Ua papai Paulo: “Na roto hoi i to ˈu haapaoraa i te ture i pohe ai au no te ture, ia nehenehe au e ora no te Atua.”—Gal. 2:19.

E haapiiraa faufaa roa ta Paulo i hinaaro e horoa i te mau amuiraa no Galatia. Ua faaroo te tahi mau Kerisetiano i te parau a te tahi mau tane e haapii ra mea titauhia ia haapao i te ture a Mose no te fanaˈo i te ora, te mau faaueraa iho â râ no nia i te peritomeraa. Ua ite râ Paulo e aita te Atua e titau faahou ra ia peritomehia te mau Kerisetiano. Ma te haaferuri i to ˈna mau taeae, ua faaite o ˈna e mea hape ta tera mau tane e haapii ra e ua haapuai o ˈna i to ratou faaroo i te tusia o Iesu Mesia.—Gal. 2:4; 5:2.

Te faaite maitai ra te Bibilia ia pohe te hoê taata, eita o ˈna e ite i te tahi mea. (Koh. 9:5) I to Paulo parauraa ua pohe o ˈna “no te ture,” te faaite ra o ˈna aita faahou to te ture a Mose e mana i nia ia ˈna. Ua papu ia Paulo e maoti to ˈna tiaturiraa i te hoo, ua ora o ˈna no te Atua.

Ua papai Paulo: “E parauhia te tahi taata e taata parau-tia, eiaha na roto i to ˈna haapaoraa i te ture, na roto noa râ i te faatupuraa i te faaroo ia Iesu Mesia.” (Gal. 2:16) Ua faataa Paulo i to Galatia: “Ua tuuhia mai [te Ture] ia ite-maitai-hia te hara e ia tae roa mai te huaai no ˈna te parau i fafauhia.” (Gal. 3:19) Ua faaite maitai te Ture eita e haere i te taata hara e te tia ore ia haapao i te Ture ma te tia roa e e titauhia te tahi tusia tia roa. Ua aratai ïa te Ture i te taata i “te huaai,” oia hoi te Mesia. Ma te faatupu i te faaroo ia Iesu Mesia, e nehenehe te hoê taata e parauhia e taata parau-tia i te aro o te Atua. (Gal. 3:24) Maoti te Ture Paulo i farii e i tiaturi ai ia Iesu. Mea na reira ïa to Paulo poheraa “no te ture” e oraraa “no te Atua.” O te Atua ˈtura ïa te mana i nia ia ˈna, e ere faahou te Ture.

Hoê â manaˈo ta Paulo i faataa i to Roma i te papairaa o ˈna: “To ˈu mau taeae, mai te mea ra e i faaipoipohia na outou i te Ture. Tera râ, ua hope te reira na roto i te tusia o te tino o te Mesia . . . Ua matara mai tatou i te Ture no te mea aita to te reira e mana faahou i nia ia tatou.” (Roma 7:4, 6) Te faaite ra teie na irava e te Galatia 2:19 e aita Paulo i parau ua pohe o ˈna ei taata rave hara i raro aˈe i te Ture. Te haapii nei râ Paulo aita faahou to te Ture e mana i nia ia ˈna e te tahi atu mau taata mai ia ˈna, ua tiamâ ratou na roto i to ratou faaroo i te Mesia.