1. Eaha ta Iesu i parau no nia i te mau taoˈa i te raˈi?

 EITA te mau ô atoa e itehia e to tatou mata. O te mau ô ite-ore-hia te mea faufaa roa ˈˈe! I roto i te Aˈoraa i nia i te mouˈa, ua parau Iesu mea faufaa aˈe te mau taoˈa i te raˈi i te mau taoˈa materia. No reira oia i parau ai i muri iho: “Te vahi hoi to reira ta oe taoˈa, to reira atoa to oe aau.” (Mat. 6:19-21) Te auraa, e turai mai to tatou aau ia tapi i te mea ta tatou e haafaufaa ra. E haapue tatou i te taoˈa i “te raˈi” ma te imi i te roo maitai i te aro o te Atua. Ua faataa Iesu eita roa taua mau faufaa ra e pê aore ra e haruhia.

2. (a) Ia au i te Korinetia 2, 4:17, 18, eaha ta Paulo i faaitoito mai ia tiatonu noa? (b) Eaha ta tatou e hiˈopoa i roto i teie haapiiraa?

² Ua faaitoito te aposetolo Paulo ia tatou ia “tiatonu noa . . . i te mau mea ite-ore-hia.” (A taio i te Korinetia 2, 4:17, 18.) I roto i teie “mau mea ite-ore-hia,” te vai ra iho â ïa te mau haamaitairaa i roto i te ao apî. I roto râ i teie tumu parau haapiiraa, e hiˈopoa mai tatou e maha atoa ô ite-ore-hia ta tatou e fanaˈo i teie nei â: Te auhoaraa e te Atua, te pure, te tauturu a te varua moˈa e te turu a Iehova e ta te tuhaa o te raˈi o ta ˈna faanahonahoraa i roto i ta tatou taviniraa. E ite atoa mai tatou e nafea ia faaite i to tatou mauruuru no teie mau ô ite-ore-hia.

3. Eaha te ô ite-ore-hia faufaa roa ˈˈe e maoti te aha e fanaˈo ai tatou i te reira?

³ O te auhoaraa e o Iehova te ô ite-ore-hia faufaa roa ˈˈe. (Sal. 25:14) Mea nafea te taata hara e nehenehe ai e riro ei hoa no te hoê Atua moˈa? Maoti ïa te tusia taraehara o  Iesu o “te faaore roa i te hara a to te ao nei!” (Ioa. 1:29) Hou Iesu a pohe ai, ua ite Iehova e tapea ta ˈna Tamaiti i to ˈna haapao maitai e tae noa ˈtu i te pohe no te faaora i te huitaata. Tera te tumu i riro mai ai te feia tei ora na mua ˈˈe i te Mesia ei hoa no te Atua.—Roma 3:25.

4. O vai te tahi mau taata o tei riro ei hoa no te Atua hou Iesu a haere mai ai i nia i te fenua?

⁴ I rotopu i te mau taata o tei riro ei hoa no te Atua hou Iesu a haere mai ai i nia i te fenua, te vai ra o Aberahama, te hoê taata faaroo puai. Noa ˈtu ua mairi 1 000 matahiti i muri aˈe i te poheraa o Aberahama, ua faahiti Iehova ia ˈna mai to ˈna “hoa.” (Isa. 41:8) Noa ˈtu ïa ua pohe to ˈna mau hoa piri, eita ratou e moˈe ia Iehova! Tei roto noa â ïa Aberahama i te mehara o Iehova. (Luka 20:37, 38) Te tahi atu hiˈoraa, o Ioba ïa. Hou te hoê rururaa a te mau melahi i te raˈi, ua faahiti Iehova ia Ioba mai te hoê “taata parau-tia e te paieti, e te mǎtaˈuraa i te Atua, e te faarueraa i te ino.” (Ioba 1:6-8) A feruri atoa na i te manaˈo o Iehova no nia ia Daniela o tei tavini ma te haapao maitai ia ˈna hau atu i te 80 matahiti i rotopu i te feia o tei haamori i te atua ěê. E toru taime to te melahi haereraa mai e haapapu ia Daniela, e taata “here-rahi-hia” oia e te Atua. (Dan. 9:23; 10:11, 19) Mea papu, te tiai ru nei Iehova i te mahana e faahoˈi mai ai o ˈna i to ˈna mau hoa here i te ora!—Ioba 14:15.

