1-2. Eaha ta tatou e hiˈopoa mai i roto i teie tumu parau haapiiraa?

 MEA maoro to oe tiairaa i te hoê rata e aita â i tapae atura i ǒ oe. Eita e ore e haapeapea oe i tera maororaa. Te na ô ra hoi te Maseli 13:12: “E maˈihia te aau ia maoro tei tiaihia ra.” Eaha râ to oe huru ia ite oe e tumu papu aita â ta oe rata i tae mai? E faaoromai â ïa oe, e ere anei?

² I roto i teie tumu parau haapiiraa, e hiˈo mai tatou i te tahi mau aratairaa Bibilia o te tauturu ia tatou ia “tiai” ma te faaoromai. (Mika 7:7) E hiˈo atoa mai tatou e piti tupuraa mea titauhia ia tiai ia Iehova ma te faaoromai. I te pae hopea, e hiˈo mai tatou i te mau haamaitairaa ta Iehova i fafau no te feia e tiai ra ia ˈna ma te faaoromai.

3. Eaha ta te Maseli 13:11 e haapii mai ra?

³ E hiˈoraa to roto i te Maseli 13:11 o te faaite ra i te faufaaraa ia tiai ma te faaoromai. Te na ô ra taua irava ra: “E tahe te faufaa tei noaa-oioi-hia, e rahi râ te faufaa a te taata te haaputu riirii mai i te reira.” Eita ïa te hoê taata maramarama e ru ia rave o ˈna i te hoê ohipa.

4. Eaha ta te Maseli 4:18 e haapii mai ra?

⁴ Te faaite ra te Maseli 4:18 e au “te eˈa o te feia parau-tia i te maramarama anaana o te poipoi o te anaana noa ˈtu â e avatea noa ˈtu.” Mea papu teie irava. Ia faaite Iehova i ta ˈna opuaraa i ta ˈna mau tavini, e faaite mǎrû noa o ˈna i te reira. E tano atoa râ teie irava no te hoê Kerisetiano  o te rave ra i te tauiraa i roto i to ˈna oraraa e o te faafatata ˈtu â ia Iehova. E titauhia te taime no te hoê taata ia faafatata ˈtu â ia Iehova. Ia haapii e ia faaohipa maitai tatou i te mau aratairaa no ǒ mai i te Atua e ta ˈna faanahonahoraa, e faatupu mǎrû noa tatou i te mau huru maitatai o te Mesia. E rahi atoa ˈtu â to tatou ite no nia i te Atua. E hiˈo anaˈe i te faahohoˈaraa ta Iesu i horoa.

5. Eaha te faahohoˈaraa ta Iesu i horoa no te faataa e titauhia te taime no te hoê taata ia taui?

⁵ Ua horoa Iesu i te hoê faahohoˈaraa o te faaite ra e au te poroi o te Faatereraa arii ta tatou e poro nei i te hoê huero iti o tei tupu mǎrû noa i roto i te aau o te feia o te haafaufaa ra i te mea tia. Ua parau oia: “E oteo e e tupu mai te huero ma te ore oia [te taata ueue huero] e ite e nafea. Na te repo iho e faahotu riirii mai, te omou na mua, te maa sitona i muri iho o te paari roa mai i te pae hopea.” (Mar. 4:27, 28) Ua faataa Iesu e mai te hoê raau e tupu mǎrû noa, e taui mǎrû noa te hoê taata o te farii i te poroi o te Faatereraa arii. A faafatata ˈtu â ˈi ta tatou mau piahi Bibilia ia Iehova, e ite tatou i te mau tauiraa maitai ta ratou e rave ra. (Eph. 4:22-24) Eiaha râ ia moˈe ia tatou, na Iehova e faatupu i tera huero iti.—Kor. 1, 3:7.

6-7. Eaha te haapii mai i te poieteraa Iehova i te fenua?

⁶ I roto i ta ˈna mau ohipa atoa, e rave Iehova i te taime e titauhia no te rave faahope roa i ta ˈna ohipa. Te na reira ra o ˈna ia aruehia to ˈna iˈoa e no te tauturu ia vetahi ê. A feruri na mea nafea Iehova i te faaineineraa i te fenua no te huitaata.

