1. Eaha ta Iehova e nehenehe e rave no te faatupu i ta ˈna opuaraa?

 E NEHENEHE Iehova e rave mai i te tiaraa e titauhia no te faatupu i ta ˈna opuaraa. Ua riro Iehova ei Orometua haapii, ei Metua tamahanahana, ei Poro evanelia e te vai ra ˈtu â. (Isa. 48:17; Kor. 2, 7:6; Gal. 3:8) Pinepine atoa râ Iehova i te faaohipa i te taata no te faatupu i ta ˈna mau opuaraa. (Mat. 24:14; 28:19, 20; Kor. 2, 1:3, 4) E nehenehe Iehova e horoa mai i te paari e te puai e titauhia no te faatupu i to ˈna hinaaro. Te tuati maitai ra te reira i ta te mau aivanaa faataaraa no nia i te auraa o te iˈoa o Iehova.

2. (a) I te tahi taime, no te aha tatou e manaˈo ai aita Iehova e faaohipa ra ia tatou? (b) Eaha ta tatou e hiˈopoa mai?

² Te manaˈo nei vetahi aita Iehova e faaohipa ra ia ratou. No te aha? No to ratou paha matahiti rahi, tupuraa aore ra no te mea e ere ratou i te mea aravihi roa. Area te tahi atu, te manaˈo ra ïa aita e faufaa ia tautoo no te tavini atu â ia Iehova. I roto i teie tumu parau haapiiraa, e ite mai tatou e nafea Iehova ia faaineine ia tatou no te faatupu i ta ˈna opuaraa. I muri mai, e hiˈopoa tatou i te tahi mau aamu Bibilia o te faaite ra ua tuu Iehova i te hinaaro e te puai i roto i ta ˈna mau tavini tane e vahine no te rave i te mau mea atoa ta ˈna e au. Ia oti, e haapii tatou e nafea ia vaiiho ia Iehova ia faaohipa ia tatou.

3. Ia au i te Philipi 2:13, e nafea Iehova ia tuu i roto ia tatou te hinaaro no te rave i ta ˈna e au?

³ A taio i te Philipi 2:13. * E nehenehe Iehova e tuu i roto ia tatou te hinaaro no te rave i ta ˈna e au. E nafea? Peneiaˈe, e faaitehia te vai ra te hoê hinaaro taa ê i roto i te amuiraa. Aore ra, e taio mai paha te mau matahiapo i te hoê rata a te amaa o te faaara mai ra te hinaarohia ra te tauturu i te tahi atu vahi. Feruri atura tatou, ‘E nafea vau ia horoa i te tauturu?’ Aita anaˈe, ua anihia mai paha ia farii i te hoê hopoia rahi e te manaˈo ra tatou eita e maraa ia tatou. Peneiaˈe atoa, i muri mai i ta tatou taioraa Bibilia, e uiui paha tatou ‘E nafea vau ia faaohipa i teie irava no te tauturu ia vetahi ê?’ Eita Iehova e faahepo ia tatou ia rave i te hoê ohipa. Ia ite râ Iehova e te hiˈopoa ra tatou ia tatou iho, e nehenehe oia e tuu i te hinaaro i roto ia tatou no te rave i te ohipa.

4. E nafea Iehova e tuu ai i roto ia tatou te puai no te rave i to ˈna hinaaro?

⁴ E nehenehe atoa Iehova e tuu i roto ia tatou te puai no te rave i ta ˈna e au. (Isa. 40:29) Maoti to ˈna varua moˈa, e tia atoa ia Iehova ia faaaravihi atu â ia tatou. (Exo. 35:30-35) Na roto i ta ˈna faanahonahoraa, e haapii mai paha Iehova e nafea ia rave i tera e tera ohipa. No reira, eiaha e taiâ i te ani i te tauturu no te amo maite i te hoê hopoia. A taparu atoa i to tatou Metua i te raˈi ia horoa ˈtu i “te puai o te hau ê i to te taata nei.” (Kor. 2, 4:7; Luka 11:13) Mea rahi te aamu Bibilia no nia i te mau tane e vahine o te faaite ra mea nafea Iehova i te horoaraa i te hinaaro e te puai no te rave i ta ˈna e au. A hiˈopoa ˈi i te reira, a feruri e nafea atoa Iehova ia faaohipa ia outou i roto i tera e tera tupuraa.

