1. Eaha te tano ia parau no nia i to tatou mau taeae apî?

 E TE mau taeae apî, mea rahi ta outou e nehenehe e rave i roto i te amuiraa. Mea puai e mea pautuutu maitai outou. (Mas. 20:29) Te tauturu rahi ra outou i to outou mau taeae e tuahine. Peneiaˈe te hinaaro ra outou e riro ei tavini tauturu, tera râ, te manaˈo ra paha vetahi mea apî roa outou aore ra aita outou i ineine atura no te amo i te hopoia rahi. Noa ˈtu mea apî outou, te vai ra te mea ta outou e nehenehe e rave i teie nei â e tiaturihia ˈi outou i roto i te amuiraa.

2. Eaha ta tatou e hiˈopoa mai i roto i teie tumu parau haapiiraa?

² I roto i teie tumu parau haapiiraa, e hiˈopoa mai tatou i te hiˈoraa o te arii Davida. E hiˈo poto atoa mai tatou i te tahi mau tupuraa o te oraraa o Asa e Iehosaphata, e piti arii no Iuda. E hiˈopoa atoa mai tatou i te tahi mau fifi ta ratou e toru i farerei, eaha ta ratou i rave i roto i tera mau tupuraa e eaha te haapiiraa no te mau taeae apî.

3. E nafea te mau taurearea e tauturu ai i te mau ruhiruhia i roto i te amuiraa?

³ I to ˈna apîraa, ua haapii Davida i te toroa e auhia e te taata. Mea papu, e auhoaraa piri to ˈna e o Iehova. Ua tutava rahi atoa o ˈna ia aravihi atu â ei taata hauti upaupa  e ua faaohipa o ˈna i tera ite no te tauturu ia Saula, te arii ta te Atua i maiti. (Sam. 1, 16:16, 23) Taurearea ma, e ite anei to outou o te nehenehe e faaohipahia no te tauturu i roto i te amuiraa? Te vai ra paha te mau ruhiruhia o te hinaaro ra ia haapiihia ratou e nafea ia faaohipa i ta ratou mau matini roro uira, no ta ratou iho haapiiraa Bibilia e no te mau putuputuraa. Ua ite outou e nafea ia faaohipa i teie mau matini, e nehenehe ïa outou e tauturu ia ratou!

4. Mai ia Davida eaha te mau huru maitatai ta te mau taeae apî e faatupu? (A hiˈo i te hohoˈa i te api matamua.)

⁴ I te roaraa o to ˈna oraraa, ua faaite Davida e nehenehe o ˈna e tiaturihia. I to ˈna apîraa, ua haapao maitai o ˈna i te mau mamoe a to ˈna metua tane, mea atâta roa tera ohipa. Teie ta Davida i parau i te arii Saula: “I tiai na hoi to tavini i te mamoe a to ˈna ra metua, e ua haere maira te liona e te daba, e ua haru i te fanauˈa no taua nǎnǎ ra, ua auau to tavini i te reira e ua taparahi, e ua rave mai i taua fanauˈa ra no roto i te vaha.” (Sam. 1, 17:34, 35) Ua ite Davida mea faufaa ia aupuru i te mau mamoe e ma te itoito ua paruru o ˈna ia ratou. E pee te mau taeae apî i te hiˈoraa o Davida ma te rave maitai i te ohipa i horoahia ia ratou.

5. Ia au i te Salamo 25:14, eaha te mea faufaa roa ˈˈe ta te mau taeae apî e nehenehe e rave?

⁵ Ua faatupu Davida i te auhoaraa piri roa e o Iehova. No ˈna, mea faufaa aˈe tera auhoaraa i to ˈna itoito aore ra to ˈna ite i te hauti i te upaupa. Aita noa Davida i hiˈo ia Iehova mai to ˈna Atua, mai to ˈna atoa râ hoa. E hoa piri roa raua. (A taio i te Salamo 25:14.) E te mau taeae apî, te mea faufaa roa ˈˈe ta outou e nehenehe e rave, o te haapuairaa ïa i to outou auhoaraa e to outou Metua i te raˈi. Ia na reira outou, e fanaˈo ïa outou hau atu â hopoia i roto i te amuiraa.

