:23) I Ierusalema, te vai ra te hoê tino matahiapo, oia hoi te mau aposetolo e te tahi mau taeae paari. E rave ratou i te tahi mau faaotiraa a faahaere atu ai i te mau amuiraa atoa. (Ohi. 15:2; 16:4) Inaha, ua pee iho â te mau taeae e tuahine i te aratairaa horoahia ˈtu, “mau papu noa ˈtura ïa te mau amuiraa i roto i te faaroo e rahi noa maira te mau mero o te mau amuiraa.”—Ohi. 16:5.
2. Mai 1919 mai â, mea nafea Iehova i te horoaraa i te aratairaa e te maa pae varua?
2 Ua tamau Iehova i te faanaho i to ˈna nunaa tae roa mai i teie mahana. Mai 1919 mai â, ua faaohipa Iesu i te hoê pǔpǔ taeae faatavaihia no te faanaho i te ohipa pororaa e no te horoa i te maa pae varua na ta ˈna mau pǐpǐ. a (Luka 12:42) Eita e ore te haamaitai ra Iehova i te ohipa a taua pǔpǔ taeae ra.—Isa. 60:22; 65:13, 14.
3-4. (1) A faataa na eaha te mau maitai ia faanahohia te ohipa. (2) Eaha ta tatou e hiˈopoa i roto i teie tumu parau?
3 Ahani e ere tatou i te mea naho maitai, eita ïa tatou e nehenehe e haapao i te ohipa ta Iesu i faaue mai. (Mat. 28:19, 20) A feruri na mai te peu aita e tuhaa fenua taa maitai no te pororaa, na te taata poro tataitahi e maiti ihea oia e hinaaro ai e poro. Pinepine paha te tahi mau vahi i te porohia area te tahi atu, mea varavara ïa. Eaha ˈtu â te mau maitai ia faanahohia te ohipa?
4 Ua horoa mai Iesu i te hiˈoraa e nafea tatou ia vai naho noa i teie mahana. I roto i teie tumu parau, e hiˈopoa tatou i te hiˈoraa o Iesu e e nafea ta tatou faanahonahoraa e pee ai ia ˈna. E ite atoa tatou e nafea ia faaite i to tatou mauruuru no ta Iehova faanahonahoraa.
TE PEE NEI TA TATOU FAANAHONAHORAA IA IESU
5. Eaha te hoê ravea e pee ai ta tatou faanahonahoraa ia Iesu? (Ioane 8:28)
5 Ua haapii mai Iesu i to ˈna Metua i te raˈi eaha te rave e eaha te parau. Te pee nei te faanahonahoraa a Iehova i te hiˈoraa o Iesu ma te niu i ta ratou mau haapiiraa e aratairaa i nia i te Parau a te Atua. (A taio i te Ioane 8:28; Tim. 2, 3:16, 17) Pinepine tatou i te haamanaˈohia ia taio e ia faaohipa i te Parau a te Atua. E nafea tatou e faufaahia ˈi?
6. E nafea tatou e faufaahia ˈi i te haapiiraa i te Bibilia?
6 E faufaahia tatou a haapii ai i te Bibilia maoti ta tatou mau papai. Ei hiˈoraa, e nehenehe tatou e faaau i te mau haapiiraa Bibilia e te aratairaa no ǒ mai i te faanahonahoraa. Ia ite tatou te tuati maitai ra ta ratou aratairaa i ta te Bibilia e parau ra, e rahi atu â to tatou tiaturi i ta Iehova faanahonahoraa.—Roma 12:2.
7. Eaha te poroi ta Iesu i poro, e e nafea te faanahonahoraa a Iehova e pee ai ia ˈna?
7 Ua poro Iesu i “te parau apî oaoa o te Faatereraa arii a te Atua.” (Luka 4:43, 44) Ua faaue atoa o ˈna i ta ˈna mau pǐpǐ ia poro i te Faatereraa arii a te Atua. (Luka 9:1, 2; 10:8, 9) I teie atoa mahana, pauroa te feia o ta Iehova faanahonahoraa te poro i te Faatereraa arii noa ˈtu ehia hopoia ta ratou e te vahi e ora ˈi ratou.
