1. Eaha te paradaiso pae varua, e eaha ta tatou e faaoti papu i te rave?

 E PARADAISO to te fenua i teie mahana tei î i te taata o te rave nei i te mau ohipa maitatai. E mirioni taata tei vai hau noa ra i roto e ua faaoti papu ratou i te ore e faarue i taua vahi ra. Te hinaaro nei ratou ia haere atoa mai te taata i roto. Eaha teie vahi? O te paradaiso pae varua! a

2. Eaha ta tatou e faahiahia ra no nia i te paradaiso pae varua?

² Maoti Iehova, e nehenehe ta ˈna mau tavini e vai hau noa ei hoê nunaa noa ˈtu te ora nei ratou i roto i te ao ino e te atâta a Satani. (Ioa. 1, 5:19; Apo. 12:12) Te ite ra Iehova e te mauiui ra te taata i roto i teie ao. Ua haapao râ oia ia vai hau noa ta ˈna mau tavini, a haamori atu ai ia ˈna ma te oaoa. Te faahohoˈa ra ta ˈna Parau i te paradaiso pae varua i te hoê “haapuraa” e “te tahi ô faarari-maitai-hia.” (Isa. 4:6; 58:11) Maoti ta Iehova haamaitairaa, e oaoa noa te feia e ora ra i roto i taua paradaiso ra i te roaraa o te mau mahana hopea fifi mau.—Isa. 54:14; Tim. 2, 3:1.

3. Mea nafea te Isaia pene 65 i te tupuraa i tahito ra?

³ Na roto i te peropheta Isaia, ua faataa Iehova mai te aha te huru oraraa o te feia i roto i te paradaiso pae varua.  E ite outou i teie faataaraa i te Isaia pene 65. Ua tupu ê na teie parau tohu i 537 hou te tau o Iesu. I tera ra tau, ua tuuhia te ati Iuda tei hopoi-ê-hia i Babulonia e ua hoˈi i to ratou fenua. Ua haamaitai e ua tauturu Iehova i to ˈna nunaa ia patu faahou ia Ierusalema e te hiero, a faariro faahou ai i te reira ei vahi haamoriraa ia ˈna.—Isa. 51:11; Zek. 8:3.

4. E nafea te Isaia pene 65 e tupu ai i teie mahana?

⁴ Ua tupu faahou te parau tohu a Isaia i 1919 a haere mai ai te mau tavini a Iehova i rapae mai ia Babulonia rahi. Aano atura te paradaiso pae varua ati aˈe te ao nei. Ua haamau te feia poro itoito i te Faatereraa arii e rave rahi amuiraa e ua faatupu atoa i te mau huru maitatai. Ua ahu mai te tane e vahine mea ino e tei rave i te peu tia ore na mua ˈˈe, “i te huru taata apî tei poietehia ia au i te hinaaro o te Atua.” (Eph. 4:24) Parau mau, e rave rahi haamaitairaa ta Isaia i faahiti te tupu i roto i te ao apî. E fanaˈo râ tatou i te tahi mau haamaitairaa i teie mahana. E hiˈo anaˈe ïa eaha te faufaaraa o te paradaiso pae varua e no te aha eiaha roa ˈtu e faarue i te reira.

TE HURU O TE FEIA I ROTO I TE PARADAISO PAE VARUA

5. Ia au i te Isaia 65:13, eaha ta tatou e fanaˈo nei i roto i te paradaiso pae varua?

⁵ Mea oraora maitai e te itoito. Te faahiti ra te parau tohu a Isaia i te taa-ê-raa e vai ra i rotopu i te huru o te feia e ora ra i roto i te paradaiso pae varua e te feia i rapaeau. (A taio i te Isaia 65:13.) E haamâha noa Iehova i te mau hiaai pae varua o te feia e haamori ra ia ˈna. E horoa mai oia i to ˈna varua moˈa, ta ˈna Parau e te maa pae varua eita e pau, ia ‘tamaa, ia inu e ia oaoa’ noa tatou. (A hiˈo atoa i te Apokalupo 22:17.) Area te feia i rapaeau i te paradaiso pae varua, te faaruru ra ïa i ‘te poia, te poihâ e te haama.’ Aita hoi ratou e fanaˈo ra i te auhoaraa piri e o Iehova.—Am. 8:11.

