1-2. No te aha e nehenehe ai e faaau ia Iesu i te hoê aratai? A horoa i te hoê hiˈoraa.

 A FERURI tei roto oe i te hoê pǔpǔ e te haere ra outou i nia i te mouˈa. Mea atâta e mea vari na nia i tera mouˈa. A haere noa ˈi outou, te ite ra oe e te atea noa ˈtu ra oe i te taata e aratai ra ia outou. Eita râ oe e mǎtaˈu, te ite ra hoi oe i to ˈna mau taahiraa avae i roto i te vari, e pee noa ïa oe i te reira.

² E nehenehe e faaauhia teie mouˈa atâta i teie ao ino. Ua horoa mai râ Iehova i te Aratai papu roa ˈˈe, ta ˈna Tamaiti o Iesu, ia nehenehe tatou e pee maite i to ˈna mau taahiraa avae. (Pet. 1, 2:21) I roto i te irava tumu o teie haapiiraa, ua faaau Petero ia Iesu i te hoê aratai. Ua vaiiho mai Iesu i to ˈna mau taahiraa avae ia pee tatou. E hiˈo mai tatou eaha te auraa ia pee i to Iesu mau taahiraa avae. E hiˈo atoa mai tatou no te aha e e nafea tatou e pee ai i te mau taahiraa avae o Iesu.

3. Eaha te auraa ia pee i te mau taahiraa avae o te hoê taata?

³ I te tahi taime, i roto i te Bibilia, e faahitihia te parau o te “avae” e te “haerea” no te mau mea ta te hoê taata e rave i roto i to ˈna oraraa. (Gen. 6:9; Mas. 4:26) E nehenehe te mau mea ta te hoê taata e rave e faaauhia i te mau taahiraa avae ta ˈna i vaiiho i muri ia  ˈna. Ia pee tatou i to ˈna mau taahiraa avae, te auraa ïa e pee tatou i to ˈna hiˈoraa.

4. Eaha te auraa ia pee i te mau taahiraa avae o Iesu?

⁴ Ia pee tatou i te mau taahiraa avae o Iesu, te auraa ïa te pee ra tatou i to ˈna hiˈoraa. I roto i te irava tumu o teie haapiiraa, ua haamahiti maitai Petero i te faaoromai o Iesu i te hamani-ino-raahia o ˈna. E ere noa râ tera te hiˈoraa maitai ta Iesu i vaiiho mai. (Pet. 1, 2:18-25) O te oraraa taatoa o Iesu ta tatou e nehenehe e rave ei hiˈoraa no tatou.

5. E nehenehe anei te hoê taata tia ore e pee i te hiˈoraa tia roa o Iesu? A faataa.

⁵ Noa ˈtu e taata tia ore tatou, e nehenehe tatou e pee i te hiˈoraa o Iesu. Aita Petero i parau ia pee i te mau taahiraa avae o Iesu ma te tia roa. Mai te peu e pee maite tatou i to ˈna mau taahiraa avae ma te rave i tei maraa ia tatou ei taata tia ore, e rave tatou mai ta te aposetolo Ioane i papai, oia hoi “ia pee noa . . . i te huru haerea o Iesu.”—Ioa. 1, 2:6.

6-7. E nafea tatou e piri atu â ˈi ia Iehova ma te pee i te mau taahiraa avae o Iesu?

⁶ Ma te pee i te mau taahiraa avae o Iesu, e piri atu â tatou ia Iehova. E nafea? A tahi, ua faaite Iesu eaha te mau mea e rave ia mauruuru te Atua ia ˈna. (Ioa. 8:29) No reira, ia pee tatou i te mau taahiraa avae o Iesu, e mauruuru ïa Iehova ia tatou. Mea papu e faafatata mai to tatou Metua i te raˈi ia tatou  ia tutava tatou i te faafatata ˈtu ia ˈna.—Iak. 4:8.

⁷ A piti, ua pee Iesu i te hiˈoraa o to ˈna Metua ma te tia roa. No reira Iesu i parau ai: “O tei ite mai ia ˈu, ua ite atoa ïa i te Metua.” (Ioa. 14:9) Ia pee tatou i te huru o Iesu i nia i te taata, mai to ˈna aroha i te hoê taata lepera e te hoê vahine tapahi, e to ˈna aumihi no te feia e oto ra, te pee atoa ra ïa tatou i te huru o Iehova. (Mar. 1:40, 41; 5:25-34; Ioa. 11:33-35) Ia pee noa tatou i te huru o Iehova, e piri atu â tatou ia ˈna.

8. E nafea tatou e upootia ˈi i nia i teie nei ao ia pee tatou i te mau taahiraa avae o Iesu? A faataa.

⁸ Ma te pee i te mau taahiraa avae o Iesu, eita teie nei ao ino e faahahi ê ia tatou. Aita Iesu i vaiiho i te mau mea o teie nei ao ia ohipa i nia i to ˈna feruriraa. Ua nehenehe ïa Iesu e parau i te po hopea o to ˈna oraraa i nia i te fenua: “Ua vî teie nei ao ia ˈu.” (Ioa. 16:33) Ua haamanaˈo noa Iesu, te tumu i tonohia mai ai oia i te fenua, o te haapapuraa ïa i te tiaraa arii hau ê o Iehova. Eiaha ïa tatou e vaiiho i te mau mea o teie nei ao ia faahahi ê ia tatou. Mai ia Iesu, e tamau anaˈe i te rave i te hinaaro o Iehova, e e “upootia” tatou i nia i teie nei ao.—Ioa. 1, 5:5.