8. Eaha te haamaitairaa tei horoahia mai?
8 E haamaitairaa rahi ia poro i te Faatereraa arii a te Atua. E ere pauroa te taata te fanaˈo i te reira. Ei hiˈoraa, a ora ˈi i te fenua, aita Iesu i vaiiho i te mau demoni ia faaite o vai o ˈna. (Luka 4:41) I teie mahana, hou te hoê taata e nehenehe ai e poro, e titauraa ta ˈna e haapao. E faaite tatou i te mauruuru no teie haamaitairaa ma te poro i te mau vahi e i te mau taime atoa. Mai ia Iesu, e rohi tatou i te poro e i te haapii i te taata i te parau mau.—Mat. 13:3, 23; Kor. 1, 3:6.
9. E nafea te faanahonahoraa e faaite ai i to te Atua iˈoa?
9 Ua faaite Iesu i to te Atua iˈoa. I roto i ta ˈna pure i to ˈna Metua i te raˈi ua parau oia: “Ua faaite au i to iˈoa.” (Ioa. 17:26) Mai ia Iesu, ua rohi te faanahonahoraa a Iehova no te tauturu i te taata ia ite o vai te iˈoa o te Atua. I roto i Te Bibilia, Huriraa o te ao apî, ua faahoˈihia te iˈoa o te Atua i to ˈna vairaa mau. Ua hurihia te taatoaraa o te Bibilia aore ra te tahi noa mau buka na roto hau atu 270 reo. I te tuhaa hau A4 e A5 o teie huriraa, e ite ïa outou i te tahi mau haapapuraa no nia i te faahoˈiraahia te iˈoa o te Atua i to ˈna vairaa mau i roto i te Bibilia. E horoa atoa te tuhaa hau A5 i te tahi atu â haapapuraa e ua faahitihia te iˈoa o te Atua e 237 taime i roto i te mau Papai Heleni Kerisetiano.
10. Eaha te haapii mai i ta Myanmar i parau?
10 Mai ia Iesu, e hinaaro tatou e tauturu e rave rahi atu â taata ia ite o vai te iˈoa o te Atua. I to ˈna iteraa o vai te iˈoa o te Atua, ua putapû roa Myanmar, hoê vahine e 67 matahiti to ˈna. Ua taˈi roa oia e ua parau: “A tahi ra vau a faaroo ai o Iehova te iˈoa o te Atua. . . . Tera te mea faufaa roa ˈˈe ta ˈu i haapii mai.” Mai ta teie aamu e faaite ra, e nehenehe iho â te oraraa o te hoê taata e taui roa a ite ai o vai te iˈoa o te Atua.
A FAAITE NOA I TE MAURUURU NO TA IEHOVA FAANAHONAHORAA
11. E nafea te mau matahiapo e faaite ai i to ratou mauruuru no ta Iehova faanahonahoraa? (A hiˈo atoa i te hohoˈa.)
11 E nafea te mau matahiapo e faaite ai i to ratou mauruuru no ta Iehova faanahonahoraa? Ia fanaˈo ratou i te aratairaa, e titauhia ia taio e ia tutava ratou i te faaohipa i te reira. Ei hiˈoraa, e faaitehia ia ratou e nafea ia faatere i te tahi mau tuhaa o te putuputuraa aore ra e nafea ia pure no te amuiraa. E haapiihia atoa ratou e nafea ia aupuru i te mau mamoe a te Mesia. Ia pee te mau matahiapo i taua mau aratairaa ra, e ite maitai ïa te mau taeae e tuahine i to Iehova here e aupuru ia ratou.
