1. Ia feruri tatou i te hoê taata aroha hamani maitai, e manaˈo paha tatou i te aha?

 IA FERURI tatou i te hoê taata aroha hamani maitai, e manaˈo paha tatou i te hoê taata maitai, aau mahanahana, aumihi e te aau horoa noa. E haamanaˈo atoa paha tatou i te faahohoˈaraa a Iesu no nia i te taata Samaria tei hamani maitai i te hoê ati Iuda tei taparahihia e tei eiâhia. Noa ˈtu e taata ěê, ua aroha roa te taata Samaria i teie taata. Ua haapao ïa o ˈna ia utuutuhia e ia aupuru-maitai-hia o ˈna. (Luka 10:29-37) Te faaite ra teie faahohoˈaraa i te hoê huru maitai nehenehe mau o Iehova, oia hoi te aroha hamani maitai. E tuhaa te reira o to ˈna here ta ˈna e faaite ra ia tatou i te mau mahana atoa.

2. Eaha te tahi atu ravea e faaite ai te hoê taata i te aroha hamani maitai?

² Teie te tahi atu ravea e faaite ai te hoê taata i te aroha hamani maitai. Eita o ˈna e haava i te hoê taata tei hapa. E hiˈoraa maitai roa Iehova no tatou i roto i teie tuhaa. Ua na ô te papai salamo: “Aita oia e tahoo ra ia tatou ia au i ta tatou mau hara.” (Sal. 103:10) I te tahi râ taime, e aˈo Iehova i te taata tei rave i te hara.

3. Eaha te mau uiraa ta tatou e hiˈopoa mai?

³ I roto i teie tumu parau haapiiraa, e pahono mai tatou i teie na toru uiraa: No te aha Iehova e faaite ai i te aroha hamani maitai? E nehenehe anei e aˈo ma te faaite noa i te aroha hamani maitai? Eaha te tauturu mai ia faaite i teie huru maitai? E hiˈo anaˈe i te pahonoraa Bibilia.

4. No te aha Iehova e faaite ai i te aroha hamani maitai?

⁴ Mea au roa na Iehova e faaite i te aroha hamani maitai. Te haapapu ra te aposetolo Paulo “e Atua aroha hamani maitai rahi” Iehova. I roto i tera tupuraa, ua faataa Paulo i te aroha hamani maitai o te Atua a horoa ˈi o ˈna i te tiaturiraa e ora i te raˈi i te feia faatavaihia noa ˈtu e taata tia ore ratou. (Eph. 2:4-7) Aita râ Iehova i faaite i te reira i teie noa mau tavini. Ua papai hoi Davida: “Mea maitai o Iehova i nia i te mau mea ora atoa, e te itehia ra to ˈna aroha hamani maitai i roto i ta ˈna mau ohipa atoa.” (Sal. 145:9) No to ˈna here i te taata, e faaite Iehova i teie huru maitai i te mau taime atoa e tumu papu no te na reira.

5. Mea nafea to Iesu iteraa i te aroha hamani maitai o Iehova?

⁵ O Iesu tei ite maitai roa ˈˈe i te aroha hamani maitai o Iehova no te mea ua ora maoro o ˈna i te raˈi i to ˈna Metua ra. (Mas. 8:30, 31) E rave rahi taime to Iesu iteraa i te aroha hamani maitai o to ˈna Metua i nia i te feia rave hara. (Sal. 78:37-42) A haapii ai i te taata, ua faaite Iesu i teie huru maitai nehenehe mau o to ˈna Metua.

