1. Mai te arii Davida, eaha paha ta tatou e ani ia Iehova?

 E HINAARO tatou paatoa i te hoê oraraa hau e aita e haapeapearaa. I te tahi râ taime, e haapeapea iho â tatou. E ani atoa paha vetahi mau tavini a Iehova mai te arii Davida: “Mai te aha ra te maoro o to ˈu feruriraa i roto i to ˈu nei aau ma te oto i roto i to ˈu nei varua i te mau mahana atoa ra?”—Sal. 13:2.

2. Eaha ta tatou e hiˈopoa i roto i teie haapiiraa?

² E haapeapea iho â tatou i te tahi taime, te vai ra râ te tahi mau mea o te nehenehe e tamǎrû i to tatou feruriraa. I roto i teie haapiiraa, e hiˈopoa na mua roa tatou eaha te tahi mau tumu e haapeapea ˈi tatou. I muri mai, e hiˈo mai tatou e ono ohipa o te tauturu mai ia ore e ahoaho a faaruru ai i te fifi.

3. Eaha te mau tumu e haapeapea ˈi tatou e e nehenehe anei tatou e taui i te tupuraa?

³ E rave rau tumu e haapeapea ˈi tatou, e i te tahi taime, aita ta tatou e ravea no te taui i te tupuraa. E ere na tatou e faaoti i te moni hoo o te maa, te ahu e te nohoraa o te maraa noa ˈtu ra i te mau matahiti atoa. Eita atoa tatou e nehenehe e tapea i te mau hoa haapiiraa  aore ra ohipa ia turai ia tatou ia rave i te mea piˈo e i te peu taotoraa tia ore. Eita atoa tatou e nehenehe e tapea i te taata ia rave i te ino. Te faaruru ra tatou i teie mau fifi no te mea te ora ra tatou i roto i te hoê ao aita te rahiraa e haapao ra i te mau faaueraa Bibilia. Ua ite Satani, te atua o teie ao, e haafifi “te haapeapearaa no te oraraa” i te tahi mau tavini a Iehova. (Mat. 13:22; Ioa. 1, 5:19) E ere i te mea maere ia farerei tatou i te tupuraa e ahoaho ai tatou!

4. Eaha paha to tatou huru i mua i te fifi?

⁴ I mua i te fifi, e nehenehe tatou e haapeapea rahi roa. E haapeapea paha tatou eita te moni e navai no te aupuru i to tatou utuafare aore ra e roohia tatou i te maˈi aore ra e ere tatou i ta tatou ohipa. E haapeapea atoa paha tatou i te ofati i ta te Atua mau ture. I mua nei, e turai Satani i te taata ia aro i te nunaa o te Atua e e nehenehe tatou e haapeapea e nafea râ i tera taime. E na ô paha tatou, ‘Mea ino anei ia haapeapea vau no teie mau tupuraa?’

5. A parau ai Iesu ia “faaea i te haapeapea,” eaha ta ˈna i hinaaro e parau?

⁵ Ua parau Iesu i ta ˈna mau pǐpǐ: “A faaea i te haapeapea.” (Mat. 6:25) Te auraa anei eiaha tatou ia haapeapea? E ere roa ˈtu! Ua haapeapea atoa te tahi mau tavini haapao maitai a Iehova i tahito, aita râ ratou i ere i ta ˈna farii maitai. * (Arii 1, 19:4; Sal. 6:3) Ta Iesu i hinaaro e parau, eiaha ta tatou taviniraa i te Atua ia haafifihia e te mau haapeapearaa o te oraraa. Eaha te tauturu ia tatou ia faaea i te haapeapea?—A hiˈo i te tumu parau “ E nafea?”

6. Ia au i te Philipi 4:6, 7, eaha te nehenehe e tamǎrû i to tatou feruriraa?

⁶ (1) A tamau i te pure. E tamǎrûhia te feruriraa o te mau Kerisetiano e haapeapea ra ia fariu ratou ia Iehova na roto i te pure. (Pet. 1, 5:7) E pahono Iehova i ta outou mau pure ma te horoa ˈtu i “te hau o te Atua, tei hau ê i te mau manaˈo atoa [o te taata].” (A taio i te Philipi 4:6, 7.) E tamǎrû Iehova i to tatou feruriraa maoti to ˈna varua moˈa.—Gal. 5:22.

