1-2. Eaha te mau tupuraa ta te mau tavini a Iehova e faaruru nei e eaha te nehenehe e tupu?

 A FERURI na i to muri nei mau tupuraa: Ua roohia te tahi taeae apî i te hoê maˈi o te haaparuparu i to ˈna tino. Ua ere te tahi taeae hau atu i te 50 matahiti i ta ˈna ohipa. Mea maoro to ˈna imiraa i te tahi atu ohipa, aita râ i noaa mai. No te matahiti rahi, ua iti roa mai ta te tahi tuahine haapao maitai e nehenehe e rave i roto i te taviniraa.

² Mai te peu tei roto outou i te hoê o te mau tupuraa i faahitihia, e haafaufaa ore paha outou ia outou iho. Peneiaˈe, e ere outou i te oaoa, e riri paha ia outou iho aore ra e taui to outou huru i nia ia vetahi ê.

3. Mea nafea Satani e te feia e pee i to ˈna huru feruriraa e hiˈo ai i te taata?

³ Te pee ra to teie nei ao i te huru feruriraa o Satani. Mai te tau mai â, ua haafaufaa ore noa te Diabolo i te taata. Ite noa ˈtu â oia e pohe te hopearaa, ua turai Satani ia Eva ia faaroo ore i te Atua! O te Diabolo atoa te faatere o te mau tuhaa huru rau o te faanahoraa o teie nei ao, oia hoi te tapihooraa, te poritita e te haapaoraa hape. E ere ïa i te mea maere ia pee te mau ona, feia mana e tia haapaoraa i to ˈna huru feruriraa ma te taataahi i te taata a haafaufaa ore atu ai ia ratou!

4. Eaha ta tatou e hiˈopoa i roto i teie haapiiraa?

⁴ O Iehova râ, te hinaaro ra ïa ia tapea tatou i te hoê manaˈo tano no nia ia tatou iho. Hau atu â, e tauturu mai  oia ia faaruru tatou i te tupuraa e haafaufaa ore ai tatou ia tatou iho. (Sal. 136:23; Roma 12:3) I roto i teie haapiiraa, e hiˈopoa mai tatou e nafea Iehova e tauturu mai ai ia roohia tatou i te maˈi, ia fifi tatou i te pae faufaa e ia toaruaru tatou no te matahiti rahi. Na mua râ, e hiˈo anaˈe eaha te haapapu ra mea faufaa te taata tataitahi i te aro o Iehova.

5. Eaha te haapapu ra mea faufaa tatou no Iehova?

⁵ Mea faufaa tatou noa ˈtu ua hamanihia tatou i te repo fenua. (Gen. 2:7) Eaha te tahi haapapuraa mea faufaa tatou no Iehova? Ua poiete oia i te taata ma to ˈna ihora huru. (Gen. 1:27) Te auraa, e nehenehe tatou e faatupu i te mau huru maitatai o te Atua e tei nia aˈe ïa tatou i te mau animara.—Sal. 8:4-8.

6. Eaha te tahi atu haapapuraa e mea faufaa tatou no Iehova noa ˈtu to tatou huru tia ore?

⁶ Noa ˈtu te hara a Adamu, ua tamau Iehova i te haafaufaa i te taata. No to ˈna here rahi ia tatou i tono mai ai oia i ta ˈna Tamaiti here ra o Iesu no te faaora ia tatou i te hara. (Ioa. 1, 4:9, 10) Maoti tera tusia taraehara, e faatia mai Iehova i tei pohe no te hara a Adamu, “te feia parau-tia” e “te feia parau-tia ore.” (Ohi. 24:15) I roto i ta ˈna Parau, ua haapapu Iehova mea faufaa tatou no ˈna noa ˈtu ua roohia tatou i te maˈi, ua fifi i te pae faufaa e ua ruhiruhia.—Ohi. 10:34, 35.

