1. Eaha te tahi mau tupuraa fifi ta tatou e mǎtaˈu nei?

 A FERURI na i teie mau hiˈoraa. Ua hinaaro Nestor raua María e tavini i te vahi e hinaaro-rahi-hia te feia poro. * E titauhia râ ia raua ia faaohie i te oraraa. Ua manaˈo râ raua eita e itehia te oaoa mau mea iti anaˈe te moni. A riro ai Biniam ei Ite no Iehova, i ora na o ˈna i te hoê vahi ua opanihia ta tatou ohipa. Ua taa ia ˈna e ei tavini a te Atua e nehenehe o ˈna e hamani-ino-hia e ua riro te reira ei haapeapearaa no ˈna. Tera râ, ua mǎtaˈu atu â o ˈna i te huru o to ˈna mau fetii a ite ai e Ite no Iehova o ˈna i teie nei. Ua itehia e mariri ai taata ino mau to Valérie e ua imi noa o ˈna i te hoê taote tâpû o te ore e faaohipa i te toto. Ua mǎtaˈu roa Valérie, aita o ˈna e hinaaro e pohe.

2. No te aha e titauhia ia tatou ia haa rahi no te ore e mǎtaˈu?

² Ua faaruru aˈena anei outou i teie huru mǎtaˈu? Papu maitai e e. Mai te peu eita tatou e haavî ia tatou iho, e rave tatou i te mau faaotiraa o te nehenehe e haafifi i to tatou auhoaraa e o Iehova. Tera hoi ta Satani e hinaaro ra. E faaohipa atoa Satani i te mǎtaˈu a turai ai ia tatou ia ofati i te mau ture a te Atua, oia atoa te faaueraa ia poro i te parau apî oaoa. (Apo. 12:17) Mea ino mau e mea puai Satani. E nafea râ tatou e paruru ai ia tatou i te mau raveraa a Satani?

3. Eaha te tauturu ia tatou ia ore e mǎtaˈu?

 ³ Ia tiaturi papu tatou i to Iehova here e turu ia tatou, eita tatou e mǎtaˈu ia Satani. (Sal. 118:6) Ei hiˈoraa, ua faaruru te taata i papai i te Salamo 118 i te mau fifi. Mea rahi to ˈna mau enemi e e tiaraa teitei to vetahi o ratou (irava 9, 10). I te tahi taime, ua faahepohia o ˈna (irava 13). Hau atu, ua aˈo etaeta Iehova ia ˈna (irava 18). Noa ˈtu râ, ua himene o ˈna: “E ore au e mǎtaˈu.” Eaha tei tauturu i teie taata papai Salamo ia ore e mǎtaˈu? Ua taa ia ˈna e ua here Iehova ia ˈna noa ˈtu ua aˈohia o ˈna. Ua papu atoa ia ˈna e noa ˈtu eaha te tupu, e ineine noa to ˈna Metua î i te here i te tauturu ia ˈna.—Sal. 118:29.

4. Ia tiaturi papu tatou e te here ra Iehova ia tatou, eaha te mau tupuraa ta tatou e faaruru ma te mǎtaˈu ore?

⁴ Mea tia ia tiaturi papu e te here ra Iehova ia tatou tataitahi. E tauturu mai te reira ia faaruru ma te mǎtaˈu ore i na tupuraa e toru: (1) te mǎtaˈu e eita e maraa ia tatou ia aupuru i to tatou utuafare, (2) te mǎtaˈu i te taata e (3) te mǎtaˈu i te pohe. Ua nehenehe te mau taeae e tuahine faahitihia i te paratarafa matamua e faaruru ma te mǎtaˈu ore i to ratou mau fifi no te mea ua tiaturi papu ratou i to Iehova here.