6. Eaha ta te tahi mau taata i manaˈo no Davida?

⁶ Te vai ra te taata tei manaˈo mea apî roa Davida e eita o ˈna e nehenehe e tiaturihia. Ei hiˈoraa, i to Davida parauraa e haere o ˈna e aro ia Golia, ua tamata te arii Saula i te tapea ia ˈna ma te parau: “E tamaiti apî hoi oe.” (Sam. 1, 17:31-33) Na mua noa ˈtu i te reira, ua faahapa to Davida iho tuaana ia ˈna no to ˈna  haapao ore. (Sam. 1, 17:26-30) E ere roa râ tera te manaˈo o Iehova ia Davida. Mea matau maitai o ˈna ia Davida. Ma te turui i nia i to ˈna hoa ra o Iehova, ua haapohe Davida ia Golia.—Sam. 1, 17:45, 48-51.

7. Eaha te haapii mai i te tupuraa o Davida?

⁷ Eaha te haapii mai i te hiˈoraa o Davida? Mea titauhia te faaoromai. E ere paha i te mea ohie no te feia tei matau ia oe i to oe tamariiraa ia hiˈo ia oe mai te hoê taata paari. Ia papu maitai râ ia oe e ere to oe huru rapaeau ta Iehova e hiˈo ra. Ua matau maitai o ˈna ia oe e ua ite atoa eaha te maraa ia oe ia rave. (Sam. 1, 16:7) A haapuai i to oe auhoaraa e te Atua. Ua na reira Davida ma te hiˈopoa maite i te mau mea ta Iehova i poiete. Ua feruri maite o ˈna i ta te reira e haapii mai ra no nia i te Atua poiete. (Sal. 8:3, 4; 139:14; Roma 1:20) E nehenehe atoa oe e ani i te puai ia Iehova. Ei hiˈoraa, te faaooo ra anei to oe mau hoa haapiiraa ia oe no te mea e Ite no Iehova oe? A pure ia Iehova ia tauturu ia oe i mua i tera mau faaoooraa, a faaohipa i te mau manaˈo tauturu ta oe e ite mai i roto i te Bibilia, ta tatou mau papai e video. I te mau taime atoa e ite ai oe i te tauturu a Iehova, e rahi atu â to oe tiaturi ia ˈna. Hau atu â, ia ite vetahi ê e te turui ra oe i nia ia Iehova, e tiaturi ratou ia oe!

8-9. Eaha tei tauturu ia Davida ia tiai noa a faaariihia ˈi o ˈna e eaha ta te mau taeae apî e haapii i to ˈna hiˈoraa?

⁸ Teie te tahi atu tupuraa ta Davida i farerei. I muri aˈe i to ˈna faatavairaahia ei arii, ua titauhia ia tiai o ˈna e rave rahi matahiti no te riro mai ei arii no Iuda. (Sam. 1, 16:13; Sam. 2, 2:3, 4) Eaha râ tei tauturu ia ˈna ia tiai noa? Aita Davida i haaparuparu ia ˈna, ua tiatonu noa râ i te mau mea ta ˈna e nehenehe e rave. Ei hiˈoraa, a ora ˈi o ˈna i te fenua o te Philiseti, ua haere Davida e aro i te mau enemi o Iseraela. Ma te na reira, ua paruru o ˈna i te mau otia o te tuhaa fenua o Iuda.—Sam. 1, 27:1-12.

⁹ E te mau taeae apî, mea rahi ta outou e haapii mai i te hiˈoraa o Davida. A rave i te maraa ia outou no te tavini i to outou mau taeae. Teie te hiˈoraa o te taeae Ricardo. * Mai to ˈna apîraa mai â, ua hinaaro o ˈna e tavini ei pionie tamau. Teie râ, aita o ˈna i ineine atura. Aita râ o ˈna i haaparuparu aore ra i riri. Ua horoa rahi o ˈna i to ˈna taime i roto i te taviniraa. Te na ô ra oia: “Ua titauhia iho â ia haamaitai au i ta ˈu taviniraa. Ua tutava vau i te hoˈi faahou e farerei i te mau taata i farii i te tauaparau. Ua tutava atoa vau i te faaineine i ta ˈu mau farerei-faahou-raa. Ua haamata atoa vau i te hoê haapiiraa Bibilia. A haamaitai noa ˈi au i ta ˈu taviniraa, ua piri atu â vau i ta ˈu fa.” I teie nei, e pionie tamau e e tavini tauturu Ricardo.