6. E nafea te Ioela 2:21-24 e faataa ˈi i te maa pae varua ta Iehova e ho mai, e e nafea tatou e faufaahia ˈi?

⁶ I roto i ta ˈna parau tohu, ua faahiti Ioela i te maa tumu no te oraraa mai te huero maa, te uaina e te hinu olive no te faaite i to Iehova aau horoa noa. E haamâha o ˈna i te mau hiaai o to ˈna nunaa, oia atoa i te pae varua. (Ioe. 2:21-24) Ei hiˈoraa, e horoa oia i te Bibilia, ta tatou mau papai, te jw.org, oia atoa te mau putuputuraa, tairururaa haaati e e toru mahana. Te fanaˈo ra tatou i teie mau maitai i te pae varua i te mau mahana atoa, no reira mea oraora maitai tatou e te itoito.

7. No te aha tatou e oaoa ˈi? (Isaia 65:14)

⁷ Mea oaoa e te mauruuru. E “umere” to te Atua nunaa no to ratou mauruuru rahi ia Iehova. (A taio i te Isaia 65:14.) Maoti te pue parau mau faaitoito, te mau parau fafau Bibilia tamahanahana e to tatou tiaturiraa papu niuhia i nia i te tusia o te Mesia, e oaoa to tatou aau. E rahi atu â te oaoa ia tauaparau tatou e to tatou mau taeae e tuahine no nia i te reira.—Sal. 34:8; 133:1-3.

8. Eaha te mea matamua e itehia i roto i te paradaiso pae varua?

⁸ O te here e te auhoêraa i rotopu i to Iehova nunaa te mea matamua e itehia i roto i te paradaiso pae varua. E faaite  mai teie ‘taamu tia roa e tahoê ai te taata’ mai te aha te oraraa i roto i te ao apî, i reira te mau tavini a Iehova e oaoa e e tahoê atu â ˈi. (Kol. 3:14) Teie ta te hoê tuahine i parau i te taime matamua a farerei ai oia i te mau Ite no Iehova: “Aita vau i ite eaha te oaoa, i roto atoa i to ˈu utuafare. I ǒ te mau Ite no Iehova râ to ˈu iteraa i te here mau.” I roto i to tatou paradaiso pae varua e fanaˈo ai te taata i te oaoa e te mauruuru. Noa ˈtu eaha te manaˈo o teie nei ao i te mau tavini a Iehova, e roo maitai to ratou i rotopu i te fetii taeae.—Isa. 65:15.

9. Eaha ta te Isaia 65:16, 17 e fafau ra no nia i te mau mauiui?

⁹ Mea hau e te aueue ore. Te parau ra te Isaia 65:14 no te feia e maiti ra i te faaea noa i rapaeau i te paradaiso pae varua: “E taˈi râ outou no te mauiui aau e e auê outou no te aau hepohepo.” E no te mau mauiui ta te mau tavini a Iehova i faaruru? “E moˈe hoi i te taata te ahoaho no mutaa iho. E hunahia te reira i to [te Atua] mata.” (A taio i te Isaia 65:16, 17.) E faaore Iehova i to tatou mau fifi, eita ïa tatou e haamanaˈo faahou i tei haamauiui ia tatou.

10. No te aha e haamaitairaa ia vai i roto i ta Iehova faanahonahoraa? (A hiˈo atoa i te hohoˈa.)

¹⁰ I teie atoa mahana, ei hau noa tatou a haere ai i te putuputuraa, i reira tatou e ore ai e tiatonu i to tatou mau ahoaho. E haapao atoa tatou ia vai noa te hau i roto i taua paradaiso ra ma te faaite i te here, te oaoa, te hau e te mǎrû ta te varua moˈa o te Atua e faatupu. (Gal. 5:22, 23) Auê ïa haamaitairaa ia vai i roto i ta te Atua faanahonahoraa! E ite mata te feia e faaea noa i roto i te paradaiso pae varua i te tupuraa o ta te Atua parau fafau o “te raˈi apî e te fenua apî.”

