“A tupai mai ai te tahi fetii ia ˈu, ua haru vau i to ˈna arapoa no te uumi atu. Ua hinaaro roa vau e haapohe ia ˈna!”—Paul.

“I te fare, e riri hanoa vau noa ˈtu e aita e tumu papu. E taora haere au i te mau taihaa, te mau mea atoa na mua mai.”—Marco.

Eita paha tatou e tae roa i tera faito. I te tahi râ taime, e ere iho â i te mea ohie no tatou paatoa ia haavî ia tatou iho. Eaha te tumu? No te mea ua raea tatou i te huru tia ore no ǒ mai ia Adamu ra. (Roma 5:12) Mai ia Paul raua Marco, e titauhia ia haavî vetahi i to ratou huru, area te tahi atu, i to ratou ïa manaˈo mai te mau manaˈo faatoaruaru aore ra tano ore. E titauhia ia haavî atoa vetahi eiaha ratou ia rave i te peu taotoraa tia ore, ia inu hua i te ava e ia rave i te raau taero.

E titauhia ia haavî i to tatou mau manaˈo e hinaaro, e ia ara atoa i ta tatou mau ohipa. Ia ore, e nehenehe te oraraa e ino roa. No te tauturu ia tatou, e toru uiraa ta tatou e pahono mai: (1) Eaha te auraa ia haavî ia tatou iho? (2) No te aha mea faufaa roa ia na reira? (3) E nafea tatou ia faatupu i teie huru maitai “ta te varua moˈa e faatupu”? (Gal. 5:22, 23) I muri mai, e hiˈopoa tatou i te titauhia i te taata tataitahi ia rave no te haavî ia ˈna iho i mua i te tupuraa fifi.

Eita te taata e haavî ia ˈna iho e haa ma te feruri ore. E tapeapea râ oia ia ˈna eiaha ta ˈna mau parau e ohipa ia faaoto i te Atua.

Ua faaite mai Iesu eaha te auraa ia haavî ia tatou iho. Te parau ra te Bibilia: “A tuhihia ˈi oia, aita oia i tuhi atu. A mauiui ai oia, aita oia i haamǎtaˈu atu, ua tuu râ ia ˈna i roto i te rima o tei haava ma te parau-tia.” (Pet. 1, 2:23) I nia i te pou haamauiuiraa, ua haavî atoa Iesu ia ˈna iho a faaooo atu ai to ˈna mau enemi. (Mat. 27:39-44) Na mua ˈtu, ua na reira atoa oia a râmâ ˈi te mau tia haapaoraa ia ˈna. (Mat. 22:15-22) Ua ite-atoa-hia ua haavî Iesu ia ˈna iho a taora ˈi te tahi mau ati Iuda ia ˈna i te ofai. Aita roa ˈtu Iesu i tahoo atu, “tapuni atura Iesu e haere atura i rapae i te hiero.”—Ioa. 8:57-59.

Ua papai te aposetolo Petero: “Ua mauiui atoa te Mesia no outou, a vaiiho mai ai i te hiˈoraa ia pee maite outou i to ˈna mau taahiraa avae.” (Pet. 1, 2:21) Noa ˈtu to tatou huru tia ore, e nehenehe tatou e pee maite i te hiˈoraa o Iesu, oia hoi ia haavî ia tatou iho mai ta ˈna i rave. No te aha mea faufaa roa ia na reira?

Mea titauhia ia haavî ia tatou iho no te fanaˈo i ta Iehova farii maitai. Noa ˈtu ua tavini tatou ia Iehova ma te haapao maitai e rave rahi matahiti, e nehenehe to tatou auhoaraa e o ˈna e fifi ia ore tatou ia haavî i to tatou huru e i ta tatou mau parau.

O Mose te taata mǎrû roa ˈˈe i to ˈna ra tau. (Num. 12:3) E rave rahi matahiti te maoro, ua faaoromai oia i te huru o te mau Iseraela. I te hoê râ mahana, aita i tia ia Mose ia haavî ia ˈna iho. Ua riri roa oia a amuamu faahou ai to Iseraela no te mea ua ere ratou i te pape. Parau atura oia ma te iria i te nunaa: “A faaroo mai na, tena na mau faaroo-atâ; e tia anei ia mâua ia hopoi atu i te pape na outou no roto i teie nei mato?”—Num. 20:2-11.

Aita Mose i haavî ia ˈna iho i tera taime. Aita o ˈna i faahanahana ia Iehova tei horoa mai i te pape. (Sal. 106:32, 33) Eaha te faahopearaa? Aita Iehova i faatia ia tomo o Mose i roto i te Fenua tǎpǔhia. (Num. 20:12) Tae noa ˈtu i to ˈna poheraa, ua tatarahapa roa paha Mose i te oreraa o ˈna i haavî ia ˈna i tera mahana.—Deut. 3:23-27.

