1. Ia au i te Tesalonia 1, 5:11, eaha te ohipa paturaa te titauhia ia tatou ia rave?

 UA APITI aˈena paha outou i te paturaa o te hoê Piha a te Basileia e te haamanaˈo ra outou i te putuputuraa matamua. Ua oaoa e ua mauruuru roa outou ia Iehova. Ua taˈi atoa paha outou a faaroo ai i te himene omuaraa. Papu, te faahanahana ra teie Piha a te Basileia apî ia Iehova. Te vai ra râ te tahi atu ohipa paturaa faufaa aˈe i te paturaa o te hoê Piha a te Basileia: Te faaitoitoraa i te feia e haere mai ra i ta tatou mau vahi haamoriraa. Ua faahiti Paulo i te reira a papai ai i te mau parau o te Tesalonia 1, 5:11.​—A taio.

2. Eaha ta tatou e hiˈopoa i roto i teie tumu parau haapiiraa?

² E hiˈoraa maitai Paulo no te faaitoito e no te faaite i te aumauiui i te mau taeae e tuahine. I roto i teie tumu parau haapiiraa, e hiˈopoa tatou mea nafea to ˈna tautururaa i te mau taeae e tuahine: (1) ia faaoromai tamau i te fifi, (2) ia faatupu i te hau e (3) ia haapuai i to ratou faaroo. E hiˈo atoa tatou e nafea ia pee i to ˈna hiˈoraa e ia faaitoito i to tatou mau taeae e tuahine.​—Kor. 1, 11:1.

3. Eaha te feruriraa aifaito ta Paulo i faaite?

³ Mea here roa na Paulo i to ˈna mau taeae. Ua nehenehe o ˈna e faaite i te aumihi i te mau taeae e tuahine tei faaruru i te fifi, no te mea ua faaruru atoa o ˈna e rave rahi fifi. I te hoê taime, ua ere o ˈna i te moni. Ua rave ïa  o ˈna i te ohipa hamaniraa fare ie no te ora e no te tauturu i to ˈna mau taeae. (Ohi. 20:34) I Korinetia, ua ohipa o ˈna e o Akuila raua Perisila e “i te mau Sabati atoa,” e poro o ˈna i te mau ati Iuda e te mau Heleni. I to Sila e Timoteo taeraa ˈtu i ǒ, ua haamata Paulo i “te poro i te poroi a te Atua ma te itoito rahi.” (Ohi. 18:2-5) O te taviniraa ia Iehova te mea faufaa roa ˈˈe no Paulo. Ua faaite o ˈna i te hoê feruriraa aifaito i nia i ta ˈna taviniraa e ta ˈna ohipa. Ua faaitoito mau o ˈna i to ˈna mau taeae e tuahine ia vaiiho i te mau haapeapearaa o te oraraa i to ratou vairaa. Ua haamanaˈo o ˈna ia ratou e o te haamoriraa ia Iehova “te mea faufaa roa ˈˈe.”​—Phil. 1:10.

4. Mea nafea to Paulo raua Timoteo tautururaa i te mau taeae e tuahine tei hamani-ino-hia?

⁴ I muri aˈe i te haamauraahia te amuiraa i Tesalonia, ua faaruru te mau Kerisetiano i te patoiraa uˈana. I te hoê taime, aita te feia patoi i ite teihea roa Paulo e o Sila, ua afai ïa ratou i “te tahi mau taeae i te mau tavana o te oire,” a tuô noa ˈi: “Te patoi nei teie mau taata i te mau faaueraa mana a Kaisara.” (Ohi. 17:6, 7) Eaha te huru o teie mau Kerisetiano apî i mua i tera fifi? Ua iti mai paha to ratou itoito no te tavini ia Iehova. Aita Paulo i hinaaro ia tupu te reira. Noa ˈtu ua titauhia ia raua Sila ia faarue i te oire, ua haapao na mua o ˈna i te maitai o teie amuiraa apî. Ua parau o ˈna ia ratou e tono o ˈna ia Timoteo “no te haapuai e tamahanahana ia [ratou] no te maitai o to [ratou] faaroo, ia ore te tahi ia aueue i taua mau ati ra.” (Tes. 1, 3:2, 3) I Lusetera, ua faaruru Timoteo i te hamani-ino-raa. Ua ite o ˈna mea nafea to Paulo tautururaa i te mau taeae i ǒ. A ite ai eaha ta Iehova i rave no ratou, ua nehenehe ïa o ˈna e haapapu i to Tesalonia e e tauturu iho â Iehova ia ratou.​—Ohi. 14:8, 19-22; Heb. 12:2.

