I TAHITO ra, e nehenehe te hoê fatu e maiti i te tahi taata ei tavana i nia i to ˈna utuafare aore ra ta ˈna faufaa. I te tahi taime, e hurihia te taˈo Hebera e Heleni no te parau “tavana” ei “tiaau.”

Ei tǐtǐ i Aiphiti, ua riro mai Iosepha, hoê o te mau tamaiti a Iakoba, ei tavana i nia i te utuafare o to ˈna fatu. Te faatiahia ra, “faarue noa ˈtura [to ˈna fatu] i te mau taoˈa atoa na ˈna ra ia Iosepha.” (Gen. 39:2-6) A riro mai ai Iosepha ei taata rahi i Aiphiti, ua faatoroa atoa oia i te hoê o ta ˈna mau tavini ei tiaau i nia i to ˈna utuafare.—Gen. 44:4.

I te tau o Iesu, e ora pinepine na te mau fatu fenua i te vahi atea i te oire tei reira ta ratou faufaa. No reira, e maiti na ratou i te hoê tiaau no te haapao i ta ratou faaapu, faaamuraa animara, oia atoa te feia rave ohipa.

O vai tei maitihia na ei tiaau? I te tau o te mau aposetolo, ua faataa te taata papai Roma o Columella, hou te hoê tavini e faatoroahia ˈi ei tiaau, e tamatahia to ˈna haapao maitai i roto i ta ˈna ohipa. Eiaha ei taata faatia hanoa e eiaha atoa ei taata haavî i te feia ta ˈna e tiaau ra. Ua parau atoa Columella: “Te mea faufaa roa ˈˈe, eiaha [te tiaau] ia manaˈo ua ite o ˈna i te mau mea atoa, ia ineine noa râ oia i te haapii atu â.”

I roto i te Bibilia, ua faahitihia te ohipa a te hoê tiaau no te faataa i te mau mea e ravehia ra i roto i te amuiraa. Ei hiˈoraa, ua faaitoito te aposetolo Petero i te mau Kerisetiano ia faaohipa i te ô ta te Atua i horoa ia ratou “no te tavini te tahi i te tahi mai te mau tiaau maitai roa tei fanaˈo i te hamani maitai rahi o te Atua.”—Pet. 1, 4:10.

I roto i te Luka 16:1-8, ua horoa atoa Iesu i te tahi faahohoˈaraa no nia i te hoê tiaau. I roto i te parau tohu no nia i te tau o to ˈna hoˈiraa mai ei Arii, ua haapapu Iesu i ta ˈna mau pǐpǐ e faatoroa oia i “te tavini haapao maitai e te paari” aore ra “te tiaau haapao maitai e te paari.” Te hopoia matamua roa a tera tiaau, o te horoaraa ïa i te maa pae varua na te mau pǐpǐ a te Mesia i te tau hopea. (Mat. 24:45-47; Luka 12:42) Auê tatou i te mauruuru te opere ra te tiaau haapao maitai na te ao atoa nei i te mau papai o te haapuai i to tatou faaroo.