5. Eaha te tahi mau haapeapearaa a te hoê upoo utuafare? (A hiˈo i te hohoˈa i te api matamua.)

⁵ Mea faufaa no te hoê upoo utuafare Kerisetiano ia aupuru i to ˈna utuafare. (Tim. 1, 5:8) E haapeapea paha o ˈna i te ere i ta ˈna ohipa a tupu ai te maˈi pee na te ao nei. Aita paha te moni e navai no te faatamaa i to ˈna utuafare aore ra no te aufau i te fare tarahu. Ua haapeapea atoa paha o ˈna e noaa faahou anei ia ˈna te ohipa. Aore ra mai ia Nestor raua María, ua manaˈo paha o ˈna e eita e haere ia faaohie i to ˈna oraraa. Ua faaohipa Satani i te mǎtaˈu no te turai i e rave rahi Kerisetiano ia faaea i te tavini ia Iehova.

6. Eaha ta Satani e hinaaro ra ia manaˈo tatou?

⁶ Te hinaaro ra Satani ia manaˈo tatou e aita Iehova e here ra ia tatou e aita o ˈna e tauturu mai no te aupuru i to tatou utuafare. E rave paha ïa tatou i te mau mea atoa ia ore tatou e erehia i te ohipa noa ˈtu e titauhia ia ofati i te mau faaueraa Bibilia.

7. Eaha ta Iesu e haapapu ra ia tatou?

⁷ O Iesu tei matau maitai roa ˈˈe i to ˈna Metua e te haapapu mai ra o ˈna e ua ite maitai Iehova “i ta [tatou] e hinaaro mau hou a ani atu ai ia ˈna.” (Mat. 6:8) Ua ite atoa Iesu e ua ineine noa Iehova i te aupuru ia tatou. Ei Kerisetiano, e mero tatou o to te Atua utuafare. O Iehova te upoo. Ua papu ïa ia tatou e e rave Iehova mai tei parauhia i roto i te Timoteo 1, 5:8.

8. (1) Eaha te tauturu ia tatou, ia puta mai te manaˈo e eita e maraa ia tatou ia aupuru i to tatou utuafare? (Mataio 6:31-33) (2) E nafea tatou e pee ai i te hiˈoraa o na hoa faaipoipo i nia i te hohoˈa o te afai ra i te maa na te hoê tuahine?

⁸ Ua papu anaˈe ia tatou te here ra Iehova ia tatou e to tatou utuafare, e tiaturi iho â tatou e e aupuru mai o ˈna. (A taio i te Mataio 6:31-33.) Te hinaaro mau ra Iehova e na reira. E Atua horoa noa o ˈna e te here. I to ˈna poieteraa i te fenua, ua hamani o ˈna i te mau mea atoa ia oaoa noa tatou. (Gen. 2:9) Noa ˈtu i te tahi taime, te vai ra ia tatou te mau mea ta tatou e hinaaro mau ra, mea faufaa ia  haamanaˈo e no ô mai ia Iehova te mau mea atoa ta tatou e fanaˈo ra. (Mat. 6:11) Eiaha e moˈehia e mea hau aˈe te mau maitai ta Iehova e horoa mai i teie nei e a muri aˈe, ia faaauhia i te mau haapaeraa atoa ta tatou e rave nei. Tera ïa ta Nestor raua María i ite.—Isa. 65:21, 22.

9. Eaha ta tatou e haapii mai ra i te hiˈoraa o Nestor raua María?

⁹ E oraraa fanaˈo to Nestor raua María i Colombie. Teie ta raua i parau: “Ua hinaaro mâua e faaohie i te oraraa no te rave atu â i roto i te taviniraa. Ua manaˈo râ mâua eita e itehia te oaoa mau mea iti anaˈe te moni.” Ua haamanaˈo râ Nestor e María i te mau mea atoa ta Iehova i rave no te haapapu i to ˈna here ia raua. Ua papu ia raua e aupuru mai iho â Iehova. Vaiiho atura i ta raua ohipa aufau-maitai-hia. Hoo atura i to raua fare no te haere e ora i te vahi e hinaaro-rahi-hia te feia poro. Eaha to raua manaˈo a rave ai i tera faaotiraa? Te na ô ra Nestor: “Ua ite mâua e mea papu te mau parau a te Mataio 6:33. Aita mâua i ere i te tahi noa ˈˈe mea i te pae materia e mea oaoa aˈe mâua i teie nei.”