9. Eaha te rave ia noaa te ora mure ore?

⁹ Ma te pee i te mau taahiraa avae o Iesu, e noaa te ora mure ore. I te uiraa te hoê taata taoˈa ia Iesu eaha te rave ia noaa te ora mure ore, ua pahono Iesu: “A pee mai ia ˈu.” (Mat. 19:16-21) Ua parau Iesu i te tahi mau ati Iuda o tei ore i tiaturi o ˈna te Mesia: “Ta ˈu mau mamoe . . . e pee mai ratou ia ˈu. E horoa vau i te ora mure ore no ratou.” (Ioa. 10:24-29) Ua parau Iesu ia Nikodemo, te hoê mero o te Sunederi o tei hinaaro e ite hau atu â no nia ia ˈna: ‘E roaa te ora mure ore i te taata o te faatupu i te faaroo ia ˈna.’ (Ioa. 3:16) E faaite tatou i to tatou faaroo ia Iesu ma te faaohipa i ta ˈna i haapii mai e ma te pee i to ˈna hiˈoraa. Ia na reira tatou, e noaa ïa ia tatou te ora mure ore.—Mat. 7:14.

10. Eaha te rave ia matau maitai tatou ia Iesu? (Ioane 17:3)

¹⁰ No te pee maite i te mau taahiraa avae o Iesu, mea titauhia ia ite tatou o vai o ˈna. (A taio i te Ioane 17:3.) Mea titauhia ia haapii tatou i to ˈna mau huru maitatai, to ˈna huru feruriraa, ta ˈna mau aratairaa, e ia matau maitai  tatou ia ˈna. Noa ˈtu mea maoro tatou i roto i te parau mau, mea titauhia ia tamau tatou i te haapii no nia ia Iehova e ta ˈna Tamaiti o Iesu.

11. Eaha to roto i te mau Evanelia?

¹¹ I roto i te Bibilia, ua haapapai Iehova e maha Evanelia o te faatia ra i te oraraa e te taviniraa a Iesu. Te faaitehia ra eaha ta Iesu i parau, eaha ta ˈna i rave e to ˈna mau huru aau. O te mau taahiraa avae teie ta Iesu i vaiiho mai no tatou. No reira, ia hiˈopoa tatou i te mau Evanelia, e matau maitai atu â tatou ia Iesu, e e tauturu mai te reira ia tatou ia “haamanaˈo maite” i to ˈna hiˈoraa a pee maite noa ˈtu ai i to ˈna mau taahiraa avae.—Heb. 12:3.

12. E nafea tatou e faufaahia ˈi i te mau Evanelia?

¹² E faufaahia tatou i te mau Evanelia ia haapii e ia feruriruri tatou i te reira. (A hiˈo atoa i te Iosua 1:8.) E hiˈo anaˈe e piti manaˈo o te tauturu ia tatou ia feruriruri e ia faaohipa i ta tatou i haapii i roto i te mau Evanelia.

13. E nafea ia faaoraora i te mau Evanelia?

¹³ A tahi, a faaoraora i te Evanelia. A feruri tei roto oe i te faatiaraa. No te tauturu ia oe, a hiˈopoa i te mau papai ta te faanahonahoraa i faaineine. A feruri i tei tupu na mua ˈˈe, aore ra i muri mai i te faatiaraa ta oe e taio ra. A faahohonu i ta oe mau maimiraa no nia i te mau taata e te mau vahi i faahitihia. A hiˈo eaha ta tera e tera papai Evanelia i faatia no te hoê â tupuraa, te vai ra hoi te tahi mau haamaramaramaraa hau ta te hoê papai Evanelia e faaite e ta te tahi atu e ore e faaite.

14-15. E nafea ia faaohipa i ta tatou i haapii i roto i te Evanelia?

¹⁴ A piti, a faaohipa i ta oe i taio i roto i te Evanelia. (Ioa. 13:17) I muri mai i ta  oe taioraa, a feruri eaha te haapiiraa ta oe e nehenehe e faaohipa. E maoti ta oe i haapii mai, a feruri e nafea oe e tauturu ai ia vetahi ê. A feruri i te hoê taata ta oe e nehenehe e tauturu e, i te taime tano, a faaite ia ˈna ma te here e te mǎrû eaha te haapiiraa ta oe i huti mai.

¹⁵ E hiˈo mai tatou e nafea ia faaohipa i teie na manaˈo e piti ma te hiˈopoa i te hiˈoraa o te vahine veve ta Iesu i ite i roto i te hiero.

