1. Eaha ta te arii Solomona e haapii mai ra i roto i te Koheleta 7:20?

 UA PAPAI te arii Solomona: “Aita hoi e taata parau-tia i te fenua o te rave noa i te maitai e o te ore roa e hara.” (Koh. 7:20) Mea papu tera parau! E taata hara tatou paatoa. (Ioa. 1, 1:8) No reira, o tatou paatoa te hinaaro ra ia faaore te Atua e te taata i ta tatou mau hape.

2. Eaha to outou huru ia faaore te hoê hoa piri i ta outou hape?

² Ua haamauiui aˈena paha outou i te hoê hoa piri. Ua hinaaro outou e faaafaro i te fifi e ia hoa faahou orua. Tatarahapa mau atura ïa outou. Eaha to outou huru a faaore ai o ˈna i ta outou hape? Ua oaoa roa paha outou, e ere anei?

3. Eaha ta tatou e hiˈopoa i roto i teie tumu parau haapiiraa?

³ Te hinaaro ra tatou ia riro Iehova ei hoa piri roa ˈˈe no tatou. I te tahi râ taime, e parau aore ra e rave tatou i te tahi mea o te haamauiui ia ˈna. No te aha mea papu e ua ineine Iehova i te faaore i ta tatou mau hara? Eaha te taa-ê-raa i rotopu i ta Iehova faaoreraa i te hapa e ta tatou? E faaore noa anei Iehova i te hara a te taata atoa?

4. No te aha tatou e papu ai e ua ineine Iehova i te faaore i te hara?

⁴ Te haapapu ra te Bibilia e ua ineine Iehova i te faaore i te hara. I te mouˈa Sinai, ua tono Iehova i te hoê melahi ia Mose ra no te faaite o vai o ˈna a na ô ai: “Iehova, Iehova, e Atua aroha hamani maitai e te aumihi, o te ore e  riri oioi, o tei rahi i te here taiva ore e te parau mau, o te faaite i te here taiva ore e tausani noa ˈtu te uˈi, o te faaore i te hape e te hapa e te hara.” (Exo. 34:6, 7) E Atua aroha hamani maitai Iehova e ua ineine noa o ˈna i te faaore i te hara a te taata e tatarahapa mau ra.—Neh. 9:17; Sal. 86:15.

5. Inaha ua matau maitai Iehova i te taata tataitahi, eaha ta ˈna e hinaaro ra e rave no tatou? (Salamo 103:13, 14)

⁵ Na Iehova i poiete ia tatou, ua ite ïa o ˈna i te mau mea atoa no nia ia tatou. A feruri na. Ua matau maitai o ˈna i te huru o te taata tataitahi. (Sal. 139:15-17) Ua ite ïa o ˈna i to tatou huru tia ore. Oia atoa eaha tei tupu i roto i to tatou oraraa e eaha to tatou huru mau. Inaha ua matau maitai Iehova ia tatou, te hinaaro ra o ˈna e faaite mai i te aroha hamani maitai.—Sal. 78:39; a taio i te Salamo 103:13, 14.

6. Mea nafea to Iehova faaite-papu-raa e ua ineine o ˈna i te faaore i te hara?

⁶ Ua faaite papu Iehova e ua ineine o ˈna i te faaore i te hara. Ua ite o ˈna e no te hara a Adamu, ua raeahia tatou paatoa i te hara e te pohe. (Roma 5:12) Aita ta te taata e ravea i mua i te reira. (Sal. 49:7-9) Tera râ, no to ˈna here rahi ia tatou e to ˈna aumihi, ua horoa Iehova i te hoê ravea no te faaora ia tatou. Ia au i te Ioane 3:16, ua horoa o ˈna i ta ˈna Tamaiti otahi ia pohe no tatou. (Mat. 20:28; Roma 5:19) Ua pohe Iesu no tatou e ua mauiui rahi o ˈna no te faaora i te taata o te faatupu i te faaroo ia ˈna. (Heb. 2:9) Ua mauiui roa Iehova a ite ai i ta ˈna Tamaiti here e faaruru ra i te hoê pohe mauiui mau e te haama! Papu, ahani aita Iehova i hinaaro e faaore i ta tatou mau hara, eita roa ˈtu o ˈna e horoa i ta ˈna Tamaiti here ia pohe no tatou.

