Te ora ra Mary raua John a ta ˈna tane faaipoipo i te hoê fenua mea rahi to Philipino i reira, e te oaoa ra raua i te poro ia ratou. I te roaraa o te maˈi parare COVID-19, mea rahi ta Mary haapiiraa Bibilia i faatere eiaha noa i to ˈna fenua, oia atoa râ i te tahi atu mau fenua. Mea nafea te noaaraa mai ia ˈna tera mau haapiiraa?

E ui noa ˈtu ïa Mary i ta ˈna mau piahi: “E taata anei ta oe i matau o te hinaaro e haapii i te Bibilia?” Ia pahono mai ratou te vai ra, e ui ïa o ˈna: “E nehenehe anei au e farerei ia ratou?” Pinepine e haamaitairaa te noaa mai maoti teie noa uiraa. No te aha? No te mea e hinaaro iho â te feia mea au na ratou i te Parau a te Atua e faaite i ta ratou i haapii i to ratou fetii e to ratou mau hoa. Eaha ˈtura ïa tei tupu no Mary?

E maha taata ta Jasmin, o te haapii ra na muri ia Mary, i faaite atu ia ˈna. O Kristine te tahi o tei ani ia faaterehia ta ˈna haapiiraa e piti taime i te hebedoma, ua au roa hoi o ˈna i ta ˈna haapiiraa. Ua ani atoa Mary ia Kristine aita anei o ˈna i matau i te tahi mau taata o te hinaaro e haapii i te Bibilia. Pahono maira Kristine: “Oia, to ˈu mau hoa.” Tau hebedoma i muri iho, e maha hoa ta Kristine i haafarerei ia Mary. I muri iho, te tahi atu ïa mau hoa, o tei horoa atoa i te iˈoa o te tahi atu o te hinaaro e haapii.

Ua hinaaro atoa Kristine ia haapii to ˈna fetii i Philipino i te Bibilia. Paraparau atura ïa o ˈna ia Andrea ta ˈna tamahine. I manaˈo na Andrea e pǔpǔ iti faaroo te mau Ite no Iehova, o te ore e tiaturi ia Iesu, e o te Faufaa Tahito noa ta ratou e faaohipa nei. I muri iho hoê noa haapiiraa, taa ihora ia Andrea e ua hape roa o ˈna. I te mau taime atoa e apo mai ai o ˈna i te hoê haapiiraa i roto i te Bibilia, e parau noa o ˈna: “Inaha, ua papaihia i roto i te Bibilia, tera iho â ïa!”

I muri iho, ua haafarerei Andrea ia Mary i te hoê hoa ohipa e e piti hoa, o tei haapii atoa. A faatere ai Mary i ta Andrea haapiiraa, aita o ˈna i ite noa ˈˈe e te faaroo noa mai ra o Angela te tati matapo o Andrea. I te hoê mahana, parau ihora te tati ia Andrea e nehenehe anei ta ˈna e ani ia Mary ia haapii atoa ia ˈna. Ua au roa Angela i ta ˈna e haapii ra. I roto noa hoê avaˈe, ua mau ia ˈna e rave rahi irava, e ua ani o ˈna ia faaterehia ta ˈna haapiiraa e maha taime i te hebedoma. Maoti te tauturu a Andrea, ua nehenehe ïa Angela e apiti i te mau putuputuraa na roto i te Zoom.

 Ia faatere Mary i ta Kristine haapiiraa, tei pihai iho noa mai Joshua ta Kristine tane i te parahiraa. Ani maira Mary ia Joshua eita anei o ˈna e hinaaro e apiti mai i te haapiiraa. Na ô atura Joshua: “Eita, e faaroo noa ˈtu vau, eiaha râ e uiui mai ia ˈu. Aita anaˈe, eita vau e faaea mai.” I roto noa e pae minuti haapiiraa, ua rahi aˈe ïa ta ˈna uiraa i ta Kristine, e farii atura o ˈna e haapii atoa i te Bibilia.

Mea rahi te haapiiraa Bibilia tei faaterehia maoti hoê noa uiraa ta Mary i tuu atu. Ua horoa atoa o ˈna e rave rahi haapiiraa na te tahi atu mau Ite no Iehova e faatere. Ia taio-pauroa-hia, e 28 haapiiraa Bibilia ta Mary i maha fenua.

Ua bapetizohia Jasmin, te piahi matamua, i Eperera 2021. O Kristine i Me 2022, e hoˈi atura o ˈna i Philipino i ǒ to ˈna fetii ra. Ua bapetizo-atoa-hia e piti piahi ta Kristine i haafarerei ia Mary. Tau avaˈe i muri iho i to Kristine bapetizoraahia, o Angela ïa tei bapetizohia, e pionie tamau o ˈna i teie nei. Te nuu maitai atoa ra o Joshua ta Kristine tane e ta raua tamahine o Andrea, e te tahi atu mau piahi, i roto i ta ratou haapiiraa.

I te senekele matamua, mea vitiviti te atuturaa te parau apî oaoa na rotopu i te mau fetii e te mau hoa. (Ioa. 1:41, 42a; Ohi. 10:24, 27, 48; 16:25-33) No reira, a ui i ta oe mau piahi e te tahi atu o te hinaaro e haapii: “E taata anei ta oe i matau o te hinaaro e haapii i te Bibilia?” E noaa mai paha ia oe e rave rahi atu â haapiiraa maoti teie noa uiraa.