1. Eaha to tatou manaˈo no nia i te ô o te pure?

 E HAAMAITAIRAA faahiahia mau ia faafatata i Tei poiete i te raˈi e te fenua na roto i te pure. A feruri na. E nehenehe tatou e haamahora i to tatou aau ia Iehova i te mau taime atoa e noa ˈtu eaha to tatou reo. Ia pure tatou ia Iehova, tei te fare maˈi anaˈe tatou aore ra i te fare tapearaa, e nehenehe tatou e tiaturi e faaroo mai iho â o ˈna ia tatou. Auê tatou i te mauruuru no te ô o te pure!

2. Mea nafea to te arii Davida faaiteraa mea faufaa no ˈna te ô o te pure?

² Ua haafaufaa rahi te arii Davida i te ô o te pure. Ua himene o ˈna ia Iehova: “Ia riro ta ˈu pure mai te mea noˈanoˈa i faaineinehia i mua ia oe.” (Sal. 141:1, 2) I te tau o Davida, e faaohipahia na te mea noˈanoˈa no te haamoriraa mau. Na te mau tahuˈa e faaineine i te reira. (Exo. 30:34, 35) Mai te mea noˈanoˈa i faaineine-maitai-hia, ua faaineine maitai Davida i ta ˈna e parau ia Iehova. Tera atoa ta tatou e rave ia farii Iehova i ta tatou mau pure.

3. Eaha to tatou huru ia faafatata tatou ia Iehova na roto i te pure e no te aha?

³ Ia pure tatou ia Iehova, e titauhia ia faaite i te tura. A feruri na i te mau orama faahiahia ta Isaia, Ezekiela, Daniela e Ioane i ite. Noa ˈtu mea taa ê te orama tataitahi, e tuatiraa te vai ra i roto i tera mau orama. Ua ite ratou pauroa i te hanahana o Iehova, ei Arii. Ua ite Isaia “ia Iehova e parahi ra i nia i te tahi terono teitei mau.” (Isa. 6:1-3) Ua ite Ezekiela ia Iehova e parahi ra i nia i to ˈna  pereoo e “e anaana ati aˈe ia ˈna mai to te anuanua.” (Ezk. 1:26-28) Ua ite Daniela i “To te mau Mahana Tahito ra” e ahu uouo to ˈna e e ura auahi to ˈna terono. (Dan. 7:9, 10) E ua ite Ioane ia Iehova e parahi ra i nia i to ˈna terono e ua haaatihia te reira i te hoê anuanua e hohoˈa i te semaradino. (Apo. 4:2-4) Ia feruri tatou i te hanahana rahi o Iehova, e haafaufaa ˈtu â tatou i te ô o te pure e e hinaaro tatou e faafatata ˈtu ia ˈna ma te tura. Eaha râ ta tatou e faahiti i roto i ta tatou mau pure?

4. Eaha ta tatou e haapii mai i te mau parau omuaraa o te pure a te Fatu itehia i roto i te Mataio 6:9, 10?

⁴ A taio i te Mataio 6:9, 10. I roto i te aˈoraa i nia i te mouˈa, ua haapii Iesu i ta ˈna mau pǐpǐ e nafea ia pure ia au i to te Atua hinaaro. I muri aˈe i to ˈna parauraa “e na ô . . . outou ia pure,” ua faaite Iesu eaha te mea faufaa roa ˈˈe te titauhia ia faahiti i roto i te pure: A tahi roa, te moˈaraa o te iˈoa o Iehova. Te piti, ia tae mai ta ˈna Faatereraa arii o te haamou i te mau enemi atoa o te Atua. E te toru, te mau haamaitairaa ta ˈna e hopoi mai a muri aˈe no te fenua e te huitaata. Ma te faahiti i te reira i roto i ta tatou mau pure, e faaite tatou e mea faufaa roa te hinaaro o Iehova no tatou.

5. Mea tano anei ia pure no to tatou mau hinaaro?

⁵ I roto i te pure a te Fatu, ua faaite atoa Iesu e nehenehe tatou e pure no to tatou mau hinaaro. E nehenehe tatou e ani ia Iehova ia horoa mai i ta tatou maa no te mahana, ia faaore mai i ta tatou mau hara, ia paruru ia tatou i mua i te faahemaraa e ia faaora ia tatou i te varua ino. (Mat. 6:11-13) Ia ani tatou ia Iehova i te reira, te faaite ra tatou e te hinaaro mau ra tatou i ta ˈna tauturu e ta ˈna farii maitai.

