1. No te aha e titauhia ia pûpû i te hoê taviniraa moˈa ia Iehova anaˈe?

 MEA titauhia ia pûpû i te hoê taviniraa moˈa ia Iehova anaˈe no te mea o ˈna to tatou Atua poiete e te Tumu o te ora. (Apo. 4:11) Noa ˈtu te here e te faatura ra tatou ia Iehova, e nehenehe te tahi mau mea o to tatou oraraa e haafifi mai ia horoa i te haamoriraa e au ia Iehova anaˈe. E hiˈopoa mai tatou i te reira i roto i teie tumu parau haapiiraa. Na mua râ, e hiˈo mai tatou eaha te auraa ia pûpû i te hoê taviniraa moˈa ia Iehova anaˈe.

2. Ia au i te Mataio 4:10, eaha te titauhia ia rave no te pûpû i te hoê taviniraa moˈa ia Iehova anaˈe?

² Ia au i te Bibilia, e faaite te hoê taata i to ˈna here mau i te Atua ma te haamori ia ˈna anaˈe. Ia hinaaro tatou e pûpû i te hoê taviniraa moˈa ia Iehova, o ˈna anaˈe ïa ta tatou e haamori. Eita tatou e vaiiho i te hoê noa ˈˈe ohipa aore ra taata ia rave i te parahiraa matamua i roto i to tatou aau.—A taio i te Mataio 4:10.

3. No te aha tatou e here ai ia Iehova?

³ Aita to tatou here ia Iehova i tupu noa mai mai tera. Ua haapii na mua hoi tatou i te parau mau no nia ia ˈna. Ua haamata i te faahiahia i to ˈna mau huru maitatai. Ua ite i te mau mea ta ˈna e au ra e ta ˈna e au ore ra e farii atura tatou i te manaˈo mai ia ˈna. Ua haapii tatou eaha ta ˈna opuaraa no te huitaata e te turu ra tatou i te reira. Ua mauruuru roa tatou e ua farii mai oia ia riro ei hoa no ˈna. (Sal. 25:14) Ua tauturu mai te mau mea atoa ta tatou i haapii no nia i to tatou Atua poiete ia faafatata ˈtu ia ˈna.—Iak. 4:8.

4. (a) Eaha ta te Diabolo e faaohipa ra ia ore to tatou aau ia taatoa no Iehova? (b) Eaha ta tatou e hiˈopoa i roto i teie tumu parau haapiiraa?

 ⁴ O te Diabolo te raatira o teie faanahoraa o te ao e te faaohipa ra oia i te reira ia faatupu tatou i te hinaaro tia ore puai mau. (Eph. 2:1-3; Ioa. 1, 5:19) Ta ˈna fa, eiaha to tatou aau ia taatoa no Iehova. E hiˈopoa anaˈe e piti ravea paari ta ˈna e faaohipa nei. A tahi, e faahema mai oia ia titau rahi tatou i te moni e te taoˈa. A piti, e turai oia ia tatou ia maiti i te faaanaanataeraa iino.

5. No te aha e titauhia ia ara eiaha tatou ia nounou i te moni?

⁵ E hinaaro tatou paatoa i te maa, te ahu e te hoê nohoraa au mau. Tera râ, e ara anaˈe eiaha tatou ia faatupu i te hinaaro tia ore ia nounou i te moni. E rave rahi taata i teie mahana e “nounou i te moni” e ta te moni e nehenehe e hoo mai. (Tim. 2, 3:2) Ua ite Iesu e faahemahia ta ˈna mau pǐpǐ ia faatupu i tera hinaaro tia ore. No reira oia i parau ai: “E ore e tia i te hoê taata ia tavini e piti fatu, e hae hoi oia i te hoê e e here oia i te tahi atu, aore ra e faatura oia i te hoê e e vahavaha oia i te tahi atu. E ore e tia ia outou ia tavini i te Atua e te moni.” (Mat. 6:24) Te taata o te tavini ra ia Iehova a horoa rahi noa ˈi i to ˈna taime e puai no te titau i te oraraa fanaˈo, te tamata ra ïa i te tavini e piti fatu. Aita roa oia e pûpû ra i te hoê taviniraa moˈa ia Iehova anaˈe!

