1. Eaha te auraa ia mǎtaˈu i te Atua e no te aha te feia e here ra ia Iehova e faatupu ai i tera mǎtaˈu?

 E HERE te mau Kerisetiano i te Atua, e mǎtaˈu atoa râ ratou ia ˈna. E na ô paha vetahi, ‘E nafea e nehenehe ai e here i te hoê taata ta oe e mǎtaˈu ra!’ Mea taa ê râ teie mǎtaˈu, e ere hoi mai te riaria. Te feia atoa o te faatupu i teie mǎtaˈu, e faatura rahi ïa i te Atua. Eita ratou e hinaaro e rave i te hoê mea o te faaoto i to ratou Metua i te raˈi a ino atu ai to ratou auhoaraa e o ˈna.—Sal. 111:10; Mas. 8:13.

2. Ia au i te mau parau ta te arii Davida i papai i roto i te Salamo 86:11, eaha na manaˈo e piti ta tatou e hiˈopoa mai?

² A taio i te Salamo 86:11. A feruri ai i teie mau parau, te papu ra ia tatou ua taa i te arii Davida i te faufaaraa ia mǎtaˈu i te Atua. E hiˈopoa anaˈe e nafea tatou ia haapao i te mau parau ta Davida i papai. Na mua, e ite mai tatou i te tahi mau tumu e titauhia ˈi ia faatura i te iˈoa o te Atua. I muri mai, e hiˈopoa tatou e nafea ia faatura i te iˈoa o te Atua i te mau mahana atoa.

3. Eaha te tupuraa o tei tauturu ia Mose ia faatura noa i te iˈoa o te Atua?

³ A feruri na i te huru o Mose a ite ai oia i te hoê orama e faaite ra i te hanahana o Iehova. Te faataa ra te buka Étude perspicace des Écritures, “tera paha te tupuraa faahiahia  roa ˈˈe ta te hoê taata i ite hou Iesu Mesia a haere mai ai i nia i te fenua!” I nia i te mouˈa Horeba, ua faaroo Mose i te hoê melahi i te parauraa: “O Iehova, o Iehova, e Atua aroha noa, e te hamani maitai rahi, e te faaoromai rahi, e te maitai rahi, e te parau mau; e te vaiiho maite i te aroha e tausani noa ˈtu te ui; e te faaore i te parau-tia ore, e te hara.” (Exo. 33:17-23; 34:5-7) Eita e ore i te mau taime atoa a faahiti ai Mose i te iˈoa o Iehova, tera te hohoˈa e puta mai i roto i to ˈna feruriraa. E ere ïa i te mea maere ua faaara Mose i te nunaa o te Atua ia faatura i “taua iˈoa mǎtaˈu e te hanahana.”—Deut. 28:58.

4. Eaha te tauturu ia tatou ia faatura ia Iehova?

⁴ A faahitihia ˈi te iˈoa Iehova, e feruri maite anaˈe i te huru o te Atua e amo ra i tera iˈoa. E haamanaˈo anaˈe i to ˈna mau huru maitatai mai to ˈna puai, to ˈna paari, to ˈna parau-tia e to ˈna here. E feruri maite anaˈe i tera mau huru maitatai e i te tahi atu ia faatura mau tatou ia ˈna.—Sal. 77:11-15.

5-6. (a) Eaha te auraa o te iˈoa o te Atua? (b) Ia au i te Exodo 3:13, 14 e te Isaia 64:8, eaha ta Iehova e nehenehe e rave no te faatupu i ta ˈna opuaraa?

⁵ E rave rahi aivanaa te parau ra, “Na ˈna e faariro” te auraa o te iˈoa Iehova. Te haamanaˈo mai ra te reira, e faatupu iho â Iehova i ta ˈna opuaraa e eita te hoê noa ˈˈe mea e nehenehe e tapea ia ˈna.

⁶ E nehenehe Iehova e riro i te titauhia ia riro no te faatupu i ta ˈna opuaraa. (A taio i te Exodo 3:13, 14.) No reira tatou e faaitoitohia ˈi ia feruri i te mau tuhaa faahiahia mau o to Iehova huru. E nehenehe atoa Iehova e faariro i te taata tia ore i te titauhia ia riro no te tavini ia ˈna e no te faatupu i ta ˈna opuaraa. (A taio i te Isaia 64:8.) Mea na reira Iehova e faatupu ai i to ˈna hinaaro. Eita roa te hoê noa ˈˈe mea e nehenehe e tapea ia ˈna ia faatupu i ta ˈna i opua e rave.—Isa. 46:10, 11.

