1-2. No te aha te aau o Iesu i horuhoru ai?

 UA HORUHORU roa Iesu i te po hou to ˈna poheraa. Fatata oia i te haamauiuihia e te feia iino. Te mea râ ta ˈna i haapeapea rahi, ia mauruuru ïa to ˈna Metua ia ˈna. Ia tapea oia i te taiva ore i roto i te ati, e haamoˈahia te iˈoa o Iehova e e fanaˈo te huitaata atoa i te tiaturiraa e ora e a muri noa ˈtu. Ua here mau Iesu i to ˈna Metua e i te taata!

² Noa ˈtu te ahoaho rahi, ua vai hau noa Iesu. Ua parau oia i ta ˈna mau aposetolo: “E horoa ˈtu vau i to ˈu nei hau.” (Ioa. 14:27) Maoti to ˈna auhoaraa piri roa e o Iehova, ua fanaˈo Iesu i “te hau o te Atua” o tei tiai i to ˈna feruriraa e aau.—Phil. 4:6, 7.

3. Eaha ta tatou e hiˈo mai i roto i teie haapiiraa?

³ Eita te mau fifi atoa ta tatou e farerei e faatupu i te hoê â ahoaho e to Iesu. E faaruru iho â te feia atoa e pee ia ˈna i te ati. (Mat. 16:24, 25; Ioa. 15:20) Mai ia Iesu, e ahoaho tatou i te tahi taime. E nafea ia faaea hau noa? E hiˈo mai tatou e toru ohipa ta Iesu i rave i roto i ta ˈna taviniraa. E ite ïa tatou e nafea ia pee i to ˈna hiˈoraa i roto i te ati.

4. Ia au i te Tesalonia 1, 5:17 eaha te faaite ra ua pure tamau Iesu i te roaraa o to ˈna mahana hopea i nia i te fenua?

⁴ A taio i te Tesalonia 1, 5:17. Ua tamau Iesu i te  pure i te roaraa o to ˈna mahana hopea i nia i te fenua. I to ˈna haamauraa i te Oroa haamanaˈoraa, ua pure oia no te pane e te uaina. (Kor. 1, 11:23-25) Hou a faarue ai i te vahi i faatupu ai ratou i te Pasa, ua pure Iesu e ta ˈna mau pǐpǐ. (Ioa. 17:1-26) I nia i te mouˈa Oliveta, ua pure Iesu e rave rahi taime. (Mat. 26:36-39, 42, 44) E ta ˈna mau parau hopea roa, e pure ïa ta ˈna i faatae i to ˈna Metua. (Luka 23:46) Aita ïa Iesu i faaea i te paraparau ia Iehova i te roaraa o taua mahana ahoaho mau!

5. No te aha te mau aposetolo i ore ai i mau papu?

⁵ Ua tia ia Iesu ia faaoromai tamau i roto i te ati no te mea ua pure oia i to ˈna Metua ma te tuutuu ore. Aita te mau aposetolo i tamau maite i roto i te pure i tera po. A tae mai ai te hora tamataraa, aita i noaa ia ratou te itoito i titauhia no te mau papu. (Mat. 26:40, 41, 43, 45, 56) No te ore e taiva i roto i te ati, e titauhia ia “tamau i te pure” mai ia Iesu. Eaha ta tatou e ani i roto i ta tatou pure?

6. E nafea te faaroo e tauturu mai ai ia faaea hau noa?

⁶ E nehenehe tatou e ani ia Iehova ia “faarahi mai i to [t]atou faaroo.” (Luka 17:5; Ioa. 14:1) Mea faufaa roa hoi te faaroo no te mau papu i mua ia Satani, te enemi o te feia atoa e pee ia Iesu. (Luka 22:31) Ia faaruru tatou i te hoê ati i muri i te tahi atu, e nafea te faaroo e tauturu mai ai ia faaea hau noa? Ua rave anaˈe tatou i te mau mea  atoa e maraa ia tatou, e vaiiho tatou i to tatou mau fifi i roto i te rima o Iehova. Ua papu ia tatou o ˈna anaˈe tei ite maitai aˈe e nafea ia faatitiaifaro i te mau mea atoa. I tera taime, ua fanaˈo ïa tatou i te hau o te tiai i to tatou feruriraa e aau.—Pet. 1, 5:6, 7.

7. Eaha ta te mau parau a Robert e haapii mai ra?

⁷ E tauturu mai te pure ia faaea hau noa i roto i te mau ati atoa. Ta te tahi ïa matahiapo 80 tiahapa matahiti o Robert te iˈoa i ite. Te na ô ra oia: “Ua tauturu mai te Philipi 4:6, 7 ia faaruru e rave rahi ati. Ua fifi au i te pae moni, e i te hoê taime, ua ere atoa i ta ˈu hopoia matahiapo.” Eaha tei tauturu ia ˈna ia faaea hau noa? Te pahono ra Robert: “I to ˈu iho â haamataraa i te ahoaho, e pure au. Rahi atu vau i te pure ma te tuutuu ore, rahi atu â vau i te fanaˈo i te hau!”

