1. Eaha te huru o te hoê taeae apî a faaroo ai oia i te oreroraa parau tei horoahia i te hoê tairururaa i 1935?

 I TE matahiti 1926, ua bapetizohia te hoê taurearea 18 matahiti. Tei rotopu to ˈna na metua i te Feia haapii Bibilia, tei matauhia i teie mahana mai te mau Ite no Iehova. Ua haapii raua i ta raua na toru tamaroa e e piti tamahine ia tavini ia Iehova e ia pee i te hiˈoraa o Iesu. I te mau matahiti atoa a tupu ai te Oroa haamanaˈoraa i te pohe o te Mesia, ua amu tera taeae apî i te pane e ua inu i te uaina ma te aau haavare ore mai te taatoaraa o te Feia haapii Bibilia o tera tau. Ua taui roa râ te oraraa o teie taeae a faaroo ai oia i te oreroraa parau “Te nahoa rahi” ta Joseph Rutherford i horoa i te hoê tairururaa i te matahiti 1935 i Washington. Eaha tei faaitehia i tera tairururaa?

2. Eaha te faataaraa apî tei horoahia i roto i te oreroraa parau a taeae Rutherford?

² I roto i ta ˈna oreroraa parau, ua faaite taeae Rutherford o vai te “nahoa rahi” tei faahitihia i roto i te Apokalupo 7:9. * Na mua ˈˈe, i manaˈohia na e ora atoa teie pǔpǔ taata i te raˈi noa ˈtu e ere to ratou faaroo i te mea puai roa. Ua faaohipa taeae Rutherford i te Bibilia no te faataa aita teie nahoa rahi i maitihia no te  ora i te raˈi, o ratou râ te mau mamoe ê atu * a te Mesia o te na roto mai i “te ati rahi” e te ora e a muri noa ˈtu i nia i te fenua. (Apo. 7:14) Ua parau Iesu: “E mamoe ê atu ta ˈu, e ere i to teie nei aua. Ia aratai atoa mai au ia ratou e tia ˈi, e faaroo mai ratou i to ˈu reo, a riro atu ai ei hoê noa nǎnǎ, hoê noa tiai.” (Ioa. 10:16) Te tavini ra teie mau mamoe ê atu ia Iehova ma te haapao maitai e te tiaturi atoa ra e ora e a muri noa ˈtu i roto i te paradaiso i nia i te fenua. (Mat. 25:31-33, 46) E hiˈo mai tatou mea nafea teie tatararaa apî i te tauiraa i te oraraa o te mau tavini a Iehova, oia atoa to te taeae 18 matahiti.—Sal. 97:11; Mas. 4:18.

3-4. Eaha ta te rahiraa taeae e tuahine i taa no nia i to ratou tiaturiraa i te tairururaa i 1935 e mea nafea ratou i te taaraa?

³ Hoê taime faufaa o tera tairururaa, o te ohipa ïa i tupu a ani ai te taeae orero i te feia i tae mai: “Te feia atoa e tiaturi ra e ora i te fenua e a muri noa ˈtu, a tia mai!” Ua parau te tahi taeae tei tae i tera tairururaa ua hau atu i te afaraa o te feia i tae mai tei tia. I muri iho, ua na ô te taeae Rutherford: “A hiˈo na i te nahoa rahi!” Ua oaoa roa te taatoaraa i tera mau parau. Ua taa i te feia i tia mai aita ratou i faatavaihia i te varua moˈa no te ora i te raˈi. I te mahana i muri iho, 840 taata tei bapetizohia ei Ite no Iehova, te rahiraa o ratou e feia ïa no roto mai i te mau mamoe ê atu.

⁴ I muri aˈe i tera oreroraa parau, ua faaea te taurearea i faahitihia i te omuaraa e e tausani atu taata i te rave i te pane e te uaina i te Oroa haamanaˈoraa. Ma te haehaa, teie ta te hoê taeae i parau no te faataa i te huru o te rahiraa taeae e tuahine: “I muri aˈe i te matahiti 1935, ua faaea vau i te rave i te pane e te uaina i te Oroa haamanaˈoraa. Aita Iehova i haapapu mai na roto i to ˈna varua moˈa ua maitihia vau no te ora i te raˈi. Ua tiaturi au e ora i nia i te fenua e e faariro i te reira ei paradaiso.” (Roma 8:16, 17; Kor. 2, 1:21, 22) Mai reira mai, ua maraa noa ˈtu â te numera o te nahoa rahi e ua ohipa amui ratou e te toea faatavaihia. *

