1. No te aha Iehova e ore ai e faaau ia tatou ia vetahi ê?

 MEA au na Iehova ia rau te huru o te mau mea atoa ta ˈna i poiete. Ua poiete hoi o ˈna i te mau mea atoa ma te taa ê mau, oia atoa i te taata. Mea taa ê te huru o te taata tataitahi. Eita ïa Iehova e faaau ia tatou ia vetahi ê. Te hiˈopoa nei râ o ˈna i te aau. (Sam. 1, 16:7) Mea matau maitai o ˈna ia tatou e aita o ˈna e titau ra i tei ore e maraa. E pee tatou i to Iehova hiˈoraa ma te hiˈo ia tatou iho mai ia ˈna e hiˈo ra ia tatou. Eita ïa tatou e haafaufaa ore ia tatou. Eita atoa tatou e faateitei ia tatou, “ei manaˈo au noa râ” to tatou.—Roma 12:3.

2. No te aha e ere i te mea maitai ia faaau ia tatou ia vetahi ê?

² E nehenehe tatou e haapii mai i te hiˈoraa o vetahi ê. Peneiaˈe mea aravihi te hoê hoa Kerisetiano i roto i te pororaa. E turai te reira ia tatou ia haamaitai i ta tatou pororaa. (Heb. 13:7; Phil. 3:17) Te vai ra te taa-ê-raa ia pee i te hoê hiˈoraa maitai e ia faaau ia tatou ia vetahi ê. Ia faaau tatou ia tatou ia vetahi ê, e feii aore ra e toaruaru tatou. E nehenehe atoa tatou e manaˈo mea faufaa ore tatou. E mai ta tatou i ite mai i roto i te tumu parau haapiiraa na mua ˈtu, e tuino te feruriraa tataˈu i roto i te amuiraa i to tatou auhoaraa e o Iehova. No reira Iehova i faaitoito ai ia tatou: “Ia hiˈopoa te taata tataitahi i ta ˈna iho ohipa, e na reira hoi oia e oaoa ˈi ia ˈna iho, eiaha râ no te mea ua faaau o ˈna ia ˈna i te tahi atu.”—Gal. 6:4.

3. Eaha te mau tutavaraa ta oe i rave no te haamaitai atu â ia oe e eaha to oe huru a rave ai i te reira?

³ Te hinaaro ra Iehova ia oaoa oe i te mau tutavaraa  atoa ta oe i rave no te haamaitai ia oe. Mai te peu ua bapetizohia oe, mea papu te oaoa ra oe ua naea ia oe tera fa! Ua rave oe i teie faaotiraa no to oe here ia Iehova. A feruri na i ta oe i rave mai tera taime e tae roa mai i teie mahana. Peneiaˈe ua haamaitai atu â oe i ta oe taioraa Bibilia e ua faahohonu atu â i ta oe iho haapiiraa. Ua haamaitai atoa paha oe i ta oe mau pure. (Sal. 141:2) Mea paraparau aˈe paha oe i roto i te pororaa i teie nei e mea aravihi atu â oe no te faaohipa i te mau mauhaa no te taviniraa. E mai te peu e utuafare to oe, ua tauturu paha Iehova ia oe ia riro ei tane, vahine aore ra metua maitai aˈe. E oaoa roa oe ia ite i te mau tutavaraa ta oe i rave no te haamaitai atu â ia oe.

4. Eaha ta tatou e hiˈopoa mai i roto i teie tumu parau haapiiraa?

⁴ E nehenehe tatou e tauturu i to tatou mau hoa Kerisetiano ia oaoa i te mau tutavaraa ta ratou e rave ra no te haamaitai ia ratou. E nehenehe atoa tatou e tauturu atu ia ore ratou e faaau ia ratou ia vetahi ê. I roto i teie tumu parau haapiiraa, e hiˈo mai tatou e nafea te mau metua e tauturu ai i ta ratou mau tamarii, e nafea te mau hoa faaipoipo e tauturu ai te tahi i te tahi e e nafea te mau matahiapo e te mau hoa Kerisetiano e tauturu ai te tahi i te tahi. E hiˈopoa atoa mai tatou i te tahi mau aratairaa Bibilia o te tauturu ia tatou ia haamau i te fa e naea ia tatou.

