1-2. Eaha te mau fifi ta to tatou mau taeae e tuahine e faaruru nei?

 UA FAAITOITO Paulo ia Timoteo e te taatoaraa o te mau Kerisetiano ia rave faahope roa i ta ratou taviniraa. (Tim. 2, 4:5) E haapao maite tatou paatoa i te faaueraa a Paulo. I te tahi râ mau taime, e ere mea ohie. Mea rahi to tatou mau taeae e tuahine te faaitoito nei no te apiti i te pororaa. (Tim. 2, 4:2) A feruri na i to tatou mau taeae te ora nei i te mau fenua ua haafifihia ta tatou ohipa aore ra ua opani-roa-hia. Te tamau noa ra ratou i te poro noa ˈtu e nehenehe ratou e mau i te auri.

² Te faaruru nei te mau tavini a Iehova e rave rau fifi o te nehenehe e faatoaruaru ia ratou. Te vai ra o te ohipa e rave rahi hora ia noaa mai te moni no te faatamaa te utuafare. Noa ˈtu e hinaaro ratou e haere e poro, ua rohirohi roa ratou i te hopea hebedoma. Te vai ra vetahi mea maˈimaˈi aore ra mea paari roa te tino, vetahi ua opanipanihia i to ratou fare. Te vai ra vetahi atu o te faatupu noa ra i te mau manaˈo toaruaru e o te tamau ra i te haafaufaa ore ia ratou. Te na ô ra te hoê tuahine o Mary * te iˈoa: “Te tutava rahi nei au no te haapae i te mau manaˈo toaruaru, e i te pae hopea, e rohirohi roa to ˈu feruriraa a ere atu ai au i te puai e te itoito no te haere e poro. E faahapa noa vau ia ˈu no te reira.”

3. Eaha ta tatou e hiˈo mai i roto i teie tumu parau haapiiraa?

³ E nehenehe Iehova e horoa mai i te itoito i roto i to tatou mau fifi atoa ia nehenehe tatou e tamau i te tavini  ia ˈna. Hou tatou a hiˈo ai e nafea Iehova ia tauturu ia tatou, e hiˈo anaˈe mea nafea o ˈna i te faaitoitoraa ia Paulo e ia Timoteo ia rave i ta raua taviniraa noa ˈtu te mau fifi.

4. Eaha te mau fifi ta Paulo i faaruru?

⁴ Mea rahi te fifi ta Paulo i faaruru. Mea papu ua hinaaro o ˈna i te itoito i te taparahiraahia o ˈna, i te pehiraahia o ˈna i te ofai e i te mauraa o ˈna i te fare tapearaa. (Kor. 2, 11:23-25) I te tahi taime, ua tutava o ˈna i te haapae i te mau manaˈo toaruaru. (Roma 7:18, 19, 24) Ua faaruru o ˈna i te hoê maˈi e au i “te hoê tara” i roto i to ˈna tino, o ta ˈna i taparu noa na i te Atua ia tatara.—Kor. 2, 12:7, 8.

5. Eaha te ohipa ta Paulo i rave noa ˈtu te mau fifi ta ˈna i faaruru?

⁵ Ua horoa Iehova i te puai ia Paulo no te rave i ta ˈna taviniraa noa ˈtu te mau fifi ta ˈna i faaruru. I te tapearaahia o ˈna i roto i te hoê fare i Roma, ua tamau o ˈna i te paturu i te parau mau i mua i te mau aratai ati Iuda e peneiaˈe atoa i mua i te mau tia o te hau faatere. (Ohi. 28:17; Phil. 4:21, 22) Ua poro atoa o ˈna i te mau tiai e te feia o tei haere mai e farerei ia ˈna. (Ohi. 28:30, 31; Phil. 1:13) I tera atoa area tau, ua faaohipa te Atua ia Paulo no te papai i te tahi mau rata o tei tauturu i te mau Kerisetiano i tera ra tau, e te faufaa-noa-hia ra tatou i te reira i teie mahana. Ua faaitoito atoa te hiˈoraa o Paulo i te amuiraa i Roma e maoti te reira, “ua rahi roa to ratou itoito i te faaiteraa i te parau a te Atua ma te mǎtaˈu ore.” (Phil. 1:14) Noa ˈtu te mau haafifiraa ta Paulo i farerei, ua tutava noa o ˈna i roto i ta ˈna taviniraa e “ua nuu te ohipa o te parau apî oaoa.”—Phil. 1:12.