5. Mea nafea Bryant i te faufaaraahia i te tauturu a te hoê matahiapo?

⁵ Na roto i teihea ˈtu ravea i faaitoito ai Paulo i to ˈna mau taeae e tuahine? I to raua haereraa i Lusetera, Ikonio e Anetiohia, ua faatoroa Paulo raua Baranaba “i te matahiapo i roto i te mau amuiraa atoa.” (Ohi. 14:21-23) Ua riro mau teie mau matahiapo ei tauturu no te mau amuiraa. Tera atoa ta tatou e ite ra i teie mahana. Teie ta te taeae Bryant i parau: “I te 15raa o to ˈu matahiti, ua faarue to ˈu papa ia matou e ua tiavaruhia to ˈu mama. Ua moˈemoˈe e ua toaruaru roa vau.” Eaha râ tei tauturu ia Bryant? Te na ô ra o ˈna: “Ua tâuˈa mau Tony, te hoê matahiapo, ia ˈu i te mau putuputuraa e i te tahi atu mau taime. Ua parau mai o ˈna e te faaruru atoa ra vetahi mau Kerisetiano i te fifi. Aita râ ratou i ere i to ratou oaoa. Ua faaite mai o ˈna i te Salamo 27:10 e pinepine atoa o ˈna i te faahiti i te hiˈoraa o Hezekia tei tavini ia Iehova ma te taiva ore noa ˈtu e ere to ˈna metua tane i te hiˈoraa maitai.” Te parau faahou ra o ˈna: “Maoti te faaitoitoraa a Tony, ua rave au i te taviniraa taime taatoa.” E te mau matahiapo, a imi i te mau taeae e tuahine o ta outou amuiraa, o te hinaaro ra “i te hoê parau maitai” faaitoito mau.​—Mas. 12:25.

6. Mea nafea Paulo i te faaohiparaa i te hiˈoraa o te mau tavini i tahito ra no te faaitoito i to ˈna mau taeae e tuahine?

⁶ Ua haamanaˈo Paulo i to ˈna mau taeae e tuahine e maoti noa te tauturu a  Iehova i nehenehe ai te “nahoa rahi ite” e faaoromai tamau e rave rahi fifi. (Heb. 12:1) Ua taa ia Paulo e nehenehe te hiˈoraa o te mau tavini i tahito ra e faaitoito i to ˈna mau taeae e tuahine ia tiatonu noa i nia i “te oire o te Atua ora.” (Heb. 12:22) Hoê â huru no tatou. Aita anei tatou i itoitohia a taio ai i ta Iehova i rave no Gideona, Baraka, Davida, Samuela e no te tahi atu mau tavini taiva ore? (Heb. 11:32-35) E nafea te hiˈoraa o to tatou mau taeae e tuahine e tauturu mai ai? Pinepine te mau taeae e tuahine i te hapono i te mau rata i te pu rahi no te faaite e ua itoitohia ratou maoti te mau faatiaraa a te mau taeae e tuahine na te ao nei.