7. Eaha te tauturu mai ia mauruuru i to tatou Metua i te raˈi?

 ⁷ Ma te feruri maite i ta to tatou Metua i te raˈi e rave ra e i ta ˈna atoa e tauturu mai ia rave, e tupu mai te hoê aau mauruuru. A mataitai ai i te mau mea ta Iehova i rave e i hamani, e tupu mai te hoê aau faatura. (Sal. 8:3, 4) Ia feruri maite atoa tatou i ta Iehova e rave ra no te tauturu ia tatou ia haapao i to ˈna hinaaro, e tupu mai te faatura rahi. E iˈoa faahiahia mau to Iehova, e ere anei? I roto i tera iˈoa, e ô mai te parau o te mau huru maitatai o to tatou Metua, i te mau mea atoa râ ta ˈna i rave e e rave a muri aˈe.—Sal. 89:7, 8.

8. Ia au i te Deuteronomi 32:2, 3, eaha to Iehova manaˈo i to ˈna iˈoa?

⁸ Tau taime rii na mua ˈˈe to Iseraela tomoraa i te Fenua tǎpǔhia, ua haapii Iehova ia Mose i te tahi himene. (Deut. 31:19) I muri mai, na Mose i haapii i tera himene i te nunaa Iseraela. (A taio i te Deuteronomi 32:2, 3.) A feruri maite ai tatou i te irava 2 e te 3, aita Iehova i huna i to ˈna iˈoa mai te huru ra mea moˈa roa e eita e tia ia faahiti. E hinaaro râ o ˈna ia ite te taatoaraa i tera iˈoa! Auê haamaitairaa no te nunaa Iseraela i to Mose haapiiraa ia ratou i te parau mau no nia ia Iehova e i to ˈna iˈoa hanahana! Mai te ûa e faararirari i te raau tupu, ua faaitoito ta Mose mau parau i te faaroo o te mau Iseraela. E nafea ia papu te faaitoito atoa ra ta tatou huru haapiiraa ia vetahi ê?

9. E nafea tatou ia haamoˈa i te iˈoa o Iehova?

⁹ A poro ai na tera e tera fare aore ra i te vahi taata, e faaohipa anaˈe i te Bibilia no te faaite o vai te iˈoa o te Atua. E nehenehe atoa tatou e pûpû i te taata i te mau papai e video au mau a aratai atu ai ia ratou i nia i ta tatou reni natirara o te faahanahana mau ra ia Iehova. I te vahi raveraa ohipa, i te haapiiraa aore ra a tere ai na te ara, e imi anaˈe i te mau ravea no te paraparau no nia i to tatou Metua î i te here e i to ˈna huru. I te taime a faaite ai tatou ia vetahi ê i te opuaraa a Iehova no te huitaata e no te fenua nei, a tahi ra paha ratou a faaroo ai i te reira. I te mau taime atoa e faaite ai tatou i te parau mau no nia i to tatou Metua î i te here, te haamoˈa ra tatou i to ˈna iˈoa. Mai te huru ra te tumâ ra tatou i te mau parau haavare e faaino atoa tei faahitihia no nia ia Iehova. E nehenehe tera mau haapiiraa e riro ei tamahanahanaraa mau no vetahi ê!—Isa. 65:13, 14.

10. No te aha eita e navai noa ia haapii ia vetahi ê i ta Iehova mau titauraa e ture aveia tia?

¹⁰ A faatere ai tatou i te haapiiraa Bibilia, e tauturu anaˈe i ta tatou mau piahi ia ite e ia faahiti i te iˈoa o te Atua. Mea faufaa atoa râ ia tauturu ia ratou ia taa i te huru mau o Iehova. Ia naea ia tatou tera fa, e navai noa anei ia faaite atu i ta te Atua mau faaueraa, ture aveia e titauraa? Aita! E haapii e e faahiahia paha te tahi piahi i ta te Atua mau faaueraa. E auraro anei râ o ˈna ia Iehova no to ˈna here ia ˈNa? A haamanaˈo na ia Eva, ua ite Eva eaha ta te Atua faaueraa, aita râ o ˈna i here mau i tei horoa ˈtu i tera faaueraa e aita atoa Adamu i na reira. (Gen. 3:1-6) Eita ïa e navai noa ia haapii ia vetahi ê i ta Iehova mau titauraa e ture aveia tia.

