TEIE ta Lisa * i parau: “Ua putapû roa vau i te hamani maitai o te mau taeae e tuahine.” No ˈna, tera tei turai ia ˈna ia farii i te parau mau. Hoê â huru no Anne tei parau: “Ua farii au i te parau mau na mua roa no te mea ua faaite mai te mau Ite no Iehova i te hamani maitai.” I teie mahana, mea au roa na raua e taio e e feruriruri i nia i te Bibilia. O te hamani maitai râ tei turai ia raua ia haa.

E nafea ia faaite i te hamani maitai o te faaitoito ia vetahi ê? E hiˈopoa anaˈe e piti ravea. A tahi, na roto i ta tatou mau parau e a piti, na roto i ta tatou mau ohipa. I muri iho, e ite tatou e faaite tatou i te hamani maitai ia vai ra.

I roto i te Maseli pene 31, te parauhia ra no nia i te vahine faaipoipo e huru maitatai to ˈna e tei nia iho “te ture o te hamani maitai” i to ˈna arero. (Mas. 31:26) E vaiiho o ˈna i tera “ture” ia aratai i ta ˈna huru paraparau e te mau taˈo ta ˈna e faahiti. E titau-atoa-hia i te mau metua tane ia faaohipa i tera “ture” a paraparau ai. Ua ite te rahiraa o te mau metua e e mauiui te tamarii i te hoê parau etaeta e aita o ˈna e mauruuru i te reira. Ia tutava te metua i te paraparau ma te mǎrû, e hinaaro te tamarii e faaroo atu.

Noa ˈtu e tamarii ta outou aore ra aita, e nafea ia faaite i te hamani maitai na roto i ta outou mau parau? E pahono mai te tuhaa matamua o te Maseli 31:26 a na ô ai: “E parau to ˈna vaha i te paari.” E titauhia ïa ia haapao maitai i te mau taˈo ta tatou e faaohipa e i ta tatou huru paraparau. Mea maitai ia ui ia tatou iho: “Ia faahiti au i tera parau, e tupu mai anei te riri aore ra te hau?” (Mas. 15:1) Papu, e haerea î i te paari ia feruri tatou hou a paraparau ai.

Teie te tahi atu parau paari: “E au te parau feruri-ore-hia i te puta ˈoˈe.” (Mas. 12:18) Ia feruri tatou i te mau faahopearaa o ta tatou mau parau i nia ia vetahi ê, e hinaaro tatou e haapao maitai i ta tatou e faahiti. E tauturu mai te faaohiparaa i “te ture o te hamani maitai” ia ore e faahiti i te mau parau o te haamauiui. (Eph. 4:31, 32) E maiti râ tatou i te mau taˈo tano e e paraparau tatou ma te mǎrû. Ua horoa Iehova i te hiˈoraa maitai i roto i tera tuhaa a tamǎrû ai o ˈna i ta ˈna tavini ia Elia tei riaria. Ua faaohipa Iehova i te hoê melahi tei paraparau ia ˈna ma “te hoê reo iti haihai e te mǎrû.” (Arii 1, 19:12) Tera râ, aita e navai noa ia haapao i ta tatou e parau no te riro ei taata hamani maitai. E mea tia atoa ia faaite i te reira na roto i ta tatou mau ohipa. E nafea ïa?

E pee tatou i te hiˈoraa o Iehova a paraparau ai e a ohipa ˈi ma te hamani maitai. (Eph. 4:32; 5:1, 2) No Lisa, faahitihia i te omuaraa, mea faufaa te hamani maitai ta te mau Ite no Iehova i faaite atu. Ua parau o ˈna: “Ua titauhia i to ˈu utuafare ia faarue i te vahi nohoraa. Ua ani e piti taeae e ta raua vahine i ta ratou paoti ia faaea ratou i te ohipa no te tauturu ia matou. Aita hoi au i haapii atura i te Bibilia i taua taime  ra.” Ua turai tera mau ohipa î i te hamani maitai ia haapii atu â Lisa i te parau mau Bibilia.

Ua putapû atoa Anne, faahitihia i te omuaraa, i te hamani maitai o te mau Ite no Iehova. Ua tapao o ˈna: “No te ino o teie ao, mea fifi no ˈu ia tiaturi i te taata.” Ua parau atoa o ˈna: “I to ˈu farereiraa i te mau Ite no Iehova, aita vau i tiaturi ia ratou. Ua manaˈo vau: ‘No te aha ratou e haapao ai ia ˈu?’ Ua faaite râ te tuahine tei faatere i ta ˈu haapiiraa i te hamani maitai mau e ua turai te reira ia ˈu ia tiaturi ia ˈna.” Eaha te faahopearaa? “I muri iho, ua haamata vau i te haapao atu â i ta ˈu haapiiraa.”

