1-2. E nafea te Koheleta 11:6 e tano ai no ta tatou ohipa pororaa i te parau apî oaoa o te Faatereraa arii?

 I ROTO i te tahi mau fenua, mea farii maitai te taata i te parau apî oaoa. Area i te tahi atu mau vahi, mea iti roa te taata o te anaanatae ra i te Atua aore ra i te Bibilia. E i to outou vahi, mai te aha te huru o te taata a poro atu ai outou? Noa ˈtu eaha te tupuraa, te titau ra Iehova ia tamau i te poro e tae roa ˈtu i te taime e parau mai ai oia ua oti.

² I te taime ta Iehova i faaoti, e hope te ohipa pororaa e “i reira ïa te hopea e tae mai ai.” (Mat. 24:14, 36) A tiai noa ˈi râ i tera mahana, e nafea tatou ia haapao i te parau “eiaha e parahi noa”? *—A taio i te Koheleta 11:6.

3. Eaha ta tatou e hiˈopoa i roto i teie tumu parau?

³ I roto i te tumu parau na mua ˈtu, ua hiˈopoa tatou e maha huru maitatai e titauhia no te riro ei “ravaai taata” aravihi. (Mat. 4:19) I roto i teie, e hiˈopoa tatou e toru tuhaa o te tauturu mai ia tamau i te poro noa ˈtu eaha te tupuraa. E ite mai tatou i te faufaaraa ia tiatonu noa i nia i te ohipa pororaa, ia faaite i te faaoromai e ia tapea noa i te hoê faaroo puai.

4. No te aha mea titauhia ia tiatonu noa i nia i te ohipa ta Iehova i horoa mai?

⁴ Ua faaite Iesu eaha te mau tupuraa o te itehia i te mau mahana hopea e o te haafifi i ta ˈna mau pǐpǐ i roto  i ta ratou ohipa pororaa. Ua aˈo oia i ta ˈna mau pǐpǐ ia “ara noa.” (Mat. 24:42) Mai i te tau o Noa mea rahi te mau mea e ore ai te taata e tâuˈa i ta tatou poroi. (Mat. 24:37-39; Pet. 2, 2:5) Mea titauhia ïa ia tiatonu noa tatou i nia i te ohipa ta Iehova i horoa mai.

5. Eaha ta te Ohipa 1:6-8 e faaite ra no nia i ta tatou ohipa pororaa?

⁵ I teie mahana, e titau-mau-hia ia tiatonu noa i nia i ta tatou ohipa pororaa. Ua tohu Iesu e nuu roa ˈtu â te pororaa noa ˈtu e pohe oia. (Ioa. 14:12) I muri iho râ i to ˈna poheraa, ua hoˈi faahou vetahi o ta ˈna mau pǐpǐ i ta ratou ohipa taiˈa. I muri aˈe i to ˈna tia-faahou-raa, ua faatupu Iesu i te hoê semeio ma te tauturu i ta ˈna mau pǐpǐ ia taiˈa e rave rahi roa iˈa. I tera taime, ua haapapu atu oia mea faufaa aˈe te ohipa ravaai taata i te tahi atu mau mea. (Ioa. 21:15-17) Hou a hoˈi ai i te raˈi, ua faaara oia eita ta ˈna mau pǐpǐ e poro noa i Iseraela, i te vahi atea atoa râ o te fenua. (A taio i te Ohipa 1:6-8.) E rave rahi matahiti i muri aˈe, ua faaite orama Iesu i te aposetolo Ioane i te mau ohipa e tupu i “te mahana o te Fatu.” * Hoê o te mau ohipa faahiahia tei faaitehia ia Ioane, o te pororaa ïa o te “parau apî oaoa e te mure ore . . . i te mau nunaa e opu e reo atoa” i raro aˈe i te aratairaa a te mau melahi. (Apo. 1:10; 14:6) Te hinaaro mau ra Iehova ia apiti tatou i tera pororaa rahi e tae roa ˈtu i te hopea.

