I te raˈi, e rave rahi huru maitatai ta Iesu i haapii a ohipa ˈi e to ˈna Metua. I te fenua, ua nehenehe oia e faaite i te hiˈoraa o te hoê rave ohipa maitai roa i te feia atoa tei apiti ia ˈna. E nafea tatou e faufaahia ˈi i te hiˈoraa o Iesu? Ma te hiˈopoa maite i to ˈna hiˈoraa, e nehenehe tatou e huti mai e toru aratairaa papu o te tauturu ia tatou ia riro ei hoa ohipa maitai no vetahi ê. E tauturu atoa teie mau aratairaa ia tatou ia hoê noa e to tatou mau taeae e tuahine.

E taata haehaa te rave ohipa maitai. E haafaufaa o ˈna i to ˈna mau hoa ohipa e eita o ˈna e rave i te tahi noa ˈˈe mea no te faatietie ia ˈna. Tera ta Iesu i haapii i to ˈna Metua ra. Noa ˈtu o Iehova anaˈe tei piihia te Atua poiete, ua haafaufaa mau o ˈna i te ohipa a ta ˈna Tamaiti. Te itehia ra te reira i to ˈna parauraa: “Hamani anaˈe i te taata i to tâua hohoˈa.” (Gen. 1:26) A faaroo ai i tera mau parau, ua ite Iesu i te haehaa o to ˈna Metua.—Sal. 18:35.

I te fenua, ua faaite Iesu i te haehaa mai to ˈna Metua. A faahanahanahia ˈi o ˈna no ta ˈna mau ohipa, ua faahanahana ˈtu oia i te Atua. (Mar. 10:17, 18; Ioa. 7:15, 16) Ua haa Iesu ia vai noa te hau i rotopu ia ˈna e ta ˈna mau pǐpǐ. Aita o ˈna i hiˈo ia ratou mai te tavini, ua faariro roa râ ia ratou ei  hoa no ˈna. (Ioa. 15:15) Ua horoi atoa o ˈna i to ratou avae no te haapii ia ratou i te haehaa. (Ioa. 13:5, 12-14) Mai ia Iesu, e titauhia ia tatou ia faaite i te faatura i to tatou mau hoa ohipa ma te tuu i to ratou hinaaro na mua ˈˈe i to tatou. ‘Ia faatura tatou te tahi i te tahi,’ e rave hau atu â tatou no ratou e eita tatou e hinaaro ia faahanahanahia tatou.—Roma 12:10.

E farii te taata haehaa “e tupu [te mau opuaraa] mea rahi anaˈe te taata aˈo.” (Mas. 15:22) Noa ˈtu eaha to tatou mau aravihi, eita hoê noa ˈˈe taata e ite pauroa i te mau mea. Ua faaite atoa hoi Iesu aita o ˈna i ite i te mau mea atoa. (Mat. 24:36) Ua tâuˈa mau o ˈna i te manaˈo o ta ˈna mau pǐpǐ. (Mat. 16:13-16) No reira to ˈna mau hoa ohipa i oaoa ˈi i te ohipa na muri ia ˈna! Ia faatupu tatou i te haehaa ma te haamanaˈo aita tatou i ite i te mau mea atoa e ma te faaroo i te manaˈo o vetahi ê, e faaau noa tatou i te hau e o ratou. Ia ohipa amui tatou, e tupu te mau opuaraa.

Mea faufaa roa ia pee te mau matahiapo i te haehaa o Iesu a ohipa amui ai ratou. E titauhia ia haamanaˈo ratou e nehenehe te varua moˈa e turai i te matahiapo tataitahi ia horoa i te hoê manaˈo o te tauturu i te tino matahiapo ia rave i te faaotiraa maitai. I roto i ta ratou mau putuputuraa, e haapao maitai ratou ia horoa te mau matahiapo atoa i to ratou manaˈo. Ia na reira ratou, o te amuiraa taatoa te faufaahia i te faaotiraa ta ratou i rave.

E huru au noa to te hoê rave ohipa maitai i nia i to ˈna mau hoa ohipa. Ua ite maitai Iesu i te huru au noa o to ˈna Metua. Ei hiˈoraa, ua tono Iehova ia Iesu no te faaora mai i te huitaata i te pohe.—Ioa. 3:16.

Ua faaite Iesu i te huru au noa i te taime i titauhia ˈi ia ˈna ia na reira. A haamanaˈo na i to ˈna tautururaa i te hoê vahine Phenikia, noa ˈtu ua tonohia o ˈna i te utuafare o Iseraela. (Mat. 15:22-28) Aita atoa o ˈna i titau rahi roa i ta ˈna mau pǐpǐ. I to Petero parauraa i mua i te taata aita o ˈna i ite o vai Iesu, ua ineine Iesu i te faaore i ta ˈna hapa. I muri aˈe, ua horoa o ˈna i te mau hopoia faufaa roa ia Petero. (Luka 22:32; Ioa. 21:17; Ohi. 2:14; 8:14-17; 10:44, 45) Na roto i to ˈna hiˈoraa, ua faaite maitai Iesu e titauhia  ia tatou ia faaite i te “huru au noa e te taata atoa.”—Phil. 4:5.

