1. Mea nafea tatou e ite ai e ohipa faaoraraa te faariroraa i te taata ei pǐpǐ na te Mesia?

 TE FAARIRORAA ia vetahi ê ei pǐpǐ na te Mesia, e ohipa faaoraraa ïa i te taata! Mea nafea tatou e ite ai? I roto i te Mataio 28:19, 20, ua faaue Iesu: “A haere ïa e faariro i te taata . . . ei pǐpǐ na ˈu ma te bapetizo ia ratou.” No te aha mea faufaa ia bapetizohia te taata? No te mea e titauraa te reira no te ora e a muri noa ˈtu. E titauhia i te feia e hinaaro ra e bapetizo ia tiaturi e maoti noa te tusia taraehara o Iesu e to ˈna tia-faahou-raa e faaorahia ˈi te taata. No reira te aposetolo Petero i parau ai i to ˈna mau hoa Kerisetiano: “I te bapetizoraa . . . e ora atoa ˈi outou i teie nei na roto i te tia-faahou-raa o Iesu Mesia.” (Pet. 1, 3:21) Ia bapetizohia te hoê piahi, ua faaoti o ˈna i te haere na te eˈa e aratai i te ora mure ore.

2. Ia au i te Timoteo 2, 4:1, 2, eaha te titauhia ia riro tatou?

² No te faariro i te taata ei pǐpǐ na te Mesia, e titauhia ia riro tatou ei taata “aravihi i te haapii.” (A taio i te Timoteo 2, 4:1, 2.) Eaha te tumu? No te mea ua faaue mai Iesu ia ‘haere e faariro i te taata ei pǐpǐ na ˈna ma te bapetizo ia ratou.’ Ua parau te aposetolo Paulo e titauhia ia “rave noa” i tera ohipa, ‘mea na reira hoi tatou iho e ora mai ai e te feia e faaroo ia tatou.’ No reira Paulo i faaitoito ai ia “haapao maitai . . . i te mau haapiiraa ta [tatou] e horoa.” (Tim. 1, 4:16) No te faariro i te taata ei pǐpǐ na te Mesia, mea faufaa ia aravihi tatou i te haapii ia vetahi ê.

3. Eaha ta tatou e hiˈo mai i roto i teie tumu parau?

 ³ Te tamau nei tatou i te faaite i te pue parau mau Bibilia i te taata e rave rahi. Mai tei hiˈopoahia râ i roto i te tumu parau na mua ˈtu, e hinaaro tatou e ite e nafea ia tauturu ia ratou ia riro ei pǐpǐ bapetizohia na Iesu Mesia. I roto i teie, e hiˈo mai ïa tatou e pae atu â ravea no te aratai i te piahi i te bapetizoraa.

4. No te aha e titauhia i te taata haapii ia haavî ia ˈna iho a faatere ai i te hoê haapiiraa Bibilia? (A hiˈo atoa i te nota.)

⁴ Mea au na tatou te pue parau mau Bibilia, e paraparau rahi paha ïa tatou no nia i te reira! Tera râ, i te Haapiiraa o Te Pare Tiairaa, te Haapiiraa Bibilia a te amuiraa aore ra te haapiiraa a te hoê piahi, eiaha ïa te taata faatere ia paraparau rahi. E titauhia ia haavî i to tatou vaha e ia faaohipa i te Bibilia no te horoa i te haapiiraa. Eita te taata haapii e faataa i te mau mea atoa ta ˈna i ite no nia i te hoê irava Bibilia aore ra tumu parau. * (Ioa. 16:12) A faaau na i to oe ite no nia i te Bibilia i te taime a bapetizohia ˈi oe e i teie mahana. Na mua ˈˈe, o te mau haapiiraa tumu Bibilia anaˈe ta oe i ite. (Heb. 6:1) Ua titauhia e rave rahi matahiti no te haapii i ta oe i ite i teie mahana, eiaha ïa e tamata i te haapii i te piahi i te mau mea atoa i te hoê â taime.

5. (1) Ia au i te Tesalonia 1, 2:13, eaha ta tatou e hinaaro ia ite te piahi no nia i ta ˈna e haapii ra? (2) E nafea tatou ia faaitoito i te piahi ia paraparau no nia i ta ˈna e haapii ra?