11. A haapii ai tatou i ta te Atua mau faaueraa e ture aveia, e nafea ia tauturu i te piahi ia here ia Iehova?

¹¹ Mea maitai ta Iehova mau titauraa  e ture aveia no tatou. (Sal. 119:97, 111, 112) Mea titauhia ïa ia taa te piahi ua horoa mai Iehova i tera mau faaueraa no to ˈna here ia tatou. No reira, mea maitai ia ui i ta tatou piahi: “I to oe manaˈo, no te aha te Atua e ani ai i ta ˈna mau tavini ia rave mai tera, eiaha râ mai tera? Eaha ta te reira e faaite mai ra no nia ia Iehova?” Ia tauturu tatou i te piahi ia feruri ia Iehova, e haamata oia i te faatura i te iˈoa hanahana o Iehova. I muri mai, eita noa te piahi e haafaufaa i te mau faaueraa, e here atoa râ ia Iehova! (Sal. 119:68) E rahi mai to ˈna faaroo i te Atua e e tauturu te reira ia ˈna ia faaoromai tamau noa ˈtu te fifi.—Kor. 1, 3:12-15.

12. I te hoê mahana, mea nafea Davida i te faatupuraa i te hoê aau piti e eaha te faahopearaa?

¹² Ua aratai te varua moˈa i te arii Davida ia papai i te tahi manaˈo faufaa i roto i te Salamo 86:11, “ia rotahi maite hoi tau aau.” I te roaraa o to ˈna oraraa, ua ite Davida mea ohie ia faatupu i te aau piti. I te hoê mahana, tei nia oia i te tahua o to ˈna fare e ite atura o ˈna i te vahine a te tahi atu tane e hopu ra i te pape. I tera taime, ua faatupu anei Davida i te aau rotahi aore ra i te aau piti? Ua ite oia i ta Iehova ture aveia, “eiaha atoa oe e nounou i ta vetahi ê ra vahine.” (Exo. 20:17) Ua tamau noa râ to ˈna mata i te hiˈo ia Bate-seba. Tupu maira te hoê aau piti i roto ia Davida, i te tahi pae, ua faahinaaro oia ia Bate-seba, area te tahi atu pae, ua hinaaro ïa e rave i te mea tia i te aro o Iehova. Noa ˈtu mea here e mea mǎtaˈu Davida ia Iehova, ua hema oia. I to Davida hararaa, ua faaino oia i te iˈoa o Iehova e ua haamauiui atoa e rave rahi taata hapa ore mai to ˈna iho utuafare!—Sam. 2, 11:1-5, 14-17; 12:7-12.

13. Eaha te haapapu ra ua taatoa faahou te aau o Davida no Iehova?

¹³ Ua farii Davida i to Iehova aˈoraa ia ˈna e maitai faahou mai nei to raua auhoaraa. (Sam. 2, 12:13; Sal. 51:2-4, 17) E nehenehe atoa te mau parau ta Davida i faahiti i roto i te Salamo 86:11 e hurihia: “Eiaha to ˈu ei aau piti.” Ua haamanaˈo ïa Davida i te peapea e te haama ta ˈna i faaruru a faatupu ai oia i te aau piti. Ua tauturu anei râ Iehova ia taatoa faahou to Davida aau no ˈna? E! I muri aˈe, te faaite ra hoi te Parau a te Atua ua tia to Davida aau ia Iehova.—Arii 1, 11:4; 15:3.

14. Eaha te titauhia ia tatou tataitahi ia ui e no te aha?

 ¹⁴ Mea mahanahana mau ia ite ua taatoa faahou mai to Davida aau no Iehova. Ua riro râ to ˈna hiˈoraa ei faaararaa no tatou i teie mahana. Mea apî aore ra mea maoro tatou i roto i te parau mau, mea titauhia ia ui ia tatou iho, ‘I mua i te mau faahemaraa a Satani, te tutava ra anei au i te faatupu i te hoê aau taatoa no Iehova?’