5. Ia au i te Ephesia 6:4, eaha ta te mau metua e haapae?

⁵ Eiaha roa ˈtu te mau metua e faaau i ta ratou tamarii i te tahi atu, e nehenehe hoi te reira e faatoaruaru i te tamarii. (A taio i te Ephesia 6:4.) Teie ta Samira * e parau ra: “I te haapiiraa, ua turai to ˈu mau orometua ia ˈu ia aravihi atu â vau i te tahi atu mau tamarii. Hau atu â, ua hinaaro to ˈu mama ia faaite noa vau i te haerea au, ia riro vau ei hiˈoraa maitai no to ˈu mau orometua haapiiraa e to ˈu papa e ere i te Ite no Iehova. Aita roa ˈtu o ˈna i hinaaro ia hape au i roto i ta ˈu mau hiˈopoaraa, eita râ e haere ia ˈu! Te mau noa ra ia ˈu i tera ra tau te haere noa ra vau i te haapiiraa e i te tahi taime, e puta mai  te manaˈo: ‘Te mauruuru ra anei Iehova ia ˈu?’”

6. Eaha te haapiiraa ta te mau metua e huti mai i roto i te Salamo 131:1, 2?

⁶ E haapiiraa faufaa mau ta te mau metua e huti mai i roto i te Salamo 131:1, 2. (A taio.) Ua parau te arii Davida aita o ˈna i titau i “te ohipa faahiahia roa ino,” oia hoi te mea e ore e maraa ia ˈna. No to ˈna haehaa, ua mauruuru noa o ˈna e aita o ˈna i titau hau atu â. Eaha ta te mau metua e haapii mai i te hiˈoraa o Davida? Eiaha te mau metua e titau rahi roa ia ratou iho e i ta ratou mau tamarii. E faaite te mau metua i ta ratou tamarii e te ite ra ratou i te mau tutavaraa ta ratou e rave nei e na te reira e turai i te mau tamarii ia haamau i te fa e naea ia ratou. Te na ô ra te tuahine Marina: “Aita to ˈu mama i faaau aˈenei ia ˈu i to ˈu mau taeae e i te tahi atu mau tamarii. Ua haapii mai o ˈna mea taa ê tatou paatoa. Mea faufaa râ tatou tataitahi no Iehova. Te mauruuru nei au i ta ˈna i haapii mai. Maoti te reira, mea varavara roa vau i te faaau ia ˈu iho ia vetahi ê.”

7-8. E nafea te hoê tane e faaite ai mea faatura o ˈna i ta ˈna vahine?

⁷ E faatura te hoê taata ia vetahi ê ma te haapao i to ratou hinaaro. E titauraa no te tane Kerisetiano ia faatura i ta ˈna vahine. (Pet. 1, 3:7) Ei hiˈoraa, e faatura te hoê tane i ta ˈna vahine ma te haafaufaa ia ˈna. Eita o ˈna e titau hau aˈe i te maraa i ta ˈna vahine e eita roa ˈtu o ˈna e faaau i ta ˈna vahine i te tahi atu. Teie te hiˈoraa o Rosa, te hoê tuahine e ere ta ˈna tane i te Ite no Iehova. Mea pinepine ta ˈna tane i te faaau ia ˈna i te tahi atu mau vahine. Ua mauiui roa Rosa no ta ˈna mau parau e ua tae roa atoa i te manaˈo mea faufaa ore o ˈna. Te parau ra o ˈna: “E titauhia ia haamanaˈo noa vau te haafaufaa ra Iehova ia ˈu.” Eiaha roa ˈtu te tane Kerisetiano e haafaufaa ore i ta ˈna vahine. Ia ore o ˈna e faatura i ta ˈna vahine, eita to raua faaipoiporaa e maitai mai e e ino atoa to ˈna auhoaraa e o Iehova. *