⁷ Te faataa ra te Bibilia i te hamaniraa te Atua i te fenua, ua tuu o ˈna i “to ˈna mau faito,” ua haamau i “to ˈna mau niu” e ua tuu i “to ˈna ofai tihi.” (Ioba 38:5, 6) Ua rave atoa o ˈna i te taime no te hiˈopoa i ta ˈna ohipa. (Gen. 1:10, 12) Eita e  ore e ua faahiahia te mau melahi a ite ai tera e tera mea ta Iehova e poiete ra e ua arue ratou ia ˈna. (Ioba 38:7) Eaha te haapii mai? E rave rahi tausani matahiti tei titauhia ia Iehova no te poiete i te mau mea atoa. I te iteraa râ Iehova i te mau mea atoa ta ˈna i poiete, parau atura o ˈna “mea maitai roa.”—Gen. 1:31.

8. Eaha ta tatou e hiˈo mai i teie nei?

⁸ Mai ta tatou i ite mai na mua ˈtu, mea rahi te aratairaa Bibilia o te faaite ra i te faufaaraa ia tiai ma te faaoromai. I teie nei, e hiˈo mai tatou e piti tupuraa mea titauhia ia tiai ia Iehova ma te faaoromai.

9. Eaha te tahi tupuraa e titauhia ia tiai tatou ia Iehova?

⁹ E tiai tatou ia pahonohia ta tatou mau pure. Ia ani tatou ia Iehova i te puai no te faaoromai i te hoê ati aore ra ia ani tatou i te tauturu no te haapae i te hoê peu au ore, e manaˈo paha tatou mea taere o ˈna no te pahono i ta tatou mau taparuraa. Eaha râ Iehova e ore ai e pahono oioi i te tahi o ta tatou mau pure?

10. No te aha e titauhia ˈi ia tiai tatou ia pahono Iehova i ta tatou mau pure?

¹⁰ Te faaroo ra Iehova i ta tatou mau pure. (Sal. 65:2) Na roto i ta tatou mau pure haavare ore, te faaite ra tatou i to tatou faaroo ia ˈna. (Heb. 11:6) Ia pure tatou ia Iehova no te ani i te tauturu no te rave i te mea e mauruuru ai o ˈna, te hinaaro ra o ˈna e ite i ta tatou mau tutavaraa no te rave i to ˈna hinaaro. (Ioa. 1, 3:22) No reira, ia ani tatou ia Iehova ia tauturu mai no te faaea i te rave i te hoê mea ta ˈna e ore e au, e titauhia te taime e te tutavaraa no te taui i to tatou haerea. Te tauturu ra Iesu ia tatou ia taa e te vai ra te tahi mau pure o te ore e pahono-oioi-hia. Ua parau o ˈna: “A tamau i te ani, e horoahia mai. A tamau i te imi, e itehia mai. A tamau i te patoto, e iritihia mai. Te taata hoi e ani, e noaa mai ta ˈna. Te taata hoi e imi, e itehia mai e ana. Te taata hoi e patoto, e iritihia mai.” (Mat. 7:7, 8) Ia pee tatou i tera aratairaa a tamau noa ˈi i te pure, e faaroo mai to tatou Metua i te raˈi e e pahono o ˈna i ta tatou mau pure.—Kol. 4:2.

11. E nafea te Hebera 4:16 e tauturu ai ia tatou aita anaˈe ta tatou mau pure e pahono-oioi-hia?

¹¹ Noa ˈtu no tatou, mea maoro aita â ta tatou pure i pahonohia ˈtura, ua fafau Iehova e pahono o ˈna i te pure “ia hinaaro tatou i te tauturu.” (A taio i te Hebera 4:16.) Eiaha roa ˈtu ïa tatou e faahapa ia Iehova ia ore o ˈna e pahono oioi mai. Ehia ˈtura matahiti to te mau tavini a Iehova pure-noa-raa ia faaore te Faatereraa arii a te Atua i te ino i nia i te fenua! Ua parau atoa Iesu ia pure no te reira. (Mat. 6:10) Mea maamaa ia vaiiho i to tatou faaroo ia paruparu no te mea noa aita â te hopea o teie ao ino i tae atura. (Hab. 2:3; Mat. 24:44) E haerea paari ia tamau noa i te tiai ia Iehova a pure noa ˈi ia ˈna ma te faaroo. E tae mai iho â te hopea o teie ao ino, ua faataa aˈe na hoi Iehova i te “mahana” e te “hora” e tae mai ai te reira. O Iehova anaˈe tei ite i te taime tano roa ˈˈe.—Mat. 24:36; Pet. 2, 3:15.

