1. No te aha mea fifi ia taa i ta te hoê taata e hinaaro ra e parau ia faaore o ˈna i ta oe hapa?

 E TOPA te hau ia parau mai te hoê hoa e ua faaore o ˈna i ta oe hapa. Mai te peu iho â râ ua parau oe aore ra ua rave oe i te tahi ohipa tei haamauiui ia ˈna. Eaha râ te auraa ia faaore oia i ta oe hapa? Peneiaˈe e hoa noa â orua. Aore ra eita o ˈna e hinaaro e faahiti i tei tupu, e ere râ orua mea piri faahou mai na mua aˈe. No reira, i te tahi taime mea fifi rii ia taa eaha mau na te auraa ua faaorehia anaˈe ta tatou hapa.

 2. Mea nafea te mau Papai i te faataaraa i ta Iehova huru faaoreraa i te hara? (A hiˈo atoa i te nota.)

² Mea taa ê roa ta Iehova huru faaoreraa i te hara a te taata tia ore, i ta tatou huru faaoreraa i te hapa te tahi i te tahi. Aita hoê aˈe taata te nehenehe e faaore i te hara mai ia ˈna. Teie ta te papai Salamo i parau no Iehova: “Te faaore mau ra hoi oe i te hara, ia faaturahia oe.” a (Sal. 130:4) E “faaore mau” iho â Iehova i te hara. Na ˈna e faataa mai ra i te auraa mau o te reira. I roto i te tahi mau irava o te mau Papai Hebera, ua faaohipahia te hoê taˈo no te faataa e nafea Iehova e faaore ai i te hara. E tano noa teie taˈo no Iehova.

 3. No te aha mea taa ê roa ta Iehova huru faaoreraa i te hara i ta te taata? (Isaia 55:6, 7)

³ Ia faaore Iehova i te hara, mea tumâ roa. E nehenehe  â tatou e faahoa ia ˈna. Auê ïa haamaitairaa! E mauruuru roa tatou ia Iehova no te faaore-noa-raa i ta tatou mau hara ma te faaore roa ˈtu.​—A taio i te Isaia 55:6, 7.

 4. E nafea Iehova e faataa mai ai i te auraa e faaore mau i te hara?

⁴ E nafea e taa ˈi ia tatou, te taata tia ore, te auraa ia faaore mau Iehova i te hara? Maoti ïa te tahi mau faahohoˈaraa nehenehe mau. E hiˈopoa mai tatou vetahi o te reira. E faaite mai te reira e ia tatarahapa tatou, e faaore Iehova i ta tatou hara, a riro faahou ai tatou ei hoa piri no ˈna. A hiˈopoa ˈi i teie mau faahohoˈaraa, e rahi atu â to tatou here e mauruuru no to tatou Metua aroha hamani maitai, o te faaore noa i te hara.

E TATARA IEHOVA I TE HARA

 5. Eaha ta Iehova e rave ia faaore o ˈna i ta tatou mau hara?

⁵ Pinepine te Bibilia i te faaau i te hara i te hopoia teimaha. O ta te arii Davida ïa i parau no ta ˈna mau hara: “Te na nia ra hoi ta ˈu mau hapa i to ˈu upoo. Mai te hoê hopoia teimaha eita e haere ia ˈu ia amo.” (Sal. 38:4) E faaore râ Iehova i te hara a te feia tatarahapa. (Sal. 25:18; 32:5) Te auraa o te taˈo Hebera tei hurihia ei “faaore i te hara,” e “iriti” ïa aore ra e “amo” i te reira. Ia faaore Iehova i ta tatou mau hara, mai te huru ra e te tatara ra o ˈna i ta tatou hopoia teimaha, oia hoi te manaˈo faahapa, a hopoi ê roa ˈtu ai i te reira.

