1-3. (a) No te aha Iehova i here ai ia Solomona, e eaha te mau haamaitairaa ta Solomona i fanaˈo? (b) Eaha te mau uiraa ta tatou e pahono mai i roto i teie tumu parau?

 MEA apî â Solomona i te riroraa mai oia ei arii i nia ia Iseraela. I te haamataraa oia i te faatere, fa maira Iehova ia ˈna na roto i te moemoeâ e na ô maira: “A ani mai i ta ˈu e horoa ˈtu na oe.” Pahono atura Solomona: “E taata apî hoi au; aore au i ite maitai i ta ˈu nei haapaoraa. . . . Ei aau ite ta oe e ho mai no to tavini ra, ia tia ia parau [aore ra no te haava] i teie nei feia.” (Arii 1, 3:5-10) Ua ani oia i te hoê “aau ite,” aore ra auraro, auê ïa aniraa haihai! Te taa ra ïa ia tatou no te aha Iehova i here ai ia Solomona. (Sam. 2, 12:24) Ua mauruuru roa hoi to tatou Atua i te pahonoraa a teie arii apî, horoa roa atoa ˈtura oia i te hoê aau paari e “te ite i te parau.”—Arii 1, 3:12.

² A tapea noa ˈi oia i to ˈna taiva ore, ua fanaˈo Solomona e rave rahi haamaitairaa. Na ˈna atoa i patu i te hoê hiero “no te iˈoa o te Atua o Iseraela no Iehova.” (Arii 1, 8:20) Ua tui to ˈna roo i to ˈna paari no ǒ mai i te Atua ra. E te mau mea ta ˈna i parau i raro aˈe i te mana o te varua o te Atua, ua papaihia ïa i roto e toru buka Bibilia. O te buka Maseli hoê.

³ Piri i te hoê hanere taime te parau “aau” i te faahitiraahia i roto i te buka Maseli. Ei hiˈoraa, te taio nei tatou i roto i te Maseli 4:23: “Faaitoito i te tiai i to aau.” I roto i teie irava, eaha te auraa o te parau “aau”? E pahono mai tatou i teie uiraa i roto i teie tumu parau. E hiˈo atoa mai tatou i te pahonoraa i teie na uiraa e piti: Mea nafea Satani e tamata ˈi i te haaviivii i to tatou aau? Eaha ta tatou e rave no te paruru  i to tatou aau? Ia ore tatou ia taiva i to tatou Atua, mea titauhia ia ite tatou i te pahonoraa i na uiraa faufaa.

4-5. (a) I te Maseli 4:23, eaha te auraa o te taˈo “aau”? (b) E nafea te hiˈoraa o to tatou ea pae tino e faaite ai i te faufaaraa o to tatou taata o roto?

⁴ I te Maseli 4:23, e faaohipahia te taˈo “aau” no te faahiti i te parau o to tatou mau manaˈo hohonu, huru aau, manaˈo turai, e to tatou mau hinaaro. O to tatou ïa taata o roto “te aau,” e ere noa te huru o ta tatou e faaite ra.

⁵ Teie te tahi hiˈoraa no nia i te ea pae tino e faaite ra i te faufaaraa o to tatou taata o roto. A tahi, ia maitai noa to tatou tino, e titauhia ia amu i te maa maitai no te ea, e ia haere atoa e faahautiuti i te tino. Ia maitai noa tatou i te pae varua, e titau-atoa-hia ia amu tatou i te maa maitai i te pae varua, a faatupu noa ˈtu ai i to tatou faaroo ia Iehova. Mea titauhia ia faaohipa i ta tatou e haapii ra e ia paraparau tatou no nia i to tatou faaroo. (Roma 10:8-10; Iak. 2:26) A piti, ma te hiˈo na rapaeau, e manaˈo paha tatou e e ea maitai to tatou noa ˈtu mea maˈimaˈi tatou. Ma te hiˈo i ta tatou mau ohipa Kerisetiano, e manaˈo atoa paha tatou e mea puai to tatou faaroo, peneiaˈe râ te tupu ra te hinaaro tia ore i roto ia tatou. (Kor. 1, 10:12; Iak. 1:14, 15) Ia haamanaˈo tatou e te hinaaro ra Satani e haaviivii ia tatou ma to ˈna huru feruriraa. E nafea oia e tamata ˈi i te na reira? E nafea tatou e paruru ai ia tatou iho?

