1. Eaha te mau fifi ta te mau tavini a Iehova e faaruru nei?

 TE FAARURU ra anei oe i te hoê fifi rahi? Ua mauiui paha oe i te parau aore ra te ohipa a te tahi i roto i te amuiraa. (Iak. 3:2) Te faaooo ra paha to oe mau hoa ohipa aore ra hoa haapiiraa ia oe no te mea te tavini ra oe ia Iehova. (Pet. 1, 4:3, 4) Te hinaaro ra paha to oe mau fetii ia faaea oe i te apiti i te mau putuputuraa aore ra ia faaea oe i te poro. (Mat. 10:35, 36) Ia teimaha roa te fifi, e hinaaro roa paha ïa oe e faaea i te tavini ia Iehova. Noa ˈtu râ te fifi ta oe e faaruru ra, e horoa mai iho â Iehova i te paari no te rave i te ohipa maitai e te puai no te faaoromai tamau.

2. Ia au i te Roma 15:4, e nafea te taioraa i te Parau a te Atua e tauturu ai ia tatou?

² I roto i te Bibilia, ua haapapai Iehova i te hiˈoraa o te tahi o ta ˈna mau tavini tei faaoromai tamau i roto i te fifi ia huti tatou i te haapiiraa. Tera ta Iehova i turai i te aposetolo Paulo ia papai. (A taio i te Roma 15:4.) E tamahanahanahia e e itoitohia tatou ia taio i tera mau hiˈoraa. Tera râ, ia faufaahia tatou, eita e navai ia taio noa i te Bibilia. Mea titauhia ia vaiiho tatou i te Bibilia ia ohipa i nia i to tatou feruriraa e to tatou huru aau. Eaha te rave ia hinaaro tatou i te tauturu i roto i te hoê tupuraa? Teie te tahi ravea e maha tuhaa: (1) A pure, (2) A faaoraora i te aamu, (3) A feruriruri, e (4) A faaohipa i ta oe i taio. E tatara huˈahuˈa mai tatou i na tuhaa e maha * e e faaohipa tatou i tera ravea no te huti mai i te haapiiraa i te hiˈoraa o te arii Davida e te aposetolo Paulo.

3. Eaha te rave hou a taio ai i te Bibilia e no te aha?

 ³ (1) A pure. Hou a taio ai i te Bibilia, a ani ia Iehova ia tauturu ia oe ia ite e nafea oe e faufaahia ˈi i ta oe e taio ra. A ani ia Iehova ia tauturu ia oe ia ite mai i te aratairaa Bibilia o te tauturu ia oe ia ite eaha te rave i roto i te hoê fifi.—Phil. 4:6, 7; Iak. 1:5.

4. Eaha te tauturu ia oe ia faaoraora i te hoê aamu Bibilia?

⁴ (2) A faaoraora i te aamu. Ua horoa mai Iehova i te aravihi ia feruri i te mau mea ta tatou i ore i ite. No te faaoraora i te hoê aamu Bibilia, a feruri i te vahi e mai te mea ra e tei roto oe i te aamu. A tamata i te feruri eaha ta te taata i roto i te aamu i ite e eaha to ratou huru i tera taime.

5. Eaha te feruriruriraa, e e nafea ia feruriruri?

⁵ (3) A feruriruri. Te feruriruriraa, o te feruri-hohonu-raa ïa i te mea ta oe i taio e e nafea oe e faaohipa ˈi i te reira. E tauturu te reira ia oe ia faatuatiati i te mau manaˈo e ia taa maitai atu â i te mea ta oe e taio ra. Ia taio oe i te Bibilia ma te ore e feruriruri, mai te mea ra e tei mua oe i te hoê hohoˈa tâpûpûhia, e eita oe e tamata i te faatuatiati i te mau tuhaa rii atoa. Te feruriruriraa, o te tapiripiriraa ïa i tera mau tuhaa rii atoa tei tâpûpûhia ia noaa mai te hohoˈa o te omuaraa. No te tauturu ia oe ia feruriruri, e pahono oe i te tahi mau uiraa mai teie: ‘Eaha tei tauturu i te taata o te aamu i roto i to ˈna fifi? Mea nafea Iehova i te tautururaa ia ˈna? E nafea vau e faaohipa ˈi i ta ˈu i haapii no te faaoromai i te tamataraa?’