⁸ Te tane e faatura i ta ˈna vahine, e haapopou, e faaite o ˈna i to ˈna here e e haafaufaa atoa o ˈna i ta ˈna vahine. (Mas. 31:28) Tera ta te tane a Katerina, tei faahitihia i roto i te tumu parau haapiiraa na mua ˈtu i rave. Ua tauturu o ˈna ia Katerina ia haapae i to ˈna mau manaˈo faatoaruaru. I to ˈna tamariiraa, mea faahapahapa roa to ˈna mama ia ˈna, mea au roa na ˈna e faaau ia Katerina i te tahi atu mau tamahine e i to ˈna mau hoa. E mai reira mai to ˈna haamataraa i te faaau ia ˈna iho ia vetahi ê. Ua tamau noa o ˈna i te na reira i to ˈna riroraa mai ei Ite no Iehova. Ua tauturu rahi mau ta ˈna tane ia ˈna ia haapae i teie huru feruriraa e ia ite e mea faufaa o ˈna. Te parau ra Katerina: “Mea here ta ˈu tane ia ˈu, e haapopou o ˈna ia ˈu no te ohipa ta ˈu e rave e e pure atoa o ˈna no ˈu. E haamanaˈo noa o ˈna ia ˈu i te mau huru maitatai o Iehova e e tauturu atoa ia ˈu ia faatitiaifaro i to ˈu huru feruriraa.”

9-10. Mea nafea te mau matahiapo i te tautururaa i te hoê tuahine ia ore e faaau ia ˈna ia vetahi ê?

⁹ E nafea te mau matahiapo e tauturu ai i te feia e faaau noa ia ratou ia vetahi ê? Teie te hiˈoraa o Hana. I te tamariiraa, mea varavara o ˈna i te haapopouhia. Te na ô ra o ˈna: “I to ˈu tamariiraa, mea mamahu  roa vau e mea pinepine au i te haafaufaa ore ia ˈu iho. Haamata ˈtura vau i te faaau ia ˈu iho ia vetahi ê.” Ua tamau noa o ˈna i te na reira i to ˈna riroraa mai ei Ite no Iehova. I te faahopearaa, ua manaˈo o ˈna aita to ˈna e faufaaraa i roto i te amuiraa. I teie nei râ, te tavini ra o ˈna ma te oaoa ei pionie. Eaha tei tauturu ia ˈna ia taui i to ˈna huru feruriraa?

¹⁰ Ua tauturu te mau matahiapo ia Hana. Ua faaite ratou mea faufaa o ˈna no te amuiraa e ua haapopou atoa ia ˈna no to ˈna hiˈoraa maitai. Teie ta ˈna i papai: “Ua ani te mau matahiapo ia ˈu ia faaitoito i te tahi mau tuahine. Maoti te reira ua taa ia ˈu mea faufaa vau i roto i te amuiraa. Te haamanaˈo ra vau i to te mau matahiapo haamauruururaa ia ˈu i te faaitoitoraa vau i te tahi mau tuahine apî. Ua taio mai ratou i te Tesalonia 1, 1:2, 3. Ua putapû roa vau i tera nau irava! Te haamauruuru nei au i teie mau matahiapo haapao maitai. I teie nei, ua taa ia ˈu i to ˈu faufaaraa i roto i te amuiraa.”

11. E nafea ia tauturu i “te feia e teimaha ra e te haihai,” faahitihia i roto i te Isaia 57:15?

¹¹ A taio i te Isaia 57:15. Te tâuˈa mau ra Iehova i “te feia e teimaha ra e te haihai.” E ere noa na te mau matahiapo te hopoia e tauturu e e faaitoito i teie mau taeae e tuahine, na tatou paatoa râ. E faaite ïa tatou e te tâuˈa mau ra tatou ia ratou. Te hinaaro ra Iehova ia faaite tatou i to ˈna here i ta ˈna mau mamoe. (Mas. 19:17) E tauturu atoa tatou ia ratou ma te faaite i te haehaa e te aau faahaihai. Eita roa tatou e hinaaro ia hiˈohia mai tatou, a feii vetahi ê. Na roto râ i ta tatou e parau e e rave, e faaitoito tatou ia vetahi ê.—Pet. 1, 4:10, 11.