7. Eaha te tahi mau hiˈoraa Bibilia o te faaite ra e ua faaore noa Iehova i te hara?

⁷ Mea rahi te hiˈoraa Bibilia o te faaite ra e ua faaore Iehova i te hara. (Eph. 4:32) E haamanaˈo paha outou i te hiˈoraa o te arii Manase. Ua hara teie taata ino ia Iehova ma te haamori i te mau atua hape e ma te turai ia vetahi ê ia na reira atoa. Ua haapohe atoa o ˈna i ta ˈna iho  mau tamarii ma te faatusia ia ratou no te mau atua hape e ua tae roa o ˈna i te tuu i te hoê pou haamoriraa idolo i roto i te hiero moˈa o Iehova. Te parau ra te Bibilia no nia ia Manase: “Mea rahi roa te ohipa ino ta ˈna i rave i te aro o Iehova no te faainoino ia ˈna.” (Par. 2, 33:2-7) I muri aˈe râ, ua tatarahapa mau Manase no ta ˈna i rave, ua faaore Iehova i ta ˈna mau hara e ua faahoˈi i te tiaraa arii o Manase. (Par. 2, 33:12, 13) E haamanaˈo atoa paha outou i te hiˈoraa o te arii Davida tei rave i te ohipa ino mau i te aro o Iehova, mai te faaturi e te haapoheraa taata. Inaha ua farii Davida ua hara o ˈna e ua tatarahapa mau o ˈna, ua faaore Iehova i ta ˈna mau hara. (Sam. 2, 12:9, 10, 13, 14) Mea papu ua ineine Iehova i te faaore i te hara e ia na reira o ˈna, e ere roa ˈtu mai te raveraa a te taata. O ta tatou ïa e hiˈopoa i teie nei.

8. No te aha o Iehova te Haava maitai roa ˈˈe?

⁸ O Iehova te “Haava o te fenua taatoa.” (Gen. 18:25) Ua ite papu te hoê haava maitai i te ture. Mea tano roa tera parau no Iehova no te mea e ere noa o ˈna i te Haava, e Iriti ture atoa râ. (Isa. 33:22) Aita hoê aˈe mai ia Iehova o te ite eaha te mea maitai e te mea ino. Eaha te titau-atoa-hia i te hoê haava maitai? Ia ite o ˈna i te mau mea atoa tei tupu hou a rave ai i te hoê faaotiraa. Inaha ua ite Iehova i te mau mea atoa, o ˈna ïa te Haava maitai roa ˈˈe.

9. Eaha ta Iehova e hiˈopoa hou a faaoti ai e faaore anei o ˈna i te hara a te hoê taata?

⁹ Taa ê roa i te mau haava taata, ua ite maitai Iehova i te mau mea atoa tei tupu. (Gen. 18:20, 21; Sal. 90:8) E ere o ˈna mai te feia o te haava ia au i ta ratou e ite mata e e faaroo. Ua taa maitai ia Iehova no te aha te hoê taata e haa ˈi mai tera. Peneiaˈe no te mea no ǒ mai tera huru i to ˈna mau metua, te haapiiraa ta ˈna i fanaˈo, te vahi ta ˈna e ora ra aore ra i te hoê maˈi i te pae feruriraa. E ite atoa Iehova eaha to roto i te aau. E ite maitai o ˈna i te mau manaˈo turai, opuaraa e hinaaro o te taata tataitahi. Aita hoê noa ˈˈe mea tei hunahia i te aro o te Atua. (Heb. 4:13) No reira, e faaore Iehova i te hara a te hoê taata no te mea ua ite o ˈna i te mau mea atoa tei tupu.

10. No te aha mea tano noa ta Iehova mau haavaraa? (Deuteronomi 32:4)

¹⁰ Mea tano noa ta Iehova mau haavaraa. Eita o ˈna e maitiiti i te taata. Ia faaore Iehova i te hara, eita o ˈna e haapao i te huru rapaeau o te hoê taata, te moni, te tiaraa aore ra te aravihi. (Sam. 1, 16:7; Iak. 2:1-4) Eita hoê noa ˈˈe taata e nehenehe e faahepo aore ra e peta ia Iehova. (Par. 2, 19:7) Aita roa ˈtu ta ˈna mau faaotiraa i ravehia na roto i te inoino aore ra te tahi atu huru aau. (Exo. 34:7) Mea papu, o Iehova te Haava maitai roa ˈˈe no te mea te taa ra ia ˈna i te mau mea atoa no nia ia tatou e te mau tupuraa ta tatou i faaruru.—A taio i te Deuteronomi 32:4.