A tapao na. Ua putapû roa Lisa raua Anne i te mau ohipa î i te hamani maitai e te here o te mau taeae e tuahine. Ua tauturu te reira ia raua ia hinaaro e ite hau atu â no nia i te parau mau. Na te hamani maitai o te amuiraa i tauturu ia raua ia tiaturi ia Iehova e i ta ˈna mau tavini.

Pinepine vetahi i te paraparau ma te mǎrû e i te faaite i te mata ataata no te mea e peu matauhia te reira i roto i to  ratou fenua. E faaite paha vetahi i te peu maitai no to ratou taere aore ra huru taata. Mai te peu râ tera anaˈe te tumu e faaite ai tatou i tera huru maitai, aita tatou e faatupu ra i te hamani maitai e au i te Atua.—A hiˈo atoa i te Ohipa 28:2.

E tuhaa te hamani maitai mau o te mau huru maitatai ta te varua moˈa e faatupu. (Gal. 5:22, 23) No te faaite i te hamani maitai mau, e titauhia ia tatou ia vaiiho i te varua moˈa ia ohipa i nia ia tatou. A na reira ˈi, te pee ra tatou i te hiˈoraa o Iehova e o Iesu. Hau atu, ei Kerisetiano, e haapao iho â tatou ia vetahi ê. Na te here ia Iehova e i te taata tupu e turai ia tatou ia na reira. E riro ïa to tatou hamani maitai ei huru maitai faahiahia mau no te mea no roto mai te reira i to tatou aau e tera te hamani maitai ta te Atua e farii ra.

Papu e hinaaro tatou e faaite i te hamani maitai i te feia tei haa ma te maitai i nia ia tatou aore ra i te feia ta tatou i matau. (Sam. 2, 2:6) Hoê ravea, o te haamauruururaa ïa ia ratou. (Kol. 3:15) Eaha râ te rave ia manaˈo tatou e ere i te mea tano ia fanaˈo te tahi taata i to tatou hamani maitai?

A feruri na. O Iehova te hiˈoraa maitai roa ˈˈe o te faaiteraa i te hamani maitai. Te horoa mai ra ta ˈna Parau i te hoê haapiiraa faufaa roa no nia i te reira. Ua faaohipahia te parau “hamani maitai rahi” e rave rahi taime i roto i te mau Papai Heleni Kerisetiano. E nafea te Atua e faaite mai ai i tera huru maitai?

Ua faaite Iehova i te hamani maitai i te mau taata atoa ma te horoa ˈtu i ta ratou e hinaaro mau ra no te ora. (Mat. 5:45) Noa ˈtu aita ratou i ite o vai o ˈna, ua faaite Iehova i te hamani maitai ia ratou. (Eph. 2:4, 5, 8) Ei hiˈoraa, ua horoa Iehova i ta ˈna Tamaiti otahi no te huitaata. Ua papai te aposetolo Paulo e ua horoa Iehova i te hoo “ia au i te rahi o [to ˈna] hamani maitai.” (Eph. 1:7) Hau atu, noa ˈtu e feia hara tatou e e haamauiui tatou ia Iehova, e tamau o ˈna i te aratai e i te haapii ia tatou. “Mai te ûa toriri” ta ˈna haapiiraa e ta ˈna mau parau. (Deut. 32:2) Papu, aita tatou e nehenehe e faahoˈi atu i te hamani maitai ta ˈna i faaite mai. E ua ite tatou ahani aita Iehova i faaite i te hamani maitai rahi, eita tatou e fanaˈo i te hoê a muri aˈe papu.—A hiˈo atoa i te Petero 1, 1:13.

Mea faaitoito mau e mea au roa ia fanaˈo i te hamani maitai o Iehova. No reira, eiaha e faaite noa i tera huru maitai i te tahi mau taata. A tutava râ i te pee i to Iehova hiˈoraa ma te faariro i te hamani maitai ei tuhaa faufaa roa o to tatou huru i te mau mahana atoa. (Tes. 1, 5:15) Ma te faaite tamau i te hamani maitai, e au tatou i te hoê auahi mahanahana i te mahana toetoe. E riro tatou ei faaitoitoraa na te mau mero utuafare, mero o te amuiraa, hoa ohipa, hoa haapiiraa e feia tapiri.

A feruri na, maoti ta outou mau parau e ohipa î i te hamani maitai e faufaahia to outou utuafare e ta outou amuiraa e e maitai mai ratou. Te vai ra paha hoê i roto i te amuiraa o te hinaaro mau nei i te tauturu no te atuatu i to ˈna fare e aua aore ra no te hoohoo mai i te tahi mau taoˈa. I roto i te taviniraa, e haa atoa outou mai tera ia farerei outou i te hoê taata e fifi ra. E nehenehe ïa outou e horoa ˈtu i te tauturu hinaarohia.

Ma te pee i te hiˈoraa o Iehova, ia arataihia ta outou mau parau e ohipa i “te ture o te hamani maitai” e tia ˈi.