12. I roto i teihea tupuraa e riro ai ei mea fifi ia faaoromai?

¹² Te faaoromai i roto i te hoê tupuraa e hiˈo-ino-hia ˈi tatou. Mea pinepine te  feia o teie nei ao i te hiˈo ino i te taata nunaa ěê. Te vai ra o te hamani ino ra i te mau huma e te mau hapepa. Mea rahi te Ite no Iehova o te faaruru ra i te tupuraa tano ore no to ratou faaroo. Mai te peu e te faaruru ra tatou i tera mau huru tupuraa, e haamanaˈo anaˈe i ta Iesu i parau: “Te taata . . . tei faaoromai tamau e tae noa ˈtu i te hopea, e ora ïa.” (Mat. 24:13) E mai te peu ua faaroo oe ua hara te hoê hoa Kerisetiano i roto i te amuiraa e ua faaarahia te mau matahiapo? E vaiiho anei oe i te reira i roto i to ratou rima ma te tiaturi e faatitiaifaro ratou i tera tupuraa ia au i te manaˈo o Iehova? Eaha ta te mau matahiapo e rave ia hara te tahi hoa Kerisetiano?

13. Eaha ta Iehova e titau ra i te mau matahiapo e hara rahi anaˈe tei ravehia?

¹³ Ia faaarahia te mau matahiapo i te hoê hara i roto i te amuiraa, e imi ratou i “te paari no nia mai” ia nehenehe ratou e ite i te manaˈo o Iehova no nia i tera tupuraa. (Iak. 3:17) E tauturu ratou i te hoa Kerisetiano tei hara ia fariu ê i to ˈna haerea ino. (Iak. 5:19, 20) E rave atoa ratou i te mau mea atoa no te paruru i te amuiraa e no te tamahanahana i tei haamauiuihia. (Kor. 2, 1:3, 4) E hara rahi anaˈe tei ravehia, e imi na mua te mau matahiapo eaha mau na tei tupu. E titauhia ïa te taime. I muri mai, e pure ratou. E horoa ratou i te aˈoraa Bibilia e e faatitiaifaro ratou i te feruriraa e te haerea o te taata rave hara “ma te tano noa.” (Ier. 30:11) Eita te mau matahiapo e faataere. Eita atoa râ ratou e rave ru i te faaotiraa. Ia pee maite te mau matahiapo i te aratairaa a Iehova, e maitai noa te amuiraa. Noa ˈtu râ ua rave te mau matahiapo mai ta Iehova e titau ra, e mauiui noa paha vetahi no te hara i ravehia. Mai te peu tei roto oe i tera huru tupuraa, eaha ta oe e nehenehe e rave ia ore oe e haamanaˈo noa i te ohipa i tupu?

14. Eaha te hiˈoraa Bibilia o te tamahanahana ia oe mai te peu ua haamauiui te tahi hoa Kerisetiano ia oe?

¹⁴ Peneiaˈe ua haamauiui rahi te hoê taata ia oe, e taeae paha aore ra e tuahine. I roto i te Bibilia, e ite mai oe i te hiˈoraa faahiahia mau o te haapii mai ia  tiai ia faaafaro Iehova i te hoê tupuraa. Noa ˈtu ua hamani-ino-hia Iosepha na to ˈna mau tuaane, aita o ˈna i vaiiho i ta ratou mau hara ia faataui i to ˈna huru. Ua rave noa o ˈna i te hinaaro o Iehova e ua haamaitai Iehova ia ˈna no to ˈna faaoromai tamau. (Gen. 39:21) I muri aˈe, aita Iosepha i feruri faahou i te mauiui ta ˈna i faaruru e ua tiatonu o ˈna i te mau haamaitairaa a Iehova. (Gen. 45:5) Mai ia Iosepha, e tamahanahanahia tatou ia faafatata ˈtu tatou ia Iehova e ia vaiiho tatou ia ˈna ia faatitiaifaro i te mau tupuraa atoa.—Sal. 7:17; 73:28.

