Ua uiui paha vetahi i teie uiraa a taio ai i teie aamu ma te ore e feruri maite atu. Teie râ, i roto i teie mau irava, e piti tane taa maitai tei piihia Mephiboseta. E faufaahia tatou a hiˈopoa faahou ai i tei tupu.

E hitu tamaiti e e piti tamahine ta te arii Saula no Iseraela. O Ionatana ta ˈna tamaiti matamua. I muri iho, ua fanau Rizepa, te vahine faaipoipo tavini a Saula, i te hoê tamaiti piihia Mephiboseta. Mea maitai ia tapao e o Mephiboseta atoa te iˈoa o te tamaiti a Ionatana. Hoê â ïa iˈoa to te tamaiti a te arii Saula e to ta ˈna mootua, o Mephiboseta.

I taua taime ra, mea hae na Saula i to Gibeona e ua opua o ˈna e haapohe ia ratou paatoa. E rave rahi tei pohe. Papu, e ere roa ˈtu i te mea tano ta ˈna i rave. No te aha? No te mea i te tau o Iosua, ua faaau te mau tavana Iseraela i te hoê faufaa no te hau i to Gibeona.—Ios. 9:3-27.

Ua vai noa teie faufaa no te hau i te roaraa o te tau o te arii Saula. Ua imi râ te arii i te haamou i to Gibeona, aita ïa o ˈna i faatura i tera faanahoraa. Ei faahopearaa, “ua hara o Saula e to ˈna utuafare i te taparahiraa i te taata.” (Sam. 2, 21:1) I muri aˈe, ua riro mai Davida ei arii. Ua faatia te toea o to Gibeona ia Davida eaha ta Saula i rave i nia ia ratou. Ua ani Davida ia ratou eaha te rave no te iriti ê i teie hara ia haamaitai Iehova i to ˈna nunaa. Aita to Gibeona i ani i te moni, ua ani râ ratou ia tuuhia mai ia ratou ra e hitu o te mau tamaiti a te taata o “tei tamata . . . i te haamou ia [ratou]” e ia haapohehia teie mau tamaiti. (Num. 35:30, 31) Ua farii Davida i ta ratou aniraa.—Sam. 2, 21:2-6.

I te hoê mahana, ua pohe Saula raua Ionatana i te tamaˈi. Ua ora noa râ te tamaiti a Ionatana o Mephiboseta. I to ˈna tamariiraa, ua marua o ˈna e pirioihia ˈtura oia. Aita ïa o ˈna i nehenehe e apiti i te haamouraa ta to ˈna papa ruau i faatupu i nia i to Gibeona. Ua ati maite Davida ia Ionatana ei hoa piri. Ua faufaahia ïa te huaai o Ionatana i tera auhoaraa oia atoa o Mephiboseta, te tamaiti a Ionatana. (Sam. 1, 18:1; 20:42) Ia au i te Bibilia: “Ua aroha . . . te arii [Davida] ia Mephiboseta, te tamaiti a Ionatana, te mootua a Saula, no te parau ta Davida raua Ionatana, te tamaiti a Saula, i horeo i mua ia Iehova.”—Sam. 2, 21:7.

Ua haa Davida mai ta to Gibeona i ani. Ua rave o ˈna e piti tamaiti a Saula, o Mephiboseta hoê. E ua rave-atoa-hia e pae mootua a Saula. (Sam. 2, 21:8, 9) Maoti ta Davida i rave, ua ore roa te faahopearaa ino o te hara a Saula.

E ere noa teie faatiaraa i te hoê aamu. Ua faataa maitai te ture a te Atua: “Eiaha te mau tamarii e haapohehia no tei ravehia e to ratou mau metua tane.” (Deut. 24:16) Aita Iehova i farii i tei ravehia i nia i na tamaiti a Saula e ta ˈna e pae mootua ahani aita ratou i hara. Te parau atoa ra te Ture: “E haapohehia te taata no ta ˈna iho hara.” E au ra e ua apiti na tamaiti a Saula e ta ˈna e pae mootua i te taparahiraa i to Gibeona. Ei faahopearaa, ua haapohehia ratou no ta ratou iho hara.

Te haapapu mai ra teie aamu e aita ta te hoê taata e nehenehe e imi i te mau otoheraa no te hara ta ˈna i rave ma te manaˈo e ma te parau e ua pee noa o ˈna i te mau aratairaa. Teie ta te hoê parau paari e faaite ra: “A haamanina i te eˈa e na reira ˈi to avae i te haere, e e riro to oe mau eˈa ei mea papu.”—Mas. 4:24-27; Eph. 5:15.