6. Ia au i te Korinetia 2, 12:9, 10, eaha tei tauturu ia Paulo ia rave faahope roa i ta ˈna taviniraa?

⁶ Ua taa ia Paulo e na Iehova i horoa i te itoito ia ˈna no te rave faahope roa i ta ˈna taviniraa. Ua parau o ˈna i roto i te paruparu e ite-maitai-hia ˈi te rahi o te puai o te Atua. (A taio i te Korinetia 2, 12:9, 10.) Maoti to ˈna varua moˈa, ua horoa Iehova i te puai ia Paulo no te rave faahope roa i ta ˈna taviniraa noa ˈtu te hamani-ino-raa, te tapearaa, e te tahi atu mau fifi ta ˈna i faaruru.

7. Eaha te mau fifi ta Timoteo i faaruru i roto i ta ˈna taviniraa?

 ⁷ Ua apiti Timoteo ia Paulo i roto i to ˈna mau tere mitionare. Hau atu â, ua tono Paulo ia ˈna no te haere e farerei e e faaitoito i te mau amuiraa. (Kor. 1, 4:17) Peneiaˈe ua manaˈo Timoteo eita tera hopoia e maraa ia ˈna, no reira ïa Paulo i parau ai ia ˈna: “Eiaha roa ei taata e vahavaha i to apîraa.” (Tim. 1, 4:12) Mea maˈimaˈi atoa hoi Timoteo. (Tim. 1, 5:23) Mea papu ïa ua hinaaro Timoteo i te puai no ǒ mai i te Atua no te rave i ta ˈna taviniraa. Ua taa râ ia ˈna e horoa mai Iehova i te puai na roto i to ˈna varua moˈa no te tauturu ia ˈna no te poro i te parau apî oaoa e no te tavini i to ˈna mau taeae.—Tim. 2, 1:7.

8. Eaha te mau ravea ta Iehova e horoa ra no te tauturu i ta ˈna mau tavini i teie mahana?

⁸ Te horoa mai ra Iehova i “te puai o te hau ê i to te taata nei” ia tamau tatou i te tavini ia ˈna. (Kor. 2, 4:7) E hiˈo anaˈe e maha ravea ta Iehova e horoa ra no te faaitoito e no te tauturu ia tatou: te pure, te Bibilia, te mau hoa Kerisetiano, e te pororaa.

9. E nafea te pure e tauturu ai ia tatou?

⁹ Te pure. Mai tei papaihia i roto i te Ephesia 6:18, te faaitoito mai ra Paulo ia tatou ia pure i te Atua “ma te tuutuu ore.” Ia na reira tatou, e horoa mai te Atua i te itoito. Tera ta Jonnie, te hoê taeae i Bolivia, i ite a faaruru ai to ˈna utuafare i te ati. Ua roohia ta ˈna vahine e to ˈna na metua i te hoê maˈi rahi i te hoê â taime. Ua tutava noa Jonnie i te haapao ia ratou noa ˈtu e ere i te mea ohie. I muri iho, ua pohe to ˈna mama e aita ta ˈna vahine e to ˈna papa i ora oioi mai i tera maˈi. Te haamanaˈo ra Jonnie: “I roto i te mau tupuraa teimaha ta ˈu i faaruru, te mea i tauturu noa ia ˈu, o te haamahoraraa ïa i to ˈu aau ia Iehova na roto i te pure.” Ua horoa noa Iehova i te itoito ia Jonnie no te faaruru i to ˈna mau ati. No Ronald, te hoê matahiapo i Bolivia, ua roohia to ˈna mama i te mariri ai taata, e hoê avaˈe i muri aˈe, ua pohe o ˈna. Te parau ra Ronald: “Ua tauturu rahi mai te pure ia ˈu ia haamahora i to ˈu aau. O Iehova anaˈe tei ite mau eaha ta ˈu e faaruru ra.” I te tahi mau taime, e manaˈo paha tatou eita e haere ia faaoromai i to tatou mau fifi e aita tatou i ite eaha te ani na roto i te pure. Te titau mai ra râ Iehova ia pure ia ˈna noa ˈtu aita tatou i ite eaha te parau.—Roma 8:26, 27.