5. Eaha to Iehova manaˈo i te feia tei faaea i te rave i te pane e te uaina i te Oroa haamanaˈoraa?

⁵ Eaha to Iehova manaˈo i te feia tei faaea i te rave i te pane e te uaina i muri aˈe i te matahiti 1935? Eaha atoa to ˈna manaˈo i te hoê Ite no Iehova o te rave i teie mahana i te pane e te uaina i te Oroa haamanaˈoraa, o te taa râ i muri aˈe aita o ˈna i faatavaihia? (Kor. 1, 11:28) Ua rave vetahi i te pane e te uaina no te mea aita ratou i papu eaha to ratou tiaturiraa. Ia farii râ ratou ua hape ratou e ia faaea atoa i te rave i te pane e te uaina a tamau noa ˈi  i te tavini ia Iehova, e fariihia ratou i rotopu i te mau mamoe ê atu. Eita ratou e faaea i te faatupu i te Oroa haamanaˈoraa no to ratou mauruuru i ta Iehova e ta Iesu i rave.

6. Eaha ta Iesu i faaue i te mau melahi?

⁶ No te ati rahi e fatata mai ra, mea faufaa ia hiˈopoa faahou i ta te Apokalupo pene 7 e parau ra no nia i te mau Kerisetiano faatavaihia e te nahoa rahi o te mau mamoe ê atu. Na nia i te faaueraa a Iesu, te tamau ra te mau melahi i te tapea na mataˈi e maha o te haamouraa. Te tiai ra ratou ia tapao-pauroa-hia te feia faatavaihia e Iehova. (Apo. 7:1-4) No to ratou haapao maitai, e riro teie mau taeae faatavaihia o Iesu ei arii e ei tahuˈa e te Mesia i te raˈi. (Apo. 20:6) E oaoa roa Iehova, Iesu e te mau melahi i te ite i na 144 000 Kerisetiano faatavaihia ia fanaˈo i ta ratou haamaitairaa i te raˈi.

7. Ia au i te Apokalupo 7:9, 10, eaha ta Ioane i ite orama? (A hiˈo i te hohoˈa i te api matamua.)

⁷ I muri aˈe i to ˈna fahitiraa i na 144 000 arii e tahuˈa, ua ite Ioane i “te hoê nahoa rahi” o te ora ˈtu i Aramagedo. E feia rahi roa teie eita e noaa ia taio. (A taio i te Apokalupo 7:9, 10.) E “ahu roa uouo” to ratou o te faaite ra aita ratou i viivii i te ao a Satani e ua auraro atoa ma te haapao maitai i te Atua e i te Mesia. (Iak. 1:27) E tuô ratou no ǒ mai to ratou faaoraraa ia Iehova e ia Iesu, te Arenio a te Atua. E amaa tamara tei to ratou rima no te faaite te oaoa ra ratou o Iesu ta Iehova i maiti ei Arii.—A hiˈo atoa i te Ioane 12:12, 13.

8. Ia au i te Apokalupo 7:11, 12, eaha te tupu i te raˈi?

⁸ A taio i te Apokalupo 7:11, 12. Eaha te tupu a arue ai te nahoa rahi i te Atua? E oaoa mau to te raˈi a ite ai i te nahoa rahi ia na roto mai i te ati rahi.

9. Ia au i te Apokalupo 7:13-15, te aha nei te nahoa rahi i teie mahana?

⁹ A taio i te Apokalupo 7:13-15. Ua parau Ioane “ua horoi e ua faauouo [te nahoa rahi] i to ratou ahu roa i te toto o te Arenio.” E haapapuraa ïa e manaˈo haava mâ to ratou e e feia parau-tia atoa i te aro o Iehova. (Isa. 1:18) Ei Kerisetiano pûpûhia i te Atua e te bapetizohia, te faatupu nei ratou i te faaroo puai i te tusia o Iesu e e auhoaraa maitai to ratou e o Iehova. (Ioa. 3:36; Pet. 1, 3:21) Ua fariihia ia tia ratou i mua i te terono o te Atua no te pûpû i “te hoê taviniraa moˈa” i te po e te ao i nia i te fenua. Tae roa mai i teie nei, te tuu ra ratou i te mau faufaa a te Faatereraa arii a te Atua na mua roa ma te apiti rahi i roto i te ohipa pororaa e faariroraa i te taata ei pǐpǐ na te Mesia.—Mat. 6:33; 24:14; 28:19, 20.