7. Eaha te titauhia ia haamanaˈo a pure ai tatou ia Iehova?

⁷ A pure ai ia Iehova, a haamahora i to outou aau. A faataa maitai ia ˈna i to outou fifi e i to outou huru. Mai te peu e ravea ta outou no to outou tupuraa, a ani ia Iehova i te paari e te puai no te faaafaro i te fifi. Mai te peu râ aita ta outou e ravea, a ani i ta Iehova tauturu no te ore e haapeapea rahi roa. Ia faataa maitai outou i te tupuraa ia Iehova, e ite papu atoa ïa outou mea nafea o ˈna ia pahono i ta outou mau pure. Ia ore o ˈna e pahono oioi mai, eiaha e faaea i te pure. Te hinaaro ra Iehova ia onoono rahi outou i roto i te pure.—Luka 11:8-10.

8. Eaha te titauhia ia faahiti atoa i roto i ta tatou mau pure?

⁸ A huri ai i to tatou ahoaho ia Iehova, eiaha e haamoˈe i te haamauruuru  ia ˈna. Noa ˈtu eaha te tupuraa fifi ta tatou e faaruru, e haamanaˈo anaˈe i te mau maitai atoa ta ˈna i ho mai. Ia ore e roaa ia tatou i te faataa i to tatou fifi, e taa ia Iehova i to tatou huru ia parau noa tatou ia ˈna: “E Iehova e, tauturu mai na ia ˈu!”—Par. 2, 18:31; Roma 8:26.

9. Eaha te titauhia ia rave ia mǎtaˈu tatou?

⁹ (2) A tiaturi i to Iehova manaˈo, eiaha râ i to tatou iho. I te tau o te peropheta Isaia, no to ratou mǎtaˈu i to Asura, ua ani to Iuda i te tauturu a to Aiphiti. (Isa. 30:1, 2) Ua faaara ˈtu râ Iehova e ere te reira i te faaotiraa paari. (Isa. 30:7, 12, 13) Na roto ia Isaia, ua faaite Iehova i te nunaa e nafea ratou e ora ˈi. Ua parau te peropheta: “Tei te parau ore e te tiaturi papu ra, o to outou ïa ora.”—Isa. 30:15.

10. Eaha te tahi mau tupuraa e titauhia ia tiaturi papu ia Iehova?

¹⁰ E nafea tatou e faaite ai i to tatou tiaturi papu ia Iehova? Teie te tahi mau tupuraa: A feruri na e pûpûhia ˈtu te hoê ohipa aufau-maitai-hia o te titau rahi i to outou taime e o te faataupupu i ta outou taviniraa. Aore ra i te vahi raveraa ohipa, e faahinaaro te tahi taata ia outou, e ere râ o ˈna i te tavini bapetizohia na Iehova. Aore ra, e parau mai te hoê mero utuafare: “A maiti, o vau aore ra to oe Atua!” I roto i teie mau tupuraa, e ere i te mea ohie ia rave i te faaotiraa paari, e horoa ˈtu râ Iehova i te aratairaa papu. (Mat. 6:33; 10:37; Kor. 1, 7:39) Teie râ te uiraa: E tiaturi anei outou ia Iehova a pee atu ai i ta ˈna aratairaa?