16. A faataa i ta te Mareko 12:41 e faatia ra.

¹⁶ A faaoraora i te faatiaraa. (A taio i te Mareko 12:41.) A feruri te haapii ra Iesu i roto i te hiero. Ua patoi noa mai te mau aratai haapaoraa ia ˈna. Na mua ˈtu, ua uiui atoa vetahi ia ˈna no te imi peapea. (Mar. 11:27-33; 12:13-34) Tei roto paha o ˈna i teie nei i te hoê vahi parauhia te Aua o te mau vahine. Te parahi ra oia i te vahi e ite ai oia i te mau afata moni. Te hiˈo ra oia i te taata ia tuu i te moni i roto i te mau afata. Mea rahi te moni ta te feia taoˈa e tuu ra i roto, e te faaroo atoa ra paha oia i te moni e topa ra i roto i te afata.

17. A faataa i te tupuraa i roto i te Mareko 12:42.

¹⁷ A taio i te Mareko 12:42. Haere maira “te hoê vahine ivi veve.” (Luka 21:2) Noa ˈtu mea veve roa ino o ˈna, e tuu o ˈna e piti lepeta i roto i te afata. I tera ra tau, e tota noa ïa e eita e paia i tera moni.

18. Ia au i te Mareko 12:43, 44, eaha ta Iesu i parau no te ô a te vahine ivi?

¹⁸ A taio i te Mareko 12:43, 44. Ua faahiahia roa Iesu i tera vahine ivi. Parau atura oia i ta ˈna mau pǐpǐ: “Mea rahi aˈe ta teie vahine ivi veve i tuu i roto i te mau afata moni i ta tera mau taata atoa. Ua tuu hoi ratou paatoa [te feia taoˈa iho â râ] i ta ratou moni hau, o ˈna râ, noa ˈtu to ˈna veve, ua tuu pauroa ïa i ta ˈna moni e ora ˈi oia.” I te tuuraa te vahine ivi i na lepeta i roto i te afata, ua tuu oia i to ˈna ora i roto i te rima o Iehova.—Sal. 26:3.

19. Eaha ta tatou e haapii mai i te hiˈoraa o te vahine ivi?

¹⁹ A faaohipa i ta oe i haapii mai. A feruri eaha ta oe i haapii mai i ta Iesu i parau no taua vahine ivi ra. Peneiaˈe ua hinaaro o ˈna e horoa hau atu â no Iehova. Ua ite râ Iesu ua horoa o ˈna i te mea maitai roa ˈˈe no Iehova. Teie ïa te haapiiraa no tatou: e mauruuru Iehova ia tavini tatou ia ˈna ma te aau taatoa. O te mea maitai roa ˈˈe hoi teie ta tatou e nehenehe e horoa. (Mat. 22:37; Kol. 3:23) E oaoa roa Iehova ia ite e te horoa ra tatou i to tatou taime e puai no te haamori ia ˈna, ma te apiti anei i te mau putuputuraa aore ra i te pororaa.

20. E nafea ia faaohipa i ta oe i haapii mai i te hiˈoraa o te vahine ivi?

²⁰ E nafea ia faaohipa i ta oe i haapii mai i te hiˈoraa o te vahine ivi? A feruri i te tahi Kerisetiano i roto i te amuiraa, o ta oe e nehenehe e faaitoito. Te vai ra paha te hoê tuahine paari o te haafaufaa ore ra ia ˈna no te mea mea paruparu to ˈna tino i teie nei e aita ta ˈna e nehenehe faahou e poro mai na mua ˈˈe. Te vai atoa ra paha te hoê taeae  e toaruaru ra no te mea mea maˈimaˈi roa o ˈna e eita o ˈna e tae faahou i te mau putuputuraa. Na roto i te “parau maitai” e nehenehe ai oe e faaitoito ia raua. (Eph. 4:29) A faaite atu eaha ta oe i haapii mai i te hiˈoraa o te vahine ivi. Na roto i ta oe mau parau mahanahana mau, e ite raua e mauruuru Iehova i te mea maitai roa ˈˈe ta tatou e horoa. (Mas. 15:23; Tes. 1, 5:11) Ia haapopou outou ia vetahi ê no te mea maitai roa ˈˈe ta ratou e horoa ra no Iehova, noa ˈtu mea iti roa, te pee maite ra ïa outou i te mau taahiraa avae o Iesu.

21. Eaha ta oe i faaoti i te rave?

²¹ Auê tatou i te mauruuru no te mau faatiaraa o te oraraa o Iesu e vai ra i roto i te mau Evanelia! Maoti te reira e nehenehe ai tatou e pee maite i to ˈna mau taahiraa avae. E nehenehe tatou e hiˈopoa i te reira i roto i ta tatou iho haapiiraa Bibilia aore ra i te haamoriraa utuafare. E faufaahia tatou i ta tatou i haapii ia faaoraora tatou i te faatiaraa e ia faaohipa tatou i te reira i roto i to tatou oraraa. E pee tatou i te hiˈoraa o Iesu e e faaroo atoa tatou i ta ˈna i parau. I roto i te tumu parau haapiiraa i muri mai, e hiˈopoa mai tatou i te mau parau hopea ta Iesu i faahiti hou a pohe ai.