1-2. Ia au i te Salamo 40:5, eaha te mau ô ta Iehova i ho mai e no te aha tatou e hiˈopoa ˈi i te reira?

 E ATUA horoa noa Iehova. A feruri na i te tahi mau ô ta ˈna i ho mai: Te hoê fenua nehenehe, te hoê roro faahiahia e ta ˈna Parau faufaa mau, oia hoi te Bibilia. Ua ho mai ïa Iehova i te hoê nohoraa, ua hamani ia tatou e te faanahoraa faahiahia ia feruri e ia paraparau e ua horoa atoa mai i te pahonoraa o te mau uiraa faufaa roa ˈˈe.—A taio i te Salamo 40:5.

² I roto i teie tumu parau, e hiˈopoa maite mai tatou i na ô e toru nei. Rahi atu â tatou i te feruri maite i te reira, rahi atu â tatou i te mauruuru e i te hinaaro e faaoaoa i to tatou Atua poiete ra o Iehova. (Apo. 4:11) E ineine atoa ïa tatou no te tauturu i te feia o tei vare i te haapiiraa mea tupu noa mai te mau mea atoa.

3. No te aha mea taa ê ai to tatou fenua?

³ E ite-maitai-hia te paari o te Atua na roto i ta ˈna huru hamaniraa i to tatou nohoraa, oia hoi te fenua. (Roma 1:20; Heb. 3:4) Te vai ra te tahi atu mau paraneta o te ohu ra ati aˈe i te mahana. I nia anaˈe râ te fenua te taata e nehenehe ai e ora.

4. Eaha te taa-ê-raa i roto i te fenua e te hoê pahi?

⁴ Mea maitai aˈe te fenua i te pahi i roto i te moana. A feruri na ua î te hoê pahi i te taata e na ratou iho e hamani i te mataˈi ta ratou e huti, i te maa e te pape. I to outou manaˈo, ehia maororaa ratou e ora noa ˈi mai tera? Hau atu â, e nafea ratou i ta ratou mau pehu? Area to  tatou fenua, ua î i te miria taata e animara. Ua navai noa râ te mataˈi ora, te maa e te pape no te taatoaraa. Noa ˈtu te pehu ta te natura e faatupu, ua riro noa te fenua ei vahi nehenehe e ei nohoraa maitai no te taata. Eaha te tumu? Ua hamani Iehova i te fenua ia nehenehe iho â te pehu ia riro faahou mai ei maitai. E hiˈo mai tatou e piti faanahoraa faahiahia mau ta Iehova i hamani, oia hoi te faanahoraa o te mataˈi ora e to te pape.

5. Mai te aha te faanahoraa o te mataˈi ora e eaha ta te reira e haapapu ra?

⁵ Mea titauhia te mataˈi ora no te taata e no te animara. I te hoê noa matahiti, e nehenehe te taata e te animara e huti e rave rahi roa miria tǎne mataˈi ora. Taa ê atu i te reira, e faarue atoa ratou i te mataˈi ino. Aita râ te mataˈi ora i iti mai e aita atoa te mataˈi ino faaruehia i rahi roa. Eaha te tumu? Ua hamani atoa Iehova i te mau raau tupu e tae noa ˈtu i te mau rimu nainai roa no te faariro i te mataˈi ino ei mataˈi ora. Te tuati maitai ra tera faanahoraa i te mau parau papaihia i roto i te Ohipa 17:24, 25 o te na ô ra: “Na ˈna hoi [na te Atua] e horoa na te taata atoa i te ora e te aho.”

6. Mai te aha te faanahoraa o te pape e eaha ta te reira e haapapu ra? (A hiˈo atoa i te tumu parau “ Ta Iehova faanahoraa no te pape.”)

⁶ E pape tahe to nia i te fenua no te mea ua tano maitai te atearaa o to tatou paraneta i te mahana. Ahani ua piri rii atu, e pihaa te pape, e paapaa a mǎrô roa ˈtu ai te fenua taatoa. Ahani ua atea rii mai, e paari te pape e e î te fenua taatoa i te hiona e te pape paari. Ua maiti maitai ïa Iehova i te vairaa o te fenua ia fanaˈo te taatoaraa i te pape. Ua âhu roa anaˈe te moana e te fenua, e riro mai te pape ei mǎhu a maraa ˈtu ai i nia no te riro mai ei ata pape. Fatata 500 000 kilometera afata tuea pape te riro nei ei mǎhu i te mau matahiti atoa. E vai noa tera mǎhu i roto i te reva mataˈi ahuru mahana e i muri mai, e topa mai ei ûa aore ra ei hiona. E hoˈi mai ïa te pape i roto i te moana e i nia i te fenua na roto i te faanahoraa ta Iehova i rave no te faaapî i te pape. Te faaite maitai ra te reira i te paari e te puai rahi o Iehova.—Ioba 36:27, 28; Koh. 1:7.