6. E nafea tatou e tiatonu noa ˈi i nia i te ohipa pororaa?

⁶ E tiatonu tatou i nia i te pororaa ia feruri tatou i te rahiraa ohipa ta Iehova e rave ra no tatou. Maoti o ˈna e fanaˈo  ai tatou i te maa pae varua e rave rahi, te mau papai neneihia, to nia i te natirara, tei haruharuhia, te mau video e te mau haapurororaa teata. Ua hurihia te mau papai i nia i ta tatou reni natirara jw.org na roto hau atu i te 1 000 reo. (Mat. 24:45-47) I roto i teie ao amahamaha i te pae poritita, faaroo e imiraa faufaa, ua hau atu i te vaˈu mirioni tavini a te Atua na te ao nei tei tahoê ei fetii taeae. I te Mahana pae 19 no Eperera 2019, ua hoê te mau Ite no Iehova na te ao atoa nei no te mataitai i te hoê video tei tatara i te irava mahana. I tera ahiahi, 20 919 041 taata tei putuputu no te Oroa haamanaˈoraa i te pohe o Iesu. Ia feruri tatou i te fanaˈoraa ia ite e ia turu i teie mau ohipa faahiahia, e hinaaro iho â tatou e tamau i te poro.

7. E nafea te hiˈoraa o Iesu e tauturu mai ai ia tiatonu noa i nia i te pororaa?

⁷ No te tiatonu noa i nia i te pororaa, e titau-atoa-hia ia pee i to Iesu hiˈoraa. Aita oia i vaiiho i te tahi noa ˈˈe mea ia tapea ia ˈna ia faaite i te parau mau. (Ioa. 18:37) Aita oia i hema a pûpû atu ai Satani i “te mau faatereraa arii atoa o te ao nei e to ratou hanahana” e a hinaaro ai te taata e faaarii ia ˈna. (Mat. 4:8, 9; Ioa. 6:15) Aita oia i faahinaaro i te mau taoˈa e aita atoa i mǎtaˈu i mua i te patoiraa uˈana. (Luka 9:58; Ioa. 8:59) Ia tamatahia to tatou faaroo, e haamanaˈo anaˈe i ta Paulo aˈoraa ia pee i te hiˈoraa o Iesu no te ore “e rohirohi e e toaruaru.”—Heb. 12:3.

8. Eaha te faaoromai e no te aha mea faufaa te reira i teie nei iho â?

⁸ Te faaoromai, o te tiairaa ïa ma te hau ia taui te hoê tupuraa. E titauhia te faaoromai no te ite i te hopearaa o te hoê tupuraa fifi aore ra o te hoê mea tiai-maoro-hia. Ua hinaaro rahi te peropheta Habakuka ia faaorehia te ino i Iuda. (Hab. 1:2) Ua hinaaro atoa ta Iesu mau pǐpǐ ia faatere mai Iesu “i reira iho” no te faatiamâ ia ratou i te hau Roma. (Luka 19:11) Te tiai ru nei tatou i te mahana e faaore ai te Faatereraa arii a te Atua i te ino a ora ˈtu ai tatou i roto i te hoê ao apî parau-tia. (Pet. 2, 3:13) E titauhia râ ia tatou ia faaoromai e ia tiai i te taime ta Iehova i maiti. E hiˈopoa anaˈe mea nafea Iehova e tauturu ai ia tatou ia faaoromai.

9. Mea nafea Iehova i te faaiteraa i to ˈna faaoromai?

⁹ O Iehova te hiˈoraa maitai roa ˈˈe o te faaoromai. Ua vaiiho o ˈna i te taime ia Noa no te hamani i te araka e no te “poro i te parau-tia.” (Pet. 2, 2:5; Pet. 1, 3:20) Ua faaroo Iehova a tamau ai Aberahama i te ani ia ˈna ia taui i ta ˈna faaotiraa e haamou i te feia o Sodoma e to Gomora. (Gen. 18:20-33) Ua faaoromai maoro Iehova i te huru o te nunaa Iseraela. (Neh. 9:30, 31) I teie mahana, te ite atoa nei tatou i te faaoromai o Iehova a vaiiho ai oia i te taime “ia noaa i te taata atoa te tatarahapa.” (Pet. 2, 3:9; Ioa. 6:44; Tim. 1, 2:3, 4) Te faaitoito mai ra to Iehova hiˈoraa ia faaite i te faaoromai ma te tamau i te poro e i te haapii i te taata. Te haapii atoa mai ra oia e nafea ia faaoromai na roto i te tahi faahohoˈaraa i roto i te Bibilia.