 6. E nafea Iehova e hopoi ê ai i ta tatou mau hara?

⁶ Te faataa ra te tahi atu faahohoˈaraa e nafea Iehova e hopoi ê roa ˈi i ta tatou mau hara. Te na ô ra te Salamo 103:12: “Mai te atea o te hitiraa mahana i te toparaa mahana, mai te reira atoa oia ia faaatea i ta tatou mau hara ia tatou nei.” Mea atea roa te pae hitia o te râ i te pae tooa o te râ. Te auraa, e faaatea ê roa Iehova i ta tatou mau hara ia tatou. Mea na ô Iehova ia faaore roa i ta tatou mau hara. Auê ïa parau mahanahana!

 7. Eaha ta Iehova e rave i ta tatou mau hara ia au i te Bibilia? (Mika 7:18, 19)

⁷ Ia hopoi ê roa Iehova i ta tatou mau hara, eita o ˈna e faahiti faahou i te reira. Ua papai te arii Hezekia no Iehova: “Ua faarue oe i ta ˈu mau hara atoa i muri mai i to oe tua.” Ia au i te nota, “ua faaore [aore ra ua tatara] oe i ta ˈu mau hara atoa mai mua i to aro.” (Isa. 38:9, 17) Te auraa, e faarue roa Iehova i te hara a te feia tatarahapa, a ore atu ai te reira e ite-faahou-hia. E nehenehe atoa e huri i teie irava mai teie: “Ua faaore oe i ta ˈu mau hara, mai te huru ra ïa aita vau i rave aˈenei i te hara.” Te haapapu ra te Bibilia i teie manaˈo na roto i te tahi atu faahohoˈaraa i roto i te Mika 7:18, 19. (A taio.) E taora Iehova i ta tatou mau hara i roto i te miti hohonu. I tahito ra, eita te hoê ohipa tei taorahia i roto i te moana e ite-faahou-hia mai.

 8. Eaha ta te Bibilia e haapii mai ra?

⁸ Te haapii mai ra te Bibilia e ia faaore Iehova i ta tatou mau hara, e hopoi ê roa oia i te reira a ore atu ai tatou e faahapa faahou ia tatou. Mai ta Davida i parau: “E oaoa te feia tei faaorehia ta ratou mau ohipa iino e tei tapoˈihia ta ratou mau hara, e oaoa te taata ta Iehova e ore e haamanaˈo faahou i ta ˈna hara.” (Roma 4:6-8) Tera te auraa e faaore mau Iehova i te hara.

 E HOROI IEHOVA I TE HARA

 9. Eaha ta te Bibilia e parau ra no nia i te faaore-roa-raa Iehova i te hara?

⁹ Te faaohipa ra Iehova i te tahi atu mau faahohoˈaraa e nafea oia e horoi ai i te hara a te feia tatarahapa maoti te hoo. Te parau ra te Bibilia e horoi e e pîpî oia i te pape i te mau hara no te tamâ i te taata tei rave i te hara. (Sal. 51:7; Isa. 4:4; Ier. 33:8) Te faataa ra Iehova i te faahopearaa: “Noa ˈtu mea uteute ta outou mau hara, e uouo roa ïa mai te hiona, noa ˈtu mea uteute mai te ahu uteute paˈo, e riro ïa mai te huruhuru mamoe ra te uouo.” (Isa. 1:18) Eita te hoê tafeta uteute aore ra te hoê uteute paˈo i nia i te ahu e mâ hanoa. Na roto râ i teie faahohoˈaraa, te haapapu mai ra Iehova e nehenehe ta tatou mau hara e horoi-roa-hia a ore atu ai e ite-faahou-hia.

10. Eaha ta te Bibilia e parau ra no nia i te faaore-rahi-raa Iehova i te hara?

¹⁰ I roto i to na mua ˈtu tumu parau, ua faaauhia te hara i te “tarahu.” (Mat. 6:12; Luka 11:4) No reira, i te mau taime atoa e hara ˈi tatou ia Iehova, e rahi noa ˈtu â ta tatou tarahu ia ˈna. Ia faaore râ oia i ta tatou mau hara, mai te huru ra ïa e faaore oia i ta tatou mau tarahu. Eita ïa o ˈna e titau mai ia faahoˈi i te tarahu ta ˈna i faaore. E topa roa ïa te hau ua faaorehia anaˈe ta tatou mau hara.

