Ua riro mai Iesu ei Tahuˈa Rahi i to ˈna bapetizoraahia i te matahiti 29. Eaha te haapapuraa? I to ˈna bapetizoraa, ua pûpû Iesu ia ˈna iho ei tusia i nia i te fata o “te hinaaro” o te Atua. (Gal. 1:4; Heb. 10:5-10) A bapetizohia ˈi Iesu, ua faaohipahia te hoê fata no te pûpû i te tusia i te Atua, te auraa, i tera atoa taime, ua haamauhia te hiero pae varua, o te mau mea atoa ïa i faanahohia maoti te tusia o Iesu no te haamori ia Iehova.—Mat. 3:16, 17; Heb. 5:4-6.

E hinaarohia te tahuˈa rahi i roto i te hoê hiero, hoê â atoa ïa i roto i te hiero pae varua. Ua faatavaihia Iesu i “te varua moˈa e i te mana.” (Ohi. 10:37, 38; Mar. 1:9-11) Eaha râ te haapapuraa ua riro mai Iesu ei Tahuˈa Rahi hou to ˈna poheraa e tia-faahou-raa? E ite tatou i te reira a hiˈopoa ˈi i te hiˈoraa o Aarona e to te mau tahuˈa rahi tei mono ia ˈna.

Ia au i te ture ta Iehova i horoa ia Mose, o te tahuˈa rahi anaˈe te nehenehe e tomo i roto i te Vahi Moˈa Roa o te sekene e o te hiero i muri aˈe. Na te hoê paruru e faataa ê te Vahi Moˈa Roa i te Vahi Moˈa. I te Mahana Taraehara anaˈe te tahuˈa rahi e na roto atu ai i te paruru no te haere i te Vahi Moˈa Roa. (Heb. 9:1-3, 6, 7) Mai ia Aarona e te tahi atu mau tahuˈa rahi tei faatoroahia hou a “na roto atu [ai] i te paruru” o te sekene, ua faatavai-atoa-hia Iesu ei Tahuˈa Rahi o te hiero pae varua a Iehova hou o ˈna a pohe ai e a “na roto atu [ai] i te paruru, oia hoi to ˈna tino” no te ora ˈtu i te raˈi. (Heb. 10:20) No reira te aposetolo Paulo i parau ai e haere mai Iesu ei “tahuˈa rahi” e e “na roto atu oia i te tiahapa rahi aˈe e te maitai roa ˈtu â e ere mea hamanihia e te rima taata,” oia hoi “te raˈi.”—Heb. 9:11, 24.

I te hoê â anei taime te faufaa apî i te haamanaraahia e avariraahia? E, hoê â hoi ohipa te titauhia ia rave no te haamana e no te avari i te faufaa apî. Ua titauhia ia haere Iesu i nia i te raˈi e ia pûpû oia i to ˈna ora ei taata tia roa. I te haamanaraahia te faufaa apî, ua avari-atoa-hia ïa te reira.

A tahi, ua tia ˈtu Iesu i mua ia Iehova. A piti, ua pûpû i to ˈna ora tia roa ia Iehova. E a toru, ua farii Iehova i te toto o Iesu ei hoo no te huitaata. Ia ore teie na ohipa e toru e ravehia, eita te faufaa apî e avarihia.

Aita te Bibilia e faaite papu ra afea Iehova i te fariiraa i te tusia taraehara o Iesu. Eita ïa tatou e nehenehe e haapapu roa afea te faufaa apî i te haamanaraahia e avariraahia. Tera râ, ua ite tatou ua haere Iesu i nia i te raˈi ahuru mahana na mua ˈˈe i te Penetekose o te matahiti 33. (Ohi. 1:3) I roto i tera area taime poto, ua pûpû Iesu i to ˈna ora ei taata tia roa ia Iehova. (Heb. 9:12) Ua itehia te haapapuraa ua farii Iehova i te faufaa apî na roto i tei tupu i te Penetekose. (Ohi. 2:1-4, 32, 33) I tera taime, ua haamanahia e ua avarihia te reira.

Ei haapotoraa, ua haamanahia e ua avarihia te faufaa apî i muri aˈe i to Iehova fariiraa i te tusia taraehara o Iesu e to ˈna faaôraa i te feia faatavaihia i roto i te faufaa apî. I reira te Tahuˈa Rahi ra o Iesu i te riroraa mai ei arai no te faufaa apî.—Heb. 7:25; 8:1-3, 6; 9:13-15.