10. Eaha ta te hiˈoraa o te taata faaapu o te Iakobo 5:7, 8 e haapii mai ra?

¹⁰ A taio i te Iakobo 5:7, 8. Te haapii  mai ra te hiˈoraa o te taata faaapu e nafea tatou ia faaoromai. E tupu oioi te tahi mau raau, area te rahiraa, te raau iho â râ e horoa mai i te maa, e titauhia ïa ia tiai maoro atu â. I Iseraela, e titauhia ia tiai hau atu i te ono avaˈe no te ooti i te maa i tanuhia. E tanu te taata faaapu i te huero i muri aˈe i te tau ûa matamua, i te afaraa ïa o te avaˈe Atopa e e ooti oia i muri aˈe i te tau ûa hopea, i te afaraa ïa o te avaˈe Eperera. (Mar. 4:28) Mai te taata faaapu, e faaite atoa anaˈe i te faaoromai, e ere râ paha i te mea ohie.

11. E nafea te faaoromai e tauturu ai ia tatou i roto i te taviniraa?

¹¹ E hinaaro te taata tia ore e ite oioi i te faahopearaa o ta ratou ohipa. Ia hinaaro tatou ia tupu maitai te raau, mea titauhia ia haapao tamau tatou i te reira ma te utaru, tanu, ueue i te huero e pîpî i te pape. No te faariro i te taata ei pǐpǐ na te Mesia, mea hinaarohia te tutavaraa tamau. E titauhia te taime no te haapii i te piahi ia faaea i te maitiiti i te taata e ia here ia vetahi ê. E tauturu te faaoromai ia tatou ia ore e toaruaru aita anaˈe te taata e faaroo ia tatou. E titau-noa-hia â te faaoromai noa ˈtu e fariihia ta tatou poroi. Eita tatou e nehenehe e faahepo i te piahi ia faatupu i te faaroo. I te tau o Iesu, aita atoa ta ˈna mau pǐpǐ i taa oioi i te auraa o ta ˈna i haapii atu. (Ioa. 14:9) E haamanaˈo anaˈe, e tanu e e pǐpǐ paha tatou i te huero, na te Atua râ e faatupu.—Kor. 1, 3:6.

12. E nafea tatou ia faaite i te faaoromai i nia i te mau mero o to tatou utuafare?

¹² Mea fifi paha no tatou ia poro i te mau mero o to tatou utuafare. E tauturuhia tatou ia pee i te aratairaa o te Koheleta 3:1, 7 o te na ô ra: “E tau to te mau  mea atoa nei . . . e taime to te mamû noa, e taime to te parau.” E faaite noa tatou i te haerea maitai ma te imi atoa râ i te mau ravea no te faaite i te parau mau. (Pet. 1, 3:1, 2) Mea titauhia ia poro e ia haapii ia vetahi ê, e faaite noa râ tatou i te faaoromai i nia i te taata, oia atoa i nia i te mau mero o to tatou utuafare.

13-14. To vai ma te hiˈoraa ta tatou e nehenehe e pee?

¹³ E nehenehe tatou e haapii i te faaoromai maoti te mau hiˈoraa no tahito e to teie tau. Mea maoro to Habakuka tiairaa ia ore te ino, ua faaite râ oia i te faaoromai a na ô ai: “Tia noa ihora vau i to ˈu ra fare araraa.” (Hab. 2:1) Ua hinaaro mau te aposetolo Paulo e rave hope roa i ta ˈna taviniraa. Ua tamau maite râ oia i te “faataa maitai i te parau apî oaoa.”—Ohi. 20:24.

¹⁴ Mea faatuitehia te hoê taeae e ta ˈna vahine faaipoipo i te Haapiiraa Gileada e ua tonohia raua i te hoê fenua mea iti te Ite no Iehova e eita te rahiraa taata e tiaturi ia Iesu e e anaanatae i te Bibilia. Ua faatia mai vetahi atu o te haapiiraa ta raua i apiti i te mau parau maitai no nia i ta ratou mau piahi Bibilia. Ua tamau râ na hoa faaipoipo i te rave maite i ta raua taviniraa noa ˈtu aita te rahiraa taata i roto i te tuhaa fenua i farii oioi i te haapii i te Bibilia. I muri aˈe e vaˈu matahiti tautooraa, ua oaoa raua i te iteraa i te hoê o ta raua mau piahi i te bapetizoraahia. Eaha ta tatou e haapii mai i te mau hiˈoraa no tahito e to teie tau? Aita teie mau tavini haapao maitai i faatau aore ra i parahi noa e ua haamaitai Iehova ia ratou. E pee anaˈe i “te hiˈoraa o te feia e fatu i te mau parau fafau.”—Heb. 6:10-12.

