UA Û aˈena paha oe i te fifi aita hoê aˈe taata i tauturu mai. E “tau ino mau” hoi ta tatou e ora nei “e te fifi ia faaruru.” No reira tatou e toaruaru e e moˈemoˈe ai i te tahi taime. (Tim. 2, 3:1) Tera râ, te vai ra te tauturu ia û tatou i te fifi. Te parau ra te Bibilia e nehenehe te hoa mau e tauturu mai i “te taime ahoaho.”​—Mas. 17:17.

Ua fanaˈo te aposetolo Paulo i te tauturu a to ˈna mau hoa i roto i to ˈna mau tere mitionare. (Kol. 4:7-11) Ua rave ratou i te tahi mau mea no Paulo, to roto hoi o ˈna i te fare tapearaa i Roma. Ei hiˈoraa, na Epapherodito i horoa ˈtu ia Paulo ra i ta te mau taeae e tuahine no Philipi i hapono mai. (Phil. 4:18) Na Tuhiko i afai i ta Paulo na rata i e piti amuiraa. (Kol. 4:7) Noa ˈtu ua tapeahia o ˈna i roto i te hoê fare tarahu e i te fare tapearaa i muri iho, ua nehenehe Paulo e tamau i ta ˈna taviniraa maoti te tauturu a to ˈna mau hoa. O oe atoa te nehenehe e riro ei hoa mau. E nafea ïa?

Na roto i te hiˈoraa o te tahi mau taeae e tuahine, e ite mai tatou eaha ta te hoa mau e rave. Ua riro te hoê tuahine ei hoa mau no Elisabet, e pionie tamau e faaea ra i Paniora. I te iteraahia e ua aai roa te mariri ai taata o te mama o Elisabet, ua hapono te tuahine e rave rahi poroi faaitoito no roto mai i te Bibilia ia Elisabet. Te na ô ra Elisabet: “I to ˈu taioraa i ta ˈna mau poroi, ua oaoa roa vau i te iteraa e taata te manaˈo ra ia ˈu, e ua itoito-roa-hia vau no te rave i tei titauhia ia ˈu.”​—Mas. 18:24.

E piri roa ˈtu â tatou i to tatou mau taeae e tuahine ma te tauturu ia ratou ia tae i te pororaa aore ra i te mau putuputuraa. Ei hiˈoraa, e nehenehe tatou e tii ia ratou, a faaitoitohia ˈi tatou e o ratou. (Roma 1:12) Teie râ, te vai ra eita ta ratou e nehenehe e faarue i to ratou fare. E nafea ïa ia riro ei hoa mau no ratou?

No te maˈi aore ra no te tahi atu tumu, eita te tahi mau taeae e tuahine e tae tino roa i te putuputuraa. Te tupuraa ïa o taeae David tei roohia i te mariri ai toto. Hau i te ono avaˈe te rapaauraahia to ˈna maˈi i te chimiothérapie. Na te fare mai ïa raua Lidia ta ˈna vahine ia nati mai no te putuputuraa.

Mea nafea to raua mau hoa i roto i te amuiraa i te tautururaa ia raua? Ua oti anaˈe te putuputuraa, e paraparau vetahi ia raua na roto i te Zoom. Ia pahono atoa raua, e  hapono vetahi i te poroi ua oti anaˈe te putuputuraa no te faaite atu e ua au roa ratou i ta raua mau pahonoraa. Te faahopearaa, ua papu atu â ia David raua Lidia e mea herehia raua.

E nehenehe tatou e faatano i ta tatou tapura ohipa no te poro na muri i te mau mero eita ta ratou e nehenehe e faarue i te fare. E ite ïa ratou e aita ratou i haamoˈehia. (Mas. 3:27) Te vai ra te pororaa na roto i te papairaa i te rata aore ra te niuniu. Te vai atoa ra te natiraa i te putuputuraa no te pororaa na roto i te Zoom. Mea au roa na David raua Lidia i tera faanahoraa. Te na ô ra taeae: “I te apiti-noa-raa ˈtu mâua i te mau taeae e tuahine no te tahi aparauraa poto noa e no te pure, ua itoito-roa-hia mâua.” E nehenehe atoa i te tahi taime e faatere i te haapiiraa Bibilia a ta tatou piahi i ǒ te hoê taata poro e mau noa o ˈna i te fare. Ia ani iho â râ tatou na mua ia ˈna e nehenehe anei.

E faataa tatou i te taime no to tatou mau taeae e tuahine eita ta ratou e nehenehe e faarue i te fare. E matau atu â ïa tatou ia ratou, e ite tatou i to ratou mau huru maitatai, a piri atu â ˈi tatou ia ratou. Ei hiˈoraa, ia poro oe na muri ia ratou, a tapao atu ai e nafea ratou e faaohipa ˈi i te Bibilia ia putapû te aau o te taata, e faahiahia roa oe. Ia tauturu oe i te mau taeae e tuahine i roto i te mau ohipa pae varua, e hoa apî ïa te noaa mai.​—Kor. 2, 6:13.

A faaruru ai Paulo i te fifi, ua tamahanahanahia o ˈna i te faaearaa mai to ˈna hoa o Tito ia ˈna ra. (Kor. 2, 7:5-7) Te haapii mai ra te hiˈoraa o Tito eita e navai ia tamahanahana i to tatou mau taeae e tuahine na roto noa i te parau. Ia faataa atoa râ tatou i te taime no ratou e ia rave i te tahi mau mea no te tauturu atu.​—Ioa. 1, 3:18.

E hiˈoraa faaitoito mau â to tatou mau taeae e tuahine no Rusia o tei tauturu te tahi i te tahi. A hiˈo na ia taeae Sergey raua Tatyana ta ˈna vahine. I muri iho i te paheruraahia to raua fare, ua afaihia raua no te titorotoro ia raua. O Tatyana tei tuuhia mai na mua. Te faatia ra Sergey: “I to [Tatyana] iho â taeraa i te fare, tae atoa maira te hoê tuahine tei ore i taiâ. E rave rahi atu â taeae e tuahine tei haere mai e tauturu ia mâua ia faanaho i to mâua nohoraa.”

Te na ô atoa ra Sergey: “Mea au iho â na ˈu te Maseli 17:17 e parau ra: ‘E faaite te hoê hoa mau i te here i te mau taime atoa e e taeae oia tei fanauhia no te taime ahoaho.’ Ua taa ˈtu â râ ia ˈu te faufaaraa o teie irava i te ûraa vau i te hamani-ino-raa eita e haere ia ˈu ia faaruru o vau anaˈe. Ua horoa mai Iehova i te hoa tei ore i taiâ i te tauturu mai.” a

E hinaaro mau â tatou i te tauturu a to tatou mau hoa i te mau taime fifi, hau roa ˈtu â ia tupu te ati rahi. No reira, e rohi anaˈe i te riro ei hoa mau i teie nei.​—Pet. 1, 4:7, 8.