Eaha te haapiiraa no tatou? Noa ˈtu mea maoro tatou i roto i te parau mau, eiaha roa tatou ia paraparau ma te faatura ore i te feia o tei riri mai aore ra o tei titauhia ia aˈo. (Eph. 4:32; Kol. 3:12) Parau mau, a paari noa ˈtu ai tatou, mea fifi roa ˈtu â ia faaite i te faaoromai. A haamanaˈo râ i te hiˈoraa o Mose, eita roa tatou e hinaaro ia ino to tatou roo i te aro o Iehova no te mea aita tatou i haavî ia tatou iho i te hoê noa taime. Eaha te tauturu mai ia tatou ia faatupu i teie huru maitai?

E pure anaˈe no te ani i te varua moˈa. Mea faufaa roa ia na reira no te mea e huru maitai teie ta te varua moˈa e faatupu e e horoa Iehova i to ˈna varua i te feia atoa o te ani atu ia ˈna. (Luka 11:13) Maoti to ˈna varua, e nehenehe Iehova e horoa mai i te puai hinaarohia. (Phil. 4:13) E faatupu atoa ïa tatou i te tahi atu mau huru maitatai o te tauturu mai ia haavî ia tatou iho mai te here.—Kor. 1, 13:5.

E ape anaˈe i te mau tupuraa atoa e ere i te mea ohie ia haavî ia tatou iho. Ei hiˈoraa, e ape anaˈe i te mau reni natirara aore ra  faaanaanataeraa tano ore. (Eph. 5:3, 4) E ape atoa anaˈe i te mau mea atoa o te turai mai ia rave i te ino. (Mas. 22:3; Kor. 1, 6:12) No te hoê taata o te faatupu hanoa i te manaˈo faufau, eiaha roa oia ia taio aore ra ia mataitai i te mau mea atoa e faatietie ra i te peu taotoraa tia ore.

E ere paha i te mea ohie no tatou ia haapao i tera mau aˈoraa. E titauhia râ ia tutava maite, i reira Iehova e horoa mai ai i te puai no te haavî ia tatou iho. (Pet. 2, 1:5-8) E tauturu mai Iehova ia haavî i to tatou mau manaˈo, i ta tatou mau parau e ohipa. Ua haapii Paul raua Marco i te haavî i to raua huru. Te vai atoa ra te hiˈoraa o te tahi taeae o te iria hanoa a faahoro ai i te pereoo e e tupu roa te tatamaˈiraa i te tahi taime. Eaha ta teie taeae i rave? Te na ô ra oia: “I te mau mahana atoa, ua pure au ma te tuutuu ore. Ua hiˈopoa atoa vau i te mau tumu parau no nia i te haavîraa ia tatou iho e ua tamau aau atoa i te tahi mau irava Bibilia. Mea maoro vau i te tutava-noa-raa i te haavî ia ˈu iho. Noa ˈtu râ, i te mau poipoi atoa, e haamanaˈo vau mea faufaa ia faaea hau noa vau i te roaraa o te mahana. E faarue oioi atoa vau i te fare no te ore e ru noa.”

Eita iho â e roaa ia tatou ia haavî ia tatou iho i te tahi taime. E haama paha tatou i te faafatata ia Iehova na roto i te pure. Eiaha râ e manaˈo mai te reira, tera hoi te taime e hinaaro roa ˈi tatou i ta ˈna tauturu. A pure oioi ïa ia Iehova, a imi i ta ˈna tauturu, a taparu ia ˈna ia faaore i ta outou hara e a faaoti papu i te ore e tapiti. (Sal. 51:9-11) Eita roa Iehova e haafaufaa ore i ta outou taparuparuraa. (Sal. 102:17) Ua haamanaˈo mai te aposetolo Ioane e tamâ te toto o Iesu ia tatou i “te mau hara atoa.” (Ioa. 1, 1:7; 2:1; Sal. 86:5) Ua faaitoito atoa Iehova i ta ˈna mau tavini ia tamau i te faaore i te hara a vetahi ê. Papu, e na reira atoa Iehova no tatou.—Mat. 18:21, 22; Kol. 3:13.

Aita Iehova i mauruuru i te taime i ore ai Mose i haavî ia ˈna iho i roto i te medebara. Noa ˈtu râ, ua faaore oia i ta Mose hara. I roto i te Bibilia, te faahitihia ra Mose mai te hoê taata faaroo puai. (Deut. 34:10; Heb. 11:24-28) Aita Mose i faatiahia ia tomo i te Fenua tǎpǔhia, e oaoa roa râ Iehova i te farii popou ia ˈna i roto i te paradaiso i nia i te fenua a ora ˈtu ai e a muri noa ˈtu. Tera atoa te haamaitairaa ta tatou e fanaˈo ia tutava maite tatou i te haavî ia tatou iho!—Kor. 1, 9:25.