11. No te aha mea taa ê mau ta Iehova huru faaoreraa i te hapa ia faaauhia i ta te taata?

¹¹ Ua farii te feia i papai i te mau Papai Hebera e mea taa ê mau ta Iehova huru faaoreraa i te hapa i ta te taata. I te tahi mau taime, ua maiti ratou i te hoê taˈo Hebera “tei faaohipa-noa-hia no te faataa  i ta Iehova faaoreraa i te hara. Eita roa ˈtu tera taˈo e nehenehe e faaohipahia no te taata no te mea mea taotia ta ˈna huru faaoreraa i te hapa.” Tei ia Iehova anaˈe te mana e faaore i te hara a te hoê taata e tatarahapa mau ra. Eaha ïa ta tatou e fanaˈo ia faaore Iehova i ta tatou mau hara?

12-13. (1) Eaha ta te hoê taata e fanaˈo ia faaore Iehova i ta ˈna mau hara? (2) E hopea anei to te mau maitai ta tatou e fanaˈo a faaore ai Iehova i ta tatou mau hara? A faataa.

¹² Ia farii tatou e ua faaore Iehova i ta tatou mau hara, e fanaˈo tatou i “te anotau haumârû,” te hau o te feruriraa e te manaˈo haava mâ. O Iehova anaˈe te nehenehe e faaore i te hara, eiaha râ te taata. (Ohi. 3:19) Ia faaore Iehova i ta tatou mau hara, e farii faahou mai o ˈna ia tatou ei hoa, mai te huru ra e aita tatou i rave aˈe i te hara.

¹³ Eita roa ˈtu ïa Iehova e faahapa aore ra faautua ia tatou no te hoê hara ta ˈna i faaore aˈena. (Isa. 43:25; Ier. 31:34) E faaatea Iehova i ta tatou mau hara “mai te atea o te hitiraa mahana i te toparaa mahana.” * (Sal. 103:12) Ia feruri tatou i te aroha hamani maitai rahi o Iehova a faaore ai i ta tatou mau hara, auê tatou i te mauruuru e i te faatura rahi ia ˈna. (Sal. 130:4) E faaore noa anei râ Iehova i te hara a te taata atoa?

14. Ia au i ta tatou i ite, e nafea Iehova e rave ai i te faaotiraa e faaore anei o ˈna i te hoê hara?

¹⁴ Mai ta tatou i ite, aita Iehova e faaoti e faaore i te hara ia au i te faito o te reira. Ua ite atoa mai tatou e ei Atua poiete, ei Iriti ture e ei Haava no tatou, e faaohipa Iehova i to ˈna ite ia rave o ˈna i te faaotiraa e faaore anei i te hoê hara. Eaha râ te mau tuhaa ta Iehova e hiˈopoa?

15. Ia au i te Luka 12:47, 48, eaha te hoê tuhaa ta Iehova e hiˈopoa?

¹⁵ Hoê tuhaa ta Iehova e hiˈopoa, o te iteraa ïa e ua taa anei i te taata rave hara e mea ino ta ˈna i rave. Ua haapapu Iesu i  te reira i roto i te Luka 12:47, 48. (A taio.) Ia opua te hoê taata e rave i te tahi ohipa ua ite o ˈna aita Iehova e farii ra, a rave atu ai i te reira, mea ino mau ïa e ua hara o ˈna. E faaoti paha Iehova i te ore e faaore i ta ˈna hara. (Mar. 3:29; Ioa. 9:41) Papu, i te tahi taime ua taa maitai ia tatou e ua rave tatou i te mea ino. Te auraa anei ïa e aita e ravea ia faaorehia ta tatou hara? E ere, no te mea te vai ra te tahi atu tuhaa ta Iehova e hiˈopoa.