7. No te aha te mau tavini a Iehova e tiaturi papu ai mea faufaa ratou no Iehova?

⁷ Ua ite Iehova i to tatou huru a faaitehia mai ai te parau apî oaoa e ua aratai oia ia tatou ia ˈna ra. (Ioa. 6:44) I to tatou haamataraa i te faafatata ia ˈna, ua faafatata atoa mai oia ia tatou. (Iak. 4:8) Te horoa atoa nei Iehova i to ˈna taime e puai no te haapii ia tatou. E tapao faaite ïa mea here roa na ˈna ia tatou. Ua ite oia i to tatou huru i teie mahana e na ˈna e tauturu mai ia riro ei taata maitai aˈe ananahi! No to ˈna here, te aˈo atoa mai ra Iehova ia tatou! (Mas. 3:11, 12) No reira, e tiaturi papu anaˈe mea faufaa tatou no Iehova.

8. E nafea te Salamo 18:27-29 e tauturu mai ai ia tapea i te hoê feruriraa maitai i roto i te fifi?

⁸ Noa ˈtu ua haafaufaa ore te tahi mau taata ia ˈna, ua papu i te arii Davida mea herehia o ˈna e Iehova e eita roa oia e faarue ia ˈna. Na tera manaˈo i tauturu ia Davida ia tapea i te hoê feruriraa maitai i roto i te fifi. (Sam. 2, 16:5-7) Ia toaruaru aore ra ia fifi tatou, e nehenehe Iehova e tauturu mai ia ore e hepohepo. E au paha to tatou tupuraa i te hoê pare, aore ra patu teitei, na Iehova râ e horoa mai i te puai no te tauma na nia ˈtu. (A taio i te Salamo 18:27-29.) Tei to tatou pae anaˈe Iehova, eita te tahi noa ˈˈe mea e nehenehe e tapea ia tatou ia tavini ia ˈna ma te aau oaoa. (Roma 8:31) I teie nei, e hiˈopoa anaˈe e toru tupuraa e titauhia ia haamanaˈo mea faufaa tatou no Iehova.

9. I roto i te maˈi, no te aha e nehenehe tatou e haafaufaa ore ia tatou iho?

⁹ I roto i te maˈi, e nehenehe to tatou aau e teimaha roa a manaˈo atu ai e ere tatou i te mea faufaa faahou. Peneiaˈe, e haama te noaa mai ia ite te taata i to tatou tupuraa aore ra ia titauhia na vetahi ê e aupuru mai. E noa ˈtu aita te taata i ite i to tatou maˈi, e haafaufaa ore  paha tatou ia tatou no te mea eita tatou e nehenehe faahou e rave mai na mua ˈˈe. I roto râ i tera tupuraa hepohepo mau, e nehenehe Iehova e faaetaeta, aore ra e faaitoito, ia tatou. E nafea?

10. Ia au i te Maseli 12:25, eaha te tauturu mai ia roohia tatou i te maˈi?

¹⁰ Ia roohia tatou i te maˈi, e nehenehe te hoê “parau maitai” e faaitoito ia tatou. (A taio i te Maseli 12:25.) I roto i te Bibilia, ua haapue Iehova e rave rahi parau maitai o te haamanaˈo mai ra mea faufaa tatou noa ˈtu e maˈi to tatou. (Sal. 31:19; 41:3) Ia taio e ia na nia iho faahou tatou i te taio i te Bibilia, e tauturu mai Iehova ia ore e hepohepo.