10. Ua nafea Davida hou a rave ai i te hoê faaotiraa rahi?

¹⁰ Teie te hoê tupuraa ê atu ta Davida i farerei i te taime a horo ê ai oia e to ˈna mau taata. Ua vaiiho ratou i to ratou mau utuafare no te haere i te tamaˈi. I te revaraa ratou, ua tomo te enemi i to ratou fare e ua haru i te mau vahine e te mau tamarii atoa. Ei taata tamaˈi aravihi, ua nehenehe Davida e manaˈo e nehenehe oia e faaora mai ia ratou. Aita  râ, ua imi o ˈna i te aratairaa ia Iehova ra. Maoti te tauturu a te tahuˈa ra o Abiatara, ua ui Davida ia Iehova: “E auau anei au i teie nei nǎnǎ?” Ua parau Iehova ia Davida ia na reira e ua haapapu atu e manuïa ta ˈna ohipa. (Sam. 1, 30:7-10) Eaha ïa te haapiiraa?

11. E nafea ia rave i te faaotiraa maitai?

¹¹ Hou a rave ai i te faaotiraa, a ani i te manaˈo o vetahi ê. E nehenehe oe e ani i te manaˈo o to oe metua e o te mau matahiapo aravihi. Mai ia Iehova e tiaturi ra i teie mau tane faatoroahia, e tiaturi atoa oe ia ratou! No Iehova, e “ô” teie mau tane no te amuiraa. (Eph. 4:8) Ia pee oe i to ratou faaroo e ia haapao oe i te mau manaˈo î i te paari ta ratou e horoa mai, e rave oe i te faaotiraa maitai. E hiˈo anaˈe eaha te haapii mai i te hiˈoraa o te arii Asa.

12. Eaha te mau huru maitatai o te arii Asa a haamata ˈi o ˈna i te faatere?

¹² I to ˈna apîraa, e taata haehaa e te itoito te arii Asa. Ei hiˈoraa i te poheraa to ˈna metua tane o Abia, ua riro mai Asa ei arii e ua tatara oia i te mau idolo i te fenua. Ua parau atoa oia ia Iuda ia “imi i te Atua no to ratou hui tupuna ia Iehova” e ia haapao i “te ture e te mau parau atoa.” (Par. 2, 14:1-7) E i to Zera no Kusa e te hoê nuu hoê mirioni faehau haereraa mai e aro ia Iuda, ua ani Asa i te tauturu ia Iehova ma te parau: “E Iehova e, e ere i te mea rave taiata ia oe ia tauturu mai i te taata puai ore, i ropu i te feia atoa e rave rahi: e tauturu mai ia matou, e to matou Atua, e Iehova; te tiaturi nei hoi matou i nia ia oe.” Te faaite ra teie pure e ua tiaturi Asa e nehenehe iho â Iehova e faaora ia ˈna e to ˈna nunaa. Ua tiaturi Asa i to ˈna Metua i te raˈi e “pohe ihora to Kusa ia Iehova.”—Par. 2, 14:8-12.

13. Eaha tei tupu no Asa i muri aˈe e no te aha?

¹³ Mea riaria iho â ia aro i te hoê nuu hoê mirioni faehau. Maoti râ te tauturu a Iehova, ua upootia mai Asa. Tera râ, i te ûraa Asa i te hoê peapea iti aˈe, aita oia i ani i te tauturu a Iehova. I te haamǎtaˈuraahia oia e te arii Baasa no Iseraela, imi atura Asa i te tauturu a te arii  no Arama e ua aratai tera faaotiraa i te ati. Na roto i te peropheta Hanani, ua parau Iehova ia Asa: “No te mea, ua tiaturi oe i te arii o Arama ra, aore i tiaturi i to Atua ra ia Iehova, e teie nei, e ora te nuu o te arii o Arama i to rima na.” Mai tera mahana, aita Asa i ite faahou i te hau. (Par. 2, 16:7, 9; Arii 1, 15:32) Eaha ïa te haapiiraa?