6. No te aha mea faufaa ia faaohipa tatou i ta tatou i haapii?

⁶ (4) A faaohipa i ta oe i taio. Ua parau Iesu ia ore tatou e faaohipa i ta tatou i haapii, e au ïa tatou i te hoê taata o tei faatia i to ˈna fare i nia i te one. E rohi oia, e mâuˈa noa râ te ohipa ta ˈna i rave. Ia tairi mai te mataˈi e ia tahe te pape pue, e marua to ˈna fare. (Mat. 7:24-27) Hoê â atoa no tatou, e mâuˈa noa ia pure, ia faaoraora i te aamu e ia feruriruri, aita râ i faaohipa i ta tatou i haapii. Ia faaruru tatou i te ati, aore ra te hamani-ino-raa, e iti mai to tatou faaroo. Tera râ, ia faaohipa tatou i ta tatou i haapii, e rave tatou i te faaotiraa maitai aˈe, e noaa te hau e e puai atu â to tatou faaroo. (Isa. 48:17, 18) Ma te faaohipa i te ravea e maha tuhaa ta tatou i hiˈopoa mai, e hiˈo tatou eaha te haapii mai i te hoê tupuraa ta te arii Davida i farerei.

7. Eaha te aamu Bibilia ta tatou e hiˈopoa mai i teie nei?

⁷ Ua rave aˈena anei te hoê hoa aore ra fetii to oe i te hoê ohipa i muri i to oe tua? E huti mai paha ïa oe i te haapiiraa i te aamu o Abasaloma, te tamaiti a te arii Davida, o tei rave i te hoê mea i muri i te tua o to ˈna metua tane e o tei tamata i te haru mai i te tiaraa arii.—Sam. 2, 15:5-14, 31; 18:6-14.

8. Eaha ta oe e rave no te fanaˈo i te tauturu a Iehova?

⁸ (1) A pure. A faaite ia Iehova eaha to oe huru i mua i te tupuraa ta oe i farerei. (Sal. 6:6-9) A haamahora maitai i to oe aau ia Iehova e a ani ia ˈna ia tauturu ia oe ia ite mai i te mau aratairaa o te tauturu ia oe ia ite eaha te rave i roto i tera tupuraa mauiui mau.

9. Eaha tei tupu i rotopu ia Davida e ia Abasaloma?

⁹ (2) A faaoraora i te aamu. A feruri i  tera mau tupuraa e a tamata i te ite eaha te huru o te arii Davida i roto i teie faatiaraa. Ua rave Abasaloma i te hoê ohipa e auhia ˈi oia e te nunaa. (Sam. 2, 15:7) I te tanoraa te taime no Abasaloma, tono atura oia i te taata na te fenua taatoa o Iseraela no te faaineine i te nunaa ia farii ia ˈna ei arii no ratou. Ua turai atoa oia ia Ahitophela, hoê taata aˈo e hoa piri no Davida, ia orure hau na muri ia ˈna. Ua faaarii Abasaloma ia ˈna iho e ua tamata i te haru e i te haapohe ia Davida o tei roohia paha i te maˈi rahi i tera taime. (Sal. 41:1-9) Ua faaroo Davida i tera opuaraa e ua faarue o ˈna i te oire o Ierusalema. Tae i te hoê mahana, ua aro te mau faehau a Abasaloma i te nuu a Davida. Ua pau te nuu orure hau e ua haapohehia Abasaloma te tamaiti a Davida.

10. Eaha ta te arii Davida i ore i rave?

¹⁰ I teie nei, a tamata i te feruri i te huru o Davida i to ˈna faarururaa i tera mau tupuraa atoa. Mea here na ˈna ia Abasaloma e mea tiaturi na ˈna ia Ahitophela. Tera râ, ua opua na taata ra i te rave i te mea ino i nia ia ˈna e ua tamata atoa i te haapohe ia ˈna. Ua mauiui roa Davida i ta raua i rave. I roto i tera tupuraa, ua nehenehe Davida e manaˈo e ua apiti atoa ˈtu te tahi o to ˈna mau hoa ia Abasaloma a manaˈo atu ai aita e nehenehe e tiaturi faahou ia ratou. Ua nehenehe oia e haapao noa ia ˈna a haamoˈe atu ai i te hoê fenua ê o ˈna anaˈe. Ua nehenehe atoa paha oia e toaruaru. Aita râ! Ua faaoromai noa Davida i tera tupuraa.

11. Eaha ta Davida i rave i roto i teie tupuraa fifi?

¹¹ (3) A feruriruri. Eaha ta oe i haapii mai i teie aamu? Eaha tei tauturu ia Davida i roto i to ˈna fifi? Aita Davida i ru, a rave atu ai i te faaotiraa maamaa. Aita atoa râ oia i faataere, ua ani oia ia Iehova i te tauturu. Ua ani atoa oia i to ˈna mau hoa ia tauturu ia ˈna e ua rave oioi atoa oia i te ohipa ta ˈna i faaoti i te rave. Noa ˈtu to ˈna mauiui rahi, aita oia i faaea i te tiaturi ia vetahi ê e aita atoa i faatupu i te hae. Ua tamau oia i te tiaturi ia Iehova e i to ˈna mau hoa.