12. No te aha te feia haihai e haere ai ia Iesu ra? (A hiˈo i te hohoˈa i te api matamua.)

¹² E nehenehe tatou e haapii mai i te hiˈoraa o Iesu. Ua tâuˈa mau o ˈna i ta ˈna mau pǐpǐ. O ˈna te taata rahi roa ˈˈe tei ora i te fenua. Noa ˈtu râ, mea mǎrû o ˈna e te haehaa. (Mat. 11:28-30) Aita o ˈna i faatietie ia ˈna no to ˈna ite rahi. Ua haapii o ˈna ma te faaohipa i te mau taˈo e faahohoˈaraa ohie ia taa, ia putapû te aau o te taata haihai e faaroo ra. (Luka 10:21) Mea taa ê roa o ˈna i te mau tia haapaoraa. Ua haafaufaa o ˈna i te taata e ua faaite o ˈna mea faufaa atoa ratou no te Atua.—Ioa. 6:37.

13. Eaha te faaite ra i te hamani maitai e te here o Iesu i ta ˈna mau pǐpǐ?

¹³ Ua itehia te hamani maitai e te here o Iesu i to ˈna huru i nia i ta ˈna mau pǐpǐ. Ua ite o ˈna e ere hoê â ite e aravihi to ratou. Te vai ra ïa te ohipa e maraa i te tahi, tei ore râ e maraa i te tahi atu. I roto i te pororaa, mea rahi ta te tahi e nehenehe e rave, area te tahi atu, eita ïa. Noa ˈtu râ, te haafaufaa ra Iesu i te mau tutavaraa atoa ta ta ˈna mau pǐpǐ i rave. E itehia te reira i roto i te faahohoˈaraa ta ˈna i horoa ˈtu ia ratou. I roto i teie hiˈoraa, ua horoa te hoê fatu i te taleni i ta ˈna mau tavini “ia au i tei tia ia ratou tataitahi ia haapao.” Mea rahi aˈe tei noaa mai i te hoê tavini i te tahi atu. Ua haapopou atu râ te fatu i te tavini tataitahi ma te parau atu: “Maitai roa, e tavini afaro oe e te haapao maitai!”—Mat. 25:14-23.

14. E nafea tatou e pee ai i te hiˈoraa o Iesu?

¹⁴ Mea hamani maitai e mea here Iesu ia tatou. Ua ite o ˈna e ere hoê â ite e aravihi to tatou, e oaoa roa râ o ˈna ia tutava tatou i te rave i te mea maitai roa ˈˈe na Iehova. Eita roa ˈtu tatou e hinaaro  ia manaˈo te hoê hoa Kerisetiano mea faufaa ore o ˈna e eita tatou e hinaaro ia haama o ˈna. E pee anaˈe i te hiˈoraa o Iesu ma te haapopou i to tatou mau taeae e tuahine no te mau tutavaraa atoa ta ratou e rave ra no te tavini ia Iehova.

15-16. Mea nafea te hoê tuahine i te faufaaraa i te haamauraa i te fa e naea ia ˈna?

¹⁵ Ia haamau tatou i te fa i roto i te taviniraa a Iehova, e faufaahia tatou e e oaoa to tatou oraraa. E haamau râ tatou i te fa e naea ia tatou. Eita tatou e haamau i te fa mai ta vetahi ê. Aita anaˈe tera mau fa e naea ia tatou, e nehenehe tatou e toaruaru roa. (Luka 14:28) Teie te hiˈoraa o Midori.

