1. No te aha Iehova i poiete ai i te mau mea atoa?

 I MUTAA ra, o Iehova anaˈe, aita oia i moˈemoˈe noa ˈˈe e aita i titauhia ia hoahia o ˈna no te oaoa. Noa ˈtu râ, ua hinaaro oia ia fanaˈo atoa vetahi ê i te ora e te oaoa. No to ˈna here, haamata ihora Iehova i te poiete.—Sal. 36:9; Ioa. 1, 4:19.

2. Eaha to Iesu e to te mau melahi huru a ite ai i te mau mea atoa ta Iehova i poiete?

² Na mua, ua poiete Iehova i ta ˈna Tamaiti o Iesu ei tauturu ia ˈna no te poiete i “te mau mea atoa,” mai te mau melahi. (Kol. 1:16) Ua oaoa Iesu i te ohipa e to ˈna Metua. (Mas. 8:30) Ua oaoa atoa te tahi atu mau tamarii a te Atua i te raˈi, ua ite roa ˈtu hoi ratou ia Iehova raua Iesu i te hamaniraa i te raˈi e te fenua. Te parauhia ra hoi, “ua pii noa te mau tamarii atoa a te Atua i te oaoa” i te otiraa te fenua i te hamanihia. Mea papu, ua tamau ratou i te faahiahia i te mau mea ta Iehova i poiete, i to ˈna iho â râ hamaniraa i te taata. (Ioba 38:7; Mas. 8:31) E itehia to Iehova here e paari i roto i te mau mea atoa i poietehia.—Sal. 104:24; Roma 1:20.

3. Ia au i te Korinetia 1, 15:21, 22, eaha ta tatou e fanaˈo i te tusia taraehara o Iesu?

³ Ua hinaaro Iehova ia ora te taata e a muri noa ˈtu i nia i te fenua nehenehe ta ˈna i poiete. A faaroo ore ai râ Adamu raua Eva ia Iehova, ua ô mai te hara e te pohe i  te ao. (Roma 5:12) Ua nafea Iehova? Ua rave oioi Iehova i te faanahoraa no te faaora i te huitaata. (Gen. 3:15) Ua opua Iehova e ho mai i ta ˈna Tamaiti ei hoo no te faatiamâ i ta Adamu raua Eva huaai i te hara e te pohe. E nehenehe ïa te taata tataitahi e maiti i te tavini ia ˈna a fanaˈo atu ai i te ora mure ore.—Ioa. 3:16; Roma 6:23; a taio i te Korinetia 1, 15:21, 22.

4. Eaha te mau uiraa e hiˈopoahia i roto i teie haapiiraa?

⁴ Ia feruri tatou i ta Iehova parau fafau no nia i te tia-faahou-raa, mea rahi te uiraa e hiti mai. E nafea te tia-faahou-raa e tupu ai? A faatiahia mai ai to tatou feia herehia tei pohe, e taa anei tatou ia ratou? E nafea tatou e oaoa ˈi i te tia-faahou-raa? E nafea te tia-faahou-raa e faarahi ai i to tatou mauruuru no to Iehova here, paari e faaoromai? E hiˈopoa tataitahi mai tatou i tera mau uiraa.

5. No te aha mea tano ia parau e faatia-mǎrû-noa-hia mai te feia pohe ma te naho?

⁵ Ia faaohipa Iehova i ta ˈna Tamaiti no te faatupu i te tia-faahou-raa, eita te feia pohe atoa e faatiahia mai i te hoê â taime. Mai te peu e na reirahia, e tupu te huanane. Eita hoi Iehova e rave i te tahi noa ˈˈe mea ma te huanane. Ia tupu te hau, mea titauhia ia ravehia te ohipa ma te naho. (Kor. 1, 14:33) Hou a hamani ai i te taata, ua faaite Iehova i te paari e te faaoromai a ohipa ˈi e o Iesu no te faaineine mǎrû noa i te fenua. E faaite atoa Iesu i tera nau huru maitatai i te roaraa o na tausani matahiti faatereraa. E ohipa amui oia e te nahoa rahi e ora ˈtu i Aramagedo ia ineine  te mau mea atoa no te farii i te feia o te faatiahia mai.