15. Eaha te haapuai i to tatou faaroo ia tamau maite tatou i te poro?

¹⁵ Te tiaturi ra tatou i te poroi o te Faatereraa arii e i te mau parau fafau Bibilia, e tutava iho â ïa tatou i te faaite i te reira i te taata e rave rahi roa. (Sal. 119:42; Isa. 40:8) I teie mahana, te ite ra tatou i te tupuraa o te mau parau tohu a te Atua e i te mau tauiraa ta te taata i rave a haapao ai ratou i te mau aˈoraa Bibilia. Ua haapuai te reira i to tatou faaroo a hinaaro atu ai tatou e faaite i te taata atoa i te parau apî oaoa o te Faatereraa arii.

16. Ia au i te Salamo 46:1-3, mea nafea to tatou tiaturi ia Iehova e ia Iesu e faaitoito mai ai ia tamau maite i te poro?

¹⁶ Te tiaturi atoa ra tatou ia Iehova, tei horoa mai i te poroi ta tatou e faaite ra, e ia Iesu, te Arii ta ˈna i maiti. (Ioa. 14:1) Noa ˈtu eaha te tupuraa ta tatou e faaruru o Iehova noa iho â to tatou haapuraa e puai. (A taio i te Salamo 46:1-3.) Ua papu atoa ia tatou maoti te puai e te mana no ǒ mai i to ˈna Metua, te aratai ra Iesu i te ohipa pororaa mai te raˈi mai.—Mat. 28:18-20.

17. No te aha e titauhia ia tamau tatou i te poro? A horoa i te hiˈoraa.

¹⁷ E puai atu â to tatou faaroo a papu ai ia tatou e haamaitai Iehova i ta tatou mau tutavaraa, i te tahi taime ma te ravea maere mau. (Koh. 11:6) Ei hiˈoraa, e rave rahi roa taata te ite nei i ta tatou mau vairaa papai. E ravea pororaa maitai anei te reira? Papu roa! I roto i Ta tatou taviniraa i te Basileia no Novema  2014, te faatiahia ra no nia i te hoê potii i te haapiiraa teitei tei hinaaro e papai i te hoê tumu parau no nia i te mau Ite no Iehova. Aita i itehia ia ˈna te Piha a te Basileia, ua haere râ oia i te tahi o ta tatou vairaa papai i ta ˈna fare haapiiraa e ua noaa mai te mau haamaramaramaraa no ta ˈna tumu parau. Ua riro mai teie potii ei Ite no Iehova e e pionie tamau oia i teie mahana. Aita anei teie mau faatiaraa e faaitoito mai ra ia tamau i te poro? Oia mau, te vai nei â te taata o te hinaaro nei i te parau apî oaoa o te Faatereraa arii!

18. Eaha te haapapu ra e hope roa te ohipa pororaa i te ravehia i te taime ta Iehova i maiti?

¹⁸ Mea papu e hope roa te ohipa pororaa i te ravehia i te taime ta Iehova i maiti. E Atua Iehova o te haa noa i te hora tia. A feruri na i tei tupu i te tau o Noa. Hau atu i te 120 matahiti na mua ˈtu, ua maiti Iehova i te taime e haamata ˈi te diluvi. E rave rahi matahiti i muri aˈe, ua faaue Iehova ia hamanihia te araka e e 40 aore ra 50 paha matahiti to Noa faaitoitoraa i te rave i tera ohipa. Noa ˈtu aita te taata i tâuˈa i ta ˈna poroi, ua tamau o Noa i te faaara ia ratou e tae roa ˈtu i te taime a parau ai Iehova ia aratai i te mau animara i roto i te araka. E i te hora tia, “na Iehova i opani i te uputa.”—Gen. 6:3; 7:1, 2, 16.

19. Eaha te tiai mai ra ia tamau tatou i te poro?

¹⁹ Fatata Iehova i te parau mai ua oti ta tatou ohipa pororaa. E haamou oia i te faanahoraa o te ao a Satani a avari atu ai i te hoê ao apî parau-tia. A tiai noa ˈi i tera taime, e pee anaˈe i te hiˈoraa o Noa, Habakuka e to te tahi atu mau tavini tei ore i parahi noa. E tamau anaˈe i te tiatonu i nia i te pororaa, i te faaite i te faaoromai e i te tapea i te hoê faaroo puai ia Iehova e i ta ˈna mau parau fafau.