5. Afea Iehova i te faaohiparaa ia Mose no te faaora i to ˈna nunaa e eaha te haapiiraa e huti mai?

⁵ Ua faaohipa Iehova ia Mose no te faaora i te nunaa Iseraela. I teihea râ taime o Iehova i te faaohiparaa ia ˈna? I muri aˈe anei i te haapiiraahia Mose i “te mau parau paari atoa a to Aiphiti”? (Ohi. 7:22-25) Aita, i muri aˈe râ i to ˈna riroraa mai ei taata haehaa e te mǎrû. (Ohi. 7:30, 34-36) Ua horoa Iehova ia Mose te itoito no te tia ˈtu i mua i te faatere rahi o Aiphiti! (Exo. 9:13-19) Eaha te haapiiraa? E faaohipa Iehova i te feia o te faaite ra i to ˈna mau huru maitatai e o te tiaturi ia ˈNa.—Phil. 4:13.

6. Eaha te haapiiraa e huti mai i to Iehova faaohiparaa ia Barazilai?

⁶ E rave rahi matahiti i muri aˈe, ua faaohipa Iehova ia Barazilai no te tauturu i te arii Davida. A horo ê ai i ta ˈna tamaiti ra o Abasaloma, ua pohe Davida e to ˈna mau taata i “te poia, e te rohirohi, e te poihâ.” I tera taime, noa ˈtu e nehenehe oia e haapohehia, ua apiti atu Barazilai i te tahi atu no te horoa i te maa na Davida ma. Aita Barazilai i feruri, ‘E matahiti rahi to ˈu, eita Iehova e faaohipa faahou ia ˈu!’ Aita, ua horoa noa râ oia i te mea e vai ra ia ˈna no te tauturu i te tavini o te Atua. (Sam. 2, 17:27-29) Eaha te haapiiraa? Noa ˈtu eaha to tatou faito matahiti, e nehenehe Iehova e faaohipa ia tatou no te tauturu i te mau taeae e tuahine, i to tatou anei fenua aore ra i te ara. (Mas.  3:27, 28; 19:17) Eita paha tatou e tae tino roa ˈtu, e nehenehe râ tatou e horoa i te ô o te faaohipahia no te tauturu i te mau hoa Kerisetiano.—Kor. 2, 8:14, 15; 9:11.

7. Mea nafea Iehova i te faaohiparaa ia Simeona e eaha te faaitoitoraa no tatou?

⁷ Ua fafau Iehova ia Simeona, te hoê taata ruhiruhia no Ierusalema, eita oia e pohe hou to ˈna mata a ite ai i te Mesia. Ua faaitoito mau tera mau parau ia Simeona ia tiai i te Mesia e rave rahi matahiti. Ua haamaitai Iehova i to ˈna faaroo e to ˈna faaoromai tamau. I te hoê mahana, “arataihia e te varua o te Atua,” ua haere Simeona i roto i te hiero. I reira, ite atura oia ia Iesu e faaohipa aˈera Iehova ia ˈna no te faaite i te hoê parau tohu no nia i teie aiû o te riro mai ei Mesia. (Luka 2:25-35) E au ra e ua pohe Simeona na mua ˈˈe Iesu a haamata ˈi ta ˈna taviniraa i nia i te fenua, ua mauruuru roa râ oia i te haamaitairaa taa ê i horoahia ia ˈna. I roto i te ao apî, e ite atu â oia e nafea te faatereraa a Iesu e haamaitai ai i te mau utuafare atoa o te fenua nei. (Gen. 12:3) No reira, e mauruuru anaˈe i te mau fanaˈoraa atoa ta Iehova e horoa mai i roto i te taviniraa.

8. E nafea Iehova ia faaohipa ia tatou mai ta ˈna i rave i nia ia Baranaba?

⁸ I te senekele matamua, ua vaiiho te hoê taata aau horoa noa o Iosepha te iˈoa ia faaohipa Iehova ia ˈna. (Ohi. 4:36, 37) No to ˈna aravihi i te tamahanahana ia vetahi ê, topa roa ˈtura te mau aposetolo ia ˈna i te iˈoa Baranaba, “Tamaiti o te tamahanahanaraa” te auraa. I te riroraa mai Saulo ei Kerisetiano, e rave rahi taeae tei taiâ i te faahoa ia ˈna, i hamani ino na hoi Saulo i te mau amuiraa. Area Baranaba, ua farii maitai ïa ia Saulo e tauturu atura ia ˈna. Papu, ua mauruuru roa Saulo i te hamani maitai o Baranaba! (Ohi. 9:21, 26-28) I muri aˈe, ua hinaaro te mau matahiapo i Ierusalema e hopoi i te poroi faaitoito i te mau taeae i Anetiohia no Suria. O vai ta ratou i maiti no tera hopoia? O Baranaba! E ua tano roa ratou i te na reiraraa, te faatiahia ra hoi, faaitoito atura Baranaba “ia ratou pauroa ia tapea noa i to ratou taiva ore i te Fatu ma te aau aueue ore.” (Ohi. 11:22-24) I teie mahana, e nehenehe atoa Iehova e tauturu ia tatou ia riro ei “Tamaiti o te tamahanahanaraa.” E faaohipa paha oia ia tatou no te tamahanahana i te mau taeae e tuahine tei maˈihia, tei hepohepo aore ra te oto nei i tei herehia. Peneiaˈe ma te farerei roa ˈtu ia ratou aore ra ma te niuniu atu. E vaiiho anei outou ia Iehova ia faaohipa ia outou mai ta ˈna i rave i nia ia Baranaba?—Tes. 1, 5:14.

