1. Eaha te taime tano no te tavini ia Iehova?

 I TO oe manaˈo eaha te taime tano roa ˈˈe no te tavini ia Iehova? I te taime fifi aore ra i te taime maitai? I mua i te fifi, oioi tatou i te turui i nia ia Iehova. Eaha râ te huru mea hau anaˈe to tatou oraraa? E moˈe anei Iehova ia tatou? Ua faaara Iehova e nehenehe te nunaa Iseraela e topa i roto i tera herepata.—Deut. 6:10-12.

2. Eaha te hiˈoraa ta te arii Asa i horoa mai?

² E hiˈoraa maitai roa to te arii Asa, e taata î i te paari hoi oia o tei turui i nia ia Iehova ma to ˈna aau atoa. Ua tavini oia ia Iehova i te taime maitai e te taime fifi. Mai te haamataraa iho â, “ua tia . . . to Asa ra aau ia Iehova.” (Arii 1, 15:14) Ua itehia te reira a tamâ ˈi Asa ia Iuda i te haamoriraa hape. Te parau ra te Bibilia, “ua hopoi ê atura oia i te mau fata no te mau atua ěê ra, e te mau vahi teitei, e ua vavahi i te mau tii, e ua tâpû i te mau uru raau.” (Par. 2, 14:3, 5) Ua tiahi atoa oia ia Maaka to ˈna mama ruau, vahine faatura-rahi-hia i Iuda tei turai i te nunaa ia haamori i te idolo.—Arii 1, 15:11-13.

3. Eaha ta tatou e hiˈopoa i roto i teie haapiiraa?

³ Aita noa Asa i faaore i te haamoriraa hape, ua tauturu atoa râ i to Iuda ia haamori faahou i te Atua mau. Ua haamaitai Iehova ia Asa e i to Iuda ma te horoa ˈtu i te hau. * Ahuru matahiti te maoro a faatere ai Asa, “hau  ihora to te fenua.” (Par. 2, 14:1, 4, 6) I roto i teie haapiiraa, e hiˈopoa tatou mea nafea Asa e te mau Kerisetiano matamua i te faaohiparaa i te taime hau ta ratou i fanaˈo. Ia oti, e pahono tatou i teie uiraa: Mai te peu aita te faatereraa o to ˈu fenua e haafifi ra ia ˈu ia haamori ia Iehova, e nafea vau ia faaohipa i tera taime hau?

4. Ia au i te Paraleipomeno 2, 14:2, 6, 7, mea nafea Asa i te faaohiparaa i te taime hau?

⁴ A taio i te Paraleipomeno 2, 14:2, 6, 7. Ua parau Asa i te nunaa ua horoa mai Iehova i “te hau no [r]atou.” Aita Asa i manaˈo e taime tera no te faafaaea. Ua parau oia, “oi vai aˈe te hau i te fenua nei,” aita e enemi e e haafifiraa i Iuda. Ua faaitoito ïa Asa i te nunaa ia faaohipa ma te paari i tera taime hau no te patu i te mau oire, aua, pare e uputa.

5. Eaha te tumu i haapuai ai Asa i ta ˈna nuu faehau?

⁵ Ua faaohipa atoa Asa i tera taime hau no te haapuai i ta ˈna nuu faehau ia ineine ratou no te aroraa. (Par. 2, 14:8) Te auraa anei aita oia i turui i nia ia Iehova? E ere, ua ite râ Asa e hopoia na te arii ia faaineine i te nunaa no te mau fifi e nehenehe e tupu mai. Ua ite atoa Asa eita tera taime hau e vai noa, e tera iho â tei tupu.

6. Mea nafea te mau Kerisetiano matamua i te faaohiparaa i te taime a vai ai ratou i roto i te hau?

⁶ Noa ˈtu ua hamani-ino-hia te mau Kerisetiano matamua, ua fanaˈo ratou i te tahi mau taime hau. Mea nafea te  mau pǐpǐ a Iesu i te faaohiparaa i taua mau taime ra? Ua tamau teie mau tane e vahine haapao maitai i te poro i te parau apî oaoa. I roto i te buka Ohipa, te parauhia ra ua “faaite noa . . . ratou i te mǎtaˈu ia Iehova.” Na roto i ta ratou mau tutavaraa tuutuu ore, “rahi noa maira te amuiraa.” Ma te papu, ua haamaitai Iehova i te ohipa pororaa ta ratou i rave i te taime hau.—Ohi. 9:26-31.

7-8. Eaha ta Paulo e ta te tahi atu mau Kerisetiano i rave i te taime hau ta ratou i fanaˈo? A faataa.

⁷ Ua imi te mau Kerisetiano matamua i te mau ravea atoa no te faaite i te parau apî oaoa. I to Paulo iteraa e uputa rahi tei matara i mua ia ˈna i Ephesia, ua faaea â oia i reira no te faariro e rave rahi atu â taata ei pǐpǐ na te Mesia.—Kor. 1, 16:8, 9.