11. Eaha te auraa ia parau te Bibilia e “tumâhia” ta tatou mau hara? (Ohipa 3:19)

¹¹ Hau atu i te faaoreraa i ta tatou mau tarahu aore ra hara, e tumâ atoa oia i te reira. (A taio i te Ohipa 3:19.) A feruri na i te hoê taata e tâpû ra i ta tatou tarahu i nia i te tahi parau tarahu. E ite-noa-hia ˈtu te mau numera tei tâpûhia. Ia tumâhia râ, eita ïa te reira e ite-faahou-hia. I tahito ra, i faaohipa na te taata i te inita o te nehenehe e tumâhia i te tahi ahu rari, a ore atu ai tei papaihia e ite-faahou-hia. Oia atoa ia “tumâhia” ta tatou tarahu ia Iehova, ua faaore-roa-hia ïa te reira, mai te huru ra e aita tatou i tarahu aˈenei ia ˈna. E mauruuru roa tatou i te iteraa e ia faaore Iehova i ta tatou mau hara, e tumâ roa o ˈna i te reira.​—Sal. 51:9.

12. Eaha te haapii mai i te faahohoˈaraa o te ata meumeu?

¹² Te faaohipa ra Iehova i te tahi atu faahohoˈaraa no te faataa e nafea o ˈna e faaore ai i te hara. Te na ô ra oia: “E haamoˈe au i ta oe mau hapa mai i muri mai i te tahi ata e ta oe mau hara mai i muri mai i te tahi ata meumeu.” (Isa. 44:22) Ia faaore Iehova i ta tatou mau hara, mai te huru ra e huna oia i te reira i muri mai i te ata meumeu, a ore atu ai e itehia ˈtu.

13. Eaha ta tatou e rave inaha ua faaore Iehova i ta tatou mau hara?

¹³ Eaha ta tatou e haapii mai i teie mau faahohoˈaraa? Ia faaore Iehova i ta tatou mau hara, eiaha ïa tatou e faahapa noa ia tatou. Maoti te toto o Iesu Mesia, ua faaore-roa-hia ta tatou mau tarahu, mai te huru ra ïa aita tatou i tarahu aˈenei ia Iehova. Mea na reira Iehova e faaore mau ai i ta tatou mau hara ia tatarahapa tatou.

E FARII FAAHOU IEHOVA IA TATOU EI HOA PIRI NO ˈNA

14. Na te aha e haapapu ra e faaore roa Iehova i te hara? (A hiˈo atoa i te hohoˈa.)

¹⁴ Ia faaore Iehova i ta tatou mau hara, mea papu e hoa faahou o ˈna no tatou.  Eiaha ïa tatou e faahapahapa noa ia tatou. Eiaha atoa tatou e manaˈo e te riri noa ra Iehova ia tatou aore ra te imi ra o ˈna i te ravea no te faautua mai. Eita roa ˈtu o ˈna e na reira. Na te aha e haapapu mai ra? Ua parau Iehova i te peropheta Ieremia: “E faaore hoi au i ta ratou hape, e eita vau e haamanaˈo faahou i ta ratou hara.” (Ier. 31:34) Ua faahiti Paulo i teie mau parau a papai ai oia: “E ore roa vau e haamanaˈo faahou i ta ratou mau hara.” (Heb. 8:12) Eaha râ te auraa o teie parau?

