Ua fanauhia vau i Holane, i 1948. I te matahiti i muri mai, ua haere matou to ˈu utuafare e ora i São Paulo, i Beresilia. E taata faaroo to ˈu na metua e ua matau matou i te taio amui i te Bibilia. I 1959, ua haere matou e ora i Marite, i te oire rahi o Massachusetts.

Mea itoito to ˈu papa, ua aupuru maite o ˈna i to ˈna utuafare. E vaˈu tamarii hoi matou. Ua ohipa papa i roto i te tapihooraa, te paturaa e i te hoê taiete manureva na te ara. Ua nehenehe ïa matou e ratere i tera e tera fenua.

I te haapiiraa tuarua, pinepine au i te feruri, ‘Eaha ta ˈu e rave i muri aˈe?’ Ua maiti vetahi o to ˈu mau hoa e haere i te haapiiraa teitei e te tahi atu i te tau faehau. Aita vau i anaanatae i te tau faehau, mea au ore hoi na ˈu te tatamaˈi e te aroraa. Ua maiti ïa vau e haere i te haapiiraa teitei. Ua hinaaro rahi au e tauturu i te taata, tera noa hoi te ravea e fanaˈo ai au i te hoê oraraa maitai roa.

I te haapiiraa teitei, mea au roa na ˈu e rave i te maimiraa no nia i te huru o te taata i te roaraa o te tau e i te tumu o te ora. Ua haapiihia matou mea tupu noa mai te mau mea atoa e ua hinaaro te mau orometua ia tiaturi matou i te reira. Mea fifi hoi ia tiaturi no te mea aita e haapapuraa e e ere mai tera te raveraa a te mau aivanaa.

Aita matou i haapiihia no nia i te mea maitai e te mea ino. Ua turai-noa-hia matou ia rave i te mau mea atoa no te manuïa. Mea au roa na ˈu e arearea na muri i to ˈu mau hoa. Ua tamata atoa vau i te raau taero. I taua taime ra, ua oaoa roa vau. Aita râ te reira i maoro. I uiui atoa na vau, ‘Tera mau anei te oraraa maitai roa?’

Ua haere au i Boston no te haapiiraa, ua titauhia ia ˈu ia rave i te ohipa no te aufau i ta ˈu haapiiraa. Farerei atura vau i te hoê hoa Ite no Iehova, tei faaite mai i te parau tohu o te Daniela pene 4 no nia i na “hitu tau.” Ua faataa mai o ˈna te ora ra tatou i te anotau hopea. (Dan. 4:13-17) Ua taa oioi ia ˈu e ia tamau vau i te mau aparauraa Bibilia, e titauhia ia ˈu ia taui i to ˈu huru oraraa. Ua ape ïa vau i to ˈu hoa.

Tei roto vau i te hoê piha haapiiraa o te faaineine ra ia riro ei rima tauturu i Marite apatoa. Ua manaˈo vau, ia tauturu vau i te mau huru taata atoa, e oraraa maitai roa ïa to ˈu. Aita râ te reira i navai no ˈu. Faarue atura vau i te haapiiraa teitei.

I Me 1970, ua hoˈi au i Holane e ua ohipa vau i roto i te hoê â taiete manureva e ta to ˈu papa. Ua nehenehe ïa vau e ratere na Afirika, Marite, Europa e Asia. I taua mau tere ra, ua ite au e noa ˈtu te fenua, e rave rau tupuraa fifi ta te taata e faaruru nei e aita ta ratou e ravea. Ua puai atu â to ˈu hinaaro e tauturu i te taata. Faaoti atura vau e hoˈi i te haapiiraa teitei no Boston, i Marite.

Aita â vau i ite i te pahonoraa o ta ˈu mau uiraa no nia i te oraraa. Aita vau i taa eaha te rave. Ani atura vau i te tauturu i to ˈu orometua haapii. Pahono mai nei oia: “No te aha oe e tamau ai i te haapii? Mâuˈa te taime! A faarue i te haapiiraa!” Faarue roa ˈtu ra ïa vau i te haapiiraa.