10. No te aha aita tatou e maere ra e mǎtaˈu te taata te tahi i te tahi?

¹⁰ Mai te tau mai â to te taata hamani-ino-raa te tahi i te tahi. (Koh. 8:9) Ei hiˈoraa, te faaohipa nei vetahi i to ratou mana no te rave i te ohipa ino. I te fare haapiiraa, e faaino vetahi mau tamarii i te tahi atu. Hau atu, mea ino vetahi i nia i to ratou mau fetii. Aita ïa tatou e maere ra e mǎtaˈu te taata te tahi i te tahi. E nafea Satani e faaohipa ˈi i te reira no te haamǎtaˈu ia tatou?

11-12. No te aha Satani e faaohipa ˈi i te mǎtaˈu taata?

¹¹ Te faaohipa ra Satani i te mǎtaˈu taata ia faaea tatou i te poro e i te faaroo ia Iehova. Te faaohipa atoa ra o ˈna i te mau faatereraa no te tapea i te ohipa a te faanahonahoraa e no te hamani ino ia tatou. (Luka 21:12; Apo. 2:10) I roto i te ao a Satani, e rave rahi o te haaparare nei i te mau parau haavare no nia i te mau Ite no Iehova. E nehenehe te taata o te tiaturi ra i teie mau parau e faaooo aore ra e hamani ino ia tatou. (Mat. 10:36) Aita tatou e maere ra i te mau raveraa a Satani.  Ua faaohipa aˈena o ˈna i teie mau ravea i te senekele matamua.—Ohi. 5:27, 28, 40.

¹² Aita Satani e faaohipa noa i te patoiraa a te mau faatereraa no te haamǎtaˈu ia tatou. A riro ai vetahi ei Ite no Iehova, e mǎtaˈu ratou i te huru o te mau fetii i mua i tera faaotiraa. I te tahi taime, mea mǎtaˈu aˈe ratou i te patoiraa a te fetii i te hamani-ino-raa. Mea here roa hoi na ratou i to ratou fetii. Te hinaaro atoa nei ratou ia haapii to ratou fetii o vai Iehova e ia here ia ˈna. E mauiui roa ratou ia faaino to ratou fetii ia Iehova e i ta ˈna mau tavini. I roto i te tahi mau tupuraa, ua patoi te fetii, ua farii râ i te parau mau i muri aˈe. Eaha râ to tatou huru ia ore to tatou mau fetii e farii faahou ia tatou?

13. E nafea te here o Iehova e tauturu ai ia tatou ia ore e mǎtaˈu i te patoiraa a te mau fetii? (Salamo 27:10)

¹³ Mea mahanahana mau te mau parau a te Salamo 27:10. (A taio.) Ia haamanaˈo tatou i to Iehova here ia tatou, eita tatou e mǎtaˈu i te patoiraa a to tatou mau fetii. Ua papu atoa ia tatou e e haamaitai mai Iehova no to tatou faaoromai tamau. E horoa mai Iehova i te mau mea atoa ta tatou e hinaaro mau ra no te ora, e tauturu mai o ˈna ia vai hau, ia oaoa e ia vai piri noa ia ˈna. Tera ïa ta Biniam i ite.