10. Mai ta te Hebera 4:12 e faaite mai ra, no te aha mea faufaa roa te taioraa e te feruriruriraa i te Bibilia?

¹⁰ Te Bibilia. Mai ia Paulo, e nehenehe tatou e imi i te itoito e te tamahanahanaraa i roto i te Bibilia. (Roma 15:4) Ia taio e ia feruriruri tatou i te Parau a te Atua, e nehenehe Iehova e faaohipa i to ˈna varua no te tauturu ia tatou ia taa e nafea te Bibilia e nehenehe ai e tauturu ia tatou. (A taio i te Hebera 4:12.) Te na ô ra Ronald: “Auaa ta ˈu taioraa Bibilia pauroa te po! E feruriruri au i te mau huru maitatai o Iehova e to ˈna here i ta ˈna mau tavini. Na te reira e faaitoito faahou mai ia ˈu.”

11. Mea nafea te Bibilia i te tautururaa i te hoê tuahine?

¹¹ E nehenehe tatou e faatupu i te feruriraa tano no nia i to tatou mau fifi ia feruriruri tatou i te Parau a te Atua. Teie te hiˈoraa o te hoê tuahine ua pohe ta ˈna  tane. Ua faaitoito te hoê matahiapo ia ˈna ia taio i te buka o Ioba, mea rahi hoi te haapiiraa ta ˈna e nehenehe e huti mai i roto i tera buka. I te haamataraa o ˈna i te taio i taua buka ra, oioi noa o ˈna i te faahapa i te feruriraa tano ore o Ioba. No ˈna, te haapao noa ra Ioba i to ˈna mau fifi. I muri iho râ, taa ˈtura ia ˈna e hoê â huru feruriraa to ˈna e to Ioba. Ua tauturu te reira ia ˈna ia faatano i to ˈna huru feruriraa e ua maitai mai o ˈna i muri aˈe.

12. E nafea Iehova e faaohipa ˈi i te mau hoa Kerisetiano no te faaitoito ia tatou?

¹² Te mau hoa Kerisetiano. Ua horoa atoa mai Iehova i te mau hoa Kerisetiano no te faaitoito te tahi i te tahi. E hinaaro rahi to Paulo e ite i te mau taeae e tuahine ia nehenehe ratou e o ˈna e faaitoito te tahi i te tahi. (Roma 1:11, 12) Mea au roa na Mary e amuimui i te mau hoa Kerisetiano. Te na ô ra o ˈna: “Ua faaohipa Iehova i te tahi mau taeae e tuahine, o tei ore i ite hoê noa ˈˈe ohipa no nia i to ˈu tupuraa. Ua faaitoito mai ratou ia ˈu. Ua hapono mai ratou i te poroi. Tera iho â ta ˈu i hinaaro mau i tera mau taime. Ua tauturu atoa te reira ia ˈu ia paraparau i te tahi atu mau tuahine o tei faaruru i te hoê fifi e to ˈu, e ua tauturu rahi mai ratou ia ˈu. E te faaite atoa mai ra te mau matahiapo ia ˈu e mea faufaa vau i roto i te amuiraa.”

13. E nafea tatou e faaitoito ai te tahi i te tahi i te mau putuputuraa?

¹³ O ta tatou mau putuputuraa te hoê vahi maitai roa ˈˈe no te faaitoito te tahi i te tahi. I te mau putuputuraa, a haere e faaitoito ia vetahi ê ma te faaite i to oe here ia ratou e to oe mauruuru no te mau mea ta ratou e rave nei. Ei hiˈoraa, hou te putuputuraa a haamata ˈi, ua haere te hoê matahiapo e farerei i te hoê tuahine e ere ta ˈna tane i te Ite no Iehova e ua parau atu: “Mea faaitoito mau to oe hiˈoraa. E tae mai oe i te putuputuraa e ta oe ono tamarii e ua ineine te mau pahonoraa.” Ma te taˈi, ua pahono atu te tuahine: “Tera iho â ta ˈu i hinaaro e faaroo i teie mahana.”