No te imi i te hoê oraraa maitai aˈe, ua apee au i te hoê pǔpǔ taata o te faataa ê ia ratou i te nunaa taata e o te hau e te here ta ratou poroi. Ua tere matou na Marite e tae roa ˈtu i Acapulco, i Mehiko. Ua ora matou e te mau hippies. Ia hiˈohia ˈtu, aita to ratou e fifi e e haapeapearaa. Oioi râ vau i te iteraa aita ta ratou e fa i roto i te oraraa e aita atoa ratou e oaoa mau ra. E ere roa ˈtu te rahiraa o ratou i te hoa mau.

I tera atoa taime, ua feruri au i te hoê mea ta ˈu i hinaaro noa na e rave i to ˈu tamariiraa, oia hoi e tere na nia i te miti, eiaha ei ihitai, ei tapena râ. Tera atoa te hinaaro o to ˈu hoa o Tom. Faaoti atura mâua e hoo mai i te hoê pahi taie no te ratere i tera e  tera fenua a imi atu ai i te hoê motu e au i te paradaiso e aita e ture i reira.

Ua haere mâua i Arenys de Mar, piri noa mai ia Barcelone, i Paniora. Ua hoo mai mâua i te hoê pahi taie e 9,4 metera te roa e ua topahia te iˈoa o Llygra. Ua tataî mâua i tera pahi. Ua tatara mâua i te matini no te haaputu i mohina pape. No te tapae i te mau uahu nainai, ua hoo mai mâua e piti hôe e 5 metera te roa. I te pae hopea, ua fano mâua i te taamotu Seychelles i te miti Initia. Ua opua mâua e fano i te pae tooa o te râ o Afirika, oia atoa i te otue no Bonne Espérance, i Afirika apatoa. Ua hiˈo mâua i te mau fetia, ua faaohipa i te tahi mau hohoˈa fenua, buka e te mau taoˈa aratai no te ite teihea roa mâua. Ua maere roa vau ua tano maitai iho â te vahi tei reira mâua.

Ua taa râ ia mâua aita e nehenehe e tere atea na nia i tera pahi taie tahito roa. Ua ô mai hoi te pape i roto, e 22 litera i te hora! Mai ta ˈu i faahiti i te omuaraa, ua tupu te hoê vero e ua riaria roa vau. I taua taime ra, a tahi ra vau a pure faahou ai i te Atua. Ua parau vau i te Atua e mai te peu e ora mai mâua, e haapii au o vai o ˈna. Ua mǎrû mai te vero e ua tapea vau i ta ˈu parau.

Haamata ˈtura vau i te taio i te Bibilia a tere ai na nia i te miti. A feruri na ia ˈu i nia i ta ˈu pahi, i ropu i te miti Mediteranea, e mataitai ra i te mau marara, te mau ouˈa e te mau iriatai. I te po, ua faahiahia roa vau i te mau haapueraa fetia. Ua papu atu â ia ˈu e te vai ra te hoê Atua o te tâuˈa mau ra i te huitaata.

Tau hebedoma i muri aˈe, ua tapae mâua Tom i Alicante, i Paniora. I reira, ua tamata mâua i te hoo atu i ta mâua pahi no te hoê pahi apî aˈe. Mea fifi ia hoo atu i te hoê pahi aita e matini, mea tahito roa e mea apoopoo! Ua faaohipa ïa vau i tera taime no te taio i te Bibilia.

Hau atu â vau i te taio i te Bibilia, rahi atu â vau i te taaraa e tauturu teie buka i te taata ia oaoa i roto i te oraraa. Ua maere au a ite ai mea papu te mau aratairaa Bibilia no nia i te huru oraraa viivii ore i te pae tino e i te pae feruriraa. Manaˈo atura vau no te aha e rave rahi taata, mai ia ˈu nei, te parau ra e Kerisetiano ratou, aita râ ratou e pee ra i te mau aratairaa Bibilia.