6. Eaha te faahohoˈaraa a Iesu e faaite ra e Atua aroha hamani maitai to ˈna Metua?

⁶ I roto i te tumu parau haapiiraa na mua ˈtu, ua faaohipa Iesu i te faahohoˈaraa a te tamaiti tei moˈe no te faaite i te aroha hamani maitai o Iehova. Ua faarue te tamaiti i te fare o to ˈna metua e “hue atura i ta ˈna faufaa i roto i te ohipa haapaoraa ore.” (Luka 15:13) I muri aˈe, tatarahapa ihora o ˈna i to ˈna haerea ino, faahaehaa aˈera ia ˈna e hoˈi atura i te fare. Ua nafea râ te metua tane? Ua parau Iesu: “Tei te atea ê â [te tamaiti], ite maira to ˈna metua tane ia ˈna, aroha ihora, horo maira, tauahi maitai ihora ia ˈna e apa maira.” Aita te metua tane i faahaama i ta ˈna tamaiti. Ua faaite râ o ˈna i te aroha hamani maitai ma te faaore i ta ˈna hapa e ma te farii faahou ia ˈna i te fare. E hara rahi ta teie tamaiti i rave. No te mea râ ua tatarahapa o ˈna, ua faaore to ˈna metua tane i ta ˈna hapa. E nehenehe te metua tane aroha hamani maitai e faaauhia ia Iehova. Na roto i teie faahohoˈaraa, ua faaite maitai Iesu e te hinaaro ra to ˈna metua e faaore i te hapa a te feia e tatarahapa mau ra.—Luka 15:17-24.

7. E nafea to Iehova aroha hamani maitai e faaite ai e Atua î i te paari o ˈna?

 ⁷ E faaite Iehova i to ˈna aroha hamani maitai no te mea e Atua î i te paari o ˈna. E ere te paari o Iehova i te hoê noa huru feruriraa. Te na ô ra hoi te Bibilia: “Te paari no nia mai,” mea î i “te aroha hamani maitai e te hotu maitatai.” (Iak. 3:17, nota.) Ei metua î i te here, ua ite Iehova eaha te mea maitai no ta ˈna mau tamarii. (Sal. 103:13; Isa. 49:15) Maoti to Iehova aroha hamani maitai e fanaˈo ai te taata i te hoê tiaturiraa papu no a muri aˈe noa ˈtu e taata tia ore ratou. No te rahi o te paari o Iehova, e faaite o ˈna i te aroha hamani maitai i te mau taime atoa e tumu papu no te na reira. Eita roa ˈtu o ˈna e na reira no te farii i te hoê hara.

8. Eaha te titauhia ia rave i te tahi taime e no te aha?

⁸ Ei hiˈoraa, ua maiti te hoê Kerisetiano i te tamau i te rave i te hara. E nafea ïa tatou? Te faaara ra Paulo “ia faaea i te amuimui atu.” (Kor. 1, 5:11) Te taata o te ore e tatarahapa i ta ˈna mau hara, e tiavaruhia ïa o ˈna i rapae i te amuiraa. Maoti teie faanahoraa, e paruruhia te tahi atu mau taeae e tuahine o te amuiraa e e ite-maitai-hia te haerea moˈa o Iehova. Tera râ, eita paha vetahi e hiˈo i te tiavaruraa mai te hoê tapao o te aroha hamani maitai o te Atua. Mea tano anei te reira?

9-10. Ia au i te Hebera 12:5, 6, no te aha e tapao te tiavaruraa o te aroha hamani maitai o te Atua? A horoa i te hoê faahohoˈaraa.

⁹ I te hoê putuputuraa, e faaarahia mai ua tiavaruhia te hoê taata ta tatou i matau maitai. E oto roa tatou a faaroo ai e ere faahou o ˈna i te Ite no Iehova. E ui paha tatou: Ua titauhia iho â anei ia tiavaruhia o ˈna? E tapao anei te tiavaruraa o te aroha hamani maitai o te Atua? E. Maoti te aˈo, e fanaˈo te Kerisetiano tei hara i te paari, te aroha hamani maitai e te here o Iehova. (Mas. 13:24) E nehenehe anei te tiavaruraa e tauturu i te hoê taata tei rave i te hara ia taui i to ˈna haerea? Papu roa. E rave rahi taeae e tuahine tei tiavaruhia no te hoê hara rahi ta ratou i rave. E maoti te reira, ua taui ratou i to ratou haerea e ua hoˈi mai ia Iehova ra.—A taio i te Hebera 12:5, 6.