5. Eaha te titauhia ia rave no te riro ei hoa no Iehova?

⁵ I teie mahana, e mirioni taata tia ore o te fanaˈo nei i te auhoaraa maitai e o Iehova. E rave rahi tane, vahine e tamarii na te ao nei o te haapapu nei na roto i to ratou haerea e hoa ratou no te Atua. E faafatata Iehova i “te feia parau-tia” anaˈe. (Mas. 3:32) Maoti te faaroo i te tusia taraehara o Iesu i riro ai teie mau taata ei feia parau-tia e ei hoa no te Atua. Maoti atoa tera ravea e farii ai Iehova ia pûpû tatou i to tatou ora ia ˈna a bapetizohia ˈtu ai. I tera taime, e tahoê ïa tatou i na mirioni taata pûpûhia e bapetizohia o tei riro ei hoa piri no te Atua Mana hope!

6. E nafea ia faaite i te mauruuru no to tatou auhoaraa piri e te Atua?

⁶ E nafea ia faaite i te mauruuru no to tatou auhoaraa piri e te Atua? Mai ia Aberahama e Ioba, e tavini anaˈe ia Iehova ma te haapao maitai a ora noa ˈi tatou i roto i teie ao ino. Mai ia Daniela, e faaite anaˈe mea faufaa aˈe to tatou auhoaraa e te Atua i to tatou iho ora. (Dan. 6:7, 10, 16, 22) Maoti te tauturu a Iehova, e roaa ia tatou ia faaoromai i te mau huru fifi atoa a vai piri noa ˈi ia ˈna.—Phil. 4:13.

7. (a) Ia au i te Maseli 15:8, eaha to Iehova huru a pure ai tatou ia ˈna? (b) E nafea Iehova ia pahono i ta tatou mau pure?

⁷ O te pure te tahi atu ô ite-ore-hia. No te riro ei hoa no te hoê taata, e titauhia ia faaite te tahi te tahi i to raua manaˈo e huru aau. Hoê â atoa no to tatou auhoaraa e o Iehova. E paraparau mai Iehova ia tatou na roto i ta ˈna Parau a faaite atoa mai ai i to ˈna mau manaˈo e huru aau. E na reira atoa tatou a pure ai ia ˈna. Mea au roa na Iehova e faaroo i ta tatou mau pure. (A taio i te Maseli 15:8.) No to ˈna râ here, eita Iehova e faaroo noa, e pahono atoa râ oia i te reira. I te tahi taime, e pahono oioi mai oia. Area te tahi atu taime, e titauhia paha ia tiai ma te tamau  noa i te pure. Tera râ, e horoa mai iho â oia i te pahonoraa maitai roa ˈˈe i te taime tano. Mea taa ê paha te pahonoraa a te Atua i ta tatou i manaˈo. Ei hiˈoraa, eita Iehova e tatara i to tatou fifi, e horoa mai râ oia i te paari e te puai ia “faaoromai maite” tatou i te reira.—Kor. 1, 10:13.

8. E nafea ia faaite i to tatou mauruuru no te ô faito ore o te pure?

⁸ E nafea ia faaite i to tatou mauruuru no te ô faito ore o te pure? Te tahi ravea, o te haapaoraa ïa i te aˈoraa a te Atua ia “tamau i te pure.” (Tes. 1, 5:17) Eita Iehova e faahepo ia tatou ia pure ia ˈna. A faatura noa ˈi i to tatou tiamâraa ia maiti, ua faaitoito atoa mai oia ia “tamau maite i te pure.” (Roma 12:12) No reira, e faaite anaˈe i to tatou mauruuru ma te pure ia ˈna i te roaraa o te mahana. Eiaha atoa e haamoˈe i te haamauruuru e i te arue ia Iehova.—Sal. 145:2, 3.

9. Eaha te huru o te tahi taeae no te fanaˈoraa ia pure ia Iehova e eaha to outou manaˈo i tera ô?

⁹ Maoro noa ˈtu â tatou i te taviniraa ia Iehova, e ite tatou mea nafea oia ia pahono i ta tatou mau pure e e rahi roa ˈtu â to tatou mauruuru no te fanaˈoraa ia pure. A hiˈo na ia taeae Chris 47 matahiti i roto i te taviniraa taime taatoa. Te na ô ra oia: “Mea au mau ia ara mai i te poipoi roa no te pure. E taime au mau tera no te paraparau ia Iehova. A hiti noa mai ai te mahana, e itehia te nehenehe o te mau mea atoa ta ˈna i poiete! E turai mai te reira ia ˈu ia haamauruuru ia Iehova no ta ˈna mau ô atoa mai te fanaˈoraa ia pure ia ˈna. I te hopearaa o te mahana, mea au mau ia pure e ia haere e taoto ma te hoê manaˈo haava maitai.”

10. No te aha tatou e haafaufaa ˈi i te varua moˈa o te Atua?

¹⁰ O te varua moˈa o te Atua te tahi atu ô ite-ore-hia. Ua faaitoito mai Iesu ia tamau i te ani i te varua moˈa. (Luka 11:9, 13) Maoti to ˈna varua, e horoa mai Iehova i te puai o “te hau ê i to te taata nei.”  (Kor. 2, 4:7; Ohi. 1:8) E tauturu mai te varua moˈa ia tatou ia faaoromai tamau i te mau fifi.