6. Ia au i te Ohipa 24:15, o vai atoa ta Iehova e faatia mai?

⁶ Te mea faufaa roa ˈtu, e titauhia i te nahoa rahi e ora ˈtu i Aramagedo ia haapii i te feia e faatiahia mai no nia i te Faatereraa arii a te Atua e ta Iehova mau titauraa. E “feia parau-tia ore” hoi te rahiraa o te taata e faatiahia mai. (A taio i te Ohipa 24:15.) Ia faufaa-atoa-hia ratou i te tusia taraehara o te Mesia, e titauhia ia rave ratou i te mau tauiraa. E mirioni e e mirioni taata tei ore i ite o vai Iehova e te titauhia ia haapii. E ohipa rahi mau ïa te tiai mai ra! E haapii-tataitahi-hia anei te taata? E riro anei ratou ei mero o te hoê amuiraa? E faaineinehia anei ratou no te haapii atoa i te feia e faatiahia mai i muri aˈe ia ratou? I tera mahana ïa tatou e ite ai. Ta tatou râ i papu, ia hope na tausani matahiti faatereraa a te Mesia, “e î hoi te fenua i te ite ia Iehova.” (Isa. 11:9) Auê ïa ohipa oaoa i te roaraa o na tausani matahiti!

7. No te aha te mau tavini a Iehova e faaite ai i te aumauiui a haapii ai i te feia e faatiahia mai?

⁷ I te roaraa o na tausani matahiti faatereraa a te Mesia, e ere te feia anaˈe e faatiahia mai te titauhia ia taui, o tatou atoa râ. E faaite ïa tatou paatoa i te aumauiui te tahi i te tahi a tauturu noa ˈi i te feia e faatiahia mai ia haapae i te mau manaˈo e hinaaro tia ore e ia ora ia au i ta Iehova mau ture aveia. (Pet. 1, 3:8) E ite te feia e faatiahia mai i te haehaa o te mau tavini a Iehova o te tutava ra ia “noaa atoa ia [ra]tou te ora.”—Phil. 2:12.

8. No te aha mea tano ia manaˈo e taa tatou i to tatou feia herehia o te faatiahia mai?

⁸ E rave rau tumu mea tano ai ia manaˈo e taa tatou i to tatou feia herehia o te faatiahia mai. Ia au i te mau tia-faahou-raa i tupu i tahito, e faatia atoa mai Iehova i te taata ia au i to ratou huru, mai to ratou hohoˈa, ta ratou huru paraparau e to ratou feruriraa na mua ˈˈe a pohe ai. No Iesu, e au te pohe i te taotoraa, e te tia-faahou-raa i te araraa mai i te taoto. (Mat. 9:18, 24; Ioa. 11:11-13) Ia ara mai te taata i te taoto, aita to ratou huru i taui e e haamanaˈo ratou i te mau mea atoa. I te faatiaraahia mai Lazaro e maha mahana i muri aˈe i to ˈna poheraa, ua haamata to ˈna tino i te pe. I to Iesu râ faatiaraa mai ia ˈna, ua taa oioi to ˈna na tuahine ia ˈna e ua taa atoa Lazaro ia raua.—Ioa. 11:38-44; 12:1, 2.

9. No te aha eita te feia pohe e faatiahia mai ei taata tia roa?

⁹ Te piti o te tumu, ua fafau Iehova eita te hoê noa ˈˈe taata i raro aˈe i te faatereraa a te Mesia e parau: “Ua paruparu vau i te maˈi.” (Isa. 33:24; Roma 6:7) E faatiahia mai te feia pohe e te hoê tino oraora maitai. E ere râ ratou i te feia tia roa i taua taime ra. Ahani e mai tera, eita ïa to ratou fetii e hoa e taa o vai ratou! E riro mǎrû noa tatou paatoa ei taata tia roa i te roaraa o na tausani matahiti faatereraa a te Mesia. Ia hope na tausani matahiti, ua naea i te taata atoa te tia-roa-raa e e faahoˈi Iesu i te Faatereraa i to ˈna Metua ra. I reira te mau ohipa a te Faatereraa arii e  hope roa ˈi i te ravehia.—Kor. 1, 15:24-28; Apo. 20:1-3.

10. Mai te aha to outou huru ia tupu te tia-faahou-raa?

¹⁰ A feruri na i te taime e faatiahia mai ai to tatou feia herehia tei pohe. E ata aore ra e taˈi anei outou i te oaoa? E himene anei outou no te arue ia Iehova? Te mea papu, e here rahi atu â outou i to outou Metua e i ta ˈna Tamaiti no te ô faahiahia mau o te tia-faahou-raa.