¹⁰ A feruri na i teie faahohoˈaraa. Ua tapao te hoê tiai mamoe e ua maˈihia hoê o ta ˈna mau mamoe. Ua ite o ˈna e titauhia ia ˈna ia faataa ê i tera mamoe i te toea o te nǎnǎ. No te mea e animara teie o tei matau i te ora ei nǎnǎ, aita ratou e ite eaha te rave ia faataa-ê-hia ratou i te nǎnǎ. Te auraa anei ïa mea ino te tiai mamoe ia na reira o ˈna? Eita roa ˈtu. Ua ite o ˈna, no tera noa mamoe tei maˈihia, o te nǎnǎ taatoa te fifihia. A faataa ê ai i te mamoe maˈimaˈi, e paruru o ˈna i te nǎnǎ taatoa.—A hiˈo atoa i te Levitiko 13:3, 4.

11. (1) No te aha e nehenehe e faaauhia te hoê taata tei tiavaruhia i te hoê mamoe tei maˈihia? (2) Eaha te faanahoraa e te tauturu ta te feia tiavaruhia e fanaˈo?

¹¹ E nehenehe e faaauhia te hoê taata tiavaruhia i te hoê mamoe tei maˈihia. E maˈi pae varua to ˈna. (Iak. 5:14) E au te maˈi pae varua i te hoê maˈi pee. No reira, e faataa-ê-hia te taata maˈi i te amuiraa. E faanahoraa te reira o te faaite ra i to Iehova here no ta ˈna mau tavini haapao maitai e e tauturu te reira i te taata tei tiavaruhia ia taa e mea ino ta ˈna i i rave e ia tatarahapa atoa. Noa ˈtu ua tiavaruhia te hoê taata, e nehenehe noa o ˈna e haere i te mau putuputuraa a fanaˈo atu ai i te mau aˈoraa Bibilia no te patu faahou i to ˈna faaroo. E nehenehe o ˈna e rave mai i ta tatou mau  papai no te taio e no te hiˈopoa i te reira. E nehenehe atoa o ˈna e mataitai i te porotarama JW Haapurororaa teata. Ia ite te mau matahiapo i te mau tauiraa ta ˈna e rave ra, e nehenehe ratou e horoa i te aˈoraa e te aratairaa no te tauturu ia ˈna ia maitai faahou mai i te pae varua e ia hoˈi mai i roto i te faanahonahoraa a Iehova. *

12. No to ratou here, eaha ta te mau matahiapo e rave aita anaˈe te hoê taata e tatarahapa?

¹² Mea faufaa ia haamanaˈo o te taata tatarahapa ore anaˈe te tiavaruhia. Ua ite te mau matahiapo e titauhia ia ratou ia feruri maite hou a rave ai i tera faaotiraa. E haamanaˈo atoa ratou e aˈo Iehova i te taata “ma te tano noa,” e te titau ra o ˈna ia na reira atoa ratou. (Ier. 30:11) No to ratou here, eita te mau matahiapo e rave i te tahi noa ˈˈe mea o te haafifi i te auhoaraa o to ratou mau taeae e o Iehova. No reira ïa ma te here e te aroha hamani maitai, e tiavaruhia te taata rave hara i te amuiraa.

13. Eaha te tumu i titauhia ˈi ia tiavaruhia te hoê Kerisetiano i Korinetia?

¹³ A feruri na i tei tupu i te senekele matamua. Ua rave te hoê Kerisetiano i Korinetia i te peu taotoraa tia ore e te vahine a to ˈna iho metua tane. Auê ïa hara rahi! Inaha, i te tau o Iseraela, ua parau Iehova: “Te tane o te taoto i te vahine faaipoipo a to ˈna metua tane, ua faatae oia i te haama i nia i to ˈna metua tane. Ia haapohe-mau-hia raua e piti.” (Lev. 20:11) Papu maitai, aita te aposetolo Paulo i faaue i te amuiraa ia haapohehia teie taata. Ua parau râ oia ia ratou ia tiavaruhia teie taata rave hara. Aita vetahi i mauruuru e ua tae roa ratou i te manaˈo e ere i te hara rahi tei ravehia.—Kor. 1, 5:1, 2, 13.

