1. Mea nafea te hoê taata Samaria i te faaiteraa i te mauruuru a faaora ˈi Iesu ia ˈna?

 UA ROOHIA hoê ahuru taata i te maˈi lepera e aita e ravea no te faaora i to ratou maˈi. I te tahi mahana, ua ite atu ratou ia Iesu, te Orometua Rahi i te atea. I faaroo na ratou ua faaora Iesu i te mau huru maˈi e ua tiaturi e mana to ˈna no te faaora ia ratou. Pii atura ratou: “E Iesu e, Orometua, aroha mai ia matou!” Ora ihora to ratou maˈi. Mea papu ua mauruuru roa ratou pauroa i to Iesu aroha hamani maitai. Hoê râ, aita ïa i faatupu noa, ua faaite roa ˈtu râ i to ˈna mauruuru * ia Iesu. Aita tera taata Samaria i taiâ i te faahanahana i te Atua “ma te reo puai.”—Luka 17:12-19.

2-3. (a) No te aha e mea fifi ai ia faaite i te mauruuru? (b) Eaha ta tatou e hiˈopoa mai?

² Mai te taata Samaria, e hinaaro atoa tatou e faaite i te mauruuru i te feia hamani maitai. I te tahi râ taime, e moˈe ia tatou i te faaite i to tatou mauruuru na roto i te parau e te ohipa.

³ I roto i teie haapiiraa, e hiˈopoa tatou no te aha mea faufaa ia faaite i te mauruuru. E huti mai tatou i te haapiiraa i te hiˈoraa o te tahi mau taata i tahito tei faaite i te mauruuru e oia atoa tei ore i na reira. Hau atu â, e horoahia mai te tahi mau ravea no te faaite i te mauruuru.

4-5. No te aha tatou e faaite ai i te mauruuru?

⁴ Ua vaiiho mai Iehova i te hiˈoraa ia ite tatou e nafea ia faaite i te mauruuru. Ua haamaitai o ˈna i te feia ta ˈna e au ra. (Sam. 2, 22:21; Sal. 13:6; Mat. 10:40, 41) Te faaitoito mai ra te Bibilia ia “pee i te haerea o te Atua mai te tamarii herehia.” (Eph. 5:1) E faaite ïa tatou i te mauruuru no te pee i te hiˈoraa o Iehova.

⁵ Te tahi atu tumu tatou e faaite ai i te mauruuru, o te oaoa ïa ta te reira e faatupu. E au te faaiteraa i te mauruuru i te hoê maa au maitai ta tatou e amu e o vetahi ê. Ia ite tatou e te mauruuru ra vetahi i ta tatou i rave, e oaoa tatou. Ia haamauruuru tatou, e oaoa vetahi ê. E ite te taata ta tatou i haamauruuru aita ta ˈna mau tutavaraa i faufaa ore. Ei faahopearaa, e piri roa ˈtu â to tatou auhoaraa e tera taata.

6. No te aha te mau parau haamauruuru e au ai i te hoê apara auro?

⁶ Mea faufaa roa ia faaite i te mauruuru. Te na ô ra te Bibilia: “Mai te lemoni auro i roto i te vairaa ario ra, o te parau ïa ia parauhia i te taime mau ra.” (Mas. 25:11) A feruri na i te nehenehe e te faufaa rahi o te hoê apara auro i roto i to ˈna vairaa ario! Eaha to outou huru ia pûpûhia mai tera ô na outou? E haamauruuru ïa outou ma te faahiti i te parau maitai. Mai te hoê apara auro e vai maoro, eita ta outou mau parau haamauruuru e moˈe i te taata.