7. Eaha te tahi ravea no te faaite i to tatou mauruuru no te ô e faahitihia ra i roto i te Salamo 115:16?

⁷ E nafea ia faaite i to tatou mauruuru no to tatou paraneta faahiahia mau e te mau mea atoa i nia iho? (A taio i te Salamo 115:16.) Te tahi ravea, o te feruri-maite-raa ïa i te mau mea atoa ta Iehova i poiete. I te mau mahana atoa, e haamauruuru anaˈe ia ˈna no te mau ô atoa ta ˈna e ho mai ra. Te tahi atoa ravea, o te tamâ-haere-raa i te mau vahi ati aˈe ia tatou.

8. No te aha e mero faahiahia mau to tatou roro?

⁸ E mero faahiahia mau te roro o te taata. I roto i te opu o to ˈna mama, e tupu mai te mau taoˈa tahi ora apî o te aiû i te mau minuti atoa ia au i te hoê faanahoraa taa maitai a oti roa ˈtu ai to ˈna roro. Ia au i te feia hiˈopoa, fatata 100 miria taoˈa tahi uira to te roro o te hoê taata paari. Ia faitohia te reira, e naea roa hoê kilo e te afa. I teie nei, e hiˈo anaˈe i te tahi mau tuhaa faahiahia mau o te roro.

9. Eaha te haapapu ra e ô no ǒ mai ia Iehova te faanahoraa ia paraparau?

⁹ Ua hamanihia tatou e te faanahoraa faahiahia ia paraparau. A feruri na eaha te tupu ia paraparau tatou. Ia faahiti tatou  i te hoê noa parau, e titauhia i to tatou roro ia faahautiuti tau 100 uaua iˈo i nia i to tatou utu, e i roto i to tatou arero, arapoa, taa e ouma. E titauhia i teie mau uaua iˈo ia haa i te taime tano ia taa-maitai-hia ta tatou mau parau. Ua piahia te hoê hiˈopoaraa no nia i te faanahoraa faahiahia ia paraparau e rave rau reo i 2019. Ua faaite te reira, e nehenehe te pêpe e taa i te auraa o te hoê parau. Te haapapu maitai ra tera hiˈopoaraa i ta te mau aivanaa e manaˈo ra, oia hoi ua fanauhia tatou e te faanahoraa no te taa e no te haapii e rave rau reo. Auê ïa tatou i te mauruuru no tera ô no ǒ mai ia Iehova ra!—Exo. 4:11.

10. E nafea tatou ia faaite i te mauruuru no te ô faahiahia ta Iehova i horoa mai no te paraparau?

¹⁰ Te tahi ravea no te faaite i te mauruuru no te ô faahiahia ta Iehova i horoa mai no te paraparau, o te faataaraa ïa ia vetahi ê i te tumu e tiaturi ai tatou na te Atua i poiete i te mau mea atoa. (Sal. 9:1; Pet. 1, 3:15) Te hinaaro ra vetahi ia tiaturi tatou i te haapiiraa mea tupu noa mai te mau mea atoa. Ma te faaohipa râ i te Bibilia e i te tahi mau manaˈo i roto i teie tumu parau haapiiraa, e nehenehe tatou e paturu i to tatou Metua i te raˈi e e faataa i te feia aau tae na Iehova iho â i poiete i te raˈi e te fenua.—Sal. 102:25; Isa. 40:25, 26.

11. Eaha te tahi tuhaa faahiahia o to tatou roro?

¹¹ E nehenehe to tatou roro e haamanaˈo e rave rahi haamaramaramaraa. I parau na te tahi aivanaa, e nehenehe to tatou roro e haamanaˈo i te mau haamaramaramaraa e vai ra i roto 20 mirioni buka rarahi. I teie nei râ, ua itehia e mea rahi atu â te ohipa ta to tatou roro e nehenehe e haaputu! Eaha te mea e faataa ê ra te taata i te animara?

12. No te aha tatou i taa ê ai i te animara?

¹² I nia i te fenua, o te taata anaˈe te nehenehe e haamanaˈo e e feruri i te mau ohipa i tupu aˈena no te huti mai i te haapiiraa. No reira tatou e nehenehe ai e taui i to tatou haerea, huru feruriraa e oraraa. (Kor. 1, 6:9-11; Kol. 3:9, 10) E nehenehe tatou e haapii i to tatou manaˈo haava ia faataa ê i te maitai i te ino. (Heb. 5:14) E tia atoa ia tatou ia haapii i te faaite i te here, i te aumihi e i te aroha hamani maitai. E nehenehe atoa tatou e rave i te mea tia i te aro o Iehova.