Faaoti papu atura vau e taui i to ˈu huru oraraa e e faaea i te raau taero. Ua papu atoa ia ˈu te vai ra te hoê pǔpǔ taata o te faaohipa ra i te mau aratairaa Bibilia i roto i to ratou oraraa e ua hinaaro vau e ite o vai ratou. Ani faahou atura vau i te Atua ia tauturu mai.

Ua hiˈopoa vau e rave rahi haapaoraa no te ite i te haapaoraa mau. A hahaere ai na te mau oire no Alicante, ua ite au e rave rahi fare pure, e hohoˈa taraihia i nia i te rahiraa. Ua taa oioi ia ˈu e ere tera te haapaoraa mau.

I te hoê Tapati, te taio ra vau i te Iakobo 2:1-5 o te faaite ra e ere i te mea maitai ia maitiiti i te taata ma te haafaufaa aˈe i te feia moni. A hoˈi ai i te pahi, ua ite au i te hoê fare putuputuraa, ua papaihia i nia i  te uputa: “Piha a te Basileia a te mau Ite no Iehova.”

Ua manaˈo vau e haere e hiˈo mai te aha te huru o tera mau taata e e farii mai anei ratou ia ˈu. Tomo atura vau i roto, aita e tiaa, e huruhuru taa to ˈu e e ahu mutumutu. Haere mai nei te hoê taata e farii ia ˈu e aratai atura ia ˈu i pihai iho i te hoê vahine paari. Ua tauturu mai teie vahine ia ˈu ia ite i te mau irava ta te taeae orero i faahiti. I muri aˈe i te putuputuraa, ua maere roa vau i te farii maitai o teie mau taata. Ua titau manihini hoê ia ˈu i to ˈna fare no te tauaparau. No te mea râ aita vau i taio atura i te taatoaraa o te Bibilia, ua pahono vau ia ˈna, “E haere atu vau ia oe ra ia ineine au.” Mai reira mai, apiti tamau atura vau i te mau putuputuraa.

Tau hebedoma i muri iho, ua hoˈi au e farerei i tera taata e ua pahono mai o ˈna i ta ˈu mau uiraa maoti te Bibilia. Hoê hebedoma i muri iho, ua horoa mai o ˈna i te hoê pute ahu. Ua parau mai o ˈna na te hoê o to ˈna mau hoa tera mau ahu e tei te fare tapearaa o ˈna no to ˈna faaroo e no to ˈna hinaaro e pee i te faaueraa Bibilia ia here te tahi i te tahi e ia vai hau noa. (Isa. 2:4; Ioa. 13:34, 35) Taa ˈtura ia ˈu tera te pǔpǔ taata o te pee maite ra i te mau aratairaa Bibilia no nia i te huru oraraa viivii ore i te pae tino e i te pae feruriraa! Faaea ˈtura vau i te imi i te hoê motu e au i te paradaiso. Ua haapii hohonu atu â vau i te Bibilia e hoˈi atura i Holane.

E maha mahana te titauhia no te tae i Groningue, i Holane. Ua imi au i te hoê ohipa. Itehia ˈtura mai ia ˈu te hoê taiete no te ohipa tamuta, ua anihia mai ia faaî i te hoê api parau. I roto, te anihia ra eaha ta ˈu haapaoraa. Papai atura vau, “Ite no Iehova.” A taio ai te fatu taiete i ta ˈu i papai, ua na ô mai o ˈna, “E niuniu atu vau ia oe.” Aita roa ˈtu râ o ˈna i niuniu mai.