6. E pure anei tatou no te mau mea noa i faahitihia i roto i te pure a te Fatu? A faataa.

⁶ Aita Iesu i titau i ta ˈna mau pǐpǐ ia tamau aau i te pure a te Fatu. I roto i te tahi atu o ta ˈna mau pure, ua faahiti Iesu i to ˈna mau hinaaro i taua mau taime ra.  (Mat. 26:39, 42; Ioa. 17:1-26) Mai ia ˈna, e nehenehe atoa tatou e faaite ia Iehova i ta tatou mau haapeapearaa. Ia titauhia ia rave tatou i te hoê faaotiraa, e ani tatou ia ˈna i te paari e te maramarama. (Sal. 119:33, 34) Ia amo tatou i te hoê hopoia, e nehenehe tatou e ani ia Iehova i te ite papu e te haroˈaroˈa. (Mas. 2:6) E nehenehe te mau metua e pure no ta ratou mau tamarii. E nehenehe atoa te mau tamarii e pure no to ratou mau metua e e nehenehe tatou paatoa e pure no te mau piahi Bibilia e no te feia ta tatou e poro nei. Eita râ tatou e faahiti noa i to tatou mau hinaaro ia pure tatou.

7. No te aha mea faufaa ia arue tatou ia Iehova i roto i ta tatou mau pure?

⁷ Mea faufaa atoa ia arue tatou ia Iehova i roto i ta tatou mau pure. Aita ˈtu taata te tia ia aruehia maori râ Iehova. Mea “maitai” hoi o ˈna e ua “ineine i te faaore i te hara.” Hau atu, e “Atua aroha hamani maitai e te aumihi [o ˈna] o te ore e riri oioi e o tei rahi i te here taiva ore e te haapao maitai.” (Sal. 86:5, 15) E tumu papu iho â to tatou no te arue ia Iehova no to ˈna mau huru maitatai e ta ˈna mau ohipa.

8. E nehenehe tatou e haamauruuru ia Iehova no teihea mau mea? (Salamo 104:12-15, 24)

⁸ Hau atu i te arueraa ia Iehova i roto i ta tatou mau pure, e hinaaro tatou e haamauruuru ia ˈna no te mau mea faahiahia ta ˈna e horoa mai ra. Ei hiˈoraa, e haamauruuru tatou ia ˈna no te û nehenehe mau o te mau tiare, no te monamona huru rau o te maa e no te oaoa ia fanaˈo i te hoa maitai. Te horoa mai ra to tatou Metua î i te here i te reira e te tahi atu mau mea ta tatou e hinaaro, ia oaoa noa tatou. (A taio i te Salamo 104:12-15, 24.) Te mea faufaa ˈtu â, e haamauruuru tatou ia Iehova no te maa pae varua e rave rahi ta tatou e fanaˈo ra e no te tiaturiraa faahiahia no a muri aˈe.

9. Eaha te tauturu mai ia haamanaˈo tatou i te haamauruuru ia Iehova? (Tesalonia 1, 5:17, 18)

⁹ E nehenehe e moˈehia ia tatou ia haamauruuru ia Iehova no te mau mea atoa ta ˈna e rave no tatou. E nafea râ tatou?  I nia i te hoê tapura, e nehenehe tatou e tapaopao i te mau mea ta tatou i ani ia Iehova a hiˈopoa tamau atu ai mea nafea Iehova i te pahonoraa i ta tatou mau pure. I reira ïa tatou e nehenehe ai e haamauruuru ia ˈna. (A taio i te Tesalonia 1, 5:17, 18.) A feruri na. E oaoa tatou ia haamauruuruhia tatou. Hoê â atoa no Iehova, ia haamanaˈo tatou i te haamauruuru ia ˈna no te mau mea ta ˈna i rave no tatou, e oaoa roa o ˈna. (Kol. 3:15) Eaha te tahi atu tumu e haamauruuru ai tatou ia Iehova?