8. Ia au i te Ioane 8:29, eaha te tahi atu tumu i faaea hau noa ˈi Iesu?

⁸ A taio i te Ioane 8:29. Noa ˈtu te hamani-ino-raa, ua faaea hau noa Iesu, ua ite oia te oaoa ra te aau o to ˈna Metua. Ua tamau Iesu i te auraro ia Iehova noa ˈtu e ere i te mea ohie i te tahi taime. Ua here Iesu i to ˈna Metua e ua tuu oia i te taviniraa a Iehova i te parahiraa matamua. Hou a haere mai ai i nia i te fenua, e Rave ohipa aravihi na Iesu na te Atua. (Mas. 8:30) I te  fenua nei, ua haapii oia i te taata i te parau mau no nia i to ˈna Metua ma te itoito rahi. (Mat. 6:9; Ioa. 5:17) Ua oaoa mau Iesu i ta ˈna taviniraa.—Ioa. 4:34-36.

9. E nafea te pororaa ma te itoito rahi e tauturu mai ai ia faaea hau noa?

⁹ Mai ia Iesu, e auraro anaˈe ia Iehova e “ia rahi noa ta [ta]tou ohipa i roto i te Fatu.” (Kor. 1, 15:58) Ia poro tatou “ma te itoito rahi,” e tuu tatou i to tatou mau fifi i te hiti. (Ohi. 18:5) I roto i te taviniraa, e farerei pinepine tatou i te feia o te faaruru ra i te mau fifi rahi aˈe. Ia haamata ratou i te here ia Iehova e i te haapao i ta ˈna aratairaa, e rave ratou i te mau tauiraa a oaoa ˈtu ai. E haamanaˈo mai te reira e aupuru iho â Iehova ia tatou e na te reira e tamǎrû i to tatou feruriraa e aau. I te roaraa o to ˈna oraraa, ua ahoaho e ua haafaufaa ore noa te tahi tuahine ia ˈna. Teie râ ta ˈna e parau ra: “Ia rahi ta ˈu ohipa i roto i te taviniraa, eita vau e haapeapea rahi faahou, e oaoa râ! Ia poro hoi au, e piri roa ˈtu â vau ia Iehova!”

10. Eaha ta te mau parau a Brenda e haapii mai ra?

¹⁰ Ua roohia te tuahine Brenda e ta ˈna tamahine i te hoê â maˈi ino mau. Tei roto Brenda i te parahiraa turairai e e rohirohi hanoa oia. Ia nehenehe, e poro te tuahine na tera e tera fare. I te rahiraa râ o te taime, e na reira oia ma te papai i te rata. Te parau ra Brenda: “I to ˈu taaraa eita to ˈu maˈi e ora i roto i teie faanahoraa o te ao, ua tiatonu vau i nia i ta ˈu taviniraa. E tauturu mai te reira ia haamoˈe i to ˈu mau fifi e ia manaˈo noa i te feia ta ˈu e poro. E tamau ïa vau i te feruri i te oraraa e tiai mai ra a muri aˈe.”

11-13. (a) Mea nafea te mau aposetolo e te tahi atu mau taata i te riroraa ei hoa papu no Iesu? (b) Mea nafea Iesu i te faaitoitoraahia e to ˈna mau hoa?

¹¹ I te roaraa o ta ˈna taviniraa, aita to Iesu mau teina i faatupu i te faaroo ia ˈna. (Ioa. 7:3-5) Ua tae roa to ˈna mau fetii i te parau, “ua maamaahia” Iesu. (Mar. 3:21) Area ta ˈna mau aposetolo haapao maitai, ua riro ïa ei hoa papu no ˈna. E au ratou i te hoa ati maitai aˈe i te taeae ra. (Mas. 18:24) Ua here mau Iesu i ta ˈna mau aposetolo taiva ore. Teie ta ˈna i parau ia ratou i te po hou to ˈna poheraa: “Outou râ, ua pee maite ïa ia ˈu i roto i to ˈu mau ati.”—Luka 22:28.

¹² Ua hape te mau aposetolo i te tahi taime, aita râ Iesu i faaea noa i nia i to ratou mau paruparu. Ua hiˈo o ˈna i te faaroo ta ratou i faatupu. (Mat. 26:40; Mar. 10:13, 14; Ioa. 6:66-69) Hou o ˈna a haapohehia ˈi, ua parau Iesu i teie feia taiva ore: “Ua parau vau ia outou e hoa, no te mea ua faaite atu vau ia outou i te mau mea atoa ta ˈu i faaroo i to ˈu Metua.” (Ioa. 15:15) E faaitoitoraa mau to Iesu mau hoa no ˈna. Auê oia i te mauruuru i ta ratou tauturu i roto i te taviniraa!—Luka 10:17, 21.