E tauturu mai te mau matahiapo ia mauruuru tatou i te mau aratairaa no ǒ mai i ta Iehova faanahonahoraa (A hiˈo i te paratarafa 11) b
12. (1) No te aha e titauhia ˈi ia tatou ia faaroo e ia auraro i te mau taeae faatoroahia? (Hebera 13:7, 17) (2) No te aha mea faufaa ia tiatonu tatou i to ratou mau huru maitatai?
12 Ia horoahia mai te aratairaa na te mau matahiapo, e titauhia ia tatou ia pee noa. Ma te na reira, te tauturu nei tatou ia ratou ia amo i ta ratou hopoia ma te oaoa. Te faaitoito mai ra te Bibilia ia faaroo e ia auraro i te mau taeae faatoroahia. (A taio i te Hebera 13:7, 17.) E ere râ i te mea ohie i te tahi taime no te mea e taata hara atoa ratou. Tera râ, ia haapao noa tatou i to ratou mau paruparu eiaha râ i to ratou mau huru maitatai, te turu ra ïa tatou i to tatou mau enemi o te hinaaro ra ia iti roa mai to tatou tiaturi i ta Iehova faanahonahoraa. Eaha ïa te rave no te ite e no te patoi i ta ratou mau haavare?
EIAHA E VAIIHO IA VETAHI Ê IA FAAITI MAI I TO OE MAURUURU
13. E nafea to te Atua mau enemi e tamata ˈi i te faaino i ta ˈna faanahonahoraa?
13 E imi te feia patoi i te faaino i te faanahonahoraa. Ei hiˈoraa, ua haapii mai tatou maoti te Bibilia e te titau ra Iehova i te feia e haamori ra ia ˈna ia vai viivii ore i te pae tino, i te pae varua e to tatou haerea. Ua faaite oia e tiavaruhia te taata o te tamau i te rave i te hara e o te ore e tatarahapa. (Kor. 1, 5:11-13; 6:9, 10) Ia auraro tatou i teie faaueraa Bibilia e parau ïa to tatou mau enemi e mea etaeta roa tatou e te aroha ore.
14. O vai to muri mai i te mau parau haavare no nia i te faanahonahoraa a Iehova?
14 Ia taa ia outou o vai to muri mai. O te Diabolo ra o Satani to muri mai i te mau parau haavare no nia i te faanahonahoraa. O ˈna hoi “te metua no te haavare.” (Ioa. 8:44; Gen. 3:1-5) Eita ïa tatou e maere ia faaohipa oia i to tatou mau enemi ia haaparare i te mau parau hape no nia i ta Iehova faanahonahoraa. Tera hoi tei tupu i te senekele matamua.
15. Eaha ta te mau tia haapaoraa i rave i nia ia Iesu e i ta ˈna mau pǐpǐ?
15 Noa ˈtu e taata tia roa Iesu e ua faatupu oia i te semeio, ua faaohipa Satani i to te Atua mau enemi no te haaparare i te parau hape no nia ia Iesu. Ei hiˈoraa, ua parau te mau tia haapaoraa i tera ra tau e te tiavaru nei Iesu i te mau demoni “i te mana o te raatira o te mau demoni.” (Mar. 3:22) A haavahia ˈi Iesu, ua pari te mau tia haapaoraa e ua faaino o ˈna i te Atua e ua turai ratou i te nahoa ia ani ia haapohehia oia. (Mat. 27:20) I muri aˈe, a poro ai ta ˈna mau pǐpǐ i te parau apî oaoa, ua “faahuehue” te feia patoi i tera rahiraa taata no te hamani ino i te mau Kerisetiano. (Ohi. 14:2, 19) No nia i te Ohipa 14:2 te faataa ra Te Pare Tiairaa o te 1 no Titema 1998: “Aita ratou i mauruuru i te patoi-noa-raa i te poroi, ua opua roa atoa te mau ati Iuda orure hau i te hoê ohipa faainoraa, na roto i te tamataraa i te turai i te mau Etene ia faaino i te mau Kerisetiano.”