11. E nafea te varua moˈa e tauturu ai ia tatou?

¹¹ E tauturu mai te varua moˈa i roto i ta tatou taviniraa i te Atua. Maoti te varua moˈa, e nehenehe tatou e aravihi atu â no te amo i ta tatou mau hopoia. No reira, mea maitai ia farii maoti noa te tauturu a te varua moˈa i tia ˈi ia tatou ia rave i tera e tera ohipa.

12. Ia au i te Salamo 139:23, 24, no te aha tatou e ani ai i te tauturu a te varua moˈa?

¹² E nafea ˈtu â ia faaite i to tatou mauruuru no te tauturu a te varua moˈa? E ani anaˈe i te varua moˈa no te hiˈopoa i to tatou aau e manaˈo. (A taio i te Salamo 139:23, 24.) Maoti to ˈna varua moˈa, e nehenehe Iehova e faaite mai i to tatou mau manaˈo e hinaaro tia ore. A na reira ˈi oia, e ani faahou anaˈe i te varua moˈa no te patoi i tera mau manaˈo e hinaaro tia ore. Eita roa tatou e hinaaro e rave i te hoê noa ˈˈe mea e ore ai Iehova e horoa mai i to ˈna varua moˈa!—Eph. 4:30.

13. E nafea ia rahi roa ˈtu â to tatou mauruuru no te varua moˈa?

¹³ E rahi roa ˈtu â to tatou mauruuru no te varua moˈa ia feruri tatou i te ohipa ta ˈna e faatupu ra i teie mahana. Hou Iesu a hoˈi ai i te raˈi, teie ta ˈna i parau i ta ˈna mau pǐpǐ: “E noaa râ ia outou te puai ia tae mai te varua moˈa i nia iho ia outou, e e riro outou ei ite no ˈu . . . e tae noa ˈtu i te hopea o te fenua.” (Ohi. 1:8) Ua tupu teie mau parau ma te faahiahia mau! Maoti te tauturu a te varua moˈa, ua haaputuputuhia e vaˈu mirioni e te afa taata no te mau nunaa atoa no te tavini ia Iehova. Te ite atoa nei tatou i te hau no te mea te tauturu ra te varua moˈa ia tatou ia faatupu i te mau huru maitatai mai te here, te oaoa, te hau, te faaoromai, te hamani maitai, te maitai, te faaroo, te mǎrû e te haavîraa ia tatou  iho. (Gal. 5:22, 23) Auê tatou i te mauruuru i te varua moˈa ta Iehova e horoa mai ra!

14. Eaha te tauturu ite-ore-hia ta tatou e fanaˈo i roto i te ohipa pororaa?

¹⁴ E fanaˈoraa ite-ore-hia ia ohipa amui e o Iehova, e oia atoa e te tuhaa o te raˈi o ta ˈna faanahonahoraa. (Kor. 2, 6:1) E na reira tatou i te mau taime atoa e apiti ai tatou i te ohipa e faariro i te taata ei pǐpǐ na te Mesia. No reira Paulo i parau ai, e hoa ohipa o ˈna e te feia poro atoa no te Atua! (Kor. 1, 3:9) I muri aˈe i to ˈna faaueraa ia “faariro i te taata o te mau nunaa atoa ei pǐpǐ” na ˈna, ua parau Iesu: “Tei pihai iho vau ia outou.” (Mat. 28:19, 20) A apiti ai i te ohipa pororaa, e riro atoa ïa tatou ei hoa ohipa no Iesu. Hau atu â, e haamaitairaa atoa ia arataihia tatou e te mau melahi a faaite noa ˈi tatou i te “parau apî oaoa e te mure ore . . . i te feia e parahi ra i te fenua.”—Apo. 14:6.

15. A horoa i te tahi hiˈoraa Bibilia o te faaite ra i te tuhaa faufaa a Iehova i roto i ta tatou ohipa pororaa.

¹⁵ Eaha te ohipa e ravehia nei maoti te turu a Iehova e ta te tuhaa o te raˈi o ta ˈna faanahonahoraa? A poro ai tatou, e topa te tahi mau huero o te poroi o te Faatereraa arii i roto i te mau aau farii a tupu maite atu ai te reira. (Mat. 13:18, 23) Na vai e faatupu e e faahotu i teie mau huero o te parau mau? Ua faataa Iesu, eita te hoê taata e nehenehe e riro ei pǐpǐ na ˈna “aita anaˈe te Metua . . . e faafatata mai ia ˈna.” (Ioa. 6:44) O te ohipa ïa i itehia a poro ai Paulo i te tahi mau vahine i rapae mai i te oire o Philipi. Teie ta te Bibilia e parau ra no nia i te tahi vahine o Ludia te iˈoa: “Haamahorahora roa ihora Iehova i to ˈna aau ia farii oia i te mau parau a Paulo.” (Ohi. 16:13-15) Mai ia Ludia, e mirioni taata ta Iehova e faafatata mai ia ˈna ra.

