1. Eaha te tupu ia hinaaro te tahi mau taata ia hiˈohia mai ratou mea aravihi aˈe ia vetahi ê?

 MEA rahi i teie mahana o te hinaaro ra ia hiˈohia mai ratou mea aravihi aˈe ia vetahi ê e aita ratou e ite ra i te ino ta ratou e rave ra i nia ia vetahi ê. E feruri paha te hoê fatu taiete i te tahi mau ravea tano ore ia hiˈohia mai ta ˈna te taiete ona roa ˈˈe. E rave paha te hoê maona i te tahi mea e pepe ai te tahi maona ia upootia o ˈna. E punu paha te hoê piahi ia fariihia o ˈna i roto i te hoê fare haapiiraa teitei. No te hoê Kerisetiano, e ere roa ˈtu tera mau ohipa i te mea tano. E ohipa tera “ta te tino hara e faatupu.” (Gal. 5:19-21) Ma te ore râ e ite, e nehenehe te tahi mau Kerisetiano e faatupu i tera huru feruriraa i roto i te amuiraa. Mea faufaa roa ia feruri i te reira no te mea e nehenehe te feruriraa tataˈu e faaamaha i te amuiraa.

2. Eaha ta tatou e hiˈopoa mai i roto i teie tumu parau haapiiraa?

² I roto i teie tumu parau haapiiraa, e hiˈo mai tatou i te tahi mau mea o te nehenehe e turai ia tatou ia faatupu i te feruriraa tataˈu e to tatou mau taeae. E hiˈopoa atoa mai tatou i te hiˈoraa o te tahi mau tavini haapao maitai a Iehova, o tei ore i faatupu i te feruriraa tataˈu. Na mua râ, e hiˈo mai tatou e nafea ia hiˈopoa i to tatou aau.

3. Eaha te mau uiraa ta tatou e ui ia tatou iho?

³ I te tahi taime, mea maitai ia hiˈopoa i to tatou aau ma te ui ia tatou iho: ‘Te faaau ra anei au ia ˈu ia vetahi ê? Te  hinaaro ra anei au ia hiˈohia mai o vau te mea aravihi aˈe i roto i te mau mea ta ˈu e rave? Aore ra o vau te mea aravihi aˈe i te hoê taeae aore ra tuahine? Aore ra te hinaaro noa ra vau e horoa i te mea maitai roa ˈˈe na Iehova?’ No te aha mea faufaa ia feruri i tera mau uiraa? A tapao na eaha ta te Bibilia e parau ra.

4. No te aha eiaha tatou e faaau ia tatou iho ia vetahi ê mai tei faahitihia i roto i te Galatia 6:3, 4?

⁴ Te faaue mai ra te Bibilia eiaha roa e faaau ia tatou ia vetahi ê. (A taio i te Galatia 6:3, 4.) No te aha? Mai te peu e manaˈo tatou e mea aravihi aˈe tatou i te tahi atu taeae, e teoteohia tatou. Ia manaˈo râ tatou mea aravihi aˈe to tatou mau taeae ia tatou iho, e nehenehe tatou e toaruaru. Mea maamaa ia faatupu i tera e piti huru feruriraa. (Roma 12:3) Te parau ra Katerina, * te hoê tuahine no Heleni: “I faaau noa na vau ia ˈu i te tahi atu mau tuahine mea nehenehe aˈe, mea aravihi aˈe i roto i te pororaa e o te faahoa ohie noa ia vetahi ê. Mea na reira vau i te manaˈoraa mea faufaa ore au.” E haamanaˈo tatou e ua faafatata Iehova ia tatou ia ˈna eiaha no to tatou nehenehe e to tatou aravihi, no to tatou râ here ia ˈna e to tatou hinaaro e faaroo i ta ˈna Tamaiti.—Ioa. 6:44; Kor. 1, 1:26-31.