10. Ia au i te Petero 1, 2:21, no te aha mea faufaa ia haamauruuru tatou ia Iehova i to ˈna tonoraa mai ia Iesu i nia i te fenua?

¹⁰ A taio i te Petero 1, 2:21. Mea faufaa ia haamauruuru tatou ia Iehova i to ˈna tonoraa mai i ta ˈna Tamaiti here no te haapii ia tatou. Maoti te hiˈoraa o Iesu, mea rahi ta tatou e haapii mai no nia ia Iehova e e nafea ia faaoaoa ia ˈna. Ia faatupu tatou i te faaroo i te tusia taraehara o Iesu, e nehenehe ïa tatou e fanaˈo i te hoê auhoaraa piri e o Iehova.​—Roma 5:1.

11. No te aha mea faufaa ia pure tatou ia Iehova na roto i te iˈoa o Iesu?

¹¹ E mauruuru tatou ia Iehova no te mea e nehenehe tatou e pure ia ˈna na roto i ta ˈna Tamaiti. Maoti noa hoi Iesu, e nehenehe ai tatou e faafatata ˈtu ia Iehova. E faaroo e e pahono Iehova i ta tatou mau pure, ia faatae tatou i te reira na roto noa i te iˈoa o Iesu. Ua parau Iesu: “Te mau mea atoa ta outou e ani ma to ˈu iˈoa, e rave au, ia faahanahanahia hoi te Metua na roto i te Tamaiti.”​—Ioa. 14:13, 14.

12. Eaha te tahi atu tumu e haamauruuru ai tatou ia Iehova no ta ˈna Tamaiti?

¹² Maoti te tusia taraehara o Iesu, e faaore Iehova i ta tatou mau hara. I roto i te Bibilia, te parauhia ra no Iesu, o ˈna te “tahuˈa rahi” e te parahi ra oia “i te pae atau o te terono o te Atua teitei i te raˈi.” (Heb. 8:1) E “tauturu to tatou tei te Metua ra, o Iesu Mesia.” (Ioa. 1, 2:1) Auê tatou i te mauruuru ia Iehova i to ˈna horoaraa mai i te hoê tahuˈa rahi mai ia Iesu, o te taa ra i to tatou mau paruparu e o “te tia atoa ra ei arai no tatou.” (Roma 8:34; Heb. 4:15) Ahani aita Iesu i horoa i to ˈna ora, aita tatou e nehenehe e faafatata ia Iehova na roto i te pure, i te mea hoi e taata hara tatou. Papu maitai, aita tatou e nehenehe e faahoˈi atu i ta Iehova i rave no tatou, oia hoi te ora o ta ˈna Tamaiti here. Auê ïa ô faufaa roa ta ˈna i horoa no tatou!

13. I te po hou o ˈna a pohe ai, mea nafea Iesu i te faaiteraa i to ˈna here i ta ˈna mau pǐpǐ?

¹³ I te po hou o ˈna a pohe ai, ua pure maoro Iesu no ta ˈna mau pǐpǐ ma te ani i to ˈna Metua “ia paruru . . . ia ratou i te varua ino.” (Ioa. 17:15) Tapao faaite ïa e mea here roa na Iesu ia ratou. A feruri na, fatata Iesu i te pohe aita râ o ˈna i haapao ia ˈna iho, ua haapeapea aˈe o ˈna no ta ˈna mau aposetolo.

14. E nafea ia faaite e mea here na tatou i te mau taeae e tuahine?

¹⁴ Mai ia Iesu, eita tatou e haapao noa i to tatou iho mau hinaaro. E pure tamau râ tatou no to tatou mau taeae e tuahine. Ia na reira tatou, te pee ra ïa tatou i te faaueraa a Iesu ia here te tahi i te tahi e te faaite ra tatou ia Iehova e mea here  roa na tatou i to tatou mau taeae e tuahine. (Ioa. 13:34) E nehenehe ta tatou mau pure e tauturu ia ratou mai ta te Bibilia e parau ra: “Te pure taparuparuraa a te hoê taata parau-tia, mea puai mau â.”​—Iak. 5:16.