7. Ia au i te Salamo 27:4, mea nafea Davida e te tahi atu mau papai salamo i te faaiteraa i to ratou mauruuru?

⁷ I tahito ra, ua faaite e rave rahi tavini a te Atua i to ratou mauruuru. O Davida, te hoê o ratou. (A taio i te Salamo 27:4.) Ua haafaufaa rahi o ˈna i te  haamoriraa mau e ua faaite roa mai na roto i ta ˈna mau ohipa. Ua haapue rahi Davida i te taoˈa no te patu i te hiero. Ua faaite atoa te huaai a Asapha i te mauruuru na roto i te papairaa i te mau salamo, aore ra himene arueraa. I roto i te hoê himene, ua haamauruuru ratou i te Atua e ua haafaahiahia i te mau “ohipa taa ê” a Iehova. (Sal. 75:1) Ua faaite papu Davida e ta Asapha huaai i to ratou mauruuru rahi ia Iehova no te mau haamaitairaa atoa ta ratou i fanaˈo. A feruri na e nafea outou e faaite ai i te mauruuru ma te pee i te hiˈoraa o tera mau papai salamo?

8-9. Mea nafea Paulo i te haafaufaaraa i to ˈna mau taeae e tuahine, e eaha te faahopearaa?

⁸ Ua haafaufaa rahi te aposetolo Paulo i to ˈna mau taeae e tuahine na roto i ta ˈna mau parau. I roto i ta ˈna mau pure, ua haamauruuru noa Paulo i te Atua no ratou. I roto i na 15 irava matamua o te Roma 16, ua faahiti Paulo e 27 o to ˈna mau hoa Kerisetiano. Ua haamanaˈo taa ê Paulo ia Periseka raua Akuila, “mai pohe hoi raua” no ˈna e ua faahiti atoa ia Phebe tei paruru na hoi i te taeae e rave rahi, e ia Paulo atoa. Ua haapopou oia i tera mau taeae e tuahine herehia e te itoito rahi.

⁹ Ua ite Paulo e mea tia ore teie mau taeae e tuahine. I te hopearaa o ta ˈna rata i to Roma, ua tiatonu Paulo i nia i to ratou mau huru maitatai. Eita e ore ua itoitohia teie mau Kerisetiano a taiohia ˈi te mau parau haapopouraa a Paulo i mua i te amuiraa. Mea papu ua piri roa ˈtu â to ratou auhoaraa e o Paulo. E outou, te faaite tamau ra anei outou i te mauruuru no te mau ohipa maitai ravehia e te mau mero o ta outou amuiraa?

10. Eaha te haapii mai i ta Iesu raveraa no te faaite i te mauruuru i ta ˈna mau pǐpǐ?

¹⁰ I roto i ta ˈna mau rata i te tahi mau amuiraa no Asia Iti, ua faaite Iesu i to ˈna mauruuru no te ohipa a ta ˈna mau pǐpǐ. Ua haamata oia i ta ˈna rata i te amuiraa i Tuatira ma te parau: “Ua ite au i ta oe mau ohipa, e to oe here e to oe faaroo e ta oe taviniraa e to oe faaoromai tamau, e mea rahi aˈe ta oe mau ohipa i rave iho nei i ta oe i rave na i te omuaraa.” (Apo. 2:19) Aita Iesu i faahiti noa i te rahi o ta ratou ohipa, ua haapopou atoa râ no to ratou mau huru maitatai. Noa ˈtu ua titauhia ia aˈo Iesu vetahi i Tuatira, ua haamata e ua faaoti noa Iesu i ta ˈna rata ma te haapopou ia ratou. (Apo. 2:25-28) E mana to Iesu ei upoo o te mau amuiraa atoa. Aita i titauhia ia haamauruuru mai o ˈna ia tatou no te ohipa i ravehia. Tera râ, ua haafaufaa o ˈna i te reira. Auê ïa hiˈoraa maitai roa no te mau matahiapo!

11. Ia au i te Hebera 12:16, mea nafea Esau i te hiˈoraa i te mau mea moˈa?

¹¹ Ma te peapea aita vetahi feia i tahito i faaite i te mauruuru. Noa ˈtu ua paari mai Esau i pihai iho i to ˈna nau metua tei here e tei auraro ia Iehova, aita o ˈna i faaite i te mauruuru no te mau mea moˈa. (A taio i te Hebera 12:16.) Ma te ore e feruri, ua hoo o ˈna i ta ˈna tufaa matahiapo i to ˈna teina, Iakoba,  no te hoê noa maa. (Gen. 25:30-34) Ua tatarahapa roa Esau, na ˈna noa iho i haafaufaa ore i ta ˈna tufaa matahiapo.