7. Eaha te haapii mai i te aˈoraa a Paulo i roto i te Roma 14:19-21?

⁷ E nehenehe to tatou mau taeae e itoitohia a ite ai e te rave ra tatou i te mau mea atoa ia vai noa te hau i roto i te amuiraa. Papu, e ere hoê â huru feruriraa to tatou, eita râ tatou e vaiiho i te reira ia faaamahamaha i te amuiraa. I roto i te hoê tupuraa, mai te peu aita e faaueraa tumu Bibilia tei ofatihia, eita tatou e turai ia vetahi ê ia turu i to tatou manaˈo. Ei hiˈoraa, i roto i te amuiraa i Roma, te vai ra te mau Kerisetiano ati Iuda e no te nunaa ěê. Ua faaorehia te ture a Mose, aita ïa i titauhia i te mau Kerisetiano ia faatura i te mau opaniraa no nia i te maa. (Mar. 7:19) Tera râ, aita vetahi i farii e amahamaha ˈtura te amuiraa. Ua faaite Paulo i te faufaaraa ia vai noa te hau a papai ai: “Mea maitai aˈe eiaha e amu i te inaˈi aore ra e inu i te uaina aore ra e rave i te tahi atu ohipa e turori ai to taeae.” (A taio i te Roma 14:19-21.) Ua tauturu Paulo i to ˈna mau taeae e tuahine ia ite i te mau faahopearaa ino ta te mau tatamaˈiraa e faatupu i nia i te hoê mero aore ra te taatoaraa o te amuiraa. Ua ineine atoa o ˈna i te rave i te mau tauiraa no te ore e faaturori ia vetahi ê. (Kor. 1, 9:19-22) Aita anaˈe tatou e onoono i nia i ta tatou e hinaaro ra, tapao faaite ïa e te hinaaro ra tatou e faaitoito ia vetahi ê e e rave i te mau mea atoa ia vai noa te hau i roto i te amuiraa.

8. Eaha ta Paulo i rave no te faaafaro i te hoê tupuraa tei haafifi i te hau i roto i te amuiraa?

⁸ Mea taa ê anaˈe te manaˈo o tera e tera taata, e ere i te mea ohie ia vai noa te hau. Ei hiˈoraa, i te senekele matamua, ua hinaaro te mau ati Iuda ia peritomehia te mau Kerisetiano no te nunaa ěê, no te mea aita ratou i hinaaro ia faainohia ratou. (Gal. 6:12) Papu, aita Paulo i mauruuru i tera huru raveraa, aita râ o ˈna i onoono ia farii ratou i to ˈna manaˈo. Ma te haehaa, ua ani o ˈna i te aratairaa a te mau aposetolo e te mau matahiapo i Ierusalema. (Ohi. 15:1, 2) Ua tauturu to ˈna hiˈoraa i te mau Kerisetiano ia oaoa e ia vai hau noa.​—Ohi. 15:30, 31.

9. E nafea tatou e pee ai i te hiˈoraa o Paulo?

⁹ E titauhia ia tatou ia faatupu i te hau ia tupu te hoê peapea. E nehenehe tatou e ani i te aˈoraa i te mau matahiapo. E ite atoa tatou i te mau aratairaa Bibilia i roto i ta tatou mau papai. Ia pee tatou i te reira, ma te ore e onoono i nia i to tatou iho manaˈo, te haa ra ïa tatou ia vai noa te hau i roto i te amuiraa.

10. Mea nafea Paulo i te faatupuraa i te hau i roto i te amuiraa?

¹⁰ Ua faatupu Paulo i te hau ma te tiatonu  noa i nia i te mau huru maitatai o to ˈna mau taeae e tuahine. Ei puohuraa i ta ˈna rata i te amuiraa no Roma, ua faahiti o ˈna i te iˈoa o te tahi mau taeae e tuahine e te ohipa maitai ta ratou i rave. Mai ia Paulo, e nehenehe tatou e faahiti i te mau huru maitatai o to tatou mau taeae e tuahine. Ma te na reira, e piri atu â tatou ia ratou e e puai atu â te here i roto i te amuiraa.