14. Mea nafea to Paulo faaiteraa i te aroha hamani maitai i nia i te taata tei tiavaruhia i Korinetia e no te aha? (Korinetia 2, 2:5-8, 11)

¹⁴ I muri aˈe, ua faarooroo Paulo e ua taui teie taata i to ˈna haerea. Ua tatarahapa mau o ˈna. Noa ˈtu ua faatae teie taata i te haama i nia i te amuiraa, teie ta Paulo i parau i te mau matahiapo: “Aita hoi au e hinaaro ra ia teimaha roa ta ˈu parau.” Ua faaue atu ïa o ˈna: “Ia ineine ïa outou i te faaore i ta ˈna hara e tia ˈi e i te tamahanahana ia ˈna.” No te aha? “Ia ore [teie taata] ia horomii-roa-hia i te oto rahi.” No to ˈna aroha, aita Paulo i hinaaro ia oto rahi e  ia faahapa noa teie taata ia ˈna iho ma te manaˈo eita Iehova e faaore i ta ˈna hara.—A taio i te Korinetia 2, 2:5-8, 11.

15. E nafea te mau matahiapo e aˈo ai ma te faaite i te aroha hamani maitai?

¹⁵ Mai ia Iehova, e faaite te mau matahiapo î i te here i te aroha hamani maitai. Ia titauhia, e aˈo te mau matahiapo i te taata rave hara. E faaite atoa ratou i te aroha hamani maitai i te mau taime atoa e tumu papu no te na reira. Ia ore te mau matahiapo e aˈo i te taata rave hara, aita ratou e faaite ra i te aroha hamani maitai. Mai te huru râ ïa, te turu ra ratou i teie haerea. Teie nei râ, o te mau matahiapo noa anei te titauhia ia faaite i te aroha hamani maitai?

16. Ia au i te Maseli 21:13, eaha ta Iehova e rave ia ore tatou e faaite i te aroha hamani maitai ia vetahi ê?

¹⁶ O te mau Kerisetiano atoa te faaite i te aroha hamani maitai mai ia Iehova, no te mea eita oia e faaroo i te feia o te ore e faaite i tera huru maitai. (A taio i te Maseli 21:13.) Te hinaaro nei hoi tatou ia faaroo Iehova i ta tatou mau pure. E haapao anaˈe ïa eiaha roa ˈtu tatou e faatupu i te aau etaeta e e tâuˈa ore i te hoê hoa Kerisetiano o te mauiui ra. Ia ineine râ tatou i te faaroo maite i te “autâ a te taata riirii.” E haamanaˈo anaˈe i teie aˈoraa: “Te taata hoi o te ore e aroha, e ore oia e arohahia ia haavahia oia.” (Iak. 2:13) Ia faˈi tatou e te hinaaro nei tatou i te aroha hamani maitai, hau atu â ïa tatou i te faaite i te reira, i te hoê iho â râ taata tei tatarahapa mau e tei hoˈi mai i roto i te amuiraa.

17. Mea nafea to te arii Davida faaiteraa i te aroha hamani maitai ma te haavare ore?

¹⁷ E tauturu te mau hiˈoraa Bibilia ia tatou ia faaite i te aroha hamani maitai e ia haapae i te riri. A feruri na i te arii Davida. Ua hinaaro Saula e haapohe ia ˈna. Ma te aau haavare ore, ua faaite noa Davida i te aroha hamani maitai i te arii faatavaihia a te Atua. Aita roa ˈtu o ˈna i tahoo aore ra i hamani ino ia Saula.—Sam. 1, 24:9-12, 18, 19.

18-19. Eaha na tupuraa e piti aita Davida i faaite i te aroha hamani maitai?

