1-2. Mai te peu aita outou i ineine atura no te bapetizoraa, eaha ta outou e nehenehe e rave? (A hiˈo i te hohoˈa i te api matamua.)

 MAI te peu e te opua ra outou e bapetizo ia outou, e fa maitai roa teie. Mai te peu ua ineine outou e ua farii te mau matahiapo, eiaha ïa e haamarirau i te bapetizo ia outou. A na reira ˈi, e fanaˈo outou i te hoê oraraa oaoa a tavini ai ia Iehova.

² Tera râ, te titauhia ra anei ia outou ia haamaitai i te tahi mau tuhaa o to outou oraraa hou a bapetizohia ˈi? Mai te peu e e, eiaha roa ˈtu e toaruaru. E naea ia outou tera fa faufaa roa, mea apî aore ra mea paari anei outou.

3. Eaha ta te hoê taata tiaraa teitei no Etiopia i ani ia Philipa, eaha râ te uiraa e hiti mai? (Ohipa 8:36, 38)

³ A taio i te Ohipa 8:36, 38. Ua ani te hoê taata tiaraa teitei no Etiopia ia Philipa: “Eaha te tapea ra ia ˈu ia bapetizohia?” Ua hinaaro mau te taata no Etiopia ia bapetizohia o ˈna, ua ineine anei râ o ˈna i te rave i teie taahiraa faufaa mau?

4. Mea nafea to te taata tiaraa teitei no Etiopia faaiteraa i to ˈna hinaaro e haapii atu â no nia ia Iehova?

⁴ Ua haere teie taata no Etiopia “i Ierusalema e haamori i te Atua.” (Ohi. 8:27) Ua farii ïa o ˈna i te haapaoraa ati Iuda. Ua haapii o ˈna o vai Iehova maoti te mau Papai Hebera. Ua hinaaro râ teie taata e haapii atu â.  Inaha, i to Philipa farereiraa ia ˈna, te taio ra o ˈna i te hoê otaro a te peropheta Isaia. (Ohi. 8:28) E ere roa ˈtu ïa i te hoê parau ohie ia taa. Tapao faaite tera e ua hinaaro iho â taua taata tiaraa teitei ra no Etiopia e haapii atu â.

5. Mea nafea to teie taata no Etiopia faaohiparaa i ta ˈna i haapii?

⁵ E taata mana oia no Kaneda arii vahine no Etiopia. E tiaau o ˈna “i te mau taoˈa atoa” a teie arii vahine. (Ohi. 8:27) E rave rahi ohipa e hopoia ta ˈna. Noa ˈtu râ, ua rave o ˈna i te taime no te haamori ia Iehova. Aita o ˈna i haapii noa, ua faaohipa atoa râ i ta ˈna i haapii mai. Ei hiˈoraa, na Etiopia roa o ˈna i te haereraa i Ierusalema no te haamori ia Iehova i te hiero. Ua faaite ïa teie taata i to ˈna hinaaro mau e haamori ia Iehova, noa ˈtu eaha te titauhia ia ˈna ia rave.

6-7. Mea nafea to te taata no Etiopia here ia Iehova i te rahi-noa-raa?

⁶ Ua haapii Philipa i te tahi pue parau mau faufaa roa i te taata no Etiopia. Ua haapii atu o ˈna e o Iesu te Mesia. (Ohi. 8:34, 35) Ua putapû roa te taata no Etiopia i ta Iesu i rave no ˈna. Eaha ïa ta ˈna e rave? E nehenehe o ˈna e tamau noa i roto i te faaroo ati Iuda. No to ˈna râ here rahi ia Iehova e ia Iesu, faaoti atura o ˈna i te bapetizo ia ˈna ei pǐpǐ na Iesu Mesia. I reira Philipa i te iteraa e ua ineine teie taata e bapetizo atura oia ia ˈna.

⁷ Ia pee outou i te hiˈoraa o teie taata no Etiopia, e ineine ïa outou no te bapetizoraa. E parau atoa outou mai ia ˈna: “Eaha te tapea ra ia ˈu ia bapetizohia?” E nafea râ ia pee i to ˈna hiˈoraa? Ma te tamau ïa i te haapii i te Bibilia, ma te faaohipa i ta tatou i haapii e ma te haapuai i to tatou here ia Iehova.

8. Eaha ta te Ioane 17:3 e faaitoito ra ia tatou ia rave?

⁸ A taio i te Ioane 17:3. Ua faaitoito anei teie irava ia outou ia haapii i te Bibilia? Papu maitai e e. E faaitoito anei râ teie irava ia outou ia tamau i te haapii? E. Eita tatou e faaea i te haapii no nia “i te Atua mau.” (Koh. 3:11) E tamau tatou i te haapii e a muri noa ˈtu. Rahi atu â tatou i te haapii no nia ia Iehova, rahi atu â ïa tatou i te faafatata ˈtu ia ˈna.—Sal. 73:28.