11. No te ore e mǎtaˈu i te enemi, eaha te tahi mau faatiaraa Bibilia ta tatou e nehenehe e hiˈopoa?

¹¹ (3) A huti mai i te haapiiraa i te mau hiˈoraa Bibilia atoa. E rave rahi faatiaraa i roto i te Bibilia o te faaite ra i te faufaaraa ia ore e mǎtaˈu e ia tiaturi papu ia Iehova. A hiˈopoa ˈi i te reira, a imi mea nafea Iehova i te tautururaa i ta ˈna mau tavini ia ore e mǎtaˈu i te enemi. A faaue ai te Sunederi ia ratou ia faaea i te poro, aita te mau aposetolo i mǎtaˈu. Ma te itoito râ, ua parau ratou: “O te Atua ei faatere ta matou e auraro e tia ˈi, eiaha te taata.” (Ohi. 5:29) Aita atoa te mau aposetolo i hepohepo a rutuhia ˈi ratou. Eaha te tumu? No te mea ua papu ia ratou tei to ratou pae o Iehova e te mauruuru nei oia ia ratou. No reira ratou i tamau noa ˈi i te poro i te parau apî oaoa. (Ohi. 5:40-42) A fatata ˈi Setephano i te pohe, aita o ˈna i ahoaho noa ˈˈe, “mai to te melahi to ˈna hohoˈa mata.” (Ohi. 6:12-15) Ua papu hoi ia ˈna ua fanaˈo oia i ta Iehova farii maitai.

12. Ia au i te Petero 1, 3:14 e te 4:14, eaha te tumu e oaoa ˈi tatou i mua i te hamani-ino-raa?

¹² Ua haapapu roa ˈtu Iehova i te mau aposetolo tei pihai iho o ˈna ia ratou ma te horoa ˈtu i te mana no te faatupu i te semeio. (Ohi. 5:12-16; 6:8) Area no tatou, ua haapapu mai Iehova na roto i ta ˈna Parau, ia mauiui noa ˈtu tatou no te parau-tia, te faaoaoa ra tatou i to ˈna aau e tei nia iho ia tatou to ˈna varua. (A taio i te Petero 1, 3:14; 4:14.) Eiaha e haapeapea no te hamani-ino-raa ta tatou e faaruru, e haapuai anaˈe râ i teie nei â i to tatou tiaturi e turu e e faaora iho â Iehova  ia tatou. Mai te mau pǐpǐ matamua, e tiaturi papu anaˈe i ta Iesu i parau: “Na ˈu hoi e horoa ˈtu i te parau e te paari e ore ai e tia i to outou mau enemi ia patoi aore ra ia mârô mai. . . . I to outou faaoromai tamau e ora ˈi outou.” (Luka 21:12-19) Eiaha e haamoˈe, te haamanaˈo ra Iehova i te mau mea iti haihai no nia i ta ˈna mau tavini tei pohe ma te haapao maitai e na ˈna e faatia mai ia ratou i te ora!

13. E nafea tatou e faufaahia ˈi i te hiˈoraa o te feia tei mǎtaˈu e tei ore i tiaturi ia Iehova?

¹³ E haapiiraa atoa ta tatou e huti mai i te feia tei mǎtaˈu e tei ore i tiaturi ia Iehova. E tauturu mai to ratou hiˈoraa ia ore e pee i to ratou haerea. A riro mai ai Asa ei arii no Iuda, ua tiaturi o ˈna ia Iehova no te aro i te hoê nuu rahi Etiopia, e maoti Iehova, o ˈna tei upootia. (Par. 2, 14:9-12) I mua râ i te nuu haihai aˈe a te arii Iseraela o Baasa, ua peta o ˈna i to Arama ia haere mai ratou e tauturu. Aita ïa Asa i tiaturi ia Iehova mai ta ˈna i rave na mua ˈtu! (Par. 2, 16:1-3) E a fatata ˈi o ˈna i te pohe no te hoê maˈi ino mau, aita Asa i ani i ta Iehova tauturu!—Par. 2, 16:12.

14. Eaha ta tatou e haapii mai i te hiˈoraa o Asa?

¹⁴ I te haamataraa, ua tiaturi Asa ia Iehova a faaruru ai o ˈna i te fifi. Aita râ o ˈna i tamau i te na reira, ua manaˈo hoi mea maitai aˈe na ˈna iho e faaafaro i te fifi. A opua ˈi Asa e ani i te tauturu i to Arama, ua tiaturi o ˈna tera te ravea maitai no te upootia i nia i to Iseraela. Aita râ i tupu mai ta ˈna i manaˈo. Na roto i te hoê peropheta, ua faaara Iehova ia ˈna: “No te mea, ua tiaturi oe i te arii o Arama ra, aore i tiaturi i to Atua ra ia Iehova, e teie nei, e ora te nuu o te arii o Arama i to rima na.” (Par. 2, 16:7) I mua i te fifi, eiaha e tiaturi rahi roa ia tatou iho, e imi anaˈe râ i te aratairaa a Iehova i roto i ta ˈna Parau. E noa ˈtu e tupuraa ru, e tiaturi anaˈe ia Iehova no te rave i te faaotiraa paari.