9. Eaha te haapiiraa e huti mai i ta Iehova raveraa no te tauturu ia Vasily?

⁹ Ua tauturu atoa Iehova i te taeae Vasily ia riro ei tiai mamoe maitai no te amuiraa. E 26 matahiti to Vasily i te riroraa mai oia ei matahiapo. I manaˈo na oia eita e maraa ia ˈna ia tauturu i te amuiraa, i te mau taeae e tuahine iho â râ o te faaruru ra i te fifi. Ua faaineine râ te mau matahiapo paari ia ˈna e ua apiti atoa ˈtu oia i te Haapiiraa no te mau taeae faatoroahia. Ua tutava rahi Vasily i te riro ei tiai mamoe maitai. Ua tapaopao oia i te mau fa rii ta ˈna e titau ra e a naea hoê hoê noa ˈi ta ˈna mau fa, ua ore roa to ˈna taiâ. Te parau ra oia: “Ua riro te mau tumu i taiâ ˈi au ei oaoaraa na ˈu i teie nei! E mauruuru roa vau ia tauturu mai Iehova ia ˈu ia maiti i te irava tano maitai no te tamahanahana i te hoê taeae aore  ra tuahine.” E te mau taeae, ia farii outou mai ia Vasily ia faaohipa Iehova ia outou, e tauturu atu oia ia amo i te hopoia rahi atu â!

10. Eaha ta Abigaila i rave e eaha te haapiiraa e huti mai?

¹⁰ I te horo-ê-raa Davida e to ˈna mau taata i te arii Saula, ua hinaaro ratou i te tauturu. Ua ani to Davida mau taata i te hoê Iseraela o Nabala te iˈoa ia horoa ˈtu i te tahi maa na ratou. Ua ani ratou ia ˈna no te mea i paruru na ratou i ta Nabala nǎnǎ mamoe i roto i te medebara. Aita râ Nabala i farii i te tauturu ia ratou. Riri ihora Davida e opua ˈtura e taparahi pohe ia Nabala e te mau tane atoa o to ˈna fetii. (Sam. 1, 25:3-13, 22) E vahine î i te paari râ e te nehenehe mau ta Nabala, o Abigaila to ˈna iˈoa. Ma te itoito, tipapa aˈera Abigaila i te pae avae o Davida no te taparu atu ia ore e haamanii i te toto. Ua tamiti maitai oia i ta ˈna mau parau ia vaiiho Davida i te reira i roto i te rima o Iehova. Ua putapû roa te aau o Davida i te haehaa e te paari o teie vahine e taa aˈera ia ˈna na Iehova i faaohipa ia Abigaila. (Sam. 1, 25:23-28, 32-34) Ua faatupu Abigaila i te mau huru maitatai i faaohipa ˈi Iehova ia ˈna. Ia faahiti te mau tuahine i te mau parau hamani maitai a faaite atoa ˈi i te paari, e nehenehe Iehova e faaohipa ia ratou no te haapuai i te faaroo o to ratou utuafare e to te amuiraa.—Mas. 24:3; Tito 2:3-5.

11. Eaha ta te mau tamahine a Saluma i rave e o vai te pee nei i to ratou hiˈoraa?

¹¹ E rave rahi matahiti i muri aˈe, ua faaohipa Iehova i te mau tamahine a Saluma no te tataî i te mau patu o Ierusalema. (Neh. 2:20; 3:12) Noa ˈtu e tavana to ratou metua tane e noa ˈtu te patoiraa a te mau enemi, ua farii teie mau tamahine i tera hopoia rahi. (Neh. 4:15-18) Mea taa ê roa ïa ratou i te mau tane o te oire no Tekoa, aita hoi “to ratou feia rarahi i rave atoa i te ohipa.” (Neh. 3:5) A feruri na i te oaoa o te mau tamahine a Saluma i te otiraa te ohipa i roto noa 52 mahana! (Neh. 6:15) I teie atoa tau, te oaoa nei te mau tuahine aau tae i te apiti atu i te hoê taviniraa taa ê, oia hoi te paturaa e te atuaturaa o te mau piha pûpûhia na Iehova. Mea faufaa roa to ratou aravihi, itoito e taiva ore i roto i tera taviniraa taa ê!