11. Ia au i te Ioane 5:28, 29, eaha te tupu no te feia e pee i ta te Atua mau ture aveia tia?

¹¹ E oaoa te feia e faatiahia mai a tatara ˈi ratou i te huru taata tahito no te pee i ta Iehova mau ture aveia tia. Te feia e rave i tera mau tauiraa, ua tia mai ïa no te ora. Te feia râ o tei ore i taui, eita ïa ratou e vaiihohia ia haafifi i te oraraa hau i roto i te ao apî.—Isa. 65:20; a taio i te Ioane 5:28, 29.

12. A muri aˈe, e nafea to te fenua atoa e ite ai i te maitai o Iehova?

¹² I raro aˈe i te Faatereraa arii, e ite te mau tavini atoa a te Atua i te tupuraa o te Maseli 10:22 e na ô ra: “Na Iehova te maitai i taoˈahia ˈi te taoˈa; e ore hoi e apiti-atoa-hia mai te ino i te reira.” Maoti te varua o Iehova, e taoˈahia ˈtu â te nunaa o te Atua i te pae varua. A mairi ai hoi tera e tera mahana, e riro atu â ratou mai te Mesia ra te huru a piri noa ˈtu ai i te tia-roa-raa. (Ioa. 13:15-17; Eph. 4:23, 24) E etaeta noa ˈtu â to ratou tino e e maitai noa ˈtu â to ratou huru. Auê ïa oraraa oaoa! (Ioba 33:25) E nafea râ tatou e faufaahia ˈi i teie nei ia feruri i te tia-faahou-raa?

13. E nafea te Salamo 139:1-4 e faaite ai ua ite maitai Iehova i to tatou huru e e nafea te reira e haapapuhia ˈi i te tia-faahou-raa?

¹³ Mai ta tatou i hiˈo mai, ia faatiahia mai te feia pohe, eita Iehova e taui i to ratou huru e e haamanaˈo ratou i te mau mea atoa i vai na i roto i to ratou feruriraa. No to Iehova here ia outou, e tapao oia i to outou mau manaˈo e huru, oia atoa i ta outou mau parau e ohipa. Ia faatia noa ˈtu Iehova ia outou, e faahoˈi mai oia ia outou i te ora ia au i to outou huru na mua ˈˈe. Ua papu i te arii Davida ua ite maitai Iehova i te huru o te taata tataitahi. (A taio i te Salamo 139:1-4.) A haamanaˈo ai i te reira, mai te aha to tatou huru?

14. Eaha to tatou huru a haamanaˈo ai ua ite maitai Iehova i te huru o te taata tataitahi?

¹⁴ Ma te haamanaˈo ua ite maitai Iehova i to tatou huru, eita tatou e haapeapea. Eaha te tumu? Te haapapu mai ra hoi te reira mea here roa na Iehova ia tatou. Ua ite oia i te mau vahi maitai o te taata tataitahi. E haamanaˈo oia i te mau tupuraa maitai e ino atoa o to tatou oraraa. Auê te mahanahana e! Eita roa Iehova e faarue ia tatou. I te mau taime atoa, tei pihai iho Iehova ia tatou no te tauturu mai.—Par. 2, 16:9.

15. E nafea te paari o Iehova e itehia ˈi na roto i te tia-faahou-raa?

¹⁵ E ravea haamǎtaˈuraa te pohe, e nehenehe to Satani mau taata e faaohipa i te reira no te turai ia tatou ia taiva i to tatou mau hoa e i te Atua. Eita râ tera raveraa e  manuïa i nia ia tatou. Ia haapohe noa ˈtu to tatou mau enemi ia tatou, e faahoˈi mai Iehova ia tatou i te ora. (Apo. 2:10) Eita roa ta ratou raveraa e faataa ê ia tatou ia Iehova. (Roma 8:35-39) Maoti te tiaturiraa o te tia-faahou-raa, aita noa Iehova i horoa mai i te ravea ia pau Satani, ua horoa atoa mai râ oia i te itoito no te mau papu. E Atua paari mau Iehova!

