Te faaohipa nei vetahi o tatou i te mau ravea apî no te tauaparau i to ratou mau fetii aore ra hoa Kerisetiano. Ei Kerisetiano feruriraa paari râ, e haamanaˈo tatou i teie aˈoraa: “E hiˈo atea noa tei haapao ra i te ino e ua ape ihora! e haere mârô â te ite ore e pohe atura.”—Mas. 27:12.

Te hinaaro ra Iehova e paruru ia tatou. Eita ïa tatou e apiti atu i te feia o te faatupu ra i te amahamaha, o tei tiavaruhia aore ra o te hopoi haere ra i te parau tano ore. (Roma 16:17; Kor. 1, 5:11; Ioa. 2, 10, 11) Te vai ra i roto i te amuiraa o te ore e auraro ra i te mau ture a Iehova. (Tim. 2, 2:20, 21) E haamanaˈo râ tatou e ere i te mea ohie ia maiti i te mau hoa na roto i tera mau ravea.

Mea faufaa roa ia haapao maitai tatou o vai ta tatou e tauaparau ra, i roto iho â râ i te hoê pǔpǔ tauaparauraa rarahi. Ua faaô vetahi mau Kerisetiano ia ratou i roto i taua mau pǔpǔ ra e ua fifihia ratou. E nafea hoê Kerisetiano e ara ˈi mai te peu hoê hanere aore ra tausani mero i roto i tera pǔpǔ? Aita hoi oia i matau i te taatoaraa. Te na ô ra te Salamo 26:4: “Aore au i parahi i roto i te mau taata haapao ore i te parau, aore hoi i amui i roto i te feia haavare.” Te haamanaˈo ra teie irava e mea maitai ia tauaparau tatou i te feia noa ta tatou i matau.

I roto atoa i te hoê pǔpǔ huru nainai rii, e ara te hoê Kerisetiano i te taime e te ohipa ta ˈna e rave ra i roto i taua pǔpǔ ra. Aita e faufaa ia pahono i te mau poroi atoa e tae mai ra. Ua faaara Paulo ia Timoteo no nia i te mau taata afai parau e o te faaô ra i roto i ta vera ma ohipa. (Tim. 1, 5:13) I teie mahana, te vai atoa ra tera huru feia i nia i te mau ravea roro uira.

Eita te hoê Kerisetiano feruriraa paari e faaino aore ra e faaô atu i roto i tera huru aparauraa. Eita oia e faahiti haere i te tahi mau parau no nia i to ˈna mau hoa Kerisetiano. (Sal. 15:3; Mas. 20:19) Eita atoa oia e faahiti i te aamu e huru ê ai te taata aore ra i te parau aita i papu. (Eph. 4:25) Te fanaˈo nei tatou e rave rahi haamaramaramaraa aore ra parau faaite papu i nia i ta tatou reni jw.org e na roto i te JW Haapurororaa teata.

Te faaohipa nei vetahi mau Kerisetiano i te ravea tauaparauraa no te tapihooraa, no te faaamuamu i te taata aore ra no te tihepu i te rave ohipa. Aita te reira e tuati ra i te haamoriraa ia Iehova. E ere te Kerisetiano i te “nounou moni” eita ïa o ˈna e imi ia monihia o ˈna i nia i te tua o to ˈna mau taeae e tuahine.—Heb. 13:5.

Mea here na tatou i to tatou mau taeae e tuahine e ia roohia ratou i te ati e tauturu e e faaitoito iho â tatou ia ratou. (Iak. 2:15, 16) Eita râ tatou e faaohipa i te mau ravea apî no te titau i te moni. Ia na reira tatou, e haafifi tatou i te faanahoraa ta te tomite amaa e te amuiraa e rave ra no te tauturu i tei roohia i te ati. (Tim. 1, 5:3, 4, 9, 10, 16) Eiaha tatou e horoa i te manaˈo e ua anihia mai tatou ia haapao i tera ohipa.

No te faahanahana i te Atua, e ara tatou i ta tatou huru faaohiparaa i te mau ravea apî e e feruri tatou i te mau fifi e nehenehe e tupu mai.—Kor. 1, 10:31.