11. E nafea tatou e faatupu ai i te hau ia tupu te hoê peapea?

¹¹ E nehenehe te hoê peapea e tupu i rotopu e piti Kerisetiano, noa ˈtu mea paari raua i te pae varua. Tera tei tupu no Paulo raua Baranaba. Aita raua i afaro i mua i te faaotiraa e rave anei ia Mareko na muri ia raua aore ra aita. Ei faahopearaa, “riri roa ˈtura te tahi i te tahi” e taa ê atura raua. (Ohi. 15:37-39) I muri iho râ, ua faatupu Paulo, Baranaba e o Mareko i te hau. Ua faaite ïa ratou e mea faufaa ia vai noa te hau e te auhoêraa i roto i te amuiraa. I muri aˈe, ua faahiti Paulo i te parau maitai no nia ia Baranaba e ia Mareko. (Kor. 1, 9:6; Kol. 4:10) Hoê â huru no tatou. E mea tia ia faatupu i te hau e to tatou mau taeae e tuahine, ma te tutava i te tiatonu i nia i to ratou mau huru maitatai. A na reira ˈi, te haa ra tatou ia vai noa te hau e te auhoêraa i roto i te amuiraa.​—Eph. 4:3.

12. Eaha te tahi mau fifi ta te mau taeae e tuahine e faaruru ra?

¹² E itoitohia te mau taeae e tuahine ia tauturu tatou ia ratou ia haapuai i to ratou faaroo. Te faaruru ra vetahi i te faaoooraa a te fetii, hoa ohipa aore ra hoa haapiiraa. Te hepohepo ra te tahi atu no te maˈi aore ra te tahi atu tumu. No vetahi atu, ua bapetizo-aˈena-hia ratou e mea maoro ratou i te tiai-noa-raa i te hopea o teie ao. E nehenehe te faaroo o teie mau taeae e tuahine e tamatahia. Tera ta te mau Kerisetiano i te senekele matamua i faaruru. Eaha ta Paulo i rave no te faaitoito ia ratou?

13. Mea nafea Paulo i te tautururaa i te mau taeae e tuahine tei faaruru i te faaoooraa?

¹³ Maoti te mau Papai, ua haapuai Paulo i te faaroo o to ˈna mau taeae e tuahine. Ei hiˈoraa, aita paha te mau Kerisetiano ati Iuda i ite eaha te parau ia faaino te mau fetii i ta ratou mau tiaturiraa. Ua itoitohia râ ratou a taio ai i te rata ta Paulo i papai i to Hebera. (Heb. 1:5, 6; 2:2, 3; 9:24, 25) Maoti te reira, ua ite ratou eaha te pahono i te feia patoi. E nehenehe atoa tatou e faaohipa i ta tatou mau papai no te paturu i ta tatou mau tiaturiraa. I te fare haapiiraa, e faaooohia paha to tatou feia apî no te mea te tiaturi ra ratou i te hoê Atua poiete. E nehenehe tatou e tauturu ia ratou ma te faaohipa i te buka rairai Mea poietehia anei? (Farani) aore ra E pae uiraa no nia i te tumu o te ora (Farani). Maoti teie mau papai, e nehenehe ratou e faataa i ta ratou e tiaturi ra.

14. Eaha ta Paulo i rave noa ˈtu te rahi o ta ˈna mau hopoia?

¹⁴ Ua faaitoito Paulo i to ˈna mau taeae e tuahine ia faaite i te here ma te rave “i te ohipa maitai roa.” (Heb. 10:24) Ua tauturu o ˈna ia ratou na roto i ta ˈna mau parau e ohipa. I Iudea, a faaruru ai te mau Kerisetiano i te oˈe, ua hapono Paulo i te mea ta ratou e hinaaro mau. (Ohi.  11:27-30) Noa ˈtu ua haa rahi Paulo i roto i te ohipa pororaa e haapiiraa i te taata, ua imi o ˈna i te mau ravea no te tauturu i te mau taeae tei roohia i te ati. (Gal. 2:10) Ua faaitoito mau o ˈna i te mau taeae e tuahine ia tiaturi e e aupuru iho â Iehova ia ratou. I teie mahana, ia horoa tatou i to tatou taime, puai, e aravihi no te tauturu i te mau taeae e tuahine tei roohia i te ati, e puai atu â to ratou faaroo. E nehenehe atoa tatou e tauturu ia ratou na roto i ta tatou mau ô. A na reira ˈi, te tauturu ra tatou i te mau taeae e tuahine ia tiaturi e eita roa ˈtu Iehova e faarue ia ratou.