5. Eaha te haapii mai i te hiˈoraa o te hoê taeae?

⁵ E nehenehe atoa tatou e ui ia tatou iho: ‘E taata hau anei au i roto i te amuiraa? Aore ra mea pinepine au i te peapea e o vetahi ê?’ Teie te hiˈoraa o te hoê matahiapo no Korea apatoa. I te hoê taime, ua hiˈo ino o ˈna i te mau taeae i horoahia te hopoia i roto i te amuiraa. Te na ô ra o ˈna: “Mea faaino roa vau i tera mau taeae. Aita vau i afaro i te mau mea ta ratou e parau ra. I muri iho, ua faatupu to ˈu huru i te amahamaharaa i roto i te amuiraa.” Ua tauturu te tahi o to ˈna mau hoa ia ˈna ia taa aita e tano ra to ˈna huru feruriraa. Ua taui o ˈna e e matahiapo maitai roa o ˈna i teie mahana. Mai te peu te ite ra tatou i tera huru feruriraa i nia ia tatou, mea titauhia ia taui oioi tatou.

6. Ia au i te Galatia 5:26, eaha te tahi mau huru o te turai ia faatupu i te feruriraa tataˈu?

⁶ A taio i te Galatia 5:26. Eaha te tahi mau huru o te turai ia tatou ia faatupu i te feruriraa tataˈu. Te vai ra te faateitei. Mea faaoru te hoê taata faateitei, e e haapao noa o ˈna ia ˈna iho. Te vai atoa ra te feii. Eita te taata feii e nounou noa i ta vetahi ê faufaa, e faaere atoa râ o ˈna ia ratou i te reira. Ia feii te hoê taata ia vetahi ê, te auraa ïa mea hae na ˈna ia ratou. E haapae roa tatou i tera mau huru.

7. Eaha te faahohoˈaraa e nehenehe e horoa no te faateitei e te feii?

⁷ E nehenehe te faateitei e te feii e faaauhia i te mau viivii i roto i te mori e titohia i roto i te hoê manureva. E maraa paha tera manureva ia rere. I muri iho râ, e nehenehe te mau viivii e vai ra i roto i te mori e tuino i te mau matini o te manureva. I reira, e topa te manureva. Hoê â atoa no te hoê tavini a Iehova. Mea au paha i te omuaraa. Ia vaiiho râ o ˈna i te teoteo e te feii ia tupu i roto i to ˈna aau, e turori o ˈna. (Mas. 16:18) E faaea o ˈna i te tavini ia Iehova e e haamauiui o ˈna ia ˈna iho e ia vetahi ê. E nafea râ ia paruru ia tatou i te faateitei e te feii?

8. E nafea ia haapae i te faateitei?

⁸ E haapae tatou i te faateitei ma te  haamanaˈo i te aratairaa ta te aposetolo Paulo i papai i to Philipi: “Eiaha roa e rave i te tahi noa ˈˈe mea ma te mârô aore ra ma te faateitei. Ma te haehaa râ, a haamanaˈo e mea hau aˈe vetahi ê ia outou.” (Phil. 2:3) Mai te peu e hiˈo tatou ia vetahi ê mai te mea ra e mea hau aˈe ratou ia tatou, eita ïa tatou e tataˈu i te tahi atu mau taeae mea aravihi aˈe ia tatou. E oaoa râ tatou no ratou, hau atu â ia faaohipa ratou i to ratou aravihi no te tavini ia Iehova! E mai te peu mea aravihi te hoê taeae aore ra te hoê tuahine, e pee o ˈna i te aratairaa a Paulo ma te hiˈo i to tatou mau huru maitatai. Mea na reira te hau e te auhoêraa e vai ai i roto i te amuiraa.

9. E nafea tatou e haapae ai i te feii?

⁹ E haapae tatou i te feii ia farii tatou te vai ra te tahi mau mea e ere tatou i te mea aravihi roa. Mai te peu e farii tatou mea aravihi aˈe vetahi ê ia tatou, eita tatou e tamata i te tupai ia ratou. E tapiri atu râ tatou ia ratou no te haapii mai i to ratou hiˈoraa. Peneiaˈe mea aravihi te hoê taeae no te horoa i te oreroraa parau. E haere paha ïa tatou e ani ia ˈna e nafea o ˈna e faaineine ai i ta ˈna mau oreroraa parau. Mai te peu mea ite te hoê tuahine i te tunu i te maa, e ani paha ïa tatou ia ˈna e nafea ia tunu i te maa. E mai te peu mea fifi no te tahi feia apî ia faahoa, e ani paha ïa ratou i te tauturu i te tahi mau taeae e tuahine mea ohie no ratou ia faahoa ia vetahi ê. Ma te na reira, eita tatou e feii e e rahi atu â to tatou ite e to tatou aravihi.