9. Eaha te tia ia tatou ia rave a haamata ˈi i te haapii i te parau mau?

⁹ A haapii ai tatou no nia ia Iehova, e haapii na mua tatou i te “mau mea rii,” mai ta Paulo e parau ra i roto i ta ˈna rata  i te mau Hebera. Aita oia i haafaufaa ore i teie mau haapiiraa, ua faaau râ o ˈna i te reira i te û o te horoahia i te hoê pêpe. (Heb. 5:12; 6:1) Ua faaue atoa Paulo i te mau Kerisetiano atoa ia faahohonu atu â i ta ratou haapiiraa Bibilia. Mea au anei na outou e faahohonu i ta outou haapiiraa Bibilia? Hinaaro anei outou e ite atu â e e tamau i te haapii no nia ia Iehova e ta ˈna opuaraa?

10. No te aha mea fifi no vetahi ia haapii?

¹⁰ No vetahi, e ere i te mea ohie ia haapii i te tahi mea apî. E no outou? I te fare haapiiraa, ua haapii anei outou i te taio maitai e i te apo mai i te tahi mea apî? Mea au anei na outou i te haapii e te ite ra anei outou i te apî? Aore ra te manaˈo ra outou eita e haere ia outou ia haapii maoti te mau buka. Noa ˈtu eaha to outou tupuraa, e nehenehe Iehova e tauturu mai, inaha mea tia roa oia e o ˈna te Orometua maitai roa ˈˈe.

11. Mea nafea to Iehova faaiteraa e o ˈna te “Orometua Rahi roa ˈˈe”?

¹¹ Ua pii Iehova ia ˈna iho “to outou Orometua Rahi roa ˈˈe.” (Isa. 30:20, 21) E Orometua hamani maitai e te faaoromai o ˈna. E imi atoa oia i te mea maitai i roto i ta ˈna mau tavini. (Sal. 130:3) Eita o ˈna e titau ia tatou ia rave i te ore e maraa ia tatou. A haamanaˈo, ua horoa mai o ˈna i te hoê ô faahiahia mau, te roro. (Sal. 139:14) Ua poiete o ˈna ia tatou e te hinaaro e haapii, e ia tamau tatou i te na reira e a muri noa ˈtu. Mea faufaa ïa “ia hiaai” tatou i te pue parau mau Bibilia i teie nei â. (Pet. 1, 2:2) A haamau ïa i te fa e taio e e haapii i te Bibilia i te mau mahana atoa. (Ios. 1:8) Maoti te haamaitairaa a Iehova, e au roa outou i te taio e i te haapii atu â no nia ia ˈna.

12. No te aha mea maitai ia haapii tatou no nia ia Iesu?

¹² Ia rave tatou i te taime no te feruriruri i nia i te oraraa o Iesu e i ta ˈna taviniraa, e pee maite ïa tatou i to ˈna hiˈoraa no te tavini ia Iehova, i te taime fifi iho â râ. (Pet. 1, 2:21) Ua faaite tia ˈtu Iesu i ta ˈna mau pǐpǐ eaha te mau fifi ta ratou e faaruru. (Luka 14:27, 28) Ua tiaturi papu râ o ˈna e e nehenehe ratou e vai taiva ore ia Iehova mai ia ˈna. (Ioa. 16:33) E haapii anaˈe ïa no nia i te oraraa o Iesu a feruri atu ai e nafea ia pee i to ˈna hiˈoraa i te mau mahana atoa.

13. Eaha te tia ia tamau i te ani ia Iehova e no te aha?

¹³ Mea au ia haapii, eita râ e navai. Te mea faufaa roa, ia ite atu â ïa tatou no nia ia Iehova a here e a tiaturi atu ai ia ˈna. (Kor. 1, 8:1-3) A haapii noa ˈi, a tamau i te ani ia Iehova ia tauturu mai e ia faarahi i to outou faaroo. (Luka 17:5) Papu, e pahono o ˈna i ta outou mau pure. Maoti to outou faaroo niuhia i nia i ta outou i haapii no nia i te Atua, e hinaaro outou e rave hau atu â.—Iak. 2:26.

14. Mea nafea te aposetolo Petero i te faaiteraa i te faufaaraa ia faaohipa i ta tatou e haapii ra? (A hiˈo atoa i te hohoˈa.)