15. Eaha ta tatou e nehenehe e rave a taio ai i te Bibilia?

¹⁵ (4) A tamau aau i te mau irava Bibilia. Ia ite outou i te irava o te faaite ra i te faufaaraa ia ore e mǎtaˈu e ia tiaturi ia Iehova, a tamau aau i te reira. E nafea ïa? A taio ma te reo puai aore ra a papai roa ˈtu i te irava e a hiˈo pinepine i te reira. Ua faauehia ia Iosua ia taio tamau i te buka ture e ia feruri maite no te haa ma te paari. Ua tauturu te reira ia ˈna ia ore e mǎtaˈu i te aratai i te nunaa o te Atua. (Ios. 1:8, 9) I roto i te tupuraa e haapeapea aore ra e mǎtaˈu ai outou, mea rahi te irava Bibilia o te nehenehe e tamǎrû i to outou feruriraa e aau.—Sal. 27:1-3; Mas. 3:25, 26.

16. E nafea Iehova ia tauturu ia tatou ia ore e mǎtaˈu e ia tiaturi ia ˈna na roto i te amuiraa?

¹⁶ (5) A amuimui i te mau tavini a Iehova. E nehenehe Iehova e faaohipa i to tatou mau taeae e tuahine no te tauturu ia tatou ia ore e mǎtaˈu e ia tiaturi ia ˈna. I te mau putuputuraa, e faaitoitohia tatou na roto i te mau tumu parau, te mau pahonoraa e te mau aparauraa a to tatou mau taeae e tuahine. (Heb. 10:24, 25) E tamahanahana-atoa-hia tatou ia faaite i to tatou  mau hoa piri i roto i te amuiraa i te mea e haapeapea ra ia tatou. E nehenehe te “parau maitai” a te hoê hoa e faaitoito rahi mai a mâmâ roa ˈtu ai to tatou feruriraa.—Mas. 12:25.

17. Ia au i te Hebera 6:19, e nafea tatou e ore ai e aueue i roto i te tupuraa fifi maoti to tatou tiaturiraa?

¹⁷ (6) Ia puai noa to outou tiaturiraa no a muri aˈe. E au to tatou tiaturiraa i te “tutau no to tatou ora” o te tauturu mai ia ore e aueue i roto i te tupuraa fifi. (A taio i te Hebera 6:19.) E feruri anaˈe ia tatou i roto i te ao apî ta Iehova e fafau mai ra, i reira tatou e fanaˈo ai i te hoê oraraa hau e aita e haapeapearaa faahou. (Isa. 65:17; Mika 4:4) E puai atoa to tatou tiaturiraa a paraparau ai ia vetahi ê no nia i te ao apî. No reira, a rave i te maraa ia outou no te poro e no te faariro i te taata ei pǐpǐ na te Mesia “ia papu maitai to outou tiaturiraa e tae noa ˈtu i te hopea.”—Heb. 6:11.

18. Eaha ta tatou e faaruru i mua nei e e nafea tatou ia faaoromai tamau i te reira?

¹⁸ A piri noa mai ai te hopea o teie faanahoraa o te ao, e faaruru atu â tatou i te fifi o te faatupu i te haapeapearaa. E tauturu rahi mai ta tatou irava matahiti 2021 ia faaoromai tamau, ia ore e mǎtaˈu e ia tiaturi ia Iehova eiaha râ ia tatou iho. I te roaraa o te matahiti 2021, e haapapu anaˈe i to tatou faaroo i ta Iehova i parau: ‘Tei te parau ore e te tiaturi papu ra, o to outou ïa puai.’—Isa. 30:15.