10. Eaha te tupuraa ta Gideona i farerei?

¹⁰ Teie te tupuraa ta Gideona i farerei. Ua haere o ˈna e to ˈna 300 taata i te tamaˈi e, maoti te tauturu a Iehova, ua upootia ratou. Aita ratou i faaoru i to ratou upootiaraa. Tera râ, aita te mau tane ati Epheraima i haapopou ia ˈna, e au ra e ua inoino ratou ia ˈna no te mea aita o ˈna i rave ia ratou i te omuaraa no te haere  i te tamaˈi. E au ra e ua haapao noa ratou i to ratou roo e aita ratou i haapao faahou i te mea faufaa roa ˈˈe: ua paruru Gideona i te nunaa e maoti te reira, ua haamoˈahia te iˈoa o Iehova.—Tav. 8:1.

11. Mea nafea to Gideona pahonoraa i te mau tane ati Epheraima?

¹¹ Ma te haehaa, ua pahono Gideona i te mau tane ati Epheraima: “Eaha ta ˈu i rave ia faaauhia i ta outou?” Ua haamanaˈo oia ia ratou i to Iehova tautururaa ia ratou i te hoê taime. I muri iho, “mǎrû maira ratou.” (Tav. 8:2, 3) Ia vai noa te hau i rotopu i te nunaa o Iehova, ua vai haehaa noa Gideona.

12. Eaha te haapii mai i te hiˈoraa o te mau tane ati Epheraima e o Gideona?

¹² Eaha te haapii mai i teie tupuraa? Eita tatou e imi ia hiˈohia mai tatou. Te mea faufaa roa ˈˈe, ia faahanahanahia Iehova. E huti mai te mau upoo utuafare e te mau matahiapo i te haapiiraa i te hiˈoraa o Gideona. Mai te peu ua riri te tahi taata ia tatou, e tamata tatou i te ite no te aha oia i riri ai. E nehenehe atoa tatou e haapopou ia ˈna no te tahi ohipa maitai ta ˈna i rave. E titauhia ïa te haehaa ia tatou. Hau atu â, mai te peu o ˈna iho â tei hape, aita e faufaa ia tamata i te faaite e o tatou iho â tei tano. To tatou auhoaraa e to tatou mau taeae ta tatou e haafaufaa aˈe.

13. Eaha te tupuraa ta Hana i farerei e eaha ta ˈna i rave?

¹³ A feruri atoa i te hiˈoraa o Hana. Ua faaipoipo o ˈna i te hoê ati Levi o Elikana te iˈoa. E vahine faaipoipo ê atoa râ ta Elikana, o Penina to ˈna iˈoa. Mea here aˈe na Elikana ia Hana. Tera râ, ‘e tamarii ta Penina, aita ta Hana.’ Ua tamau noa ïa Penina i te haamauiui ia Hana ma te faaooo ia ˈna “a taˈi roa ˈtu ai Hana, a ore atu ai e tamaa faahou.” (Sam. 1, 1:2, 6, 7) Aita râ te Bibilia e parau ra ua tahoo Hana ia Penina. Ua haamahora râ o ˈna i to ˈna aau ia Iehova e ua tiaturi e tauturu mai Iehova. E o Penina? Ua taui anei to ˈna huru i nia ia Hana? Aita te Bibilia e faataa ra, ua fanaˈo râ Hana i te hau o roto no ǒ mai ia Iehova “e aita ˈtura te oto i ite-faahou-hia i nia i to ˈna hohoˈa.”—Sam. 1, 1:10, 18.

14. Eaha te haapii mai i te hiˈoraa o Hana?

¹⁴ Eaha te haapii mai i te hiˈoraa o Hana? Ia feii te tahi taata ia oe, a haamanaˈo i ta te Bibilia e parau ra: “Eiaha te ino ia tahoohia ˈtu i te ino,” a faatupu noa i te hau. (Roma 12:17-21) Noa ˈtu eita o ˈna e taui i to ˈna huru, e vai hau noa oe e e oaoa noa oe.

15. Mea matauhia Apolo e o Paulo no te aha?

¹⁵ E hiˈo anaˈe i teie nei eaha te haapii  mai i te hiˈoraa o Apolo e te aposetolo Paulo. Mea matau-maitai-hia raua, mea ite roa raua i te Parau a te Atua e mea aravihi atoa raua no te haapii i te taata. Mea rahi ta raua i faariro ei pǐpǐ. Aita râ raua i feii te tahi i te tahi.