14. Eaha ta tatou e haapii mai ra i te hiˈoraa o Biniam?

¹⁴ Ua riro mai Biniam ei Ite no Iehova noa ˈtu te hamani-ino-raa a te faatereraa i to ˈna fenua. E hiˈopoa anaˈe mea nafea to Iehova here i te tautururaa ia Biniam ia ore e mǎtaˈu i te taata. Te na ô ra o ˈna: “Aita vau i manaˈo e e uˈana mai te hamani-ino-raa. Te mea râ ta ˈu i mǎtaˈu rahi aˈe, o te patoiraa a to ˈu fetii. I to ˈu faaotiraa e riro ei Ite no Iehova, ua mǎtaˈu roa vau e eita to ˈu papa e to ˈu utuafare e farii faahou ia ˈu.” Noa ˈtu râ, ua papu ia Biniam e tamau Iehova i te aupuru i te feia ta ˈna e here ra. Te faataa ra o ˈna: “Ua feruri au i nia i ta Iehova i rave no te tauturu i ta ˈna mau tavini tei faaruru i te fifi moni, te faainoraa e te haavîraa uˈana. Ua ite au e ia vai piri noa vau ia Iehova, e haamaitai o ˈna ia ˈu. Ua tapeahia vau e rave rahi taime e ua hamani-ino-hia vau. Ua ite râ vau e e tauturu noa Iehova ia tatou mai te peu eita tatou e taiva ia ˈna.”  Ua riro Iehova ei Metua mau no Biniam e ua fanaˈo o ˈna i te hoê utuafare pae varua.

15. No te aha tatou e mǎtaˈu ai i te pohe?

¹⁵ I roto i te Bibilia, te faahohoˈahia ra te pohe i te hoê enemi. (Kor. 1, 15:25, 26) E haapeapea paha tatou no to tatou ora, i te taime iho â râ tatou aore ra te hoê taata herehia e roohia ˈi i te maˈi ino mau. No te aha e nehenehe tatou e mǎtaˈu i te pohe? No te mea ua poiete Iehova ia tatou e te manaˈo e ora e a muri noa ˈtu i roto i to tatou aau. (Koh. 3:11) E nehenehe te hoê feruriraa tano no nia i te pohe e paruru ia tatou. Ei hiˈoraa, e nehenehe te reira e turai ia tatou ia haapao maitai i ta tatou maa, ia faaetaeta i te tino, ia haere i te taote a rave atu ai i te mau rapaauraa titauhia e ia ape i te mau tupuraa atâta.

16. No te aha Satani e faaohipa ˈi i te mǎtaˈu i te pohe?

¹⁶ Ua ite Satani e mea faufaa te ora no tatou. No reira o ˈna i pari ai e ua ineine tatou i te haapae i te mau mea atoa no to tatou ora, oia atoa i to tatou auhoaraa e o Iehova. (Ioba 2:4, 5) Ua hape râ Satani! Papu, e nehenehe oia e“faatupu i te pohe” e te tamata noa ra Satani i te faaohipa i te mǎtaˈu i te pohe no te turai ia tatou ia faarue ia Iehova. (Heb. 2:14, 15) I te tahi taime, e haamǎtaˈu te feia e turu ra ia Satani i te mau tavini a Iehova ma te parau e haapohehia ratou ia ore ratou e faaea i te haamori i te Atua. I roto i te tahi atu tupuraa, te ite ra Satani e maˈi ino mau to tatou. E faaohipa ïa o ˈna i te reira no te turai ia tatou ia rave i te hoê faaotiraa o te ore e tuati ra i ta te Bibilia e parau ra. E faahepo paha te mau taote aore ra fetii ia farii tatou i te toto. A na reira ˈi, e ofati tatou i te ture a te Atua. Aore ra e turai paha te tahi atu ia tatou ia farii i te hoê ravea rapaauraa o ta te Atua e ore e farii ra.

17. Ia au i te Roma 8:37-39, no te aha eiaha tatou e mǎtaˈu i te pohe?

¹⁷ Aita tatou e hinaaro e pohe, ua ite râ tatou e ia tupu noa mai te reira, eita Iehova e faaea i te here ia tatou. (A taio i te Roma 8:37-39.) Ua pohe vetahi tavini a Iehova, te haamanaˈo noa nei râ oia ia ratou, mai te huru ra e te ora noa ra ratou. (Luka 20:37, 38) Te tiai ru nei Iehova i te faahoˈi mai ia ratou i te ora. (Ioba 14:15) Ua horoa Iehova i te ora o ta ˈna Tamaiti here ia fanaˈo tatou i “te ora mure ore.” (Ioa. 3:16) Ua ite tatou e te here e te tâuˈa mau ra Iehova ia tatou. Eiaha roa ˈtu ïa tatou e faarue ia Iehova ia maˈihia tatou aore ra ia hinaaro vetahi e haapohe ia tatou. E turui râ tatou i nia ia ˈna no te fanaˈo i te tamahanahanaraa, te paari e te puai. Tera iho â ta Valérie e ta ˈna tane i rave.—Sal. 41:3.