15. Eaha tei tauturu i te hoê tuahine ia ore e haapao i te ino o to ˈna hoa ohipa?

¹⁵ Parau mau, eita paha tatou e faaruru i te hoê â huru tupuraa e to Iosepha. Noa ˈtu râ, e nehenehe tatou e mauiui ia hamani ino te tahi ia tatou. Mai te peu e peapea to tatou e te tahi atu, oia atoa te tahi o te ore e tavini ra ia Iehova, e apî mai tatou ia faaohipa tatou i te mau aratairaa Bibilia. (Phil. 2:3, 4) Teie te hiˈoraa o te hoê tuahine tei faaroo e ua haere hoê o to ˈna mau hoa ohipa e faatia haere i te parau haavare no nia ia ˈna. Ua mauiui roa teie tuahine. Aita râ o ˈna i ura noa mai tera. Ua feruri o ˈna i te hiˈoraa o Iesu, “a tuhihia ˈi oia, aita oia i tuhi atu.” (Pet. 1, 2:21, 23) Maoti te hiˈoraa o Iesu, aita te tuahine i faarahi i teie ohipa. I muri aˈe, faaroo atura te tuahine e maˈi to to ˈna hoa ohipa e e hepohepo rahi to ˈna. Farii noa ˈtura te tuahine e tera te tumu i parau hanoa ˈi to ˈna hoa ohipa i te parau. Oaoa ˈtura te tuahine ua faaoromai o ˈna i tera tupuraa e ua vai hau noa o ˈna.

16. Eaha te tamahanahana ia oe mai te peu ua hamani-ino-hia oe? (Petero 1, 3:12)

¹⁶ Ia hamani-ino-hia oe aore ra ia haamauiuihia oe, a haamanaˈo e faafatata Iehova i “te feia o te mauiui ra.” (Sal. 34:18) Mea here na ˈna ia oe no te mea te faaoromai tamau ra oe e te huri ra oe i ta oe hopoia i nia ia ˈna. (Sal. 55:22) O ˈna te Haava o te fenua taatoa, aita hoê mea ta ˈna i ore i ite. (A taio i te Petero 1, 3:12.) A roohia ˈi oe i te fifi e aita  ta oe e ravea, a haamanaˈo e mea faufaa roa ia tiai ia faatitiaifaro Iehova i te tupuraa.

17. Eaha ta Iehova i fafau i roto i te Isaia 30:18?

¹⁷ Fatata roa to tatou Metua i te raˈi i te haamaitai ia tatou maoti ta ˈna Faatereraa arii. Te na ô ra te Isaia 30:18: “Te tiai nei Iehova ma te faaoromai no te hamani maitai ia outou, e e tia oia i nia no te aroha hamani maitai ia outou. E Atua parau-tia hoi Iehova. E oaoa te feia atoa e tiai noa ra ia ˈna.” E haamaitaihia ïa te feia e tiai ra ia Iehova i teie nei â e i roto i te ao apî.

18. Eaha te mau haamaitairaa e tiai mai ra ia tatou?

¹⁸ I roto i te ao apî, eita tatou e faaruru faahou i te ahoaho e te fifi ta tatou e faaruru nei i teie mahana. Aita faahou te ino e e ore roa te mauiui. (Apo. 21:4) Eita tatou e haapeapea faahou e noaa anei te mau mea ta tatou e hinaaro mau ra no te mea e rahi te maa i nia i te fenua. (Sal. 72:16; Isa. 54:13) E ere anei i te mea faahiahia?

19. Eaha ta Iehova e faaineine mǎrû noa ra no tatou?

¹⁹ E nafea Iehova e faaineine ai ia tatou ia ora i raro aˈe i ta ˈna aratairaa? Te tauturu ra oia ia tatou ia haapae i te mau peu ta ˈna e ore e au e ia faatupu i te mau huru maitatai e mauruuru ai oia. Eiaha ïa e haaparuparu e a tamau noa i te tavini ia Iehova. Fatata roa te ao apî, e tamau anaˈe ïa i te tiai maite ia Iehova a rave faahope ai oia i ta ˈna ohipa!