12-13. Mea nafea to Iseraela faaiteraa i te mauruuru ore, e eaha tei tupu?

¹² I nehenehe atoa na te mau Iseraela e faaite i te mauruuru i roto e rave rahi tupuraa. Ua tiamâ mai hoi ratou i te faatîtîraa i Aiphiti i muri aˈe i to Iehova faatupuraa i na ati ahuru. Ua faaora-atoa-hia ratou a haamou ai Iehova i te nuu a Pharao i te miti Uteute. No te haamauruuru i te Atua, ua arue ratou ia Iehova ma te hoê himene upootiaraa. Ua tamau noa anei ratou i te faaite i te mauruuru?

¹³ I mua i te mau fifi apî, aita to Iseraela i haamanaˈo i te mau ohipa maitai ta Iehova i rave no ratou. Ua faaite papu ratou i to ratou mauruuru ore. (Sal. 106:7) “Ua amuamu ihora taua amuiraa atoa o te tamarii a Iseraela ra ia Mose raua o Aarona.” Te tupuraa mau râ, o Iehova ta ratou i amuamu. (Exo. 16:2, 8) No to te Atua inoino, ua tohu ihora oia e pohe tera uˈi taatoa i te medebara, o Iosua anaˈe raua Kaleba te toe mai. (Num. 14:22-24; 26:65) E nafea tatou ia ape i tera mau hiˈoraa ino a pee atu ai i te mau hiˈoraa maitai?

14-15. (a) E nafea te mau hoa faaipoipo ia faaite i te mauruuru te tahi i te tahi? (b) E nafea te mau metua ia haapii i ta ratou tamarii i te mauruuru?

¹⁴ I roto i te utuafare. E faufaahia te utuafare taatoa ia faaite te mau mero atoa i te mauruuru. Ia haamauruuru tamau na hoa faaipoipo te tahi i te tahi, e piri atu â raua. E mea ohie atoa ia faaore i te hapa a te tahi e te tahi. Eita atoa te tane e hiˈo noa i te mau ohipa maitai a ta ˈna vahine, e faaite roa ˈtu râ oia i to ˈna mauruuru. (Mas. 31:10, 28) E e na reira atoa te vahine maitai i nia i ta ˈna tane.

¹⁵ A haamanaˈo te haapao ra te tamarii i ta outou e parau e e rave ra. E te mau metua, e nafea ia haapii i ta outou tamarii ia faaite i te mauruuru? A haamauruuru atu i te taime e tia ˈi! A haapii atu i te haamauruuru i te taata a tauturuhia ˈi ratou. Ia taa atoa ia ratou no  roto roa mai te aau te parau haamauruuru o te nehenehe e faaitoito ia vetahi ê. Ua parau Clary te hoê vahine apî: “I te 32raa o to ˈna matahiti, ua tia i to ˈu mama ia haapao i ta ˈna e toru tamarii o ˈna anaˈe. A raea ˈi to ˈu e 32 matahiti, ua feruri au i te fifi ta ˈna i faaruru. Ua haamauruuru vau ia ˈna no ta ˈna mau haapaeraa no te aupuru ia matou tootoru. I muri aˈe to ˈna parauraa mai ua putapû roa to ˈna aau i ta ˈu mau parau, pinepine o ˈna i te manaˈonaˈo i te reira no te faaitoito ia ˈna.”

16. Mea nafea te faaiteraa i te mauruuru i te faaitoitoraa ia vetahi ê? A faataa.

¹⁶ I roto i te amuiraa. E itoitohia to tatou mau taeae ia haamauruuru tatou ia ratou. A feruri na i te tupuraa o Jorge, te hoê matahiapo e 28 matahiti. Ua roohia o ˈna i te hoê maˈi rahi. Hoê avaˈe i te maoro, aita o ˈna i apiti i te mau putuputuraa. A hoˈi atu ai o ˈna, aita atoa i tia ia ˈna ia faaea no te taatoaraa o te porotarama. Te na ô ra Jorge: “Ua hepohepo roa vau e ua manaˈo aita to ˈu e faufaa eita hoi e tia ia ˈu ia rave i ta ˈu tuhaa i roto i te amuiraa. I muri aˈe râ i te hoê putuputuraa, ua haamauruuru mai te hoê taeae no te hiˈoraa maitai ta ˈu i faatupu i nia i to ˈna utuafare. Ua oaoa e ua itoito-rahi-hia ratou i ta ˈu mau oreroraa parau i te mau matahiti i mairi. Ua putapû roa vau e ua tahe aˈera to ˈu roimata. Ua faaitoito mau tera mau parau ia ˈu!”