15. E nafea te mǎtaˈu i te Atua e tauturu mai ai ia ore e hema i mua te hoê hohoˈa tano ore?

¹⁵ Ia ite outou i te hohoˈa e faatupu i te hinaaro tia ore i roto i te afata teata aore ra te natirara, e nafea outou? Mea ohie roa ia parau, ‘E ere teie i te hohoˈa faufau!’ E ere anei râ tera i te ravea ta Satani e faaohipa ra ia faatupu outou i te aau piti? (Kor. 2, 2:11) E nehenehe te hohoˈa e faatupu i te hinaaro tia ore e faaauhia i te hoê tipi ta te tahi taata e faaohipa no te tâpû i te raau. Eita paha te raau e mutu oioi, ia tamau râ tatou i te faaohipa i tera tipi, e nehenehe te raau e mutu a taa ê roa ˈtu ai. E nehenehe te hoê ohipa iti haihai e au ra e ere i te mea ino e turai i te hoê taata ia faatupu i te aau piti a aratai atu ai ia ˈna ia rave i te hara e ia taiva ia Iehova. No reira, eiaha roa e vaiiho i te hoê noa ˈˈe ohipa tia ore ia tomo mai i roto i to outou aau! Ia taatoa noa to outou aau no Iehova i te mǎtaˈuraa i to ˈna iˈoa e tia ˈi.

16. I mua i te faahemaraa, eaha te mau uiraa e titauhia ia feruri?

¹⁶ Ua rau te mau ohipa ta Satani e tuu mai i mua no te faahema ia tatou. I tera mau taime, oioi paha tatou i te manaˈo e ere te reira i te mea ino roa. E na ô paha tatou, ‘Eita vau e tiavaruhia ia rave au i teie ohipa, e ere ïa i te mea ino!’ Mea atâta roa râ tera huru feruriraa. Mea maitai  ia ui ia tatou iho: ‘E ere anei teie i te faahemaraa no ǒ mai ia Satani ia faatupu vau i te aau piti? Ia rave au i teie ohipa, eita anei au e faaino i te iˈoa o Iehova? E tauturu mai anei teie ohipa ia faafatata ˈtu â ia Iehova aore ra ia faaatea ia ˈna?’ A feruri maite i teie mau uiraa. A taparu ia Iehova i te paari no te pahono i teie mau uiraa ma te haavare ore. (Iak. 1:5) E tauturu mai te reira ia mau papu i mua i te faahemaraa e ia parau mai ia Iesu: “A haere ê atu e Satani.”—Mat. 4:10.

17. No te aha mea ino roa no tatou ia faatupu i te aau piti?

¹⁷ Mea ino roa no tatou ia faatupu i te aau piti. A feruri na i te hoê pǔpǔ tuaro aita te mau mero e hoê ra. Te vai ra vetahi o te imi ra i to ratou iho hanahana, te tahi atu, aita e haapao ra i te mau faatureraa, e te tahi atu, aita ïa e faatura ra i te taata faaineine. I to outou manaˈo e upootia anei tera pǔpǔ tuaro? Eita roa! Mea titauhia ïa ia riro to tatou aau mai te tahi pǔpǔ tuaro tahoê. Ia hoê to tatou manaˈo e aau no te tavini ia Iehova e tia ˈi. A haamanaˈo, te hinaaro ra Satani ia faatupu tatou i te aau piti. Eaha ïa te tupu i roto ia tatou? I te hoê pae, e faatupu tatou i te hinaaro tia ore, area i te tahi pae, e hinaaro tatou e auraro i ta Iehova mau ture aveia. No reira mea faufaa roa ia taatoa to tatou aau no te tavini ia Iehova! (Mat. 22:36-38) Eiaha roa e vaiiho ia Satani ia faatupu i roto ia tatou te aau piti.

18. Ia au i te Mika 4:5, eaha ta tatou i faaoti papu i te rave?

¹⁸ Mai ia Davida, e pure anaˈe ia Iehova: “Ia rotahi maite hoi tau aau i te mǎtaˈuraa i to iˈoa na.” E rave anaˈe i te mau mea atoa e maraa ia tatou no te haapao i tera mau parau. I te mau mahana atoa, ia faaite ta tatou mau faaotiraa atoa, te mea iti e te mea rahi, e mea moˈa te iˈoa o Iehova no tatou. Ei Ite no ˈna, e nehenehe ïa tatou e amo maite i te iˈoa o Iehova. (Mas. 27:11) E nehenehe atoa ïa tatou e parau mai te peropheta Mika ra: “E haere . . . tatou ma te iˈoa o Iehova, o to tatou ïa Atua e a muri noa ˈtu.”—Mika 4:5.