18. Eaha ta tatou e haapii mai ra i te hiˈoraa o Valérie?

¹⁸ I te 35raa o to ˈna matahiti, ua itehia e e mariri ai taata ino mau to Valérie. E hiˈopoa anaˈe mea nafea te here o Iehova i te tautururaa ia ˈna ia ore e mǎtaˈu i te pohe. Te na ô ra Valérie: “I te iteraahia to ˈu maˈi, ua oti roa mâua ta ˈu tane. E titauhia ia tâpûhia vau. Ua farerei au e rave rahi taote tâpû, aita râ ratou i farii ia tâpû ia ˈu ma te ore e faaohipa i te toto. Papu, ua mǎtaˈu vau, tera râ, e faaueraa te reira no ô mai i te Atua. Aita roa ˈtu vau e hinaaro e farii i te toto. I roto i to ˈu oraraa, ehia taime to Iehova faaiteraa  i to ˈna here ia ˈu e i teie nei, e ravea ta ˈu no te faaite i to ˈu here ia ˈna. No reira, i te mau taime atoa e faaitehia mai ai e te ino noa ˈtu ra to ˈu maˈi, e itoito atu â vau i te faaoaoa ia Iehova eiaha râ ia Satani. Ei faahopearaa, ua tâpûhia vau ma te ore e faaohipa i te toto. Noa ˈtu aita to ˈu maˈi i ore, ua tamau Iehova i te horoa i ta mâua ta ˈu tane e hinaaro mau ra. Ei hiˈoraa, hou a ite ai e maˈi to ˈu, ua hiˈopoahia te tumu parau haapiiraa ‘E faaruru i te mau fifi ma te itoito’ i te putuputuraa. * Ua tamahanahanahia mâua e ua taio mâua i tera tumu parau e rave rahi taime. Maoti te reira, oia atoa te pororaa e te mau putuputuraa, ua nehenehe mâua e vai hau noa e e rave i te mau faaotiraa maitai.”

19. Eaha te fatata i te tupu?

¹⁹ Maoti te tauturu a Iehova, ua nehenehe te mau Kerisetiano na te ao nei e upootia i nia i te mau fifi e e patoi ia Satani. (Pet. 1, 5:8, 9) E nehenehe atoa outou e upootia. Fatata roa Iehova i te faaue ia Iesu e te feia faatavaihia ia “faaore i te mau ohipa a te Diabolo.” (Ioa. 1, 3:8) I muri iho, eita te mau tavini a te Atua i nia i te fenua e mǎtaˈu “e aita e tumu e mehameha ˈi” ratou. (Isa. 54:14; Mika 4:4) A tiai noa ˈi i te reira, e haa rahi tatou no te ore e mǎtaˈu.

20. Eaha te tauturu mai ia ore e mǎtaˈu?

²⁰ Mea tia ia papu atu â ia tatou e te here e te paruru ra Iehova i ta ˈna mau tavini. No te na reira, e titauhia ia tatou ia feruriruri e ia paraparau no nia i ta Iehova i rave no te paruru i ta ˈna mau tavini i tahito ra. E titau-atoa-hia ia tatou ia haamanaˈo mea nafea Iehova i te tautururaa ia tatou tataitahi ia faaruru i te mau tupuraa fifi mau. Maoti te tauturu a Iehova, e nehenehe tatou e upootia i nia i te mǎtaˈu.—Sal. 34:4.