Aita, aita te Bibilia e te hoê noa ˈˈe buka e faaite ra i rave na te mau Kerisetiano i tera peu.

I roto e rave rahi Bibilia, na te huriraa o tera irava i aratai i te tahi mau taata ia manaˈo e bapetizohia na vetahi no te feia pohe i te tau o Paulo. Teie te huriraa a te tahi Bibilia: “Aore ra, eaha ihora te feia i bapetizohia no te feia i pohe ra, ia ore roa te feia i pohe ra ia tia faahou? eaha ihora ratou i bapetizohia ˈi no tei pohe ra?”—Te Bibilia Moˈa ra.

A tapao i te mau parau a na aivanaa tuatapapa Bibilia e piti. Ua parau Gregory Lockwood aita te bapetizoraa “no te tahi taata tei pohe ê na i ravehia aˈenei i tahito” e “aita e haapapuraa o tera peu i roto i te Bibilia e i roto i te aamu o te taata.” Ua papai atoa Gordon Fee: “Aita e faahitiraa i roto i te Bibilia aore ra i roto i te aamu o te taata no teie huru bapetizoraa. Aita te reira i faahitihia i roto i te Faufaa apî e aita e haapapuraa ua ravehia aˈenei tera peu e te mau Kerisetiano matamua aore ra e te tahi noa ˈˈe haapaoraa i haamauhia i muri aˈe i te poheraa o te mau aposetolo.”

Te parau ra te Bibilia ua faariro te mau Kerisetiano i “te taata o te mau nunaa atoa ei pǐpǐ . . . ma te bapetizo ia ratou . . . ma te haapii ia ratou ia haapao i te mau mea atoa” ta Iesu i faaue atu. (Mat. 28:19, 20) Hou te hoê taata e riro ai ei pǐpǐ bapetizohia, e titauhia ia ˈna ia haapii, ia tiaturi e ia auraro ia Iehova e i ta ˈna Tamaiti. Eita te hoê taata tei pohe ê na e tei roto i te menema e nehenehe e rave i te reira e eita atoa e tia i te tahi Kerisetiano e ora nei e na reira no tei pohe.—Koh. 9:5, 10; Ioa. 4:1; Kor. 1, 1:14-16.

Eaha te auraa o ta Paulo mau parau?

I to ˈna tau, ua parau vetahi i Korinetia aita e tia-faahou-raa to te feia pohe. (Kor. 1, 15:12) No te faaite mea hape to ratou manaˈo, ua parau Paulo: “E faaruru na vau i te pohe i te mau mahana atoa.” Aita â o ˈna i pohe atura. I mua râ i te mau tupuraa i fatata ˈi o ˈna i te pohe, ua tiaturi papu Paulo ia pohe noa ˈtu o ˈna, e faatiahia o ˈna ei varua puai mai ia Iesu.—Kor. 1, 15: 30-32, 42-44.

Ua titauhia ia taa to Korinetia ia faatavaihia te hoê Kerisetiano, e faaruru o ˈna i te ati i te mau mahana atoa e e pohe hou o ˈna e faatiahia mai ai. Te auraa, “tei bapetizohia i roto i te Mesia ra o Iesu, ua bapetizohia [ïa] ia apiti atoa . . . i to ˈna pohe?” (Roma 6:3) Ia bapetizohia te Kerisetiano faatavaihia i te pohe o te Mesia, e faaruru o ˈna i te ati e e pohe atoa hou o ˈna a faatiahia ˈi i te raˈi.

Hau atu i te piti matahiti i muri aˈe i to Iesu bapetizoraahia i roto i te pape, ua parau oia i ta ˈna na aposetolo e piti: “E bapetizohia orua mai ia ˈu nei e bapetizohia.” (Mar. 10:38, 39) Te manaˈo ra Iesu i te pohe ta ˈna e faaruru no to ˈna haapao maitai i te Atua. Ua papai Paulo ia apiti te feia faatavaihia i “te mauiui o te Mesia, e faahanahana-atoa-hia ïa [ratou] e oia.” (Roma 8:16, 17; Kor.  2, 4:17) E titauhia ïa ia pohe ratou no te tia faahou i te raˈi.

No reira mea tano ai ia huri i ta Paulo mau parau mai teie: “Ahiri e ore roa te feia pohe e faatiahia mai, eaha ïa te faufaa no te feia e bapetizohia ra i te mea e e pohe ratou? No te aha ïa ratou e bapetizohia ˈi a pohe atu ai?”