11. Mea nafea Iehova i te tautururaa i te tahi taeae?

¹¹ A hiˈo na i te tupuraa o Jorge. Noa ˈtu to ˈna apî, ua roohia Jorge i te hoê maˈi o tei haaparuparu i to ˈna tino. Te na ô ra Jorge: “Aita vau i ite e nehenehe au e hepohepo aore ra e haama no to ˈu tupuraa. A rahi roa mai ai te maˈi, ua taa ia ˈu e taui roa to ˈu oraraa. Ua hepohepo roa vau e ua taparuparu atoa ia Iehova ia tauturu mai.” Mea nafea Iehova i te aupururaa ia ˈna? Te parau ra Jorge: “Mea fifi roa no ˈu ia tiatonu i to ˈu feruriraa i nia i te ohipa ta ˈu e rave. Ua faaitoitohia vau ia taio i te tahi mau irava poto no roto mai i te mau Salamo o te faaite ra mea nafea Iehova i te aupururaa i ta ˈna mau tavini. I te mau mahana atoa, ua na nia iho noa vau i te taio i tera mau irava e mǎrû mai nei to ˈu aau. Ua tapao vetahi e mata oaoa to ˈu i teie nei e ua parau roa mai te faaitoito ra to ˈu oaoa ia ratou. Ua pahono Iehova i ta ˈu mau pure! Ua tauturu mai oia ia taui i ta ˈu huru hiˈoraa  ia ˈu e ia haamanaˈo i te parauhia ra i roto i te Bibilia, oia hoi mea faufaa vau no Iehova noa ˈtu to ˈu maˈi!”

12. I roto i te maˈi, eaha te titauhia ia rave no te fanaˈo i ta Iehova tauturu?

¹² Mai te peu ua roohia outou i te maˈi, a haamanaˈo te taa ra ia Iehova to outou tupuraa. A taparuparu ia Iehova ia tauturu ia outou ia tapea i te hoê feruriraa maitai. A maimi i te mau parau maitai ta Iehova i haapue i roto i ta ˈna Parau. A haafaufaa iho â râ i te mau irava Bibilia o te haapapu ra mea here na Iehova i ta ˈna mau tavini. Ei reira outou e tamata roa ˈi i te maitai rahi o Iehova i nia i ta ˈna mau tavini taiva ore atoa!—Sal. 84:11.

13. Eaha te huru o te upoo utuafare ia ere oia i ta ˈna ohipa?

¹³ E hinaaro te mau upoo utuafare î i te here e horoa i te mau mea hinaarohia e to ratou utuafare. A feruri na râ noa ˈtu to ˈna haapao maitai, ua ere te hoê taeae i ta ˈna ohipa. E tutava maite oia i te imi i te tahi atu ohipa, eita râ i noaa mai. I roto i tera tupuraa, e manaˈo paha te taeae mea faufaa ore o ˈna. Eaha ta Iehova i fafau i ta ˈna mau tavini e e nafea te reira e tauturu ai i te taeae?

14. No te aha Iehova e tapea ˈi i ta ˈna parau?

¹⁴ E tapea noa iho â Iehova i ta ˈna parau. (Ios. 21:45; 23:14) No te aha? A tahi, ia ore to ˈna iˈoa ia faainohia. A piti, e Atua Iehova o te ore e faahiti faufaa ore noa i te parau. Ua parau Iehova e aupuru oia i ta ˈna mau tavini taiva ore, e na reira iho â ïa oia. (Sal. 31:1-3) A toru, ei Metua, ua ite Iehova e oto e e haapeapea to ˈna utuafare ia ore o ˈna e aupuru atu. Ua fafau oia i te aupuru ia tatou i te  pae tino e te pae varua, eita te hoê mea e nehenehe e tapea ia ˈna ia rave mai ta ˈna i parau!—Mat. 6:30-33; 24:45.

15. (a) Eaha te tupuraa fifi ta te mau Kerisetiano matamua i faaruru? (b) Eaha ta te Salamo 37:18, 19 e haapapu ra?

¹⁵ Ma te haamanaˈo e tapea Iehova i ta ˈna parau, eita tatou e hepohepo ia fifi tatou i te pae faufaa. A feruri na i te mau Kerisetiano i te senekele matamua. Ua hamani-ino-rahi-hia te amuiraa i Ierusalema, “purara ê atura te mau pǐpǐ atoa.” (Ohi. 8:1) Te auraa, ua fifi ratou i te pae faufaa! Ua ere ratou i to ratou fare e i ta ratou ohipa aore ra imiraa moni. Ua faarue anei râ Iehova ia ratou? Ua ere anei ratou i to ratou oaoa? Aita roa ˈtu! (Ohi. 8:4; Heb. 13:5, 6; Iak. 1:2, 3) Ua tauturu noa Iehova i tera mau Kerisetiano taiva ore e e na reira atoa oia no tatou.—A taio i te Salamo 37:18, 19.