15. Eaha te auraa eita Iehova e haamanaˈo faahou i ta tatou mau hara?

¹⁵ Te parau “haamanaˈo” i roto i te Bibilia, e ere noa ïa te manaˈoraa i te tahi ohipa tei tupu. Oia atoa râ te raveraa i te tahi mea. Teie ta te taata ohipa ino tei patitihia i nia i te pou i ani ia Iesu: “Iesu, haamanaˈo mai oe ia ˈu ia tae oe i roto i ta oe Faatereraa arii.” (Luka 23:42, 43) Aita o ˈna i ani noa ia Iesu ia haamanaˈo ia ˈna i taua taime ra. Te faaite ra ta Iesu pahonoraa e rave oia i te tahi ohipa no teie taata, oia hoi e faatia faahou mai Iesu ia ˈna. No reira, ia parau Iehova e eita o ˈna e haamanaˈo faahou i ta tatou mau hara, te auraa ïa eita oia e faautua ia tatou a muri aˈe.

16. E au tatou i te aha ia au i te Bibilia?

¹⁶ Te faaohipa ra te Bibilia i te tahi atu faahohoˈaraa no te faaite e faatiamâhia tatou ia faaore Iehova i ta tatou mau hara. No to tatou huru tia ore, e au tatou i te “tîtî” no te hara. Auaˈe râ Iehova i faaore i ta tatou mau hara, e au tatou i te tîtî tei “faatiamâhia” i te hara. (Roma 6:17, 18; Apo. 1:5) Auê ïa parau oaoa roa!

17. Eaha te tupu ia faaore Iehova i ta tatou mau hara? (Isaia 53:5)

¹⁷ A taio i te Isaia 53:5. No te mea e taata hara tatou, mai te huru ra e maˈi  pohe to tatou. Tera te faahohoˈaraa hopea ta tatou e hiˈopoa mai. Maoti te tusia o ta ˈna Tamaiti, ua ora to tatou maˈi ia Iehova ei auraa parau. (Pet. 1, 2:24) Na roto i te hoo e maitai mai ai tatou i te pae varua e e piri faahou ai tatou ia Iehova. E oaoa roa te hoê taata ua ora anaˈe to ˈna maˈi. E oaoa atoa tatou ia maitai mai tatou i te pae varua, a fanaˈo faahou ai i ta Iehova farii maitai. Tera te tupu ua faaore anaˈe Iehova i ta tatou mau hara.

EAHA TE AURAA NO TATOU IA FAAORE IEHOVA I TE HARA?

18. Eaha ta tatou i haapii mai i te mau faahohoˈaraa Bibilia no nia i te huru e faaore ai Iehova i te hara? (A hiˈo atoa i te tumu parau tarenihia “E nafea Iehova e faaore ai i te hara?”)

¹⁸ Eaha ta tatou i haapii mai i te mau faahohoˈaraa Bibilia no nia i te huru e faaore ai Iehova i te hara? E faaore roa oia i te reira, a ore atu ai e faautua mai a muri aˈe. E fanaˈo ïa tatou i te auhoaraa piri e to tatou Metua i te raˈi. E haamanaˈo râ tatou e ô te faaoreraa Iehova i ta tatou mau hara no to ˈna here e hamani maitai rahi ia tatou, e ere râ no te mea mea tano iho â ia fanaˈo tatou i te reira.​—Roma 3:24.

19. (1) Ia mauruuru tatou i te aha? (Roma 4:8) (2) Eaha ta to muri iho tumu parau e faaite mai?

¹⁹ A taio i te Roma 4:8. Mauruuru roa tatou ia Iehova, te Atua o te “faaore mau . . . i te hara.” (Sal. 130:4) E titauhia râ ia rave tatou i te tahi mea faufaa. Ua faataa Iesu: “Ia ore râ outou e faaore i ta te taata ra hapa, e ore atoa to outou Metua e faaore i ta outou.” (Mat. 6:14, 15) No reira, mea faufaa roa ia pee i te hiˈoraa o Iehova ma te faaore i ta vetahi ê hapa. E faaite mai to muri iho tumu parau e nafea ia na reira.