12. E nafea Iehova ia faaohipa ia tatou mai ta ˈna i rave i nia ia Tabita?

¹² Ua tauturu Iehova ia Tabita ia hamani maitai ia vetahi ê. Te faatiahia ra “mea rahi roa ta ˈna ohipa maitatai e mea horoa roa oia i te ô aroha hamani maitai,” i te mau vahine ivi iho â râ. (Ohi. 9:36) No to Tabita aau horoa noa e hamani maitai, e rave rahi tei oto ia ˈna i to ˈna poheraa. Ua oaoa roa râ ratou i to te aposetolo Petero faatiaraa mai ia ˈna! (Ohi. 9:39-41) Eaha te haapiiraa e huti mai? E Kerisetiano apî aore ra ruhiruhia tatou, tane aore ra vahine, e nehenehe tatou paatoa e rave i te ohipa maitatai no te tauturu i to tatou mau taeae e tuahine.—Heb. 13:16.

13. Mea nafea Iehova i te faaohiparaa i te hoê tuahine mamahu e eaha ta teie tuahine i parau?

¹³ Ua tauturu Iehova i te hoê tuahine mamahu o Ruth te iˈoa ia riro ei mitionare. I te tamariiraa, haaviti noa Ruth i te opere i te api parau i tera e tera fare. Te na ô ra oia: “Mea au roa na ˈu tera ohipa.” No te paraparau râ i te taata i te pae  opani e no te faaite i te Faatereraa arii, e ere roa ˈtu i te mea ohie no ˈna. Noa ˈtu râ, ua riro mai Ruth ei pionie tamau i te 18raa o to ˈna matahiti. I 1946, ua apiti atu oia i te Haapiiraa Bibilia no Gileada e tonohia ˈtura i Vaihi e i Tapone. Ua faaohipa maitai Iehova ia ˈna no te poro i te parau apî oaoa i tera mau fenua. I muri aˈe 80 matahiti te maoro i roto i te taviniraa, teie ta Ruth i parau: “Ua tamau Iehova i te tauturu ia ˈu. Maoti o ˈna, ua faaea vau i te haama hanoa. Ua papu ia ˈu e nehenehe o ˈna e faaohipa i te feia atoa o te tiaturi ia ˈna.”

14. Ia au i te Kolosa 1:29, eaha te titauhia ia rave ia faaohipa Iehova ia tatou?

¹⁴ Mai tahito mai â, ua faaohipa Iehova i ta ˈna mau tavini no te faatupu i to ˈna hinaaro. E nafea Iehova ia faaohipa ia outou? Tei te huru ïa o ta outou tautooraa. (A taio i te Kolosa 1:29.) Ia vaiiho outou ia Iehova ia faaohipa ia outou, na ˈna e faariro ia outou ei taata poro itoito, ei Kerisetiano aravihi i te haapii ia vetahi ê, ei taata tamahanahana, ei rave ohipa aravihi e ei hoa papu. E tia ia ˈna ia faariro ia outou i te titauhia ia riro no te faatupu i to ˈna hinaaro!

15. Ia au i te Timoteo 1, 4:12, 15, eaha te titauhia i te mau taeae apî ia taparu ia Iehova?

¹⁵ E te mau taeae apî, te hinaaro-rahi-hia ra te mau tane itoito no te riro ei tavini tauturu. E rave rahi amuiraa, mea rahi aˈe te matahiapo i te tavini tauturu. Eita anei vetahi o outou e hinaaro e tavini atu â i roto i te amuiraa? I te tahi taime, e pahono vetahi: “Navai noa ia poro tamau!” Mai te peu tera atoa to outou manaˈo, a taparu ia Iehova ia tauturu ia outou ia faatupu i te hinaaro ia riro ei tavini tauturu, oia atoa ia horoa ˈtu i te puai no te tavini atu â ia ˈna. (Koh. 12:1) Te hinaaro nei matou i ta outou tauturu!—A taio i te Timoteo 1, 4:12, 15.

16. Eaha te titauhia ia ani ia Iehova e no te aha?

¹⁶ E nehenehe Iehova e faariro ia tatou i te titauhia ia riro no te faatupu i to ˈna hinaaro. No reira, a ani ia ˈna ia tuu atu i roto ia outou te hinaaro e te puai ia rave i te ohipa. E Kerisetiano apî aore ra ruhiruhia outou, a faaohipa i to outou taime, puai e ta outou mau faufaa no te faahanahana ia Iehova i teie nei â. (Koh. 9:10) Eiaha e vaiiho i te mǎtaˈu aore ra i te taiâ ia tapea ia outou ia farii i te mau haamaitairaa i roto i te taviniraa. Noa ˈtu e tuhaa iti ta tatou, e fanaˈoraa taa ê mau ia rave i te ohipa o te faahanahana i to tatou Metua î i te here!