TE HIˈO ra te taata hiˈopoa i te huru o te reva i nia i te hoê hohoˈa haruharuhia. Te ite ra oia i te tahi vero atâta mau e fatata mai ra i te hoê tuhaa fenua mea rahi te taata e faaea ra i reira. No te faaora ia ratou, e rave oia i te mau mea atoa no te faaara ia ratou hou te vero e tae mai ai.

I teie mahana, te faaara atoa nei Iehova i te feia o te fenua nei no nia i te hoê vero rahi atu â. E nafea oia ia faaara mai? E nafea tatou e papu ai e taime â to te taata no te haapao i te faaararaa? No te ite i te pahonoraa, e hiˈo mai tatou te tahi mau faaararaa ta Iehova i horoa i tahito ra.

I tahito ra, ua faaara Iehova no nia i te mau faautuaraa, aore ra vero rahi, ta ˈna e faatae i nia i te feia i ofati i ta ˈna mau faaueraa. (Mas. 10:25; Ier. 30:23) I te mau taime atoa, ua faaara atea oia i te taata e ua faaite atu eaha te mau tauiraa e titauhia ia rave. (Arii 2, 17:12-15; Neh. 9:29, 30) No te tauturu i taua feia ra ia haapao oioi i te faaararaa, ua tono Iehova i ta ˈna mau tavini taiva ore.—Am. 3:7.

O Noa te tahi o taua mau tavini taiva ore ra ta Iehova i faaohipa. E rave rahi matahiti te maoro, ua faaara oia ma te mǎtaˈu ore i te feia ino e te piˈo o to ˈna tau no nia i te diluvi e fatata mai ra. (Gen. 6:9-13, 17) Ua tamau Noa i te faaite e nafea ratou e ora ˈi i parauhia ˈi oia e “taata poro i te parau-tia.”—Pet. 2, 2:5.

Noa ˈtu te mau faaararaa tuutuu ore a Noa, aita te taata i tiaturi e i tâuˈa noa ˈˈe i ta te Atua poroi. I te taeraa mai te diluvi, “mou atura ratou paatoa.” (Mat. 24:39; Heb. 11:7) Eita ratou e nehenehe e parau aita te Atua i faaara ia ratou.

I te tahi atu taime, ua faaara Iehova i te taata na mua rii e haamata ˈi ta ˈna faautuaraa. Ua haapao râ Iehova e e taime iho â to te taata no te rave i te titauhia. Ua faaara atea oia i to Aiphiti hou na ati ahuru e tupu ai. Na roto ia Mose e ia Aarona, ua faaarahia ˈtu Pharao e ta ˈna mau tavini no nia i te hitu o te ati, te hoê vero ûa paari o te tupu i te mahana i muri iho. Ua navai anei te taime ta te Atua i vaiiho atu? E, te parau ra hoi te Bibilia: “O tei mǎtaˈu i te parau a Iehova i taua mau tavini o Pharao ra, ua faahoro ïa i to ˈna mau tavini e ta ˈna mau puaa atoa i roto i te mau fare; area tei ore i haapao i te parau a Iehova ra, ua vaiiho ïa i to ˈna mau tavini e ta ˈna mau puaa i rapae.” (Exo. 9:18-21) Aita Iehova i faaara noa, ua vaiiho atoa râ i te taime i te taata no te ape i te pau rahi.

Ua faaara-atoa-hia Pharao e ta ˈna mau tavini hou te ati ahuru a tupu ai. Aita râ ratou i haapao i te faaararaa. (Exo. 4:22, 23) I te pae hopea, ua pohe ta ratou mau tamaiti matahiapo. Mea peapea mau! (Exo. 11:4-10; 12:29) Ua nehenehe anei ratou e haapao i te faaararaa hou a maoro roa ˈi? E! Ua faaara oioi Mose i te mau Iseraela no nia i te ati ahuru e fatata mai ra e ua horoa ˈtu i te mau aratairaa ia nehenehe to ratou utuafare ia ora. (Exo. 12:21-28) Ehia rahiraa taata tei haapao i te faaueraa a Iehova e tei ora mai i ta  ˈna faautuaraa? E au ra e toru mirioni taata, i rotopu ia ratou te vai ra te mau Iseraela, te taata ěê e te feia no Aiphiti.—Exo. 12:38.

Mai ta teie mau hiˈoraa e faaite ra, ua haapao noa Iehova ia navai iho â te taime i te taata no te pee i ta ˈna faaararaa. (Deut. 32:4) No te aha oia i na reira ˈi? Te faataa ra te aposetolo Petero aita Iehova “e hinaaro ra ia haamouhia te hoê, te hinaaro nei râ ia noaa i te taata atoa te tatarahapa.” (Pet. 2, 3:9) Te tâuˈa mau ra Iehova i te taata. Te hinaaro ra oia ia tatarahapa e ia haapao ratou i ta ˈna faaueraa hou oia a faatae mai ai i ta ˈna faautuaraa.—Isa. 48:17, 18; Roma 2:4.

I teie atoa mahana, mea titauhia ia haapao te taata i te faaararaa ru e horoahia ra na te ao atoa nei. A ora ˈi Iesu i nia i te fenua, ua tohu oia e haamouhia te faanahoraa o teie nei ao i te “ati rahi.” (Mat. 24:21) Ua faataa oia i te mau ohipa e tupuraa ta ta ˈna mau pǐpǐ e ite a piri noa mai ai te faautuaraa a te Atua. Te tuati ra ta Iesu faataaraa i te mau tupuraa e itehia ra na te ao nei.—Mat. 24:3-12; Luka 21:10-13.

Ia au i tera parau tohu, te faaara nei Iehova i te taata atoa ia farii i ta ˈna faatereraa î i te here. Te hinaaro ra oia ia oaoa te feia auraro i teie nei â e oia atoa i roto i te hoê ao apî parau-tia a muri aˈe! (Pet. 2, 3:13) Ia tiaturi te taata i ta ˈna mau parau fafau no a muri aˈe, ua horoa Iehova i te hoê poroi o te faaora i te taata, oia hoi “te parau apî oaoa o te Faatereraa arii.” (Mat. 24:14) Ua faanaho maitai Iehova i ta ˈna mau tavini ia faaite ratou i taua poroi ra i roto e 240 fenua. Te titau nei Iehova i te taata e rave rahi ia haapao i te faaararaa a ora ˈtu ai ratou i te mahana rahi o ta ˈna faautuaraa parau-tia!—Zeph. 1:14, 15; 2:2, 3.

Mai tahito mai â, ua vaiiho noa iho â Iehova i te taime no te haapao i ta ˈna faaararaa. No teie râ mahana, teie te uiraa faufaa: E haapao anei te taata i ta te Atua mau faaararaa hou a maoro roa ˈi? Ei feia poro na te Atua, e tamau anaˈe i te tauturu e rave rahi atu â taata ia ora ˈtu i te haamouraa o te faanahoraa o teie nei ao!