11. Ia au i te Isaia 65:18, 19, eaha to tatou huru a vai ai i roto i te paradaiso ta Iehova i faanaho?

¹¹ Te aau mehara e te popou. Te faataa ra Isaia no te aha tatou e ‘popou e e oaoa ˈi’ i roto i te paradaiso pae varua. E faanahoraa teie no ǒ mai ia Iehova ra. (A taio i te Isaia 65:18, 19.) No reira, eita tatou e maere ia faaohipa Iehova ia tatou no te tauturu i te taata ia faataa ê mai ia ratou i te mau faanahonahoraa mǎrô a teie ao e ia haere mai i roto i te paradaiso pae varua ruperupe. Auê tatou i te faahiahia i te fanaˈo i te mau haamaitairaa ia ite i te parau mau, e te hinaaro  ra tatou ia fanaˈo atoa vetahi ê i te reira.—Ier. 31:12.

12. Eaha to outou manaˈo a taio ai i te Isaia 65:20-24, e no te aha?

¹² E mauruuru atoa tatou e ora ra i roto i te paradaiso pae varua no to tatou tiaturiraa. A feruri na i ta outou e ite e e rave i roto i te ao apî! Te fafau ra te Bibilia: “Aita faahou e aiû . . . e ora tau mahana noa, aita atoa e ruhiruhia e pohe na mua ˈˈe e tia roa ˈi to ˈna mau mahana.” E hamani tatou i te fare e e ora tatou i roto. E tanu tatou i te vine e e amu tatou i te hotu. “Eita [ta]tou e rohi faufaa ore noa” no te mea e haamaitai Iehova ia tatou. Ua fafau mai oia i te horoa mai i te oraraa papu e te oaoa. “Na mua ˈˈe atoa ratou e pii mai ai,” ua ite ê na oia eaha ta te taata tataitahi e hinaaro mau a “haamâha ˈtu ai i te hinaaro o te mau mea ora atoa.”—Isa. 65:20-24; Sal. 145:16.

13. E nafea te Isaia 65:25 e faataa ˈi i te mau tauiraa ta te mau tavini a Iehova i rave?

¹³ Mea mǎtaˈu ore e te paruruhia. Maoti te varua o te Atua, mea rahi tei taui roa i to ratou huru. (A taio i te Isaia 65:25.) Ua haavî ratou i to ratou mau hinaaro tia ore. (Roma 12:2; Eph. 4:22-24) Parau mau, mea tia ore noa â te mau tavini a te Atua, e hape iho â ïa ratou. Ua tahoê râ Iehova “i te mau huru taata atoa” o te here nei ia ˈna e te tahi i te tahi a vai hau noa ˈtu ai ratou. (Tito 2:11) E semeio teie ta te Atua Manahope anaˈe e nehenehe e faatupu!

14. Mea nafea te Isaia 65:25 i te tupuraa i nia i te hoê taeae?

¹⁴ E nehenehe anei râ hoê taata e taui roa? Teie te hiˈoraa o te hoê taata apî tei tapeahia e rave rahi taime i te 20raa o to ˈna matahiti. I matau na oia i te rave i te peu taotoraa tia ore e te ohipa ino. Ua tapeahia o ˈna no te ohipa eiâ e te ohipa tano ore. Te taata na mua mai e taparahi oia. I to ˈna râ iteraa i te parau mau e haereraa i te mau putuputuraa a te mau Ite no Iehova, ua papu ia ˈna e ua itehia mai ia ˈna te hoê mea faufaa roa, te paradaiso pae varua. I muri aˈe i to ˈna bapetizoraa, pinepine oia i te manaˈo e tano maitai te Isaia 65:25 no ˈna. Ua taui roa o ˈna, na mua ˈˈe e taata ino e teie nei, e faatupu i te hau.