¹⁸ Aita râ Davida i faaite noa i te aroha hamani maitai. I te hoê mahana, ua ani o ˈna i te maa ia Nabala. E taata iria teie. Ma te faatura ore, aita roa ˈtu Nabala i farii i teie aniraa. Riri roa ihora Davida e faaoti atura i te haapohe ia Nabala, to ˈna mau taata e to ˈna utuafare. Auaa râ, e vahine maitai e te faaoromai ta Nabala, o Abigaila to ˈna iˈoa. Ua faaineine oioi o ˈna i te maa e horoa ihora na Davida ia ore Nabala e to ˈna mau taata ia haapohehia.—Sam. 1, 25:9-22, 32-35.

¹⁹ Teie te tahi atu tupuraa. Ua horoa te peropheta Natana i te hoê faahohoˈaraa ia Davida no nia i te hoê taata taoˈa o tei eiâ i te mamoe a te hoê taata veve. Ma te riri, pahono atura Davida: “Te horeo nei au i te ora o te Atua ra o Iehova, mea tano ia pohe tera taata!” (Sam. 2, 12:1-6) Ua ite maitai  Davida i te ture a Mose. Ia eiâ te hoê taata i te hoê mamoe, e faahoˈi o ˈna e maha mamoe na te taata ta ˈna i eiâ. (Exo. 22:1) E utua etaeta ia haapohe i teie taata. Ua horoa Natana i teie faahohoˈaraa no te tauturu ia Davida ia taa i te mau ohipa ino atoa ta ˈna i rave. Mea hau aˈe te aroha hamani maitai o Iehova i nia ia Davida i to Davida i nia i te taata tei eiâ i te mamoe o te faahohoˈaraa a Natana!—Sam. 2, 12:7-13.

20. Eaha te haapiiraa e huti mai i te hiˈoraa o Davida?

²⁰ No to ˈna riri rahi, ua faaoti Davida e haapohe ia Nabala e to ˈna mau taata atoa. I muri aˈe, ua faautua Davida i te taata taoˈa o te faahohoˈaraa a Natana ma te parau mea tano ia haapohehia tera taata. I roto i te piti o te tupuraa, e hinaaro paha tatou e ite no te aha te hoê taata maitai e haava etaeta ai mai tera. E titauhia ia feruri eaha tei tupu i roto i te oraraa o Davida. I taua taime ra, ua faahapa noa te manaˈo haava o Davida ia ˈna. Ia haava etaeta te hoê taata ia vetahi ê, e tapao faaite ïa e ua paruparu roa o ˈna i te pae varua. Area Iesu, ua aˈo ïa i ta ˈna mau pǐpǐ ma te parau: “A faaea i te haava ia ore outou ia haavahia, e haavahia hoi outou mai ta outou e haava ra ia vetahi ê.” (Mat. 7:1, 2) E haapae anaˈe ïa i te riri e e tutava anaˈe i te faaite i te “aroha hamani maitai rahi” mai to tatou Atua.

21-22. I roto i teihea tupuraa e nehenehe ai tatou e faaite i te aroha hamani maitai?

²¹ E ere noa te aroha hamani maitai i te hoê huru aau, e turai râ te reira ia tauturu ia vetahi ê, i roto anei i te utuafare aore ra i te amuiraa. Mea rahi te tupuraa e nehenehe ai tatou e faaite i te aroha hamani maitai. E nehenehe anei tatou: E tamahanahana i te hoê taata e oto ra? E faaineine i te maa aore ra e raverave i te tahi ohipa no te tauturu atu? E riro ei hoa maitai no te hoê Kerisetiano tei hoˈi mai ia Iehova e e faaitoito ia ˈna i te pae varua? Aore ra e faaite i te poroi mahanahana o te parau apî oaoa ia vetahi ê? O te tahi mau tupuraa noa teie e faaite ai tatou i te aroha hamani maitai i te taata atoa.—Ioba 29:12, 13; Roma 10:14, 15; Iak. 1:27.

²² Ia ite tatou i te hoê taata e hinaaro ra i te tauturu, tera te taime e faaite ai tatou i te aroha hamani maitai. Ma te na reira, e faaoaoa tatou i te aau o to tatou Metua i te raˈi, te Atua “aroha hamani maitai rahi!”