E faaite tatou i te huru au noa ia ohipa tatou ma te hau e te mau huru taata atoa. Mea maitai Iesu i nia i te mau taata atoa, no reira to ˈna mau enemi i pohehae roa ˈi ia ˈna. Pari aˈera ratou ia ˈna ma te parau: “E hoa [o ˈna] no te feia titau tute e te feia rave hara,” te feia tei farii i ta ˈna poroi. (Mat. 11:19) Mai ia Iesu, e nehenehe anei tatou e ohipa amui e te mau huru taata atoa? Ua tavini taeae Louis i roto i te tuhaa haaati e i te Betela e ua ohipa o ˈna e te mau huru taata atoa. Te na ô ra o ˈna: “Ua faaau vau i te mau pǔpǔ atoa ta ˈu i ohipa ˈtu i te hoê patu hamanihia e te ofai huru rau. Ia faanaho-maitai-hia te mau ofai tataitahi e paari maitai te patu. Ua faatano atoa vau i to ˈu huru no te ohipa ma te hau e te mau huru taata atoa. Maoti noa hoi te reira i haere ai te ohipa i mua.” Auê ïa haerea maitai roa!

E nafea tatou e faaite ai i te huru au noa i roto i te amuiraa? E nehenehe tatou e na reira a amuimui ai e ta tatou pǔpǔ pororaa. E nehenehe tatou e poro e te mau mero atoa o te amuiraa e aita e hiˈoraa te matahiti. E nehenehe anei tatou e faatano i ta tatou huru taviniraa ia au i te maraa ia ratou?

E tufa te rave ohipa maitai “ma te aau tae.” (Tim. 1, 6:18) A ohipa ˈi i pihai iho i to ˈna Metua, ua tapao Iesu aita Iehova i huna i te tahi noa ˈˈe mea ia ˈna. I to Iehova faaineineraa i te raˈi, tei reira atoa Iesu a apo noa mai ai i te haapiiraa no ǒ mai i to ˈna Metua ra. (Mas. 8:27) I muri aˈe, ua tufa Iesu i “te mau mea atoa” ta ˈna i faaroo i to ˈna Metua. (Ioa. 15:15) E nehenehe tatou e pee i te hiˈoraa o Iehova ma te tufa i te mau mea atoa ta tatou i haapii i to tatou mau taeae e tuahine. Aita te hoê hoa ohipa maitai e hinaaro e faatere ia vetahi ê ma te tapea i ta ˈna i ite e i to ˈna mau aravihi o te nehenehe e tauturu, e oaoa râ o ˈna i te tufa ˈtu i te reira.

E nehenehe atoa tatou e faaitoito i to tatou mau hoa ohipa. Ia tapao te hoê taata i ta tatou mau tutavaraa a haamauruuru atu ai ia tatou no ta tatou ohipa, eita anei tatou e oaoa? Ua rave Iesu i te taime no te haapopou i to ˈna mau hoa ohipa no te ohipa maitai ta ratou i rave. (A hiˈo atoa i te Mataio 25:19-23; Luka 10:17-20.) Ua parau o ˈna ia ratou e ohipa rahi aˈe ta ratou e rave i ta ˈna e rave ra. (Ioa. 14:12) I te po hou o ˈna a pohe ai, ua parau Iesu i ta ˈna mau aposetolo haapao maitai: “Outou râ, ua pee maite ïa ia ˈu i roto i to ˈu mau ati.” (Luka 22:28) Aita e ore, ua faaitoito mau teie mau parau ia ratou ia tamau i ta ratou taviniraa! Ia rave tatou i te taime no te haapopou i to tatou mau hoa ohipa, e oaoa e e horoa ˈtu â ratou i roto i te taviniraa.

Te na ô ra taeae Kayode: “Aita e titauhia ia tia roa te hoê hoa ohipa maitai, e oaoa to ˈna mau hoa a ohipa ˈi na muri ia ˈna e eita ta ratou ohipa e riro ei mea teimaha.” Mai tera anei oe a ohipa ˈi e o vetahi ê? E nehenehe oe e ani i to oe mau taeae e tuahine eaha to ratou manaˈo no nia ia oe i roto i tera tuhaa. Mai te mau pǐpǐ a Iesu tei oaoa i te ohipa na muri ia ˈna, mea au atoa paha na to oe mau taeae e ohipa na muri ia oe. E nehenehe ïa oe e parau mai te aposetolo Paulo: “E hoa ohipa . . . matou no to outou oaoa.”—Kor. 2, 1:24.