¹³ Taa ê atu i te mau aposetolo, e hoa ê atu to Iesu. Ua farii maitai te tahi mau tane e vahine ia ˈna i to ratou fare  e ua faaineine atoa i te maa. (Luka 10:38-42; Ioa. 12:1, 2) Ua apee vetahi ia Iesu i to ˈna mau tere e ua tufa atoa i ta ratou mau faufaa. (Luka 8:3) No to Iesu maitai rahi ratou i faahoa ˈi ia ˈna. Ua hamani maitai Iesu i te taata e aita oia i titau atu i te ore e maraa ia ratou. E taata tia roa Iesu, aita râ oia i haafaufaa ore i te turu a to ˈna mau hoa tia ore! Ua tauturu mau to Iesu mau hoa ia ˈna ia faaea hau noa.

14-15. Eaha te rave ia noaa mai te mau hoa papu e e nafea ratou e tauturu mai ai?

¹⁴ E tauturu mai te mau hoa papu ia tapea i te taiva ore ia Iehova. Ia noaa mai râ te hoa papu, e titauhia na mua ia riro oe ei hoa mau no ratou! (Mat. 7:12) Te faaitoito mai ra te Bibilia ia horoa i to tatou taime e puai no te tauturu ia vetahi ê, i te feia iho â râ “e ere ra.” (Eph. 4:28) O vai ma te hinaaro ra i te tauturu i roto i ta outou amuiraa? E tia anei ia outou ia haere i te fare toa no te tahi Kerisetiano maˈimaˈi aore ra ruhiruhia? E nehenehe anei outou e horoa i te maa na te tahi utuafare e fifi ra i te pae moni? Mea aravihi anei outou i te faaohipa i te reni natirara jw.org^® e te faanahoraa JW Library^®? E nehenehe ïa outou e tauturu i te mau mero o te amuiraa ia haafaufaa i tera mau ravea apî. Ia haa rahi tatou no te tauturu ia vetahi ê, e rahi mai to tatou oaoa!—Ohi. 20:35.

 ¹⁵ E tauturu mai te mau hoa ia faaea hau noa i roto i te ati. Mai ia Elihu, e faaroo maite ratou ia haamahora tatou i to tatou aau. (Ioba 32:4) E ere na te mau hoa e rave i ta tatou mau faaotiraa, e horoa mai râ ratou i te mau aˈoraa niuhia i nia i te Bibilia. (Mas. 15:22) E mai te arii Davida, e faaite anaˈe i te haehaa ma te farii i te tauturu a te mau hoa. (Sam. 2, 17:27-29) E ô maitatai mau ratou no ǒ mai ia Iehova ra!—Iak. 1:17.

16. Ia au i te Philipi 4:6, 7, eaha te ravea hoê roa no te fanaˈo i te hau? A faataa.

¹⁶ A taio i te Philipi 4:6, 7. No te aha te Bibilia e parau ai e fanaˈo noa tatou i te hau “na roto i te Mesia ra o Iesu”? No te mea e titauhia ia taa e ia farii i te hopoia rahi a Iesu i roto i te opuaraa a te Atua. Mea na roto i te tusia taraehara o Iesu ta tatou mau hara e faaorehia ˈi. (Ioa. 1, 2:12) Auê tamahanahanaraa e! Ei Arii o te Faatereraa arii a te Atua, na Iesu e faaore i te mauiui atoa ta Satani e ta teie ao i faatupu. (Isa. 65:17; Ioa. 1, 3:8; Apo. 21:3, 4) Te tiai ru mau nei tatou i tera mahana! Ua horoa mai Iesu i te hoê hopoia rahi, ua haapapu râ oia e tei pihai iho o ˈna ia tatou e tae noa ˈtu i te hopea o teie faanahoraa o te ao. (Mat. 28:19, 20) Aita anei tatou e itoitohia ra i tera parau? Mea faufaa ïa te tamahanahanaraa, te tiairaa e te itoito no te faaea hau noa!

17. (a) E nafea te hoê Kerisetiano e faaea hau noa ˈi? (b) Ia au i te Ioane 16:33, eaha te titauhia ia rave?

¹⁷ E nafea ˈtura outou ia faaea hau noa i roto i te ati? A rave mai ia Iesu. A tahi, a tamau maite i roto i te pure. A piti, a auraro ia Iehova e a poro ma te itoito rahi noa ˈtu e ere i te mea ohie i te tahi taime. A toru, a farii i te tauturu a to outou mau hoa. Mea na reira te hau o te Atua e tiai ai i to outou feruriraa e aau. E mai ia Iesu, eita roa ïa outou e taiva ia Iehova i roto i te ati!—A taio i te Ioane 16:33.