⁵ E hinaaro tatou ia ite te piahi no roto mai te Bibilia te mea ta ˈna e haapii ra. (A taio i te Tesalonia 1, 2:13.) E nafea ïa? A faaitoito i te piahi ia paraparau i te taata no nia i ta ˈna i haapii. Eiaha na oe noa e faataa i te mau irava Bibilia, a ani râ i te piahi ia faataa mai i te tahi. A tauturu i te piahi ia ite e nafea o ˈna ia faaohipa i ta ˈna e haapii ra i roto i te Bibilia. Na roto i te mau uiraa, a tauturu ia ˈna ia faataa i to ˈna manaˈo e to ˈna huru a taio ai i tera e tera irava. (Luka 10:25-28) Peneiaˈe, e ani oe ia ˈna: “Eaha te huru maitai o Iehova e matara mai ra i roto i teie irava? E nafea teie irava e tauturu ai ia oe? Eaha to oe huru ia au i ta oe i haapii mai?” (Mas. 20:5) Te mea faufaa, ia mauruuru e ia faaohipa te piahi i ta ˈna i haapii, e ere râ te rahi o to ˈna ite no nia i te Bibilia.

6. No te aha mea maitai ia rave i te taata poro aravihi i te haapii no te faatere i te hoê haapiiraa Bibilia?

 ⁶ E titauhia te haehaa no te riro ei taata aravihi i te haapii. Ua rave aˈenei oe i te mau taata poro aravihi i te haapii no te faatere i te hoê haapiiraa Bibilia? Mai te peu e e, a ani i to ratou manaˈo no nia i ta oe huru haapiiraa e faaohiparaa i te Bibilia. (A hiˈo atoa i te Ohipa 18:24-26.) A ani atoa ia ratou ua taa maitai anei i te piahi ta ˈna e haapii ra? E nehenehe atoa oe e ani i te taata poro aravihi ia faatere i te haapiiraa i te mau taime e ore ai oe e vata. E rave-tamau-hia ïa te haapiiraa e e ite te piahi i te faufaaraa o te reira. Eiaha e manaˈo, ‘Na ˈu tera haapiiraa! O vau anaˈe te nehenehe e faatere i ta ˈna haapiiraa!’ E ere anei te hinaaro ra oe i to ˈna maitai e ia tamau oia i te haapii i te parau mau?

7. Eaha te tauturu i te piahi ia au i ta ˈna e haapii ra?

⁷ Mea faufaa ia ite te piahi i to oe tiaturi papu i ta oe e parau ra e mea au na oe te pue parau mau Bibilia. (Tes. 1, 1:5) E anaanatae atu â ïa te piahi i ta ˈna e haapii ra. Ia tano, a faatia mea nafea te mau faaueraa Bibilia i te tautururaa ia oe. E taa ïa ia ˈna e nehenehe atoa o ˈna e faufaahia i te mau aratairaa Bibilia.

8. Eaha ˈtu â ta oe e nehenehe e rave no te tauturu i te piahi e no te aha oe e na reira ˈi?

⁸ A faatere ai i te haapiiraa Bibilia, a faatia i te mau tupuraa ta te mau taeae e tuahine i farerei e mea nafea ratou i te faaoromairaa. Te vai ra anei te hoê mero o te amuiraa o te nehenehe e tauturu i te piahi? No te aha e ore ai e ani ia ˈna ia apiti mai i roto i te haapiiraa a te piahi? Aore ra e nehenehe oe e maiti i te hoê aamu i roto i te tuhaa “Ua taui te Bibilia i to ˈu oraraa” i nia i te jw.org. * E tauturu taua mau faatiaraa e video i te piahi ia taa i te faufaaraa ia faaohipa i te mau faaueraa Bibilia i roto i to ˈna oraraa.