I te tahi atu taiete ohipa tamuta, ua farerei tia ˈtu vau i te fatu e ua ani mai o ˈna eaha ta ˈu mau parau tuite e te mau haamaramaramaraa no nia ia ˈu. Faataa ˈtura vau ua tataî aˈena vau i te hoê pahi taie raau. Oaoa roa vau i to ˈna parauraa mai, “E nehenehe oe e haamata i teie mahana. Tera râ, eiaha roa ˈtu oe e haafifi i ta ˈu ohipa. E Ite no Iehova vau e te pee ra vau i te mau aratairaa Bibilia.” Oaoa roa vau e parau atura vau, “E Ite no Iehova atoa vau!” No to ˈu  râ rouru roa e to ˈu huruhuru taa, parau mai nei o ˈna ia ˈu, “E haapii ïa taua i te Bibilia!” Farii atura vau i te reira. I tera taime to ˈu iteraa no te aha aita te fatu taiete na mua ˈtu i taniuniu mai. Ua aratai mai hoi Iehova ia ˈu i te hoê vahi maitai e ua pahono o ˈna i ta ˈu mau aniraa. (Sal. 37:4) Haamata ˈtura vau i te ohipa e tera taeae hoê matahiti i te maoro a haapii atu ai mâua i te Bibilia. I Tenuare 1974, ua bapetizohia vau.

Hoê avaˈe i muri aˈe, ua riro vau ei pionie. Oaoa roa vau i roto i tera taviniraa. Hoê avaˈe i muri mai, ua haere au i Amsterdam no te turu i te hoê pǔpǔ reo Paniora. Oaoa roa vau i te faatere i te mau haapiiraa Bibilia na roto i te reo Paniora e Potiti! I Me 1975, ua riro mai au ei pionie taa ê.

I te hoê mahana, ua haere mai te hoê tuahine i ta matou putuputuraa na roto i te reo Paniora, o Ineke to ˈna iˈoa e e pionie taa ê atoa o ˈna. Ua titau manihini mai o ˈna i te hoê piahi Bibilia no Bolivia. Ua haamata mâua Ineke i te haamatau ma te papai i te rata e maoti te reira, ua itehia ia ˈu hoê â fa ta mâua. Ua faaipoipohia mâua i 1976 e ua tamau mâua i roto i te taviniraa pionie taa ê e tae roa ˈtu i 1982. I tera matahiti, ua titau-manihini-hia mâua i te 73raa o te Piha haapiiraa no Gileada. Ua tonohia mâua i Afirika hitia o te râ. Ua tavini mâua e pae matahiti i Mombasa, i Kenya! I 1987, ua tonohia mâua i Tanzanie, te hoê fenua ua opanihia te ohipa pororaa na mua ˈˈe. I tera râ taime, ua nehenehe faahou matou e poro i ǒ. I muri aˈe 26 matahiti taviniraa i reira, ua hoˈi mâua i Kenya.

Ua oaoa roa mâua i te tautururaa i te taata ia ite i te parau mau. Ei hiˈoraa, ua farerei au i ta ˈu piahi Bibilia matamua i Mombasa a poro ai i te vahi taata. Ua pûpû atu vau e piti vea na ˈna e parau mai nei o ˈna, “Ia oti ia ˈu i te taio i te reira, eaha ïa ta ˈu e rave?” I te hebedoma i muri mai, haamata ˈtura mâua i te haapiiraa i nia i te buka E nehenehe oe e ora e a muri noa ˈtu i roto i te paradaiso i nia i te fenua nei. No matara noa ˈtura teie buka na roto i te reo Swahili. Hoê matahiti i muri mai, ua bapetizohia o ˈna e tavini atura ei pionie tamau. Ua tauturu raua ta ˈna vahine fatata 100 taata ia ite o vai Iehova e tae roa ˈtu i te bapetizoraa.

I te taime matamua a ite ai au eaha mau na te fa o te oraraa, hoê â huru aau to ˈu e to te taata hoohoo ratere tei itehia mai ia ˈna te hoê poe moni rahi, aita roa ˈtu vau e hinaaro e faarue i te reira. (Mat. 13:45, 46) Ua hinaaro vau e tauturu i te taata ia fanaˈo i te hoê oraraa maitai roa. Ua ite mau mâua ta ˈu vahine i te rima o Iehova i te tautururaa i to ˈna nunaa ia fanaˈo i te hoê oraraa maitai roa.