Eaha Iesu i faahiti ai i te Salamo 22:1 ta Davida i papai hou oia a pohe ai?

Hou Iesu a pohe ai, ua faahiti oia i teie mau parau: “To ˈu Atua, to ˈu Atua, eaha oe i faarue mai ai ia ˈu?” (Mat. 27:46) O te mau parau teie a Davida papaihia i roto i te Salamo 22:1. (Mar. 15:34) I to Iesu râ faahitiraa i teie mau parau, e ere te auraa aita o ˈna i tiaturi faahou i to ˈna Metua. Ua ite Iesu no te aha ua titauhia ia pohe o ˈna e ua ineine iho â oia i te horoa i to ˈna ora. (Mat. 16:21; 20:28) Ua ite atoa Iesu, i te taime e haapohehia ˈi o ˈna, eita Iehova e paruru faahou ia ˈna. (Ioba 1:10) I to Iehova tatararaa ta ˈna paruru, ua nehenehe Iesu e faaite i to ˈna taiva ore ma te pohe na roto i te mauiui rahi.—Mar. 14:35, 36.

Eaha Iesu i faahiti ai i te parau o teie Salamo? Aita tatou i papu roa, te vai ra râ te tahi mau tumu ta tatou e nehenehe e feruri. *

Ma te faahiti i teie mau parau, ua hinaaro anei Iesu e faaite i mua i te taata eita Iehova e tauturu ia ˈna? Ua titauhia iho â ia aufau Iesu i te hoo ma te ore e titau i te tauturu a Iehova. Ua tonohia Iesu i nia i te fenua no te riro ei taata e no te faaruru i “te pohe no te taata atoa.”—Heb. 2:9.

Ma te faahiti i te mau parau matamua o taua Salamo ra, ua hinaaro anei Iesu ia  haamanaˈo te taata i te taatoaraa o tera Salamo? I tera ra tau, e tamau aau na te mau ati Iuda i te mau Salamo. Ia faahitihia te tahi irava o te hoê Salamo, e haamanaˈo oioi ratou i te taatoaraa o taua Salamo ra. Mai te peu tera ta Iesu i hinaaro e rave, ua na reira ïa oia no te tauturu i ta ˈna mau pǐpǐ ia haamanaˈo i te rahiraa parau tohu no nia i to ˈna poheraa e vai ra i roto i taua Salamo ra. (Sal. 22:7, 8, 15, 16, 18, 24) Te faahanahana ra te mau irava hopea o teie Salamo ia Iehova e te faaite ra i to ˈna tiaraa arii i nia i te fenua taatoa.—Sal. 22:27-31.

Ma te faahiti i teie mau parau a Davida, ua hinaaro anei Iesu e faaite aita ta ˈna e hapa? Hou Iesu a pohe ai, ua haavahia o ˈna ma te tano ore e ua parihia i te faainoraa i te Atua. (Mat. 26:65, 66) Ua rave haavitivitihia te haavaraa i te maororaa po. Aita te Sunederi i haapao i te mau ture haamauhia no te mau haavaraa. (Mat. 26:59; Mar. 14:56-59) Ma te faahiti i teie mau parau, ua hinaaro paha Iesu e faaite aita e mea ta ˈna i rave e faautuahia ˈi o ˈna i te pohe.

Te haamanaˈo ra anei Iesu i te taata e noa ˈtu ua mauiui atoa Davida, ua ere oia i te farii maitai a Iehova? I to Davida papairaa i tera parau, e ere te auraa aita o ˈna i tiaturi faahou i te Atua. I muri noa mai, ua faaite Davida i to ˈna tiaturi e faaora iho â Iehova i to ˈna mau taata e ua haamaitai noa Iehova ia ˈna. (Sal. 22:23, 24, 27) No Iesu atoa, “te Tamaiti a Davida,” ua patitihia o ˈna i nia i te pou haamauiuiraa, e ere râ te auraa ua ere o ˈna i te farii maitai a Iehova.—Mat. 21:9.

Te faaite ra anei Iesu i to ˈna oto rahi, i te mea e ua tatara Iehova i ta ˈna paruru ia nehenehe o ˈna e faaite i to ˈna taiva ore? I te omuaraa, e ere te hinaaro o Iehova ia mauiui e ia pohe ta ˈna tamaiti. No te ohipa râ ta Adamu raua Eva i rave, ua titauhia ia pohe Iesu. Aita Iesu i rave i te ohipa ino. Ua titauhia râ ia mauiui e ia pohe o ˈna no te faaite e haavare ta Satani e no te hoo faahou mai i te huitaata i te hara e te pohe. (Mar. 8:31; Pet. 1, 2:21-24) I te taime noa Iehova e tatara ˈi i ta ˈna paruru e nehenehe ai Iesu e na reira.

Ua hinaaro anei Iesu e tauturu i ta ˈna mau pǐpǐ ia feruri i te tumu Iehova i farii ai ia pohe o ˈna i nia i te pou haamauiuiraa? * Ua ite Iesu mea rahi te turori, ia haapohehia o ˈna mai te hoê taata ino. (Kor. 1, 1:23) Ia feruri râ ta ˈna mau pǐpǐ i te tumu mau e haapohehia ˈi o ˈna, e taa ïa ia ratou i te auraa mau o te reira. (Gal. 3:13, 14) I muri iho, e hiˈo ratou ia ˈna mai te hoê faaora, eiaha râ mai te hoê taata ohipa ino.

Aita tatou i papu no te aha Iesu i faahiti ai i te Salamo 22:1. Ua taa râ ia ˈna e te mea ta ˈna e rave ra, no te faatupu ïa i te hinaaro o te Atua. I muri noa mai i to ˈna faahitiraa i teie Salamo, ua na ô Iesu: “Ua hope ia ˈu i te rave i ta oe i ani mai!” (Ioa. 19:30; Luka 22:37) Oia mau, i te tatararaa Iehova i ta ˈna paruru, ua nehenehe Iesu e rave i te mea i tonohia mai ai o ˈna i nia i te fenua. Ua nehenehe atoa Iesu e faatupu i te mau mea i papaihia no nia ia ˈna i “roto i te ture a Mose, te mau peropheta e te mau Salamo.”—Luka 24:44.