17. Ia au i te Kolosa 3:15, e nafea tatou e faaite ai i te mauruuru ia Iehova no to ˈna aau horoa noa?

¹⁷ I to tatou Atua horoa noa. Te horoa rahi mai nei Iehova i te maa pae varua na tatou. Te fanaˈo nei tatou i te mau aˈoraa tano maitai na roto i ta tatou mau putuputuraa, vea e reni natirara. Aita anei outou i faaroo i te hoê oreroraa parau, i taio i te hoê tumu parau e i mataitai i te hoê haapurororaa a na ô atu ai, ‘Tera iho â ta ˈu i hinaaro’? E nafea tatou e faaite ai i te mauruuru ia Iehova? (A taio i te Kolosa 3:15.) Na roto ïa i ta tatou mau pure tuutuu ore no ta ˈna mau ô maitatai.—Iak. 1:17.

18. E nafea tatou ia faaite atoa i te mauruuru ia Iehova no ta tatou mau Piha a te Basileia?

¹⁸ E faaite atoa tatou i te mauruuru ia Iehova a atuatu maite ai i ta tatou mau  vahi haamoriraa. E haapao maitai te feia e faaohipa ra i te mau mauhaa haapurororaa ia ore te reira ia ino. Ia atuatu-maitai-hia te mau Piha a te Basileia, e vai maoro atu â te reira e e iti mai te mau tataîraa. E nehenehe ïa te moni e faaohipahia no te patu e no te faaapî i te tahi atu mau Piha a te Basileia ati aˈe te ao.

19. Eaha te haapii mai i te tupuraa o te hoê tiaau haaati e ta ˈna vahine?

¹⁹ I te feia e haa rahi ra no tatou. E nehenehe ta tatou mau haamauruururaa e faataui i te manaˈo o te hoê taata o te faaruru ra i te fifi rahi. Teie te tahi tupuraa: I muri aˈe i to te hoê tiaau haaati e ta ˈna vahine pororaa i te hoê mahana taatoa i te tau toˈetoˈe, ua hoˈi raua i te fare ma te rohirohi. Ua varea te vahine i te taoto i roto i to ˈna pereue mahanahana. I te poipoi aˈe ua parau o ˈna i ta ˈna tane eita e tia faahou ia ˈna ia rave i tera taviniraa. E i tera iho â mahana, tae maira hoê rata na ˈna no ǒ mai i te amaa. Te haapopouhia ra te tuahine no to ˈna faaoromai tamau i roto i te taviniraa. E ere hoi i te mea ohie ia tauiui i te vahi faaearaa i tera e tera hebedoma. Ua na ô mai ta ˈna tane: “Ua oaoa mau o ˈna i tera haapopouraa e aita o ˈna i faahiti faahou e faarue i te taviniraa haaati. I te tahi taime, o vau tei haaparuparu, na ˈna râ i faaitoito mai ia tamau noa.” Ua faaea noa raua i roto i tera taviniraa haaati fatata e 40 matahiti te maoro.

20. Eaha ta tatou e nehenehe e rave i te mau mahana atoa, e no te aha?

²⁰ I te mau mahana atoa, eita anei tatou e nehenehe e faaite i te mauruuru ma te parau e te ohipa atoa? E tauturu paha ta tatou mau tutavaraa e haapopouraa haavare ore i te tahi taata ia faaruru i te fifi e te hepohepo o te oraraa. E faatupu ta tatou mau haamauruururaa i te auhoaraa o te vai maoro. Te mea faufaa roa ˈtu â, e pee tatou i te hiˈoraa o Iehova, to tatou Metua î i te here e te aau horoa noa.