10. Eaha ta te Atua e rave no te nahoa rahi e eaha te parau fafau ta ˈna e faatupu?

¹⁰ E aupuru-noa-hia te nahoa rahi o te na roto mai i te ati rahi no te mea “e hohora mai te Atua e parahi ra i nia i te terono i to ˈna tiahapa i nia ia ratou.” I reira teie parau fafau ta te mau mamoe ê atu i tiai maoro na e tupu ai: “E tamǎrô [te Atua] i te mau roimata atoa o to ratou mata. E ore roa te pohe, e ore  atoa te oto e te auê e te mauiui.”—Apo. 21:3, 4.

11-12. (1) Ia au i te Apokalupo 7:16, 17, eaha te tiai mai ra i te nahoa rahi? (2) Eaha ta te mau mamoe ê atu e rave i te Oroa haamanaˈoraa e no te aha?

¹¹ A taio i te Apokalupo 7:16, 17. I teie mahana, no te mau arepurepuraa i to ratou fenua aore ra no te fifi i te pae faufaa, te pohe nei vetahi Ite no Iehova i te poia. Te tahi atu, ua tapeahia ïa no to ratou faaroo. Te oaoa nei râ te nahoa rahi i te ite, i muri aˈe i te haamouraa o teie ao ino, eita ratou e ere i te maa i te pae tino e i te pae varua. Ia haamouhia te ao a Satani, eita te nahoa rahi e “paapaa” a ninii ai Iehova i to ˈna riri i nia i te mau nunaa. I muri aˈe i te ati rahi, e aratai Iesu i teie nahoa rahi i “te mau pape pihaa o te ora [mure ore].” Auê tiaturiraa faahiahia no teie nahoa rahi eita e noaa ia taio, e ore roa hoi ratou e ite i te pohe!—Ioa. 11:26.

¹² E mauruuru te mau mamoe ê atu ia Iehova e ia Iesu no te tiaturiraa ta ratou e fanaˈo ra! Aita ratou i maitihia no te ora i te raˈi, mea faufaa râ ratou no Iehova. Te arue amui nei te mau Kerisetiano faatavaihia e te mau mamoe ê atu i te Atua e te Mesia. Ei hiˈoraa, e na reira ratou a faatupu ai i te Oroa haamanaˈoraa i te pohe o te Mesia.

13-14. No te aha ia tae mai te mau mamoe ê atu i te Oroa haamanaˈoraa i te pohe o te Mesia e tia ˈi?

¹³ Ia faaauhia i te rahiraa taata e tae mai i te Oroa haamanaˈoraa, mea iti roa te feia e rave i te pane e te uaina. I roto i te rahiraa o te mau amuiraa na te ao, aita e taata e rave nei i te pane e te uaina i te Oroa haamanaˈoraa, mea rahi aˈe ïa te feia e tiaturi ra e ora i nia te fenua. No te aha râ te mau mamoe ê atu e haere ai i te Oroa haamanaˈoraa i te pohe o Iesu? Mai te taata o te haere i te faaipoiporaa o to ˈna hoa, e haere atoa te mau mamoe ê atu i te Oroa haamanaˈoraa no to ratou here i te Mesia e i te feia faatavaihia. E na reira atoa ratou no te faaite i te mauruuru  no te tusia taraehara o Iesu, maoti hoi te reira e nehenehe ai ratou e ora e a muri noa ˈtu i nia i te fenua.

¹⁴ Te tahi atu tumu faufaa e haere ai te mau mamoe ê atu i te Oroa haamanaˈoraa, no te auraro ïa i ta Iesu faaueraa. A haamau ai Iesu i tera amuraa maa e ta ˈna mau aposetolo haapao maitai, ua parau oia ia ratou: “A tamau i te rave i te reira ei manaˈoraa ia ˈu.” (Kor. 1, 11:23-26) E tamau ïa te mau mamoe ê atu i te haere i te Amuraa maa a te Fatu e tae noa ˈtu i te poheraa o te Kerisetiano faatavaihia hopea i nia i te fenua. No reira te mau mamoe ê atu e titau manihini ai i te taata atoa ia tae mai i te Oroa haamanaˈoraa.