12. Eaha ta Iehova i rave no te tauturu ia Davida?

¹² Mea nafea to Iehova tautururaa ia Davida? Ia maimi oe, e haapii mai oe e ua horoa Iehova i te puai hinaarohia e Davida no te faaoromai i to ˈna ati. (Sal. 3:1-8; upoo parau) Ua haamaitai Iehova i te mau faaotiraa a Davida e ua tauturu oia i to Davida mau hoa taiva ore a aro ai ratou no te paruru i to ratou arii.

13. E nafea ia pee i te hiˈoraa o Davida ia inoino tatou i te hoê taata? (Mataio 18:15-17)

¹³ (4) A faaohipa i ta oe i taio. A ui ia oe iho: ‘E nafea vau e pee ai i te hiˈoraa o Davida?’ Eiaha e faataere i te faatitiaifaro i te fifi. E faaohipa paha oe i te aratairaa a Iesu i roto i te Mataio pene 18, tei te huru o te tupuraa. (A taio i te Mataio 18:15-17.) Ia riri oe, eiaha e ru i te rave i te faaotiraa. A pure ia Iehova ia tamǎrû i to aau e ia horoa mai i te paari no te ite eaha te rave. Eiaha e faaea i te tiaturi i to oe mau hoa, a farii râ i ta ratou tauturu. (Mas. 17:17) E te mea faufaa roa ˈtu â, a pee i te mau aratairaa ta Iehova e horoa ra i roto i ta ˈna Parau.—Mas. 3:5, 6.

14. Eaha te tahi mau tupuraa e ite ai oe i te tauturu i roto i te Timoteo 2, 1:12-16; 4:6-11, 17-22?

¹⁴ Te faaruru ra paha oe i te patoiraa a to oe mau fetii, aore ra te ora ra paha oe  i te hoê fenua te haafifihia ra aore ra ua opanihia te ohipa a te mau Ite no Iehova. E itoitohia paha oe ia taio i te Timoteo 2, 1:12-16 e 4:6-11, 17-22. * Ua papai Paulo i teie mau irava i roto i te fare tapearaa.

15. Eaha ta oe e nehenehe e ani ia Iehova?

¹⁵ (1) A pure. Hou a taio ai i tera mau irava, a faaite ia Iehova i to oe fifi e eaha to oe huru aau i mua i tera tupuraa. A faataa pauroa ˈtu ia ˈna e a ani ia ˈna ia tauturu ia oe ia ite mai i te aratairaa i roto i te mau faatiaraa no nia i te mau fifi ta Paulo i faaruru, o te tauturu ia oe ia ite eaha te rave.

16. Eaha tei tupu no Paulo?

¹⁶ (2) A faaoraora i te aamu. A feruri o oe tera i roto i te tupuraa o Paulo. Ua ponaohia oia i te fifi i roto i te hoê fare tapearaa i Roma. Ua mau aˈena oia i te fare tapearaa na mua ˈˈe. I teie râ taime, ua papu ia ˈna e e haapohehia oia. Ua faarue te tahi o to ˈna mau hoa ia ˈna. Ua paruparu atoa to ˈna tino.—Tim. 2, 1:15.

17. Eaha ta Paulo i ore i rave?

¹⁷ Ua nehenehe Paulo e haamau i to ˈna feruriraa i nia i tei tupu na mua ˈtu ma te feruri ahani oia i maiti i te hoê oraraa ê, eita ïa oia e tapeahia. Ua nehenehe oia e riri i te mau tane no Asia tei faarue ia ˈna, e ua nehenehe atoa oia e faaea i te tiaturi i te tahi atu o to ˈna mau hoa. Aita râ Paulo i na reira. No te aha i papu ai ia ˈna eita to ˈna mau hoa e taiva ia ˈna e e haamaitai Iehova ia ˈna?