¹⁶ E ere te papa o Midori i te Ite no Iehova. Mea pinepine o ˈna i te faaau ia Midori i to ˈna taeae e tuahine, oia atoa i to ˈna mau hoa haapiiraa. Te parau ra Midori: “Ua tae roa vau i te manaˈo mea faufaa ore au!” A paari ai râ o ˈna, ua iti mai tera mau manaˈo to ˈna. Te na ô ra o ˈna: “E taio vau i te Bibilia i te mau mahana atoa. E horoa mai te reira i te hau e e ite au i to Iehova here ia ˈu.” Hau atu â, ua haamau Midori i te fa e naea ia ˈna e ua ani o ˈna i te tauturu ia Iehova ia naea iho â ia ˈna te mau fa ta ˈna i haamau. E ua oaoa roa Midori i te mau tutavaraa atoa ta ˈna i rave ia naea ia ˈna ta ˈna mau fa.

17. E nafea ia tamau noa i te faaapî i to tatou huru feruriraa e e nafea te reira e tauturu ai ia tatou?

¹⁷ E titauhia te taime no te taui i to tatou huru feruriraa. No reira Iehova i faaitoito mai ai: “Ia tamau noa outou i te faaapî i to outou huru feruriraa.” (Eph. 4:23, 24) E titauhia râ ia pure, ia haapii e ia feruriruri i te Bibilia. A tamau i te rave  i te reira e i te ani i te tauturu ia Iehova. Maoti to ˈna varua moˈa, e tauturu mai o ˈna ia tatou ia faaea i te faaau ia tatou ia vetahi ê. E tauturu atoa mai Iehova ia iriti ê i te feii e te teoteo e vai ra i roto i to tatou aau.

18. E nafea te Paraleipomeno 2, 6:29, 30 e faaitoito ai ia tatou?

¹⁸ A taio i te Paraleipomeno 2, 6:29, 30. Ua matau maitai Iehova ia tatou. Ua ite o ˈna i te mau fifi ta tatou e faaruru ra e ta tatou mau tutavaraa no te haapae i te huru feruriraa o teie ao e i to tatou huru tia ore. A ite ai Iehova i ta tatou mau tutavaraa, e rahi atu â to ˈna here ia tatou.

19. Eaha te hiˈoraa e faaite ra i to Iehova here ia tatou? A faataa.

¹⁹ E nehenehe to Iehova here ia tatou e faaauhia i te here o te hoê mama no ta ˈna aiû. (Isa. 49:15) Teie ta te hoê mama o Rachel te iˈoa e parau ra: “Aita i tia te avaˈe i te fanauraa vau ia Stéphanie. Mea nainai roa o ˈna i te fanauraahia mai e mea paruparu atoa. Ua tapeahia o ˈna i te fare maˈi. Ua farii râ te mau tuati maˈi ia haere au e amoamo ia ˈna i te mau mahana atoa. Maoti te reira, ua puai atu â to ˈu here ia ˈna. I teie mahana, e ono matahiti to Stéphanie, mea nainai roa o ˈna ia faaauhia i te tahi atu mau tamarii hoê â faito matahiti e to ˈna. Ua rahi atu â to ˈu here ia ˈna no te mea ua aro o ˈna no te ora mai e e oaoa rahi ta ˈna i hopoi mai i roto i to ˈu oraraa!” Mea mahanahana ia ite mai tera atoa te here o Iehova ia ite o ˈna te tutava nei tatou i te tavini ia ˈna ma te aau atoa.

20. E nafea oe e oaoa ˈi?

²⁰ Ei Ite no Iehova, mea taa ê tatou tataitahi e mea herehia tatou i roto i te nunaa o Iehova. Aita o ˈna i faafatata ia oe ia ˈna no to oe aravihi e to oe ite, no te mea râ ua hiˈo o ˈna i roto i to oe aau e ua ite o ˈna i to oe mǎrû e to oe hinaaro e haapii i to ˈna mau eˈa. (Sal. 25:9) Ia papu ia oe, e oaoa Iehova ia tutava oe i te tavini ia ˈna. Te faaite ra to oe faaoromai tamau e to oe haapao maitai e “aau maitai roa” to oe. (Luka 8:15) A tamau ïa i te horoa i te mea maitai roa ˈˈe na Iehova, ‘e na reira hoi oe e oaoa ˈi ia oe iho!’