15. E nafea tatou tataitahi e arue ai i te Atua e i te Mesia i te Oroa haamanaˈoraa?

¹⁵ I taua oroa ra, e arue amui tatou i te Atua e i te Mesia na roto i te himene e te pure. I te matahiti 2021, teie te oreroraa parau e horoahia: “A haafaufaa i ta te Atua e te Mesia i rave no oe!” Maoti te reira, e rahi roa ˈtu â to tatou mauruuru ia Iehova e i te Mesia. A faahaerehia ˈi te pane e te uaina, e haamanaˈo tatou te faahohoˈa ra te reira i te tino e te toto o Iesu. E feruri atoa tatou i te here ta Iehova i faaite a vaiiho ai ia pohe ta ˈna Tamaiti no te faaora ia tatou. (Mat. 20:28) Eita te feia atoa e here ra i to tatou Metua i te raˈi e i ta ˈna Tamaiti e hinaaro e mairi i te Oroa haamanaˈoraa i te pohe o te Mesia.

16. Te vai ra anei te taa-ê-raa i rotopu i te mau Kerisetiano faatavaihia e te mau mamoe ê atu? A faataa.

¹⁶ Mea here na Iehova i te mau Kerisetiano faatavaihia e te mau mamoe ê atu e mea faufaa ratou pauroa no ˈna. Eaha te tumu? No te mea ua hoo mai oia i te feia faatavaihia e i te mau mamoe ê atu i te toto faufaa roa o ta ˈna Tamaiti here. Noa ˈtu mea taa ê to ratou tiaturiraa, eiaha teie mau Kerisetiano ia taiva i te Atua e i te Mesia. (Sal. 31:23) Ua faatavaihia tatou aore ra aita, e nehenehe Iehova e horoa mai i to ˈna varua moˈa ia au i to tatou tupuraa.

17. Eaha ta te toea o te feia faatavaihia e tiai ru nei?

¹⁷ Aita te mau Kerisetiano faatavaihia i fanauhia e te tiaturiraa e ora i te raˈi, ua tuu râ te Atua i te reira i roto i to ratou aau. No reira ratou e manaˈo noa ˈi i to ratou tiaturiraa, e pure ai no te reira e e tiai ru ai i te fanaˈo i ta ratou haamaitairaa  i te raˈi. Aita râ ratou i ite mai te aha te huru o to ratou tino a muri aˈe. (Phil. 3:20, 21; Ioa. 1, 3:2) Te tiai ru nei ratou i te farerei ia Iehova, ia Iesu, i te mau melahi, i te feia faatavaihia tei faatia-aˈena-hia e i te parahi atoa i roto i te Faatereraa arii i te raˈi.

18. Eaha ta te mau mamoe ê atu e tiai ru nei?

¹⁸ Te poihere nei te mau mamoe ê atu i te tiaturiraa ta te Atua i tuu i roto i te aau o te taata atoa, oia hoi e ora e a muri noa ˈtu i nia i te fenua. (Koh. 3:11) Te tiai ru nei ratou i te mahana e faariro ai ratou i te fenua taatoa ei paradaiso, e patu ai i to ratou fare, e tanu ai i ta ratou maa e e fanau ai i ta ratou tamarii ma te maˈi ore. (Isa. 65:21-23) E tere ratou na te mau fenua e rave rahi no te mataitai i te mau mouˈa, uru raau e moana a hiˈopoa atoa ˈi i te mau mea atoa ta Iehova i hamani. Te tumu râ e oaoa roa ˈi ratou, no te mea ïa e puai e e piri roa ˈtu â to ratou auhoaraa e o Iehova.

19. No te aha e taime faufaa te Oroa haamanaˈoraa no tatou e afea te reira e faatupuhia ˈi i teie matahiti?

¹⁹ Ua horoa Iehova i te hoê tiaturiraa faahiahia i ta ˈna mau tavini tataitahi. (Ier. 29:11) No tatou paatoa, e taime faufaa te Oroa haamanaˈoraa i te pohe o te Mesia no te arue i te Atua e i te Mesia no ta raua i rave ia ora tatou e a muri noa ˈtu. Aita ˈtu oroa faufaa aˈe no te mau Kerisetiano mau maori râ te Oroa haamanaˈoraa i te pohe o te Mesia. E faatupuhia te reira i te Mahana maa 27 no Mati 2021 i muri aˈe i te toparaa mahana. I teie matahiti, e faatupu e rave rahi i tera oroa ma te tiamâ, te tahi atu noa ˈtu te patoiraa, vetahi râ, i roto ïa i te fare tapearaa. A hiˈo noa mai ai Iehova, Iesu e to te raˈi ia tatou, ia oaoa te mau amuiraa, pǔpǔ e taata atoa i ta tatou Oroa haamanaˈoraa i te pohe o te Mesia!