6. Eaha te fa a Satani, e eaha ta ˈna e rave ra ia naea tera fa?

⁶ Te hinaaro ra Satani ia riro tatou mai ia ˈna, te hoê orure hau miimii o te ore e tâuˈa i ta Iehova mau ture aveia. Aita ta Satani e nehenehe e faahepo ia tatou ia feruri e ia haa mai ia ˈna. No reira ïa oia e tamata ˈi i te tahi atu mau ravea. Ei hiˈoraa, e haaati oia ia tatou i te taata ta ˈna i haaviivii aˈena. (Ioa. 1, 5:19) E tiaturi oia e maiti tatou i te apiti atu ia ratou noa ˈtu ua ite tatou e “ino” aore ra e viiviihia to tatou huru feruriraa e haerea i te mau amuimuiraa iino. (Kor. 1, 15:33) Ua manuïa tera ravea i nia ia Solomona. Ua faaipoipo oia i e rave rahi vahine nunaa ěê. E mana rahi to ratou  i nia ia ˈna, “riro ê atura tana aau i taua mau vahine,” fariu ê atura to ˈna aau ia Iehova.—Arii 1, 11:3.

7. Eaha ˈtu â ta Satani e faaohipa ra no te haaparare i to ˈna huru feruriraa, e no te aha e ara ˈi tatou i te reira?

⁷ Te faaohipa ra Satani i te mau hohoˈa i roto i te afata teata no te haaparare i to ˈna huru feruriraa. Ua taa ia ˈna e eita noa te mau aamu e faaanaanatae ia tatou, e haapii atoa mai râ te reira e nafea ia feruri, eaha te huru aau e faatupu e eaha te mau ohipa ta tatou e rave. Ua faaohipa maitai Iesu i teie huru haapiiraa. A hiˈo na i ta ˈna mau faahohoˈaraa o te taata hamani maitai no Samaria e o te tamaiti o tei faarue i te fare e o tei haamâuˈa i ta ˈna faufaa. (Mat. 13:34; Luka 10:29-37; 15:11-32) Tera râ, e nehenehe te feia o tei viiviihia i te huru feruriraa a Satani e faaohipa i te aamu no te haaviivii ia tatou. E titauhia ïa te huru au noa. E faaanaanatae mai te mau hohoˈa teata a horoa atoa mai ai i te haapiiraa ma te ore e haaviivii i to tatou feruriraa. Ia vai ara râ tatou. Ia maiti tatou i te tahi hohoˈa, mea maitai ia uiui tatou: ‘Te haapii ra anei teie hohoˈa ia ˈu e mea maitai ia haamâha i to ˈu mau hinaaro o te tino?’ (Gal. 5:19-21; Eph. 2:1-3) Eaha ta oe e rave ia ite e te haaparare ra te hoê hohoˈa i te huru feruriraa o Satani? A ape atu i te reira mai ta oe e ape i te hoê maˈi pee!

8. E nafea te mau metua e tauturu ai i ta ratou mau tamarii ia paruru i to ratou aau?

⁸ E te mau metua, e hopoia taa ê ta outou e paruru i ta outou mau tamarii i te mau tutavaraa a Satani no te haaviivii i to ratou aau. Te rave ra paha outou i te mau mea atoa no te paruru i ta outou mau tamarii i te maˈi. E ara outou ia vai mâ te fare, e faarue outou i te mau mea atoa e tupu ai te maˈi i nia ia outou e ta outou mau tamarii. E titau-atoa-hia ia paruru outou i ta outou mau tamarii i te mau hohoˈa teata, te mau hauti video e te mau reni natirara o te nehenehe e haaviivii ia ratou i to  Satani huru feruriraa. Ua tuu Iehova ia outou ra te mana ia haapao i te ea pae varua o ta outou mau tamarii. (Mas. 1:8; Eph. 6:1, 4) Eiaha ïa e taiâ ia haamau i te tahi mau ture niuhia i nia i te mau ture aveia Bibilia i te fare. A parau i ta outou mau tamariirii eaha ta ratou e nehenehe e e ore e nehenehe e mataitai, e a tauturu ia ratou ia taa i te tumu o ta outou faaotiraa. (Mat. 5:37) A paari mai ai ta outou mau tamarii, a faaineine ia ratou ia feruri eaha te mea maitai e te mea ino ia au i ta Iehova mau ture aveia. (Heb. 5:14) E a haamanaˈo, mea rahi ta ta outou mau tamarii e haapii i te mea ta outou e parau, i te mea atoa râ ta outou e rave.—Deut. 6:6, 7; Roma 2:21.