14. E nafea te pororaa e faaitoito ai ia tatou?

¹⁴ Te pororaa. Ia poro tatou i te taata, e itoitohia tatou noa ˈtu aita ratou e anaanatae i ta tatou poroi. (Mas. 11:25) I te tiavaruraahia te hoê mero o te utuafare o Stacy, ua hepohepo roa o ˈna e ua faahapa noa o ˈna ia ˈna iho. Eaha râ tei tauturu ia ˈna i roto i tera tupuraa? O ta ˈna taviniraa ïa. I roto i te pororaa, ua haapao o ˈna i te feia o tei hinaaro i te tauturu. Te parau ra o ˈna: “I tera taime, ua horoa mai Iehova i te hoê piahi Bibilia o tei haere oioi i mua i te pae varua. Ua faaitoito rahi mai te reira ia ˈu.”

15. Eaha te haapii mai i te hiˈoraa o Mary?

¹⁵ Te vai ra o te manaˈo ra e, no to ratou tupuraa, aita ratou e nehenehe e rave hau atu â i roto i te pororaa. Mai te peu tera atoa to oe manaˈo, a haamanaˈo e oaoa Iehova ia rave oe i tei maraa ia oe. I te haereraa Mary e poro i te hoê tuhaa fenua reo ê, ua manaˈo o ˈna e aita to ˈna e faufaa. Te na ô ra o ˈna: “I te haamataraa, ua horoa noa vau i te pahonoraa poto i te mau putuputuraa aore ra ua taio vau i te irava Bibilia e, i roto i te pororaa, ua horoa noa vau i te api parau i te taata.” Ua manaˈo Mary e ere o ˈna mea aravihi mai te tahi atu mau taata e paraparau maitai ra i te reo. Ua faatano râ o ˈna i to ˈna manaˈo. Feruri atura o ˈna e nehenehe Iehova e faaohipa ia ˈna noa ˈtu e ere o ˈna  i te mea aravihi roa. Te na ô ra o ˈna: “Mea ohie ia taa i ta te Bibilia e haapii ra e e nehenehe te reira e taui i te oraraa o te hoê taata.”

16. E nafea te feia i opanipanihia i te fare e itoitohia ˈi?

¹⁶ Te ite ra Iehova i to tatou hinaaro e haere poro, e tauturu mai ïa o ˈna ia tatou ia poro i te mau tuati maˈi e te mau taote. Ia tamau tatou i te feruri i ta tatou taviniraa na mua ˈˈe, e nehenehe tatou e toaruaru. Ia haamanaˈo râ tatou e nehenehe Iehova e tauturu ia tatou, e itoitohia ïa tatou no te faaoromai i te mau fifi atoa ma te oaoa.

17. Ia au i te Koheleta 11:6, no te aha mea faufaa ia tamau tatou i te poro?

¹⁷ Ia ueue tatou i te huero o te parau mau, aita tatou i ite teihea huero te tupu mai. (A taio i te Koheleta 11:6.) Teie te hiˈoraa o te tuahine Barbara. E 80 tiahapa matahiti to ˈna. E poro o ˈna na roto i te niuniu paraparau e te rata. I roto hoê o ta ˈna mau rata, ua tuu o ˈna i Te Pare Tiairaa o te 1 no Me 2014, e te tumu parau “Ta te Atua i rave no oe.” Aita o ˈna i ite e tapae ta ˈna rata i te fare o te hoê vahine e ta ˈna tane e Ite no Iehova raua na mua ˈˈe. Ua na nia iho noa raua i te taio i tera vea. No te tane, mai te huru ra e te paraparau ra Iehova ia ˈna. Ua apiti faahou mai na hoa faaipoipo i te mau putuputuraa. E i muri aˈe 27 matahiti, ua riro faahou mai raua ei Ite no Iehova. Mea papu ua itoito-roa-hia Barbara i te iteraa e ua hoˈi mai na hoa faaipoipo i te parau mau maoti te rata ta ˈna i hapono atu.

18. Eaha te rave no te fanaˈo i te puai no ǒ mai ia Iehova?

¹⁸ E horoa mai Iehova i to ˈna puai i roto i te mau tupuraa atoa. Ia faaohipa tatou i te mau ravea ta ˈna e horoa mai ra, mai te pure, te Bibilia, te mau hoa Kerisetiano e te pororaa, te faaite ra ïa tatou i to tatou tiaturi papu e tauturu mai iho â Iehova. E tamau anaˈe i te tiaturi i to tatou Metua i te raˈi o te horoa mai “i te etaeta i te feia i tia te aau ia ˈna.”—Par. 2, 16:9.