6. Eaha te haapiiraa e huti mai i ta Iesu i parau i te amuiraa i Laodikea?

⁶ Piri i te hopea o te senekele matamua, ua faaoru te mau mero o te amuiraa i Laodikea ma te manaˈo: “E taoˈa rahi ta ˈu e mea rahi te taoˈa i noaa mai  ia ˈu e aita vau e ere ra i te tahi mea.” I te aro râ o Iehova e o Iesu, “mea aroha roa [ratou] e te veve e te matapo e te vai tahaa.” Ua aˈo Iesu ia ratou no te mea ua vaiiho ratou i te nounou moni ia tuino i to ratou auhoaraa e o Iehova. (Apo. 3:14-17) Ia taa ia tatou ua oteo mai te nounou moni i roto i to tatou aau, e faatitiaifaro oioi anaˈe i to tatou huru feruriraa. (Tim. 1, 6:7, 8) Ia ore, eita to tatou aau e taatoa no Iehova e eita oia e farii i ta tatou taviniraa. O Iehova iho te titau mai ra ia taatoa tatou no ˈna. (Mar. 12:30) E nafea te moni e nehenehe ai e riro ei marei no tatou?

7-9. Eaha te haapiiraa e huti mai i te hiˈoraa o David?

⁷ A feruri na i te hiˈoraa o te hoê matahiapo itoito o David te iˈoa e ora ra i Marite. Mea au roa na David ta ˈna ohipa, ua horoahia ia ˈna te hoê tiaraa rahi aˈe i roto i te taiete e aita ˈtu taata aravihi mai ia ˈna i roto i to ˈna toroa i to ratou fenua. Ua parau David: “I tera taime, ua manaˈo vau e haamaitairaa anaˈe tera no ǒ mai ia Iehova.” Tera iho â anei?

⁸ Ua haamata David i te ite i te tahi mau tapao e faaite ra te tuino ra ta ˈna ohipa i to ˈna auhoaraa e o Iehova. Te na ô ra oia: “I te putuputuraa e tae roa ˈtu i roto i te taviniraa, pinepine au i te feruri i ta ˈu ohipa. E moni rahi ta ˈu i te avaˈe, ua rahi atoa mai râ te haapeapearaa e te fifi i roto i to ˈu faaipoiporaa.”

⁹ Ua taa ia David e titauhia ia rave i te tauiraa. Te na ô faahou ra oia: “Ua faaoti papu vau i te taui.” Ua faaineine David i te hoê tapura apî no te taui i ta ˈna mau hora ohipa e faaite atura i to ˈna paoti. Eaha tei tupu? Ua vaiihohia David! Tera  râ, te na ô ra oia: “I te mahana i muri iho, ua faaî au i ta ˈu parau aniraa no te riro ei pionie tauturu tamau.” No te aupuru ia raua, e tamâ David e ta ˈna vahine i te mau fare tahua rahi. Tau taime i muri aˈe, ua rave oia i te taviniraa pionie tamau e ua na reira atoa ta ˈna vahine. Ua maiti teie na hoa faaipoipo i te hoê ohipa haihai no te rahiraa, e ere râ i te fifi no raua! Noa ˈtu ua iti roa mai ta raua moni i te avaˈe, e navai noa te reira no te aufau i ta raua mau haamâuˈaraa. Ua hinaaro raua e tuu ia Iehova i te parahiraa matamua. E ua ite mata roa raua e aupuru iho â Iehova i te feia atoa e imi na mua i te Faatereraa arii.—Mat. 6:31-33.