16. Eaha te nehenehe e parau no Apolo?

¹⁶ E ati Iuda Apolo tei fanauhia i Alesanederia. E vahi matauhia teie no te mau haapiiraa teitei i te senekele matamua. E au ra e mea ite roa Apolo i “te paraparau e mea ite atoa i te mau Papai.” (Ohi. 18:24) I te haereraa Apolo i Korinetia, ua faaite roa vetahi i roto i te amuiraa e mea au aˈe na ratou ia ˈna i te tahi atu mau taeae, mai ia Paulo, tei ratere atoa mai na reira. (Kor. 1, 1:12, 13) E au ra e aita Apolo i turu i tera huru feruriraa to ratou. I muri aˈe i to ˈna faarueraa ia Korinetia, ua taparu Paulo ia ˈna ia hoˈi faahou mai i Korinetia. (Kor. 1, 16:12) Ahani Apolo i turu i te huru feruriraa o to Korinetia, eita ïa Paulo e taparu ia ˈna ia hoˈi mai. Ua faaohipa maitai iho â Apolo i to ˈna ite e to ˈna aravihi ma te poro i te parau apî oaoa e ma te faaitoito i to ˈna mau taeae. Mea papu e taata haehaa o Apolo. Ei hiˈoraa, aita te Bibilia e parau ra e ua inoino Apolo i te faataaraa Akuila raua Periseka ia ˈna i “te eˈa o te Atua ma te tano atu â.”—Ohi. 18:24-28.

17. Eaha ta Paulo i rave ia vai noa te hau i roto i te amuiraa?

¹⁷ Ua ite Paulo mea maitai te ohipa ta Apolo i rave. Aita Paulo i haapeapea a manaˈo ai te amuiraa mea maitai aˈe Apolo ia ˈna. E taata haehaa o Paulo. Te itehia  ra to ˈna aau faahaihai e to ˈna huru au noa i roto i te aˈoraa ta ˈna i horoa i te amuiraa o Korinetia. Aita Paulo i haapeu i te parauraa vetahi e no Paulo ratou. Ua parau râ o ˈna i te hoê mea e faahanahana ˈtu ai ratou ia Iesu e ia Iehova.—Kor. 1, 3:3-6.

18. Ia au i te Korinetia 1, 4:6, 7, eaha te haapii mai i te hiˈoraa o Apolo e o Paulo?

¹⁸ Eaha te haapii mai i te hiˈoraa o Apolo e o Paulo? Te rohi nei paha tatou no Iehova e te tauturu ra tatou e rave rahi ia tae i te bapetizoraa. Ua taa râ ia tatou e maoti noa te tauturu a Iehova e manuïa ˈi ta tatou mau tutavaraa. Te haapii atoa mai ra te hiˈoraa o Apolo e o Paulo, mea rahi anaˈe ta tatou hopoia i roto i te amuiraa, e ravea tera no te tauturu i te amuiraa ia vai hau. E mauruuru rahi to tatou i te mau taeae faatoroahia te tauturu ra ia tatou ia vai hau e ia hoê noa i roto i te amuiraa. Te faaohipa ra ratou i te mau aratairaa Bibilia no te tauturu ia tatou. Aita teie mau taeae e faateitei ra ia ratou. Ma te haehaa râ, te tauturu ra ratou i te amuiraa ia faaroo ia Iesu e ia pee i to ˈna hiˈoraa.—A taio i te Korinetia 1, 4:6, 7.

19. Eaha ta tatou paatoa e rave? (A hiˈo atoa i te tumu parau “ Eiaha e faaau te tahi i te tahi.”)

¹⁹ Ua horoa mai Iehova ia tatou paatoa te aravihi e te ite. E faaohipa tatou i te reira “no te tavini te tahi i te tahi.” (Pet. 1, 4:10) Te manaˈo ra paha tatou aita e faufaaraa te tuhaa ta tatou e rave nei i roto i te amuiraa. Mea faufaa râ pauroa te mau mea iti ta tatou e rave nei ia hoê noa te amuiraa. E au te reira i te mau tafairaa i nia i te hoê ahu, e oti roa te hoê ahu nehenehe i tera mau tafairaa iti. E tutava anaˈe ïa no te haapae i te huru feruriraa tataˈu. E faaoti papu anaˈe i te tapi i te hau e ia vai hoê noa te amuiraa.—Eph. 4:3.