Te hinaaro mau ra Iehova ia oaoa te hoê tane e te hoê vahine i roto i to raua faaipoiporaa, ia here e ia piri noa raua te tahi i te tahi. (Mat. 19:4-6) Mai te peu te hinaaro ra oe e faaipoipo, ihea roa oe e imi ai i te hoa faaipoipo? Na Iehova i poiete ia tatou, o ˈna ïa tei ite eaha te rave ia oaoa te faaipoiporaa. Ia faaohipa oe i te mau aratairaa ta ˈna i horoa mai, e oaoa oe. E hiˈo anaˈe vetahi o tera mau aratairaa.

A tahi, “mea haavarevare aˈe te aau i te tahi atu mau mea atoa e mea atâta roa.” (Ier. 17:9) Ia imi te hoê taata i te hoa faaipoipo, e nehenehe to ˈna aau e turai ia ˈna ia rave i te faaotiraa feruri-ore-hia. Mea maamaa roa ia tiaturi i te aau! (Mas. 28:26) No reira, e ere i te mea maitai ia faaite oioi na taata e haamatau ra i to raua here a rave atu ai i te faaotiraa ru e faaipoipo, noa ˈtu aita raua i matau maitai atura.

Te na ô ra te Maseli 22:3: “E ite te taata feruriraa haroˈaroˈa i te tupuraa atâta e e tapuni oia, e haere noa ˈtu râ te maˈua a faaruru atu ai i te mau faahopearaa.” Mea atâta roa ia faaohipa i te mau reni haamatauraa no te imi i te hoê hoa faaipoipo. Ua tamata vetahi, ua atihia râ ratou! Ua faaohipa te tahi mau taata i tera mau reni no te punu e no te eiâ i te taata ma te haavare e Ite no Iehova ratou.

E faaohipa atoa vetahi reni haamatauraa i te ravea numeraraa no te faatano ia oe i te hoê taata ia haamatau orua. Eita roa ˈtu râ tera raveraa e haere! Mea maamaa roa ia vaiiho e na te hoê matini e faaoti e e maiti i te hoa faaipoipo no oe. Eita roa te reira e tuati ra i te mau aratairaa Bibilia.—Mas. 1:7; 3:5-7.

Te na ô ra te Maseli 14:15: “E tiaturi te taata vare hanoa i te mau parau atoa, e haapao maitai râ te taata feruriraa haroˈaroˈa i to ˈna mau taahiraa tataitahi.” Hou a faaoti ai e faaipoipo i te tahi taata, e haamatau maitai na mua oe ia ˈna. Eita oe e nehenehe e na reira i nia i te reni haamatauraa. Noa ˈtu e hapono orua i te tahi mau hohoˈa, te poroi e te paraparau pinepine  ra orua maoti tera mau ravea, e nehenehe anei iho â e parau ua matau maitai orua? Ua manaˈo vetahi ua itehia mai ia ratou te here mau. I muri aˈe râ, ua tatarahapa roa ratou no te mea mea ê roa te taata ta ratou i paraparau i nia i te reni haamatauraa e te taata ta ratou i farerei tino roa.

Te na ô ra te papai Salamo: “Aita vau e amuimui ra i te mau taata haavare, e te ape nei au i te feia o te huna ra o vai ratou.” (Sal. 26:4) Mea rahi te haavare ra no nia ia ratou i nia i te mau reni haamatauraa. E huna ratou o vai mau ratou ia vare te taata ta ratou e haamatau ra e feia maitai ratou. E haavare atoa paha vetahi e Ite no Iehova ratou. Tera mau iho â anei? Ua bapetizohia anei ratou? E feia feruriraa paari anei i te pae varua? E auhoaraa piri anei to ratou e o Iehova? E hiˈoraa maitai anei ratou i roto i te amuiraa? Aore ra, e ere roa ˈtu ratou i te hiˈoraa maitai e e “amuimuiraa . . . iino” atoa ratou. (Kor. 1, 15:33; Tim. 2, 2:20, 21) E ia au i te Bibilia, e nehenehe iho â anei ratou e faaipoipo? Mea faufaa roa ia ite i te pahonoraa o teie mau uiraa. Mea fifi râ ia ite i te reira ia ore oe e uiui atu i te mau taeae e tuahine tei matau maitai ia ratou. (Mas. 15:22) Hau atu â, eita te hoê tavini a Iehova e “amui-au-ore-hia i te feia aita e tiaturi ra ia Iesu.”—Kor. 2, 6:14; Kor. 1, 7:39.

Mea atâta roa te mau reni haamatauraa. Teie te tahi mau vahi papu aˈe no te imi i te hoê hoa faaipoipo maitai. I te mau fenua e nehenehe te mau Ite no Iehova e putuputu, e nehenehe ratou e haamatau i te tahi mau hoa Kerisetiano i te mau putuputuraa anei, i te mau tairururaa aore ra i roto i te tahi atu mau tupuraa.

I te mau fenua râ aita tatou e nehenehe e putuputu no te maˈi pee COVID-19, e faaohipa ïa tatou i te mau ravea roro uira no te apiti atu i te mau putuputuraa. E ravea atoa te reira no te haamatau atu i te mau taeae e tuahine faaipoipo-ore-hia. E ite tatou i to ratou huru i te mau putuputuraa e e hiˈoraa maitai anei ratou i roto i ta ratou amuiraa. (Tim. 1, 6:11, 12) E ia oti te putuputuraa, ua faanahohia te tahi mau piha no te tauaparau, e nehenehe atoa ïa tatou e farerei ia ratou. Maoti teie mau ravea, e ite tatou eaha te huru o te hoê taeae aore ra tuahine ta tatou e hinaaro e haamatau, na roto i to ˈna huru i nia i te tahi atu mau Kerisetiano. (Pet. 1, 3:4) A haamatau ai oe i te hoê Kerisetiano, e ite oe te tuati ra anei ta orua mau fa e o ˈna iho â anei ta oe e hinaaro ra e faaipoipo.

Ia pee te feia e hinaaro ra e faaipoipo i te mau aratairaa Bibilia no te imi i te hoê hoa faaipoipo, e ite mau ïa ratou i te parau e vai ra i roto i te Maseli 18:22: “Te taata e ite mai i te hoê vahine [aore tane] faaipoipo maitai, ua ite mai ïa ia ˈna te tahi haamaitairaa, e e fanaˈo oia i ta Iehova farii maitai.”