13. Ia au i te Salamo 77:11, 12, e nafea ia faaohipa maitai i te roro ta Iehova i ho mai?

¹³ Te tahi ravea no te faaite i to tatou mauruuru no te roro ta Iehova i ho mai, o te haamanaˈoraa ïa i te mau taime atoa i tauturu e i tamahanahana ˈi Iehova ia tatou. E tauturu mai hoi te reira ia papu eita roa o ˈna e faarue ia tatou! (A taio i te Salamo 77:11, 12; 78:4, 7) Te tahi atu  ravea, o te haamanaˈoraa ïa i te mau maitai ta vetahi ê e rave no tatou a faaite atu ai i te mauruuru. Ua itehia i te mau aivanaa, mea oaoa aˈe te feia aau mauruuru. Mea maitai atoa ia pee tatou i te hiˈoraa o Iehova ma te maiti maitai i ta tatou e hinaaro e haamanaˈo. A feruri na ia Iehova, e nehenehe o ˈna e haamanaˈo i te mau mea atoa. Ia tatarahapa râ te hoê, e maiti Iehova i te faaore e i te haamoˈe i ta ˈna mau hara. (Sal. 25:7; 130:3, 4) E na reira atoa anaˈe ia hapa noa mai vetahi ê ia tatou.—Mat. 6:14; Luka 17:3, 4.

14. E nafea ia faaite i te mauruuru no te roro ta Iehova i ho mai?

¹⁴ E nehenehe atoa tatou e faaite i te mauruuru no te roro ta Iehova i ho mai ma te faaohipa i te reira no te faahanahana ia ˈna. Te maiti nei vetahi i te faaohipa i to ratou roro no te faatupu i to ratou iho hinaaro ma te faaoti eaha te mea maitai e te mea ino no ratou. Na Iehova râ i poiete ia tatou, o ˈna anaˈe ïa tei ite eaha te mea maitai e te mea ino no tatou. (Roma 12:1, 2) Ia haapao tatou i ta ˈna mau ture aveia, e fanaˈo tatou i te hau. (Isa. 48:17, 18) E oaoa atoa tatou i to tatou oraraa no te mea e faahanahana te reira i to tatou Atua poiete e Metua a mauruuru atu ai oia ia tatou.—Mas. 27:11.

15. Mea nafea te Bibilia e faaite ai i to Iehova here i te huitaata?

¹⁵ E ô faufaa mau te Bibilia no ǒ mai i te Atua. No to ˈna here i ta ˈna mau tamarii i nia i te fenua, ua aratai to tatou Metua i te raˈi i te tahi mau taata no te papai i te Bibilia. Maoti ta ˈna Parau, te horoa mai ra Iehova i te pahonoraa o te mau uiraa faufaa roa mai teie te huru: No te aha tatou i poietehia? Eaha te opuaraa a te Atua no te fenua? Eaha te tupu a muri aˈe? Te hinaaro ra Iehova ia ite ta ˈna mau tamarii atoa i te pahonoraa o teie  mau uiraa. No reira, i te roaraa o te tau, ua aratai Iehova i te taata ia huri i te Bibilia na roto e rave rahi reo. I teie mahana, ua hurihia te taatoaraa o te Bibilia aore ra te tahi tuhaa na roto hau atu i te 3 000 reo! O te Bibilia ïa te buka huri-roa ˈˈe-hia e opere-roa ˈˈe-hia i te ao nei! Noa ˈtu te vahi e te reo o te taata, e nehenehe te rahiraa e haapii i te Bibilia na roto i to ratou reo tumu.—A hiˈo i te tumu parau “ Te huriraahia te Bibilia na roto e rave rau reo Afirika.”

16. Ia au i te Mataio 28:19, 20, e nafea ia faaite i to tatou mauruuru no te Bibilia?

¹⁶ I te mau mahana atoa, e faaite anaˈe i to tatou mauruuru no te Bibilia ma te taio, ma te feruri maite e ma te faaohipa i ta te reira e haapii mai ra. E faaite atoa anaˈe i to tatou mauruuru i te Atua ma te faaite i ta ˈna poroi i te taata e rave rahi.—Sal. 1:1-3; Mat. 24:14; a taio i te Mataio 28:19, 20.

17. Eaha te mau ô ta tatou i hiˈopoa mai e eaha ta tatou e hiˈopoa i roto i to mua ˈtu haapiiraa?

¹⁷ Ua hiˈopoa mai nei tatou e toru ô ta Iehova i ho mai, oia hoi te hoê fenua taa ê mau, te hoê roro faahiahia mau e ta ˈna Parau te Bibilia. Tera râ, ua ho mai atoa Iehova i te tahi atu mau ô ite-ore-hia e to tatou mata. O ta tatou ïa e hiˈopoa mai i roto i to mua ˈtu haapiiraa.