16. Eaha te titauhia ia haamanaˈo ia faaroo tatou i te mau parau haavare?
16 Aita Satani i faaea i te haavare mai te senekele matamua tae roa mai i teie mahana. Inaha, ‘te haavare noa nei oia i to te ao atoa nei.’ (Apo. 12:9) Ia faaroo noa ˈtu outou i te mau parau tano ore no nia i te faanahonahoraa aore ra te mau taeae tei faatoroahia, a haamanaˈo i ta te mau enemi o te Atua i rave i nia ia Iesu e te mau pǐpǐ i te senekele matamua. I teie mahana, te hamani-ino-hia ra ta Iehova mau tavini e te faainohia ra mai ta te Bibilia iho â i tohu. (Mat. 5:11, 12) Eita tatou e vare i te mau parau haavare ia taa ia tatou o vai to muri mai e ia paruru oioi tatou ia tatou. E nafea ia paruru ia tatou?
17. E nafea ia paruru ia tatou i te mau parau haavare? (Timoteo 2, 1:13) (A hiˈo atoa i te tumu parau tarenihia “ Eaha te rave ia faaroo tatou i te mau parau haavare?”)
17 A patoi i te mau parau haavare. Ua horoa te aposetolo Paulo i te aratairaa taa maitai eaha te rave ia faaroo tatou i te mau parau haavare. Ua parau oia ia Timoteo ia faaue i te tahi pae eiaha e tâuˈa e eiaha e faaroo i te mau aai faatura ore i te Atua. (Tim. 1, 1:3, 4; 4:7) E ere te hoê taata paari mai te hoê tamarii rii o te tuu i roto i to ˈna vaha i te tahi mea repo ta ˈna i rave mai i raro. Ua taa ia ˈna e maˈihia o ˈna ia na reira oia. E patoi tatou i te mau aai, aore ra parau haavare, no te mea ua ite tatou o vai to muri mai. O “te mau parau maitatai” o te parau mau ta tatou e tapea noa.—A taio i te Timoteo 2, 1:13.
18. E nafea ia faaite i to tatou mauruuru no ta Iehova faanahonahoraa?
18 E toru noa ravea ta tatou i hiˈo mai e pee ai ta te Atua faanahonahoraa ia Iesu. A haapii ai i te Bibilia, a tapao i te tahi atu â mau ravea e na reira ˈi te faanahonahoraa. A tauturu ia vetahi ê o ta outou amuiraa ia mauruuru atu â i te faanahonahoraa. E a faaite noa i to outou mauruuru ma te tavini ia Iehova ma te taiva ore e ma te pee maite i te faanahonahoraa ta ˈna e faaohipa ra no te faatupu i to ˈna hinaaro. (Sal. 37:28) E haafaufaa noa anaˈe ïa i ta tatou haamaitairaa ei mero no to Iehova nunaa î i te here e te taiva ore.
E NAFEA OUTOU IA PAHONO?
-
E nafea te mau tavini a te Atua e pee ai ia Iesu?
-
E nafea ia faaite noa i to tatou mauruuru no ta Iehova faanahonahoraa?
-
Eaha te rave ia faaroo noa ˈtu tatou i te mau parau haavare?
HIMENE 103 Te mau tiai no ǒ mai ia Iehova
a A hiˈo i te tumu parau tarenihia “No te aha 1919?” i roto i te buka “Le culte pur de Jéhovah enfin rétabli!” api 102-103.
b FAATAARAA O TE HOHOˈA: I muri aˈe i to te mau matahiapo aparauraa no nia i te pororaa i te vahi taata, ua horoa te mau taeae i te aratairaa i te feia poro ia tapiri atu i te patu a poro ai ratou e te vairaa papai afaifai.