10. E nafea ia tiai i to tatou aau?

¹⁰ Mea navai tatou i te pae materia aore ra aita, e titauhia ia tatou paatoa ia tiai i to tatou aau. Eiaha tatou ia nounou i te moni e eiaha atoa te ohipa ia riro ei mea faufaa aˈe i te taviniraa ia Iehova. Eaha te tauturu atu ia tiai i to outou aau? A hiˈopoa ia outou iho na roto i te mau uiraa mai teie te huru: ‘I te putuputuraa aore ra i roto i te taviniraa, pinepine anei au i te feruri i ta ˈu ohipa? E haapeapea noa anei au i te titauhia ia rave ia noaa mai te hoê oraraa fanaˈo? Te fifi ra anei to ˈu faaipoiporaa no te moni e te mau taoˈa materia? Ua ineine anei au i te taui i to ˈu toroa no te rave i te hoê ohipa haihai no te rahiraa, o te tauturu mai râ ia tavini atu â ia Iehova?’ (Tim. 1, 6:9-12) A feruri maite ai i tera mau uiraa, a haamanaˈo te here ra Iehova ia tatou e teie ta ˈna i fafau i te feia atoa e ati maite ia ˈna anaˈe: “E ore roa vau e vaiiho ia oe, e e ore roa vau e faarue ia oe.” No reira te aposetolo Paulo i parau ai: “Eiaha roa ei nounou moni i roto i to outou oraraa.”—Heb. 13:5, 6.

11. Eaha te faahopearaa i nia i te hoê taata ia au i te faaanaanataeraa ta ˈna e maiti?

¹¹ Te hinaaro ra Iehova ia oaoa tatou i te oraraa nei. Ia au i te Parau a te Atua, mea maitai no te taata ia amu e ia inu i te maa “ei maitai no ˈna i ta ˈna ra mau ohipa.” (Koh. 2:24) E ere ïa te faaanaanataeraa i te mea ino. Tera râ, mea rahi te faaanaanataeraa a teie nei ao o te tuino i te oraraa o te taata e o te turai ia ratou ia au i te mau mea ta te Atua e ore e au.

12. Ia au i te Korinetia 1, 10:21, 22, no te aha e titauhia ia maiti maitai ta tatou faaanaanataeraa?

 ¹² E hinaaro Iehova ia taatoa tatou no ˈna. Eita ïa tatou e nehenehe e amu i “te amuraa maa a Iehova” e i “te amuraa maa a te mau demoni.” (A taio i te Korinetia 1, 10:21, 22.) Ia farii tatou i te tamaa e te hoê taata, te faahoa ra ïa tatou ia ˈna. Ia maiti tatou i te faaanaanataeraa e faatietie i te taparahiraa taata, te peu tahutahu, te peu faufau aore ra te tahi atu hinaaro tia ore, te amu ra ïa tatou i te maa faaineinehia e te mau enemi o te Atua! E mauiui tatou e e ino to tatou auhoaraa e o Iehova.

13-14. Ia au i te Iakobo 1:14, 15, no te aha e titauhia ia haapao maitai i ta tatou faaanaanataeraa? A horoa i te hiˈoraa.

¹³ E au te faaanaanataeraa i te maa. E nehenehe tatou e maiti i te maa ta tatou e tuu i roto i to tatou vaha. Ua amu anaˈe tatou i te maa, e ô te reira i roto i to tatou tino. E maa maitai anaˈe, e maitaihia te tino. Ia ore, e fifi to tatou ea. Eita paha te faahopearaa e itehia i tera iho â mahana, e itehia râ i te roaraa o te tau.

¹⁴ Hoê â atoa no te faaanaanataeraa. E nehenehe tatou e maiti i ta tatou e tuu i roto i to tatou feruriraa. Ia oti, e ohipa te reira i nia i to tatou manaˈo e aau. Mea maitai anaˈe te faaanaanataeraa, e maitaihia ïa tatou. Ia ore, e mauiui tatou. (A taio i te Iakobo 1:14, 15.) Eita te faahopearaa e ite-oioi-hia, e itehia râ i te roaraa o te tau. No reira te Bibilia i parau ai: “Eiaha e vare: Eita te Atua e noaa i te haavare. Ta te taata hoi e ueue ra, o ta ˈna atoa ïa e ooti. No te mea te taata e ueue ia au i ta to ˈna iho tino, e ooti ïa i ta te tino e faatupu, oia hoi te tahuti.” (Gal. 6:7, 8) Mea faufaa ia haapae roa i te mau faaanaanataeraa e faatietie ra i te mau mea ta Iehova e au ore!—Sal. 97:10.