9. Eaha te tahi manaˈo ta Satani e haaparare ra, e no te aha mea atâta?

⁹ Te tamata atoa ra Satani i te haaviivii i to tatou aau ma te turai ia tatou ia tiaturi i te paari o te taata, eiaha râ i te manaˈo o Iehova. (Kol. 2:8) A feruri na i te hoê manaˈo ta Satani e haaparare ra: ia riro te imiraa faufaa ei fa matamua i roto i te oraraa. E monihia paha te feia o te feruri ra mai tera, aore ra eita. Mea atâta teie na tupuraa, no te mea e imi ratou ia monihia ratou, e tuu ratou i te hiti to ratou ea, to ratou utuafare e tae roa ˈtu i to ratou auhoaraa e te Atua ia naea ia ratou ta ratou fa. (Tim. 1, 6:10) E nehenehe tatou e haamauruuru i to tatou Metua i te raˈi i to ˈna tautururaa ia tatou ia faatupu i te hoê manaˈo au noa no nia i te moni.—Koh. 7:12; Luka 12:15.

10-11. (a) Eaha ta tatou e rave no te paruru ia tatou iho? (b) Eaha te ohipa a te mau tiai i tahito ra, e e nafea to tatou manaˈo haava e ohipa ˈi mai te hoê tiai?

¹⁰ No te paruru i to tatou aau, mea tia ia tatou ia ite eaha te mau tupuraa atâta a haavitiviti atu ai i te rave i te tahi mea no te paruru ia tatou. Te haamanaˈo mai ra te taˈo hurihia “tiai” i roto i te Maseli 4:23 i te ohipa a te hoê tiai. I te tau o te arii Solomona, i tia na te mau tiai i nia i te aua o te hoê oire a faaara ˈtu ai mai te peu te piri mai ra te ati. E tauturu mai teie faahohoˈaraa ia taa eaha ta tatou e rave ia ore Satani ia haaviivii i to tatou feruriraa.

¹¹ I tahito ra, i ohipa amui na te mau tiai e te mau tiai uputa o te oire. (Sam. 2, 18:24-26) I paruru na ratou i te oire ma te haapao maitai e ua piri te mau uputa ia faafatata mai te hoê enemi. (Neh. 7:1-3) E ohipa to tatou manaˈo haava haapiihia i te Bibilia * mai te hoê tiai e e faaara mai oia ia tatou ia tamata Satani i te tomo i roto i to tatou aau, oia hoi ia tamata Satani i te ohipa i nia i to tatou mau manaˈo, huru aau, manaˈo turai aore ra hinaaro. Ia faaara mai to tatou manaˈo haava ia tatou, mea tia ia tatou ia faaroo atu e ia tapiri i te uputa, ei auraa parau.

12-13. Eaha paha ta tatou e hinaaro e rave, eaha râ to tatou huru i mua i te tamataraa?

¹² Teie te tahi hiˈoraa no nia e nafea tatou e paruru ai ia tatou ia ore to Satani feruriraa ia ohipa i nia ia tatou. Ua haapii mai Iehova “eiaha roa ˈtu te mau peu taotoraa tia ore, e te peu viivii e rave rau . . . ia faahitihia i rotopu ia [tatou].” (Eph. 5:3) Eaha râ ta tatou e rave mai te peu e haamata to tatou mau hoa ohipa aore ra hoa haapiiraa, i te paraparau no nia i te mau  peu taotoraa tia ore? Ua ite tatou e mea tia “ia haapae i te haerea ino e oia atoa te mau hinaaro o teie nei ao.” (Tito 2:12) E faaara mai paha te tiai, oia hoi to tatou manaˈo haava, ia tatou. (Roma 2:15) E faaroo anei râ tatou? E hinaaro paha tatou e faarooroo i to tatou mau hoa aore ra e mataitai roa ˈtu i te mau hohoˈa ta ratou e faaite haere nei. Teie râ te taime no te tapiri i te mau uputa o te oire, ei auraa parau, ma te taui anei i te aparauraa aore ra ma te haere ê atu.

¹³ E titauhia te itoito no te patoi i te mau faaheporaa a vetahi ê ia feruri aore ra ia rave i te mea ino. Ia papu maitai ia tatou e te ite mai ra Iehova i ta tatou mau tutavaraa, e e horoa mai oia i te puai e te paari ta tatou e hinaaro mau no te patoi i te huru feruriraa a Satani. (Par. 2, 16:9; Isa. 40:29; Iak. 1:5) Eaha ˈtu â ta tatou e nehenehe e rave no te paruru i to tatou aau?

14-15. (a) E iriti tatou i te uputa o to tatou aau i te aha, e e nafea tatou e na reira ˈi? (b) E nafea te Maseli 4:20-22 e tauturu ai ia tatou ia faufaahia i ta tatou taioraa Bibilia? (A hiˈo i te tumu parau tarenihia “Ia feruriruri oe.”)