9. E nafea ia faaitoito i te piahi ia faaite i ta ˈna e haapii ra i to ˈna utuafare e i to ˈna mau hoa?

⁹ Mai te peu ua faaipoipohia te piahi, te haapii atoa ra anei to ˈna hoa faaipoipo? Mai te peu e aita, a ani atu ia apiti mai i te haapiiraa. A faaitoito i te piahi ia  faaite i ta ˈna e haapii ra i to ˈna utuafare e i to ˈna mau hoa. (Ioa. 1:40-45) Peneiaˈe, e ani atu oe: “E nafea oe ia faataa i teie manaˈo i to oe utuafare? Eaha te irava ta oe e faaohipa no te haapapu i te reira i to oe mau hoa?” A na reira ˈi, te faaineine ra ïa oe i te piahi ia riro ei taata haapii. E ia faaî oia i te mau titauraa, e nehenehe oia e riro mai ei taata poro bapetizo-ore-hia. E nehenehe e ani i te piahi aita anei o ˈna i matau i te taata o te hinaaro e haapii i te Bibilia. Ia horoa mai o ˈna i te hoê iˈoa, a farerei oioi i tera taata e a pûpû atu i te hoê haapiiraa Bibilia. A faaohipa i te video Eaha te ravehia i te hoê haapiiraa Bibilia? *

10. Ia au i te Tesalonia 1, 2:7, 8, e nafea te taata haapii e pee ai i te hiˈoraa o Paulo?

¹⁰ E faaite te taata haapii te tâuˈa mau ra o ˈna i te piahi. A feruri mai te mea ra e nehenehe o ˈna e riro mai ei taeae aore ra tuahine no oe. (A taio i te Tesalonia 1, 2:7, 8.) E ere paha i te mea ohie no ˈna ia haapae i to ˈna mau hoa i roto i teie nei ao e ia rave i te mau tauiraa no te tavini ia Iehova. Mea faufaa ïa ia tauturu i te piahi ia imi i te hoa i roto i te amuiraa. A riro ei hoa no ˈna, eiaha noa i roto i ta ˈna haapiiraa, i te taime ê atoa râ. Peneiaˈe, ma te niuniu, ma te hapono atu i te poroi vini aore ra ma te farerei poto noa ia ˈna.

11. A amui mai ai i roto i te amuiraa, eaha ta tatou e hinaaro ia ite te piahi, e no te aha?

¹¹ E titauhia te utuafare taatoa no te tauturu i te hoê tamarii ia paari mai. E hinaaro-atoa-hia te tauturu a te amuiraa taatoa no te faariro i te hoê taata ei pǐpǐ na te Mesia. No reira te feia poro aravihi e tauturu ai i te piahi ia faahoa i te tahi atu mau Kerisetiano hiˈoraa maitai. E oaoa ïa te piahi i te amuimui i te mau tavini o te Atua ia tauturu ratou ia ˈna ia faaruru i te fifi e ia riro ei hoa no Iehova. A faaite i te piahi tataitahi te oaoa ra te amuiraa i te farii ia ˈna. E ite oia i te here e vai ra i rotopu i te mau taeae e tuahine, mea ohie aˈe ïa no ˈna ia faaea i te amuimui i te feia o te ore e here ra ia Iehova. (Mas. 13:20) Ua ape anaˈe to ˈna mau hoa tahito ia ˈna, ua ite oia e hoa papu to ˈna i roto i ta Iehova faanahonahoraa.—Mar. 10:29, 30; Pet. 1, 4:4.

12. No te aha e titauhia ia paraparau i te piahi no nia i te pûpûraa ia ˈna i te Atua e te bapetizoraa?

¹² Eiaha e taiâ i te paraparau i te piahi no nia i te pûpûraa ia ˈna i te Atua e te bapetizoraa. Te fa hoi o te hoê haapiiraa Bibilia, o te tautururaa ïa i te taata ia riro ei pǐpǐ bapetizohia na te Mesia. Ia rave-tamau-hia te haapiiraa Bibilia e ia haamata iho â râ te piahi i te apiti i te mau putuputuraa, e taa ia ˈna e tauturu atu ta ˈna haapiiraa Bibilia ia riro ei tavini no Iehova.

13. Eaha te mau titauraa e aratai i te piahi i te bapetizoraa?

¹³ A tauturu i te piahi ia faaî i tera e tera titauraa ia ineine o ˈna no te bapetizoraa. Na mua roa, ia ite te piahi o vai Iehova, ia here e ia tiaturi atoa o ˈna ia ˈNa. (Ioa. 3:16; 17:3) E haamata te piahi i te riro ei hoa no Iehova e no te mau taeae e tuahine o te amuiraa. (Heb. 10:24, 25; Iak. 4:8) I muri mai, e tatarahapa oia no te mau ohipa ino ta ˈna i rave a haapae roa ˈtu ai i te reira. (Ohi. 3:19) No to ˈna tiaturi i ta ˈna e haapii ra, e hinaaro o ˈna e faaite i te parau mau ia vetahi ê. (Kor. 2, 4:13) I muri mai, na ˈna iho e faaoti i te pûpû ia ˈna ia Iehova a bapetizohia ˈtu ai. (Pet. 1, 3:21; 4:2) E mahana oaoa ïa no tatou paatoa! A faaî ai te piahi i tera e tera titauraa, a haapopou e a faaitoito ia ˈna ia tamau oia i te haere i mua i te pae varua.