16. Eaha na uiraa e titauhia ia uiui no te ite te tiaturi mau ra oe ia Iehova?

¹⁶ Ia tamata te mau enemi o Iehova i te haapohe ia oe, te tiaturi papu ra anei oe e faatia mai Iehova ia oe? No te ite tera anei to oe tiaturiraa, mea titauhia ia uiui, ‘Te faaite ra anei ta ˈu mau faaotiraa i te mau mahana atoa te tiaturi ra vau ia Iehova?’ (Luka 16:10) Aore ra, ‘Te faaite ra anei to ˈu huru oraraa te tiaturi ra vau e aupuru mai iho â Iehova ia ˈu ia imi na mua vau i ta ˈna Faatereraa arii?’ (Mat. 6:31-33) Mai te peu e e pahono oe e i na uiraa e piti, te tiaturi mau ra ïa oe ia Iehova e e mau papu oe i mua i te mau tamataraa atoa.—Mas. 3:5, 6.

17. (1) E nafea te tia-faahou-raa e haapapu ai mea faaoromai Iehova? (2) E nafea tatou ia faaite i te mauruuru no to Iehova faaoromai?

¹⁷ Ua faaoti ê na Iehova i te mahana e te hora no te haamou i teie faanahoraa o te ao. (Mat. 24:36) Eita o ˈna e ohipa na mua ˈˈe i te taime ta ˈna i faataa. Te hinaaro ru nei oia e faatia mai i te feia pohe, te faaoromai nei râ oia. (Ioba 14:14, 15) Te tiai nei oia i te taime tano no te faahoˈi mai ia ratou i te ora. (Ioa. 5:28) E rave rau tumu e mauruuru ai tatou ia Iehova no to ˈna faaoromai. A feruri na: No to Iehova faaoromai, e taime to te taata no “te tatarahapa.” (Pet. 2, 3:9) Te hinaaro ra Iehova ia fanaˈo e rave rahi atu â taata i te ora mure ore. E nafea tatou ia faaite i te mauruuru no to Iehova faaoromai? Ma te imi maite ïa e ma te tauturu i “te taata aau farii i te ora mure ore” ia here e ia tavini ia Iehova. (Ohi. 13:48) Mai ia tatou, e faufaa-atoa-hia ïa ratou i to Iehova faaoromai.

18. No te aha e titauhia ia faaite i te faaoromai i nia ia vetahi ê?

 ¹⁸ A tiai noa ˈi ia hope na tausani matahiti faatereraa a te Mesia, te faaoromai ra Iehova i to tatou huru tia ore. I teie mahana, ua ineine oia i te faaore i ta tatou mau hara. Mea tano atoa ïa ia imi tatou i te maitai i roto ia vetahi ê e ia faaite atu i te faaoromai. Te tahi hiˈoraa: Ua hepohepo te tane a te tahi tuahine e ua faaea oia i te apiti i te mau putuputuraa. Te na ô ra te tuahine: “Mea mauiui mau no ˈu, ua taui taue noa to mâua oraraa, eita mâua e nehenehe faahou e rave i ta mâua i hinaaro.” Ua faaite noa râ te tuahine i te faaoromai i nia i ta ˈna tane. Maoti to ˈna tiaturi ia Iehova, ua tia i teie tuahine ia faaruru i teie fifi. Mai ia Iehova, aita oia i tiatonu i nia i te fifi, i nia râ i te mau vahi maitai o ta ˈna tane. Te na ô ra oia: “Mea maitai roa ta ˈu tane e te tutava ra o ˈna i te faaea i te hepohepo.” Mea faufaa roa ia faaite tatou i te faaoromai i nia i to tatou utuafare e i nia i te mau taeae e tuahine o te amuiraa i roto i te fifi.

19. Eaha ta tatou i faaoti papu i te rave?

¹⁹ Ua oaoa Iesu e te mau melahi a poietehia ˈi te fenua. A feruri na râ i to ratou oaoa ia î te fenua i te feia tia roa o te here e o te tavini ia Iehova. A feruri na i te oaoa o te feia e amui atu ia Iesu i te raˈi a ite ai ratou i te taata ia faufaahia i ta ratou ohipa i rave. (Apo. 4:4, 9-11; 5:9, 10) A feruri na i te oraraa aita e roimata mauiui faahou e ia ore roa te maˈi, te oto e te pohe. (Apo. 21:4) A tiai noa ˈi, e faaoti papu anaˈe i te faaite i te here, te paari e te faaoromai mai to tatou Metua ra o Iehova. E tamau ïa tatou i te oaoa noa ˈtu te ati e rave rau. (Iak. 1:2-4) Auê tatou i te mauruuru ua fafau Iehova e tupu te tia-faahou-raa!—Ohi. 24:15.