18. Eaha ta Paulo i rave i roto i to ˈna fifi?

¹⁸ (3) A feruriruri. Eaha tei tauturu ia Paulo i roto i to ˈna fifi? Noa ˈtu ua ite Paulo e fatata roa o ˈna i te pohe, aita i moˈe ia ˈna e o te faahanahanaraa ia Iehova te mea faufaa roa ˈˈe, e ua feruri noa o ˈna e nafea ia faaitoito ia vetahi ê. Ua turui oia i nia ia Iehova ma te tamau i te pure. (Tim. 2, 1:3) Aita Paulo i manaˈo noa i te mau taeae tei faarue ia ˈna. Ua faaite râ oia i to ˈna mauruuru rahi i to ˈna mau hoa taiva ore, tei turu ia ˈna ma te here. Hau atu â, ua tamau Paulo i te feruriruri i te Parau a te Atua. (Tim. 2, 3:16, 17; 4:13) Te mea faufaa roa ˈtu â, ua papu ia Paulo e mea here na Iehova e na Iesu ia ˈna, aita raua i faarue ia ˈna e e haamaitai raua ia ˈna no to ˈna taiva ore.

19. Mea nafea to Iehova tautururaa ia Paulo?

¹⁹ Ua faaara Iehova ia Paulo e hamani-ino-hia oia no to ˈna tiaraa Kerisetiano. (Ohi. 21:11-13) Mea nafea to Iehova tautururaa ia Paulo? Ua pahono oia i ta ˈna mau pure e ua haapuai atoa ia ˈna. (Tim. 2, 4:17) Ua papu ia Paulo e noaa ia ˈna te haamaitairaa i rohi ai oia. Ua turai atoa Iehova i te mau hoa taiva ore o Paulo ia tauturu ia ˈna.

20. Ia au i te Roma 8:38, 39, e nafea ia pee i te hiˈoraa o Paulo?

²⁰ (4) A faaohipa i ta oe i taio. A ui ia oe iho: ‘E nafea vau e pee ai i te hiˈoraa o Paulo?’ Mai ia Paulo, e haamanaˈo anaˈe e nehenehe tatou e hamani-ino-hia no to tatou faaroo. (Mar. 10:29, 30) Ia ore e taiva i mua i te fifi, mea titauhia ia turui i nia ia Iehova na roto i te pure e ia tamau i te feruriruri i te Parau a te Atua. E haamanaˈo anaˈe o te faahanahanaraa ia Iehova te mea faufaa roa ˈˈe. Ia papu ia tatou e eita roa Iehova e faarue ia tatou e aita hoê noa ˈˈe mea e nehenehe e faataa ê ia tatou i to ˈna here.—A taio i te Roma 8:38, 39; Heb. 13:5, 6.

21. Eaha tei tauturu ia Hector e ia Aya i roto i to raua fifi?

²¹ Noa ˈtu eaha te tupuraa, e nehenehe te mau hiˈoraa Bibilia e faaitoito ia tatou. E taurearea no Initonetia o Hector, aita to ˈna metua e tavini ra ia Iehova. Te faaite ra o ˈna e o te hiˈoraa o Ruta te turai ra ia ˈna ia haapii no nia ia Iehova e ia tavini ia ˈna. Te parau atoa ra Aya, hoê pionie i Tapone, ua tauturu te aamu o Iona ia ˈna ia ore e taiâ faahou i te poro i te vahi taata.

22. E nafea oe e faufaahia ˈi i te mau aamu Bibilia haruharuhia e te anairaa “A pee i to ratou faaroo”?

²² Ihea oe e ite ai i te hiˈoraa Bibilia o te faaitoito ia oe? I roto ïa i ta tatou mau video, haruharuraa mea faaroo noa, e te anairaa “A pee i to ratou faaroo.” * E faaoraora te reira i te aamu Bibilia. Hou a mataitai, a faaroo e a taio ai i tera mau aamu, a ani ia Iehova i te tauturu no te ite mai i te mau haapiiraa faufaa roa o ta oe e nehenehe e faaohipa. A feruri mai te mea ra e o oe tera i roto i te aamu. A feruriruri eaha ta te mau tavini haapao maitai a Iehova i rave e eaha tei tauturu ia ratou i roto i to ratou fifi. I muri iho, a faaohipa i ta oe i haapii mai i roto i to oe tupuraa. A haamauruuru ia Iehova no te tauturu ta ˈna e horoa noa mai ra e a faaite i to oe mauruuru ma te faaitoito e ma te turu ia vetahi ê.

23. Ia au i te Isaia 41:10, 13, eaha ta Iehova e haapapu mai ra ia tatou?

²³ Mea fifi te oraraa i roto i teie ao faaterehia e Satani. (Tim. 2, 3:1) Eiaha râ e hepohepo e e mǎtaˈu. Te ite ra Iehova i ta tatou e faaruru ra. Ia hiˈa tatou, te haapapu ra oia e mau iho â tatou i to ˈna rima atau puai. (A taio i te Isaia 41:10, 13.) Ma te tiaturi papu e tauturu oia ia tatou, e noaa mai te puai no roto mai i te Bibilia, e te itoito no te faaoromai tamau i te mau fifi atoa.