15. No te aha tatou e hinaaro ai e tauturu i te taata ia haere mai i roto i te paradaiso pae varua, e e nafea tatou?

¹⁵ Te na ô ra te omuaraa o te Isaia 65:​13: “Teie ta te Arii hau ê e Fatu ra o Iehova e parau ra.” Te na ô ra te hopea o te irava 25: “Te parau ra Iehova.” Ua tupu noa ta te Atua mau parau. (Isa. 55:​10, 11) Te vai ra iho â te paradaiso pae varua i teie mahana e ua faanaho Iehova i te hoê fetii taeae taa ê mau. I rotopu ia ratou, e fanaˈo tatou i te hau e te parururaa noa ˈtu te ino o teie nei ao. (Sal. 72:7) No reira tatou e tauturu ai i te taata ia riro ei mero no to Iehova utuafare pae varua. E na reira tatou maoti te ohipa e faariro i te taata ei pǐpǐ.—Mat. 28:19, 20.

A TAUTURU IA VETAHI Ê IA HAERE MAI I ROTO I TE PARADAISO PAE VARUA

16. E nafea te taata e haere mai ai i roto i te paradaiso pae varua?

¹⁶ E hopoia ta tatou tataitahi ia hinaaro te taata e haere mai i roto i te paradaiso pae varua. E pee ïa tatou i te  hiˈoraa o Iehova. Eita hoi o ˈna e faahepo i te taata. E “faafatata” mai râ oia ia ratou ma te mǎrû. (Ioa. 6:44; Ier. 31:3) Te feia aau maitai tei haapii i to Iehova mau huru maitatai, e faafatata iho â ïa ia ˈna. Na roto atoa i to tatou mau huru maitatai e to tatou haerea maitai e hinaaro ai te taata e haere mai i roto i te paradaiso pae varua.

17. Ia aha tatou ia hinaaro te taata e haere mai i roto i te paradaiso pae varua?

¹⁷ Hoê ravea e tauturu ai tatou ia vetahi ê, o te hereraa ïa e te hamani-maitai-raa i to tatou mau taeae e tuahine. Ia haere mai te taata i te putuputuraa, e hinaaro tatou ia tu to ratou manaˈo e te feia tei haere na i te putuputuraa i te amuiraa no Korinetia. Ua parau taua feia ra: “Tei rotopu mau te Atua ia outou.” (Kor. 1, 14:24, 25; Zek. 8:23) Mea faufaa râ ia pee noa tatou i te aˈoraa: “Ia vai noa te hau i rotopu ia outou.”—Tes. 1, 5:13.

18. Na te aha e turai i te taata ia apiti mai ia tatou?

¹⁸ E tutava anaˈe i te hiˈo i te mau taeae e tuahine mai ia Iehova ma te tiatonu i to ratou mau huru maitatai, eiaha râ i to ratou mau paruparu. Tae anaˈe hoê mahana, e ore roa to ratou mau paruparu. E faaafaro tatou i te fifi ma te here ma te hamani maitai te tahi i te tahi, “ma te aumihi î i te here, i te faaoreraa ˈtu i te hapa.” (Eph. 4:32) I reira te taata e hinaaro e fanaˈo i teie mau maitai e haere mai ai i roto i te paradaiso pae varua. b

 A FAAEA NOA I ROTO I TE PARADAISO PAE VARUA

19. (1) Ia au i te tumu parau tarenihia “ Ua faarue e ua hoˈi mai ratou,” eaha ta vetahi i parau i to ratou hoˈiraa mai i roto i te paradaiso pae varua? (2) Ia faaoti papu tatou i te aha? (A hiˈo atoa i te hohoˈa.)

¹⁹ Mea fanaˈo iho â tatou i roto i ta Iehova faanahonahoraa! Te unauna noa ˈtu ra te reira, e te rahi noa ˈtura te feia haamori ia Iehova i roto. Ia mauruuru noa tatou i teie faanahoraa taa ê no ǒ mai ia Iehova. Te taata e hinaaro e fanaˈo i te itoito, te oaoa, te hau e te paruru, e titauhia ia haere mai i roto i te paradaiso pae varua e ia ore e faarue i te reira. A haapao maitai râ, te tamata ra Satani i te faaere ia tatou i teie haamaitairaa. (Pet. 1, 5:8; Apo. 12:9) Eiaha roa ˈtu e vaiiho ia ˈna ia upootia! E paruru anaˈe i te ruperupe, te moˈaraa e te hau o te paradaiso pae varua.