⁸ Ua nehenehe Paulo e te tahi atu mau Kerisetiano e poro e rave rahi atu â taata a ravehia ˈi te hoê faaotiraa no nia i te peritomeraa i te matahiti 49. (Ohi. 15:23-29) A faaarahia ˈi te mau amuiraa, ua haapuai atu â ratou i roto i te ohipa e faaite i “te parau apî oaoa o te parau a Iehova.” (Ohi. 15:30-35) Eaha tei itehia i muri iho? Te parau ra te Bibilia, “mau papu noa ˈtura ïa te mau amuiraa i roto i te faaroo e rahi noa mai ra te mau mero o te mau amuiraa i te mau mahana atoa.”—Ohi. 16:4, 5.

9. Eaha te tupuraa o te mau Ite no Iehova i roto e rave rahi fenua, e eaha ta tatou e ui ia tatou iho?

⁹ I roto e rave rahi fenua i teie mahana, aita te mau Ite no Iehova e haafifihia ra ia poro. Tera anei to oe tupuraa? Mai te peu e e, a ui ia oe iho, ‘Mea nafea vau ia faaohipa i teie taime hau?’ I teie mau mahana hopea, te rave ra te nunaa o Iehova i te ohipa pororaa e haapiiraa rahi roa ˈˈe na te ao nei. (Mar. 13:10) E rave rahi ohipa ta tatou e nehenehe e rave no te turu i te reira.

10. Eaha ta te Timoteo 2, 4:2 e faaitoito mai ra ia rave?

¹⁰ E nafea ia faaohipa i te taime hau ta oe e fanaˈo ra? (A taio i te Timoteo 2, 4:2.) No te aha e ore ai e hiˈopoa e nafea oe aore ra te hoê mero o to oe utuafare e nehenehe ai e poro atu â ma te tavini paha ei pionie? E ere teie i te taime no te haapue i te moni e te taoˈa, mea faufaa ore te reira ia tupu te ati rahi.—Mas. 11:4; Mat. 6:31-33; Ioa. 1, 2:15-17.

11. Eaha ta vetahi i rave no te poro e rave rahi atu â taata?

¹¹ Ua haapii vetahi feia poro i te reo apî no te poro e no te haapii e rave rahi atu â taata. Te faufaahia nei ratou i te mau papai Kerisetiano ta te faanahonahoraa a te Atua i faaineine na roto e rave rau reo. I te matahiti 2010, ua piahia ta tatou mau papai na roto e 500 reo. I teie mahana, mea na roto ïa hau atu i te 1 000 reo!

12. Mea nafea te taata i te faufaaraahia ia faaroo i te parau mau na roto i to ratou reo tumu? A horoa i te hiˈoraa.

¹² Mai te aha te huru o te taata a faaroo ai i te parau mau na roto i to ratou reo tumu? E hiˈopoa anaˈe i te tupuraa o te tahi tuahine tei apiti i te hoê tairururaa e toru mahana i Memphis, Marite. Ua tupu tera tairururaa na roto i te reo Kinyarwanda e paraparauhia ra i Rwanda, Congo (Kinshasa) e i Ougan da. I muri aˈe i te tairururaa, te na ô ra teie tuahine: “A 17 matahiti au i teie nei i Marite, a tahi ra vau a taa maitai ai i te mau oreroraa parau.” Ua putapû roa te tuahine i te fanaˈoraa i te tairururaa na roto i to ˈna reo tumu. E nehenehe anei oe e haapii i te tahi atu reo no te tauturu ia vetahi ê, te feia iho â râ o ta oe tuhaa fenua o te paraparau maitai aˈe i te tahi atu reo? E oaoa te noaa mai ia na reira oe!

13. Mea nafea to tatou mau taeae i Rusia i te faaohiparaa i te taime hau ta ratou i fanaˈo?

¹³ I te tahi mau fenua, te haafifi ra te mau faatereraa i te pororaa a to tatou mau taeae. A feruri na i te tupuraa o to tatou mau taeae i Rusia. Ua hamani-ino-hia ratou e rave rahi matahiti te maoro, i te avaˈe Mati râ o te matahiti 1991, ua nehenehe faahou ratou e haamori ia Iehova ma te tiamâ. I tera taime 16 000 feia poro i Rusia. E 20 matahiti i muri aˈe, ua hau atu ratou i te 160 000 feia poro. E haapapuraa tera ua ohipa maite to tatou mau taeae i te taime a vai ai ratou i roto i te hau. Aita râ tera taime hau i vai maoro. Ua haaparuparu anei to tatou mau taeae? Aita roa ˈtu, ua imi ratou i te mau ravea atoa no te tamau i te tavini ia Iehova.

14-15. Mea nafea Iehova i te tautururaa ia Asa?