14. E nafea oe e turui ai i nia ia Iehova, e ia au i te Timoteo 1, 4:12, e hiˈohia oe mai te aha?

¹⁴ A faaite noa i te haehaa e a tamau i te tiaturi ia Iehova. I to oe bapetizoraahia, e faaroo puai to oe. Ua tiaturi oe ia Iehova e ma te oaoa, ua farii oia ia oe i roto i to ˈna utuafare. Teie nei râ mea faufaa roa ia tamau i te turui i nia ia Iehova. Mea ohie paha ia turui i nia ia Iehova ia titauhia ia rave i te faaotiraa rahi. E nafea râ tatou i roto i te tahi atu mau tupuraa? Mea faufaa roa ia tiaturi ia Iehova ia rave oe i te faaotiraa no nia anei i te faaanaanataeraa, te ohipa e te mau opuaraa. Eiaha e turui i nia i to oe iho paari! A imi i te mau aratairaa Bibilia e tano i to oe tupuraa e a faaohipa i ta oe e haapii mai. (Mas. 3:5, 6) Ia na reira oe, e faaoaoa oe ia Iehova e e tiaturihia oe i roto i te amuiraa.—A taio i te Timoteo 1, 4:12.

15. Ia au i te Paraleipomeno 2, 18:1-3; 19:2, eaha te hape a te arii Iehosaphata?

¹⁵ Mai ia tatou paatoa, e taata tia ore oe e e hape atoa oe. Eiaha râ te reira ia tapea ia oe ia rave i te mau mea atoa e maraa ia oe no te tavini ia Iehova. A feruri na i te hiˈoraa o te arii Iehosaphata. Mea rahi to ˈna huru maitatai. I to ˈna apîraa, ua “imi [oia] i te Atua o tana metua, e ua haapao i ta ˈna parau.” Ua tono atoa oia i te huiarii na te mau oire o Iuda no te haapii i te nunaa no nia ia Iehova. (Par. 2, 17:4, 7) I te tahi râ mau taime, ua rave Iehosaphata i te faaotiraa ino. Ei faahopearaa, ua tamaˈihia o ˈna e te hoê tia a Iehova. (A taio i te Paraleipomeno 2, 18:1-3; 19:2.) Eaha te haapiiraa e huti mai i tera hiˈoraa?

16. Eaha te haapii mai i te hiˈoraa o Rajiv?

¹⁶ A farii e a faaohipa i te aˈoraa. Mai te  tahi atu mau taurearea, e ere paha i te mea ohie no oe ia tuu i te taviniraa na mua roa i roto i to oe oraraa. Eiaha râ e haaparuparu! Teie te hiˈoraa o te taeae Rajiv. Te na ô ra oia: “I to ˈu apîraa, aita ta ˈu e fa i roto i te oraraa. Mai e rave rahi feia apî, mea anaanatae aˈe na ˈu te tuaro e te arearearaa i te haereraa i te mau putuputuraa e i roto i te taviniraa.” Eaha râ tei tauturu ia Rajiv? O te aˈoraa ïa a te hoê matahiapo hamani maitai. Te parau ra Rajiv: “Ua haaferuri oia ia ˈu i te aratairaa e vai ra i roto i te Timoteo 1, 4:8.” Ua farii Rajiv i te aˈoraa ma te haehaa e ua hiˈopoa eaha te mea faufaa mau i roto i to ˈna oraraa. Ua faaoti o ˈna i te tuu i te mau fa pae varua na mua roa e, tau matahiti i muri aˈe, ua riro mai o ˈna ei tavini tauturu.

17. Eaha te manaˈo o te feia paari no nia i te mau taeae apî e tavini ra ia Iehova?

¹⁷ E te mau taeae apî, mea here na te feia paari ia outou o te tavini ra ia Iehova e o ratou “ma te aau hoê.” (Zeph. 3:9) Te haafaufaa ra ratou i to outou itoito, puai e hinaaro e rave i te ohipa o tei horoahia ia outou. Mea faufaa outou no ratou!—Ioa. 1, 2:14.

18. Ia au i te Maseli 27:11, eaha to Iehova manaˈo i te mau taeae apî e tavini ra ia ˈna?

¹⁸ E te mau taeae apî, te here e te tiaturi nei Iehova ia outou! Ua tohu oia e, ia tae i te mau mahana hopea, e pûpû te feia apî ia ratou. (Sal. 110:1-3) Ua ite o ˈna te here e te hinaaro nei outou e tavini ia ˈna ma te aau atoa. A faaoromai e eiaha e haaparuparu! Ia hape outou, a farii ia haapiihia e ia aˈohia outou mai te huru ra e no ǒ mai ia Iehova ra te reira. (Heb. 12:6) A haapao maitai i te hopoia i horoahia ˈtu ia outou e, te mea faufaa roa ˈˈe, a faaoaoa i to outou Metua i te raˈi.—A taio i te Maseli 27:11.