16. Eaha te tatarahapa e no te aha mea faufaa te reira ia hinaaro tatou ia faaore Iehova i ta tatou mau hara?

¹⁶ E hiˈopoa atoa Iehova e te tatarahapa mau ra anei te taata rave hara. E nafea te taata rave hara e faaite ai te tatarahapa ra o ˈna? E taui o ˈna i to ˈna feruriraa, huru e ta ˈna mau opuaraa. E oto roa o ˈna eiaha noa no te mea ua rave o ˈna i te ohipa ino, no te mea atoa râ ua paruparu-roa-hia o ˈna i te pae varua a hara ˈtu ai. A haamanaˈo e ohipa ino mau ta te arii Manase e te arii Davida i rave, ua faaore râ Iehova i te reira no te mea ua tatarahapa mau raua. (Arii 1, 14:8) E mea tia ia ite papu Iehova e ua tatarahapa mau tatou no te faaore i ta tatou hara. Aita râ e navai ia faaite noa i te manaˈo tatarahapa, e mea tia atoa ia ineine tatou i te haa. * Tera te tahi atu tuhaa ta Iehova e hiˈopoa.

17. Eaha te fariuraa i te Atua e no te aha mea faufaa te reira ia ore tatou e tapiti faahou i te hoê hara? (Isaia 55:7)

¹⁷ E hiˈopoa atoa Iehova e te fariu ra anei te taata rave hara ia ˈna. Te auraa, mea tia ia rave o ˈna i te mau tauiraa ma te haapae i to ˈna haerea ino e ma te rave i te hinaaro o Iehova i roto i to ˈna oraraa. (A taio i te Isaia 55:7.) Mea tia atoa ia taui o ˈna i to ˈna feruriraa e ia tu te reira i te mau aratairaa a Iehova. (Roma 12:2; Eph. 4:23) Mea tia atoa ia faaoti papu o ˈna i te haapae roa i to ˈna huru feruriraa e haerea ino. (Kol. 3:7-10) E riro to tatou faaroo i te tusia o te Mesia ei niu papu no Iehova no te faaore i ta tatou  mau hara. E faaore atu â Iehova i te reira a ite ai e te tutava mau ra tatou i te taui i to tatou haerea.—Ioa. 1, 1:7.

18. Eaha ta tatou i hiˈopoa no nia i ta Iehova huru faaoreraa i te hara?

¹⁸ E hiˈo poto faahou mai na tatou i te mau manaˈo faufaa ta tatou i hiˈopoa mai. O Iehova te hiˈoraa maitai roa ˈˈe o te faaoreraa i te hara. Aita ˈtu mai ia ˈna! No te aha tatou e papu ai i te reira? A tahi, ua ineine noa o ˈna i te faaore i te hara. A piti, ua ite o ˈna i te mau mea atoa no nia ia tatou. O ˈna ïa te ite maitai aˈe e ua tatarahapa mau anei tatou. A toru, ia faaore Iehova i ta tatou mau hara, e tumâ roa o ˈna i te reira mai te huru ra e aita tatou i rave aˈe i te hara. E nehenehe ïa tatou e fanaˈo faahou i te hoê manaˈo haava mâ e i ta ˈna farii maitai.

19. Noa ˈtu e taata tia ore tatou e e tamau tatou i te rave i te hara, no te aha tatou e nehenehe ai e oaoa?

¹⁹ Parau mau, no te mea e taata tia ore tatou, e tamau tatou i te rave i te hara. E nehenehe râ tatou e itoitohia i teie mau parau o te buka 2 o te Étude perspicace des Écritures api 765: “E Atua aroha hamani maitai Iehova e ua taa ia ˈna e taata tia ore ta ˈna mau tavini. Eiaha ïa ratou e faahapa noa ia ratou no to ratou huru tia ore e ta ratou mau hapa. (Sal. 103:8-14; 130:3) Ia tutava ratou i te ora ia au i to Iehova hinaaro, e oaoa ratou. (Phil. 4:4-6; Ioa. 1, 3:19-22).” Auê ïa parau faaitoito mau te reira!

20. Eaha ta tatou e hiˈopoa i to muri iho tumu parau haapiiraa?

²⁰ Auê tatou i te mauruuru a ite ai e ua ineine Iehova i te faaore i ta tatou mau hara ia tatarahapa mau tatou! E nafea ïa tatou e pee ai i te hiˈoraa o Iehova? E nafea tatou e faaite ai i te hoê â huru aroha hamani maitai e to Iehova? No te aha râ mea taa ê ai te reira i te tahi taime? No te aha mea faufaa roa ia ite i tera taa-ê-raa? E pahonohia tera mau uiraa i to muri iho tumu parau haapiiraa.