16. I roto i teihea tupuraa e nehenehe ai tatou e manaˈo mea faufaa ore ta tatou taviniraa?

¹⁶ No te matahiti rahi, e haamata paha tatou i te manaˈo mea iti ta tatou e horoa ra na Iehova. Hoê â atoa haapeapearaa to te arii Davida i to ˈna ruhiruhiaraa. (Sal. 71:9) I roto i tera tupuraa, e nafea Iehova e tauturu ai ia tatou?

17. Eaha te haapiiraa e huti mai i te tupuraa o te tuahine Jheri?

¹⁷ A feruri na i te tupuraa o te tuahine Jheri. Ua anihia oia ia apiti atu i te hoê putuputuraa no te haapii i te atuatu i te Piha a te Basileia. Te na ô ra râ Jheri: “Ua ruhiruhia vau e e vahine ivi atoa, eita Iehova e hinaaro ia ˈu!” I te po na mua ˈtu i tera putuputuraa, ua pure e ua haamahora Jheri i to ˈna aau ia Iehova.  I te taeraa ˈtu oia i te Piha a te Basileia i te mahana i muri iho, ua manaˈo noa â Jheri, aita e ohipa faufaa ta ˈna e nehenehe e rave. I tera râ putuputuraa, ua haamatara hoê o te mau taeae orero e titauhia i te mau taeae e tuahine ia farii na Iehova e haapii ia ratou. Na ô ihora Jheri, “‘E hoa, mai tera hoi au!’ I tera taime, ua taˈi au e ua taa atoa tera ta Iehova pahonoraa i ta ˈu pure. Te haapapu mai ra oia e ohipa faufaa ta ˈu e nehenehe e horoa e ua ineine oia i te haapii ia ˈu!” Te na ô faahou ra Jheri: “I te apitiraa ˈtu vau i tera putuputuraa, ua haapeapea e ua toaruaru vau. I te haereraa mai râ i rapae, aita vau i taiâ faahou, ua itoitohia râ!”

18. Eaha te haapapu ra e tamau Iehova i te haafaufaa i ta tatou taviniraa noa ˈtu ua ruhiruhia tatou?

¹⁸ Noa ˈtu ua ruhiruhia tatou, e ohipa noa â ta Iehova e nehenehe e horoa na tatou! (Sal. 92:12-15) Ua haapii Iesu, iti noa ˈtu â ta tatou e rave no te tavini i te Atua, te haafaufaa ra Iehova i te reira! (Luka 21:2-4) A tiatonu noa ïa i nia i ta outou e nehenehe e rave! E maraa noa â paha ia outou ia paraparau no nia ia Iehova, ia pure no te mau taeae e ia faaitoito ia vetahi ê ia mau papu i to ratou faaroo. No Iehova, e hoa ohipa outou no ˈna! Ta ˈna e haafaufaa ra, e ere te rahiraa ohipa ta outou e rave, to outou râ hinaaro e auraro ia ˈna!—Kor. 1, 3:5-9.

19. Eaha ta te Roma 8:38, 39 e haapapu ra?

¹⁹ Auê tatou i te mauruuru i te haamori ia Iehova, te haafaufaa mau ra hoi oia i ta ˈna mau tavini! Ua hamani oia ia tatou no te faatupu i to ˈna hinaaro e te oaoa mau nei tatou i te pûpû ia ˈna i te hoê taviniraa moˈa! (Apo. 4:11) Ia haafaufaa ore te feia o teie nei ao ia tatou, e haamanaˈo anaˈe mea faufaa tatou no Iehova! (Heb. 11:16, 38) Ia teimaha to tatou aau no te maˈi, te fifi i te pae faufaa aore ra te matahiti rahi, e haamanaˈo anaˈe e ore roa ˈtu te tahi mea e nehenehe e faataa ê ia tatou i te here o to tatou Metua i te raˈi!—A taio i te Roma 8:38, 39.