¹⁴ I te tau o Asa, ua hope te taime hau a tae mai ai te hoê nuu puai mau na Etiopia mai. I te manaˈo o Zera, te raatira o teie nuu tei hau atu i te 1 000 000 faehau, e pau to Iuda ia ratou. E ere ta te arii Asa i te nuu rahi, ua tiaturi râ oia  i to ˈna Atua ra o Iehova. Teie ta Asa i faahiti i roto i ta ˈna pure: “E tauturu mai ia matou, e to matou Atua, e Iehova; te tiaturi nei hoi matou i nia ia oe, e no to oe iˈoa i haere hua ˈtu ai matou e rave i teie nei feia rahi.”—Par. 2, 14:11.

¹⁵ Noa ˈtu ua tataipiti te rahiraa faehau Etiopia, ua ite Asa e nehenehe to ˈna Atua e tauturu i te nunaa. E ua na reira iho â Iehova, ua pau te nuu Etiopia i to Iuda ma te haama mau.—Par. 2, 14:8-13.

16. Mea nafea tatou e ite ai eita te hau ta tatou e fanaˈo nei e vai maoro?

¹⁶ Aita tatou i papu eaha ta te taata tataitahi e faaruru i mua nei, ua ite râ tatou eita te hau ta te mau tavini a Iehova e fanaˈo ra i teie mahana e vai maoro. Ua tohu Iesu e i te mau mahana hopea “e hae te mau nunaa atoa” i ta ˈna mau pǐpǐ. (Mat. 24:9) Ua parau atoa te aposetolo Paulo, “te feia atoa e hinaaro e haamori i te Atua anaˈe ma te hoê e te Mesia ra o Iesu, e hamani-ino-atoa-hia ïa.” (Tim. 2, 3:12) E “riri rahi” to Satani, eiaha ïa tatou ia manaˈo e faaherehere o ˈna ia tatou!—Apo. 12:12.

17. I mua nei, e nafea paha to tatou faaroo e tamatahia ˈi?

¹⁷ I mua nei, e tamatahia to tatou faaroo. Fatata te ao i te faaruru i “te hoê ati rahi aita i tupu aˈenei mai te omuaraa mai o teie nei ao e tae roa mai i teie mahana, e o te ore atoa e tupu faahou.” (Mat. 24:21) E riri mai paha te mau mero utuafare ia tatou e e opanihia paha ta tatou ohipa. (Mat. 10:35, 36) Mai ia Asa, e tiaturi anei oe e tauturu e e paruru Iehova ia oe?

18. Ia au i te Hebera 10:38, 39, eaha te tauturu ia tatou ia faaruru i te mau ohipa e tupu i mua nei?

¹⁸ I teie nei â, te faaineine ra Iehova ia tatou no te mau ohipa e tupu i mua nei. Te aratai ra oia i “te tavini haapao maitai e te paari” no te horoa mai i te maa pae varua i “te taime tano” ia mau papu tatou. (Mat. 24:45) Mea titauhia râ ia tatou tataitahi ia rave i ta tatou tuhaa e ia tiaturi ia Iehova ma te faaroo aueue ore.—A taio i te Hebera 10:38, 39.

19-20. A taio ai i te Paraleipomeno 1, 28:9, eaha te mau uiraa e titauhia ia tatou ia pahono e no te aha mea faufaa ia na reira tatou?

 ¹⁹ Mai te arii Asa, mea titauhia ia imi tatou ia Iehova. (Par. 2, 14:4; 15:1, 2) Ua haamata tatou i te na reira ma te haapii o vai Iehova e ma te bapetizo ia tatou. Te haafaufaa nei tatou i te mau mea atoa o te tauturu ia tatou ia here atu â ia Iehova. E ui anaˈe ia tatou iho: ‘Te tamau ra anei au i te apiti i te mau putuputuraa a te amuiraa?’ Mai te peu e e, e fanaˈo iho â ïa tatou i te maa pae varua e i te faaitoitoraa a te mau taeae e tuahine. (Mat. 11:28) Mea maitai atoa ia uiui, ‘Te haapii tamau ra anei au i te Bibilia? I te mau hebedoma atoa, te faaherehere ra anei to matou utuafare i te taime no te haamoriraa utuafare? Aore ra noa ˈtu o vau anaˈe to ˈu oraraa, te na reira atoa nei au? Ia au i to ˈu tupuraa, te rave hope ra anei au i ta ˈu tuhaa no te poro e no te faariro i te taata ei pǐpǐ na te Mesia?’

²⁰ No te aha mea faufaa ia pahono tatou i tera mau uiraa? Te parau ra te Bibilia, te paheru ra Iehova i to tatou feruriraa e aau, mea tano iho â ïa ia na reira atoa tatou. (A taio i te Paraleipomeno 1, 28:9.) E ia ite tatou e titauhia ia taui i ta tatou mau fa, to tatou huru e feruriraa, e ani anaˈe i ta Iehova tauturu. Teie te taime tano no te faaineine ia tatou no te mau ohipa e fatata i te tupu. Eiaha e vaiiho i te tahi noa ˈˈe mea ia tapea ia oe ia faaohipa ma te paari i te taime hau ta oe e fanaˈo ra.