15-16. Eaha to tatou huru i nia i te mau taeae e tuahine tei paruparu i te pae varua?

¹⁵ Ua tamau Paulo i te tauturu i te mau taeae e tuahine tei paruparu i te pae varua. Ua faaite o ˈna i te aumihi ia ratou na roto i ta ˈna mau ohipa e ta ˈna huru paraparau. (Heb. 6:9; 10:39) Ei hiˈoraa, i roto i ta ˈna rata i to Hebera, pinepine o ˈna i te faahiti i te taˈo “tatou” no te faaite e e titau-atoa-hia ia ˈna ia faaohipa i teie mau aˈoraa. (Heb. 2:1, 3) Mai ia Paulo, eita tatou e faarue i te mau taeae e tuahine tei paruparu i te pae varua, e tamau râ tatou i te tauturu ia ratou ma te faaitoito atu. Ma te na reira, te faaite ra tatou i to tatou here ia ratou. E nehenehe tatou e faahiti i te mau parau mahanahana, eita râ e navai, mea faufaa atoa ia paraparau tatou ia ratou ma te mǎrû.

¹⁶ Ua haapapu Paulo i to ˈna mau taeae e tuahine e ua ite Iehova i te mau ohipa maitatai ta ratou i rave. (Heb. 10:32-34) Tera atoa ta tatou e rave no te tauturu i te hoê taeae aore ra tuahine tei paruparu i te pae varua. E nehenehe tatou e ani ia  ˈna ia faatia mai e mea nafea o ˈna i te iteraa i te parau mau. E nehenehe atoa tatou e faaitoito ia ˈna ia haamanaˈo e mea nafea Iehova i te tautururaa ia ˈna. E haapapu ïa tatou i teie taeae aore ra tuahine e aita i moˈehia ia Iehova te mau ohipa maitatai ta ˈna i rave na mua ˈˈe e eita roa ˈtu Iehova e faarue ia ˈna. (Heb. 6:10; 13:5, 6) E faaitoito te reira ia ratou ia tamau i te tavini ia Iehova.

17. I roto i teihea tuhaa e titauhia ia tatou ia aravihi atu â?

¹⁷ A mairi ai te tau, e aravihi atu â te hoê tamuta i roto i te ohipa paturaa. Hoê â atoa no tatou, e aravihi atu â tatou i te faaitoito ia tamau tatou i te faaitoito te tahi i te tahi. E nehenehe tatou e tauturu ia vetahi ê ia faaoromai tamau i te mau fifi ma te haamanaˈo atu i te mau hiˈoraa i tahito ra. E nehenehe atoa tatou e haa ia vai noa te hau i roto i te amuiraa, ma te faahiti i te mau huru maitatai o vetahi ê e ma te faatupu i te hau. E tamau tatou i te haapuai i te faaroo o to tatou mau taeae e tuahine ma te faaohipa i te mau irava Bibilia, ma te horoa i te rima tauturu e ma te faaitoito i te mau Kerisetiano tei paruparu i te pae varua.

18. Eaha ta tatou e faaoti papu i te rave?

¹⁸ E oaoa te feia atoa e apiti ra i te ohipa paturaa a te faanahonahoraa. E oaoa e e mauruuru atoa tatou a patu ai i te faaroo o to tatou mau taeae e tuahine. Taa ê atu i te paturaa o te hoê piha o te nehenehe e pe aore ra e parari, eita ta tatou ohipa e mou. E vai noa te reira e a muri noa ˈtu. E tamau anaˈe ïa “i te faaitoito e i te tauturu te tahi i te tahi.”​—Tes. 1, 5:11.