¹⁴ No te paruru i to tatou aau, e patoi tatou i te mau ohipa e turai ia tatou ia rave i te mea ino, e farii atoa râ tatou i te mau ohipa e turai ia tatou ia rave i te mea maitai. A feruri faahou na i te hiˈoraa o te hoê oire auahia i te patu. I tapiri na te hoê tiai uputa i te mau uputa o te oire ia ore te enemi ia tomo mai. I te tahi râ taime, i iriti na oia i te mau uputa ia afaihia mai te maa e te tahi atu mau mea e hinaarohia. Mai te peu eita te mau uputa e iritihia, e pohe to reira feia i te poia. Hoê â huru no tatou, mea tia ia tatou ia iriti i te uputa o to tatou aau ia tamau te manaˈo o te Atua i te ohipa i nia ia tatou.

¹⁵ Tei roto i te Bibilia te manaˈo o Iehova. I te mau taime atoa e taio ai tatou i te reira, te vaiiho ra ïa tatou i to Iehova manaˈo ia ohipa i nia i to tatou huru feruriraa, huru aau e haerea. E nafea tatou e faufaahia ˈi i ta tatou taioraa Bibilia? Mea faufaa te pure. Te parau ra te hoê tuahine Kerisetiano: “Hou a taio ai i te Bibilia, e pure au ia Iehova, a ani ai ia tauturu mai oia ‘ia ite au i te mau mea taa ê’ i roto i ta ˈna Parau.” (Sal. 119:18) E titau-atoa-hia ia feruri tatou i te mea ta tatou e taio ra. Ia pure, ia taio e ia feruriruri tatou, e puta te hohonuraa o “to [tatou] aau” i te Parau a te Atua, e e haafaufaa mau â tatou i te manaˈo o Iehova.—A taio i te Maseli 4:20-22; Sal. 119:97.

16. Mea nafea e rave rahi i faufaahia ˈi i te JW Haapurororaa teata?

¹⁶ Hoê faahou ravea e vaiiho ai tatou i to Iehova manaˈo ia ohipa i nia ia tatou, o te mataitairaa ïa i te mau video i nia i te JW Haapurororaa teata. Te na ô ra te hoê tane e ta ˈna vahine faaipoipo: “Ua riro mau â te faanahoraa avaˈe ei pahonoraa i ta mâua mau pure! Ua haapuai e ua faaitoito mai te reira ia mâua, ia oto aore ra ia moˈemoˈe mâua. E i te fare, e faaroo noa mâua i te mau himene rau. E faataˈi mâua i te reira ia tunu mâua i te maa, ia tamâ i te fare, aore ra a inu ai i te ti.” Te tauturu mai ra tera faanahoraa ia tatou ia paruru i to tatou aau, te haapii mai ra ia feruri mai ia Iehova e ia patoi i te mau faaheporaa ia pee i to Satani huru feruriraa.

17-18. (a) Eaha te tupu ia pee tatou i ta tatou e haapii ra no ǒ mai ia Iehova ra mai ta Te mau arii 1, 8:61 e parau ra? (b) Eaha te nehenehe e haapii mai i te hiˈoraa o te arii Hezekia? (c) Ia au i te pure a Davida i roto i te Salamo 139:23, 24, e nehenehe tatou e pure no te aha?

¹⁷ I te mau taime atoa e ite ai tatou i te faufaaraa ia rave i te mea maitai, e puai atu  â to tatou faaroo. (Iak. 1:2, 3) E oaoa tatou no te mea ua rave tatou i te tahi mea e haapeu roa ˈi Iehova i te parau e e tamarii tatou no ˈna, e e rahi atu â to tatou hinaaro e faaoaoa ia ˈna. (Mas. 27:11) E riro te tamataraa tataitahi ei faaiteraa e aita tatou e tavini ra ma te aau piti i to tatou Metua here. (Sal. 119:113) E faaite tatou e te here ra tatou ia Iehova ma te hoê aau taatoa, te hoê aau o tei faaoti papu e auraro i ta ˈna mau faaueraa a rave atu ai i to ˈna hinaaro.—A taio i Te mau arii 1, 8:61.

¹⁸ Ei taata tia ore, e hapa iho â tatou. Ia turori noa ˈtu tatou, e haamanaˈo anaˈe i to te arii Hezekia hiˈoraa. Ua hapa oia, ua tatarahapa râ i muri iho e ua tamau i te tavini ia Iehova “ma te aau haavare ore,” aore ra taatoa. (Isa. 38:3-6; Par. 2, 29:1, 2; 32:25, 26) E patoi anaˈe i ta Satani mau tamataraa no te haaviivii ia tatou i to ˈna huru feruriraa. E pure anaˈe no te faatupu i te hoê aau auraro. (Arii 1, 3:9; a taio i te Salamo 139:23, 24.) E ore tatou e taiva ia Iehova mai te peu e tutava tatou i te paruru i to tatou aau na mua roa.