15. No te aha mea faufaa ia pure no to tatou mau taeae e tuahine?

¹⁵ E titauhia ia pure no to tatou mau taeae e tuahine o te faaruru ra i te fifi. E nehenehe tatou e ani ia Iehova ia horoa ia ratou i te puai no te faaoromai tamau i te maˈi, te ati natura, te tamaˈi, te hamani-ino-raa e te tahi atu mau fifi. E nehenehe atoa tatou e pure no to tatou mau taeae e tuahine e ohipa ra ei rima tauturu. Te fifihia ra paha te hoê taeae aore ra tuahine ta oe i matau, e nehenehe ïa oe e faahiti i to ˈna iˈoa i roto i ta oe mau pure. Ia pure tatou ia Iehova no to tatou mau taeae e tuahine, te faaite ra tatou i to tatou here rahi no ratou.

16. No te aha e titauhia ia pure no te mau taeae faatoroahia i roto i te amuiraa?

¹⁶ E mauruuru roa atoa te mau taeae faatoroahia o te amuiraa, ia pure tatou no ratou. Ua ite te aposetolo Paulo i te faufaaraa o te reira i to ˈna papairaa: “A pure atoa no ˈu, ia noaa ia ˈu te aravihi ia parau atu ma te mǎtaˈu ore, ia faaite hoi au i te parau huna moˈa o te parau apî oaoa.” (Eph. 6:19) I teie atoa mahana, mea rahi te taeae o te haa ra ma te itoito i roto i te mau amuiraa. Ia pure tatou ia Iehova no te tauturu i tera mau taeae, te faaite ra tatou i to tatou here no ratou.

17-18. I roto i teihea mau tupuraa, e anihia paha tatou ia pure no vetahi ê e eaha ta tatou e haamanaˈo?

¹⁷ I te tahi taime, e anihia paha tatou ia pure no vetahi ê. Ei hiˈoraa, e titau manihini paha te hoê tuahine ia tatou no te hoê haapiiraa Bibilia e e ani mai o ˈna ia tatou ia pure. I te mea e aita tatou i matau i te piahi, mea maitai aˈe paha ia rave tatou i te pure faaotiraa. No te mea, i muri aˈe noa i te haapiiraa tatou e ite ai eaha te faahiti i roto i ta tatou pure no te tauturu i te piahi.

¹⁸ I te putuputuraa no te pororaa e a te  amuiraa, e anihia i te mau taeae ia faaoti i te pure. E haamanaˈo taua mau taeae ra i te faufaaraa o te mau putuputuraa. Aita te pure i faanahohia no te aˈo aore ra no te faaara i te amuiraa. No te mau putuputuraa, e pae minuti noa tei faataahia no te himene e te pure. E haapao ïa te taeae maitihia no te pure ia ore ta ˈna parau ia rahi roa, i te omuaraa iho â râ o te putuputuraa.​—Mat. 6:7.

19. Eaha te tauturu ia tatou ia vai ineine no te mahana haavaraa o Iehova?

¹⁹ A piri mai ai te mahana haavaraa o Iehova, e titauhia ia tatou ia haafaufaa ˈtu â i te ô o te pure i roto i to tatou oraraa. Ua parau Iesu: “A vai ara ïa e a tamau i te pure ia nehenehe outou e ora ˈtu i teie mau mea atoa o te tupu iho â.” (Luka 21:36) Ia pure tamau tatou, e puai atu â to tatou faaroo e e ineine tatou ia tae mai te mahana haavaraa o Iehova.

20. E nafea ta tatou mau pure e riro ai ei mea noˈanoˈa?

²⁰ I roto i teie tumu parau haapiiraa, ua ite mai tatou e e ô faufaa mau â te pure. Te mea faufaa roa e titauhia ia tatou ia haapao, o te hinaaro o Iehova ïa. E faaite atoa tatou i to tatou mauruuru ia Iehova no ta ˈna Faatereraa arii e i te horoaraa mai i te ora o ta ˈna Tamaiti no tatou. E pure atoa tatou no to tatou mau taeae e tuahine e no to tatou mau hinaaro pae tino e pae varua. Ia feruri maitai tatou eaha ta tatou e ani i roto i ta tatou mau pure, e faaite ïa tatou e te haafaufaa mau ra tatou i te ô faahiahia mau o te pure. Ia riro ta tatou mau parau ei mea noˈanoˈa no Iehova e ei “mea au . . . na ˈna.”​—Mas. 15:8.