14. E nafea te taata haapii e ite ai te haere ra te piahi i mua?

¹⁴ E titauhia te faaoromai no te tauturu i te piahi ia pûpû ia ˈna i te Atua a bapetizohia ˈtu ai. Ia tae râ i te hoê taime, e titauhia ia ite te hinaaro ra anei oia e tavini ia Iehova. Ua haamata anei te piahi i te haapao i ta Iesu mau faaueraa aore ra ua haapii noa oia i te Bibilia?

15. Eaha te mau tapao e faaite ua ineine te piahi no te bapetizoraa?

¹⁵ A imi tamau i te mau tapao e faaite te haere ra te piahi i mua. Te faaite ra anei o ˈna i to ˈna mauruuru no to Iehova mau huru maitatai? Te pure ra anei oia ia Iehova? (Sal. 116:1, 2) Mea au anei na ˈna e taio i te Bibilia? (Sal. 119:97) Te apiti tamau ra anei oia i te mau putuputuraa? (Sal. 22:22) Ia au i ta ˈna i haapii, ua rave  anei o ˈna i te mau tauiraa i roto i to ˈna oraraa? (Sal. 119:112) Ua haamata anei oia i te faaite i ta ˈna e haapii ra i to ˈna utuafare e hoa? (Sal. 9:1) Te mea faufaa roa ˈtu, te hinaaro ra anei o ˈna e riro ei Ite no Iehova? (Sal. 40:8) Aita anaˈe te piahi i rave hoê o teie mau titauraa, ma te faatura a imi eaha te tumu i ore ai o ˈna i na reira. Ia oti, a paraparau i te piahi ma te hamani maitai e te haavare ore atoa râ. *

16. Afea mea tano ai ia faaea i te hoê haapiiraa Bibilia?

¹⁶ Mea faufaa ia feruri pinepine mea tano anei ia tamau i te haapiiraa a te piahi. A ui ia oe iho: ‘Te faaineine ra anei te piahi i ta ˈna haapiiraa? Te tae mai ra anei oia i te mau putuputuraa? Te rave noa ra anei o ˈna i ta ˈna mau peu iino? E mero noa anei o ˈna no te hoê haapaoraa hape?’ Mai te peu ua taa ia oe aita te piahi e haafaufaa ra i ta ˈna e haapii ra e aita atoa i rave i te mau tauiraa e titauhia, no te aha ïa e tamau noa ˈi i ta ˈna haapiiraa? Mai te huru ra ïa te haapii ra oe i te hoê taata i te au, aita râ o ˈna e hinaaro e ouˈa i roto i te miti.

17. Ia au i te Timoteo 1, 4:16, eaha te titauhia i te mau taata haapii atoa ia rave?

¹⁷ Mea faufaa roa ia rave i ta tatou tuhaa no te aratai i te piahi i te bapetizoraa e ia riro oia ei pǐpǐ na te Mesia. No reira tatou e faaohipa ˈi i te Bibilia no te horoa i te haapiiraa a faaite atoa ˈi i te piahi te tiaturi e te au ra tatou i te pue parau mau Bibilia. E faaitoito atoa tatou i te piahi ia imi i te hoa i roto i te amuiraa. E tamau atoa tatou i te paraparau no nia i te pûpûraa i te Atua e te bapetizoraa a imi noa ˈi i te mau tapao e faaite ua ineine anei te piahi no tera faaotiraa faufaa. (A hiˈo i te tumu parau “ Eaha te rave no te aratai i te piahi i te bapetizoraa?”) Te oaoa nei tatou i te apiti i teie ohipa faaoraraa i te taata! E faaoti papu anaˈe i te faatere maite i te mau haapiiraa Bibilia o te aratai i te mau piahi i te bapetizoraa.