15. Eaha te ô ta Iehova i horoa mai no to tatou maitai?

¹⁵ Mea au roa na te mau tavini o Iehova e mataitai i te JW Haapurororaa teata, e faanahoraa teata maitai anaˈe to nia iho! Te na ô ra tuahine Marilyn: “Ua tauturu mai te JW Haapurororaa teata ia faatupu i te hoê feruriraa maitai. E nehenehe au e mataitai i te mau mea atoa, aita e ohipa ino i nia iho. Ia moˈemoˈe aore ra ia toaruaru vau, e pata vau i te hoê oreroraa parau faaitoito mau aore ra te hoê haamoriraa poipoi. Ua faafatata ˈtu â vau ia Iehova e i ta ˈna faanahonahoraa. Ua maitai-roa-hia to ˈu oraraa i te JW Haapurororaa teata!” Te haafaufaa ra anei outou i teie ô no ǒ mai ia Iehova? Taa ê atu i te faanahoraa o te avaˈe, e matara atoa mai te haruharuraa, te video e te himene faaitoito mau i nia i te JW Haapurororaa teata.

16-17. No te aha e titauhia ia haapao maitai i te rahiraa taime e faaanaanatae ai tatou e eaha te tauturu mai ia na reira?

¹⁶ E titauhia ia haapao maitai i te huru faaanaanataeraa, i te rahiraa taime atoa râ e faaanaanatae ai tatou. Ia ore, e rahi aˈe te taime e horoahia no te faaanaanataeraa i te taviniraa ia Iehova. Ia ore tatou e ara, e mâuˈa hanoa to tatou taime. Te na ô ra tuahine Abigail, 18 matahiti: “I te hopea mahana, mea au na ˈu e tamǎrû ia ˈu ma te mataitai i te afata teata. Ia ore râ vau e haapao, e hora taatoa vau  i mua i te reira!” Te parau atoa ra taeae Samuel: “E pau rahi to ˈu taime ia mataitai e rave rahi video poto i nia i te natirara. Hoê noa hoi ta ˈu i hinaaro e mataitai, i te hopearaa e toru aore ra e maha ˈtu hora vau i te na reiraraa!”

¹⁷ E nafea ia haapao maitai i te taime outou e faaanaanatae ai? Na mua, a tapao ehia taime ta outou e faataa nei no te faaanaanatae i roto hoê hebedoma. I nia i te hoê tarena, a tapao ehia taime ta outou i faaohipa no te mataitai i te afata teata, no te haere i nia i te natirara e no te hauti i nia i te matini uira. Ua rahi roa anaˈe te taime e horoahia no te faaanaanataeraa, a tapao i te mau tauiraa e titauhia ia rave. A tuu na mua i te mau mea faufaa roa e te toea o te taime no te faaanaanataeraa. Ia oti, a ani ia Iehova i te tauturu no te rave mai ta outou i faaoti. Ma te na reira, e taime e e puai to outou no ta outou iho haapiiraa Bibilia, no te haamoriraa utuafare, no te mau putuputuraa e no te tavini ia Iehova ma te poro e ma te haapii i te taata. A na reira ˈi, e oaoa te noaa mai i te taime e faaanaanatae ai outou, o Iehova hoi ta outou i tuu na mua roa!

18-19. E nafea ia haapapu ua taatoa tatou no Iehova?

¹⁸ I te otiraa te aposetolo Petero i te faahiti i te parau no nia i te hopea o te ao a Satani e no nia i te ao apî, teie ta ˈna i parau: “Taeae here ma, i te mea e te tiai nei outou i teie mau mea, a imi i te mau ravea atoa a itehia ˈtu ai outou e te Atua ei mea viivii ore e te hapa ore e i roto i te hau.” (Pet. 2, 3:14) Ia haapao tatou i tera aˈoraa a tamau atoa ˈi i te ora e i te haamori ia Iehova mai ta ˈna e titau mai ra, ua taatoa ïa tatou no ˈna.

¹⁹ E tamau Satani e ta ˈna ao i te faahema ia tatou ia tuu tatou ia Iehova i te parahiraa hopea roa. (Luka 4:13) Noa ˈtu eaha te tuuhia i mua ia tatou, eiaha e vaiiho i te hoê noa ˈˈe taata aore ra ohipa e rave i te parahiraa matamua i roto i to tatou aau. E faaoti papu anaˈe i te pûpû i te taviniraa moˈa ia Iehova anaˈe!