I IERUSALEMA, te vai ra te fare vairaa taihaa tahito no te mau fenua faahitihia i roto i te Bibilia. I reira e faaiteitehia ˈi te hoê ofai no te mau matahiti 700 haere mai 600 hou te tau o Iesu. Ua itehia mai tera ofai i roto i te hoê ana hunaraa maˈi e ere i te mea atea ia Heberona i Iseraela. I nia iho, teie tei nanaˈohia: “Ia faautuahia Hagaf, tamaiti na Hagav, e Yahweh sabaota.” Eaha ta teie mau parau e haapapu ra? Te faaite ra te reira, i te tau tahito, ua matauhia i te papai i te iˈoa o te Atua ra o Iehova e na reta Hebera e maha, YHWH. Pinepine te taata e haere aore ra e tapuni i roto i te mau ana hunaraa maˈi i te nanaˈo i te iˈoa o te Atua i nia i te ofai, na reira atoa te iˈoa o te mau taata te vai ra te tahi tuhaa o te iˈoa o te Atua i roto i to ratou iˈoa.

Teie ta Rachel Nabulsi, orometua haapii i te haapiiraa teitei i Géorgie i parau: “Mea faufaa ia ite ua faahiti-pinepine-hia te iˈoa [Iehova] e na reta e maha, YHWH. . . . Ia au i te mau parau i nanaˈohia i nia i te ofai, mea faufaa YHWH i Iseraela e i Iuda.” Te haapapu ra te reira e papaihia te iˈoa o te Atua e na reta Hebera e maha YHWH o te itehia ra e tausani taime i roto i te Bibilia. Pinepine te iˈoa o te Atua i te ite-atoa-hia i roto i te iˈoa o te tahi mau taata.

Te mau parau “Yahweh sabaota” tei nanaˈohia i nia i te ofai, o Iehova o te mau nuu o te raˈi ïa te auraa. E au ra e ua matau te taata i tahito i te faahiti i te iˈoa o te Atua, e oia atoa te mau parau, Iehova o te mau nuu o te raˈi. E ere ïa i te mea maere ia ite i tera mau parau, hau atu i te 250 taime i roto i te mau Papai tumu Hebera, e i te rahiraa o te taime, i roto ïa i te buka a Isaia, Ieremia e Zekaria.