16. O vai te tia ia faahanahana no te mau maitai atoa ta tatou e fanaˈo i roto i te taviniraa?

¹⁶ O vai te tia ia faahanahana ua manuïa anaˈe tatou i roto i te taviniraa? Ua pahono Paulo i tera uiraa a papai ai o ˈna i te amuiraa o Korinetia. Te na ô ra oia: “Ua tanu vau, ua pîpî Apolo i te pape. Na te Atua râ i tamau i te faatupu. No reira, e ere roa ˈtu tei te taata tanu ra te hanahana, e ere atoa tei te taata pîpî pape ra, tei te Atua râ o te faatupu.” (Kor. 1, 3:6, 7) Mai ia Paulo, e faahanahana anaˈe ia Iehova no te mau maitai atoa ta tatou e ite i roto i te taviniraa.

17. E nafea ia faaite i to tatou mauruuru i te fanaˈoraa taa ê ia ohipa amui e te Atua, te Mesia e te mau melahi?

¹⁷ E nafea ia faaite i to tatou mauruuru i te fanaˈoraa taa ê ia ohipa amui e te Atua, te Mesia e te mau melahi? Ma te itoito, e imi anaˈe i te mau ravea atoa no te faaite i te parau apî oaoa ia vetahi ê. Ua rau te raveraa ta tatou e nehenehe e faaohipa mai te pororaa i “mua i te taata e na tera e tera fare.” (Ohi. 20:20) E rave rahi atoa taeae e tuahine o te poro nei ma te faanaho-ore-hia. Ma te mata oaoa, e aroha ˈtu ratou i te tahi taata a faatupu atu ai i te hoê aparauraa. Ia farii taua taata ra, e tamata ratou i te faaô atu i te poroi o te Faatereraa arii.

18-19. (a) E nafea tatou ia pîpî i te mau huero o te parau mau i te pape? (b) Mea nafea Iehova i te tautururaa i te hoê piahi Bibilia?

¹⁸ Ei hoa ohipa no te Atua, e titauhia ia tatou ia ueue e ia pîpî atoa i te mau huero  o te parau mau i te pape. Ua anaanatae anaˈe te tahi taata i te poroi, e tutava anaˈe i te hoˈi e farerei i taua taata ra no te haamata i te hoê haapiiraa Bibilia. Ia ore tatou ia vata, e faanaho anaˈe ia haere te tahi atu taata poro. A nuu ai te haapiiraa Bibilia i mua, e oaoa roa tatou i te ite mea nafea Iehova ia taui i te aau e te manaˈo o te taata.

¹⁹ Ta te hiˈoraa o te tahi taeae tei riro na ei tahuˈa na mua ˈˈe i Afirika apatoa e faaite ra. Mea au roa na ˈna i ta ˈna e haapii ra i roto i te Bibilia. Aita râ o ˈna i farii ohie i ta te Bibilia e parau ra no nia i te peu e uiui i te feia pohe. (Deut. 18:10-12) I muri mai, ua vaiiho oia ia Iehova ia taui i to ˈna huru feruriraa e faarue atura i tera peu. Ua ere râ te taeae i ta ˈna imiraa moni. E 60 matahiti to ˈna i teie nei e te na ô ra oia: “Te mauruuru mau ra vau i te mau mea atoa ta te mau Ite no Iehova i rave no ˈu mai te tautururaa mai ia imi i te hoê ohipa. Te mea faufaa roa ˈtu râ, te haamauruuru nei au ia Iehova i te tautururaa mai ia ˈu ia tamâ i to ˈu oraraa e ia riro mai ei tavini bapetizohia no ˈna.”

20. Eaha ta tatou i faaoti papu i te rave?

²⁰ I roto i teie haapiiraa, ua hiˈopoa mai tatou e maha ô, aore ra maitai, ite-ore-hia ta tatou e fanaˈo nei. O to tatou auhoaraa piri e o Iehova te ô faufaa roa ˈˈe. Maoti te reira e fanaˈo ai tatou i te tahi atu mau maitai ite-ore-hia mai te faafatataraa ia ˈna na roto i te pure, te fanaˈoraa i te tauturu a te varua moˈa e te ohipa-amui-raa e to te raˈi. E faaoti papu anaˈe i te faaite i to tatou mauruuru no teie mau ô ite-ore-hia. Hau atu â, e tamau anaˈe i te haamauruuru ia Iehova, to tatou Hoa mau!