Noa ˈtu râ, te ani ra Iehova ia tiai tatou ma te faaoromai ia haa oia i te taime ta ˈna i faataa. No te aha? E nafea tatou e oaoa ˈi a tiai noa ˈi?

NO TE AHA IEHOVA E ANI AI IA TATOU IA TIAI NOA?

Te na ô ra te Bibilia: “Te tiai nei Iehova ma te faaoromai no te hamani maitai ia outou, e e tia oia i nia no te aroha hamani maitai ia outou. E Atua parau-tia hoi Iehova. E oaoa te feia atoa e tiai noa ra ia ˈna.” (Isa. 30:18) Ua papai Isaia i teie mau parau no te ati Iuda haapaari. (Isa. 30:1) Mea taiva ore râ vetahi ati Iuda. Ua faaitoito ïa teie mau parau ia ratou. E faaitoitoraa atoa te reira no te mau tavini taiva ore a Iehova i teie mahana.

E titauhia ïa ia tiai tatou ma te faaoromai no te mea te na reira ra Iehova. Ua faataa o ˈna i te taime e haamou ai oia i teie nei ao e te tiai ra o ˈna ia tae mai taua mahana ra e taua hora ra. (Mat. 24:36) I tera taime, e ite te taata e haavare te mau pariraa a te Diabolo no nia ia Iehova e ta ˈna mau tavini. I reira Iehova e haamou roa ˈi ia Satani e te feia atoa e turu ra ia ˈna. E “aroha hamani maitai” râ o ˈna ia tatou.

Parau mau, eita Iehova e tinai i to tatou mau fifi, ua fafau râ oia e nehenehe tatou e oaoa a tiai noa ˈi. Mai ta Isaia i parau, e oaoa tatou a tiai ru ai i te tahi ohipa maitai. (Isa. 30:18) a E hiˈo anaˈe e maha ravea no te oaoa a tiai noa ˈi.

E NAFEA IA OAOA A TIAI NOA ˈI?

A tiatonu i te mau mea maitai. Mea rahi te ohipa ino ta Davida i ite i te roaraa o to ˈna oraraa. (Sal. 37:35) Ua papai râ o ˈna: “A mamû i mua ia Iehova e a tiai maite ia ˈna. Eiaha e inoino i te taata o te manuïa ra i te faatupu i ta ˈna mau opuaraa iino.” (Sal. 37:7) Ua faaohipa Davida i teie parau ma te tiatonu i to ˈna tiaturiraa e faaora Iehova ia ˈna. Ua mauruuru atoa o ˈna no te mau maitai no ǒ mai ia Iehova ra. (Sal. 40:5) Ia  tiatonu atoa tatou i te mau maitai ta tatou e fanaˈo ra, eiaha râ i te mau fifi, mea ohie aˈe ïa ia tiai ia Iehova.

A tamau i te arue ia Iehova. Ua parau tei papai i te Salamo 71, o Davida paha, ia Iehova: “E tamau ïa vau i te tiai. E faarahi atu â vau i ta ˈu arueraa ia oe.” (Sal. 71:14) Mea nafea oia i te arueraa ia Iehova? Ua paraparau Davida ia vetahi ê no nia ia Iehova e ua arue ia ˈna na roto i te himene. (Sal. 71: 16, 23) Mai ia Davida, e oaoa tatou i te tiai ia Iehova. E arue tatou ia ˈna i roto i te pororaa, ta tatou mau aparauraa e na roto i te himene arueraa. Ia himene oe, a feruri i te poroi faaitoito e vai ra i roto.

A amuimui i te mau taeae e tuahine o te faaitoito ia oe. A faaruru ai i te fifi, ua na ô Davida ia Iehova: “I mua i to nunaa taiva ore, e tiaturi au i to iˈoa.” (Sal. 52:9) E itoito-atoa-hia tatou maoti to tatou mau taeae e tuahine taiva ore, eiaha noa i te mau putuputuraa e i te pororaa, i te tahi atoa râ mau taime.—Roma 1:11, 12.

A haapuai i to oe tiaturiraa. Te na ô ra te Salamo 62:5: “Te tiai ra hoi au i te Atua ma te maniania ore. No ǒ mai hoi ia ˈna ra to ˈu tiaturiraa.” Mea faufaa ia papu to tatou tiaturiraa mai te peu iho â râ aita te hopea i tae oioi mai, mai ta tatou i manaˈo na. No reira mea faufaa ia papu ia tatou e tupu te mau parau fafau a Iehova noa ˈtu ehia ˈtu â maororaa e tiai ai tatou i te reira. E puaihia to tatou tiaturiraa ia haapii tatou i te Parau a te Atua, te mau parau tohu, te tuatiraa i roto i ta te mau taata papai i faahiti, e te mau tuhaa rii ta Iehova i faaite no nia ia ˈna. (Sal. 1:2, 3) E titau-atoa-hia ia “pure ia au i te aratairaa a te varua moˈa,” ia vai piri noa tatou ia Iehova a tiai noa ˈi ia tupu ta ˈna parau fafau o te ora mure ore.—Iuda 20, 21.  

Mai ia Davida, ia papu ia outou e e aupuru Iehova i te feia o te tiaturi nei ia ˈna e e faaite o ˈna ia ratou i to ˈna here taiva ore. (Sal. 33:18, 22) A tamau ïa i te tiai ia Iehova ma te tiatonu i te mau mea maitai i roto i to outou oraraa, ma te arue ia ˈna, ma te amuimui i te mau taeae e tuahine e ma te haapuai i to outou tiaturiraa faufaa roa.