¹⁴ Ua faaite te aposetolo Paulo i te faufaaraa ia tamau te mau pǐpǐ a Iesu i te faaohipa i ta ratou e haapii ra. Ua faahiti ïa o ˈna i te aamu o Noa. Ua parau hoi Iehova ia Noa e e haamou o ˈna i te feia ino i ora na i tera ra tau na roto i te diluvi.  Eaha ïa te titauhia ia Noa e to ˈna utuafare ia rave? Ua faahiti Petero i te tau hou te diluvi, “a hamanihia ˈi te araka.” (Pet. 1, 3:20) Ua faaroo Noa e to ˈna utuafare i te faaararaa a te Atua ma te hamani i te hoê araka, hoê ïa pahi rarahi. (Heb. 11:7) Faaau atura Petero i ta Noa i rave i tei titauhia no te bapetizoraa ma te parau: “Te bapetizoraa o te faaora atoa ia outou.” (Pet. 1, 3:21) E nehenehe ïa e faaauhia ta outou faaineineraa no te bapetizoraa i ta Noa e to ˈna utuafare i rave i te roaraa matahiti i hamani ai ratou i te araka. Eaha ïa te titauhia ia rave ia ineine outou no te bapetizoraa?

15. E nafea ia faaite e ua tatarahapa mau tatou?

¹⁵ E titauhia na mua roa ia faaite e ua tatarahapa mau tatou i ta tatou mau hara. (Ohi. 2:37, 38) I reira ïa tatou e taui ai i to tatou huru oraraa. Ua haapae anei outou i te tahi peu ta Iehova e au ore mai te peu taotoraa tia ore, te pupuhiraa i te avaava e te parau-ino-raa? (Kor. 1, 6:9, 10; Kor. 2, 7:1; Eph. 4:29) Mai te peu e aita â, a tutava noa ïa. A paraparau i te taata e faatere ra i ta outou haapiiraa aore ra a ani i te tauturu e te aratairaa a te mau matahiapo. Mai te peu e taurearea outou o te ora noa ra i te fare metua, a ani i to outou metua ia tauturu ia outou ia faaineine no te bapetizoraa ma te haapae i te hoê peu ino.

16. Eaha te tia ia rave no te haamori ia Iehova?

¹⁶ Mea faufaa ia haamau i te hoê porotarama pae varua. E titauhia ia outou ia tamau i te haere e i te apiti i te mau putuputuraa. (Heb. 10:24, 25) Ia ineine outou i te apiti i te pororaa, a tamau i te rave i te reira, e oaoa ˈtu â ïa outou. (Tim. 2, 4:5) E te mau taurearea e ora noa ra i te fare metua, a ui ia outou iho: ‘Na to ˈu na metua anei e parau roa mai ia haere i te putuputuraa e i te pororaa aore ra na ˈu iho e faaineine ia ˈu?’ Mai te peu na outou iho, te faaite ra ïa outou i to outou faaroo, here e mauruuru ia Iehova to outou Atua. Teie ïa “te  mau ohipa tei au i te haamoriraa i te Atua anaˈe,” ta outou e pûpû no Iehova. (Pet. 2, 3:11; Heb. 13:15) E mauruuru Iehova i te mau ô pûpûhia ma te aau tae. (A hiˈo atoa i te Korinetia 2, 9:7.) E na reira tatou no to tatou hinaaro e horoa i te mea maitai roa ˈˈe na Iehova.

17-18. Eaha te huru maitai e titauhia no te faaineine ia outou no te bapetizoraa e no te aha? (Maseli 3:3-6)

¹⁷ A tamau noa ˈi outou i te nuu i mua i te pae varua, e faaruru outou i te tahi mau fifi. E faaooohia e e hamani-ino-hia paha outou no to outou faaroo. (Tim. 2, 3:12) Peneiaˈe te tutava ra outou i te haapae i te hoê peu ino, o te nehenehe e hoˈi mai i te tahi taime. Aore ra e toaruaru roa outou no te mea te ru nei outou i te bapetizo. Eaha râ te tauturu ia outou ia faaoromai tamau? Na to outou ïa here ia Iehova.

¹⁸ O to outou here ia Iehova te mea faufaa roa ˈˈe. (A taio i te Maseli 3:3-6.) Maoti teie here, e nehenehe outou e faaruru i te mau fifi. Pinepine atoa te Bibilia i te faahiti i to Iehova here taiva ore i ta ˈna mau tavini. Eita roa ˈtu o ˈna e faarue i ta ˈna mau tavini aore ra e faaea i te here ia ratou. (Sal. 100:5) Ua hamanihia outou ia au i te huru o te Atua. (Gen. 1:26) E nafea ïa outou e faaite ai i tera huru here?

19. E nafea outou e faaite ai i to outou mauruuru no te mau mea atoa ta Iehova i rave no outou? (Galatia 2:20)

¹⁹ A faaite i to outou mauruuru ia Iehova. (Tes. 1, 5:18) I te mau mahana atoa, a feruri e mea nafea Iehova i te faaiteraa i to ˈna here ia outou. A faaite i to outou mauruuru ia ˈna na roto i te pure ma te faahiti roa ˈtu i ta ˈna i rave no outou. Ia papu ia outou e ua rave Iehova i tera mau mea atoa no to ˈna here ia outou. Tera ta te aposetolo Paulo i papu. (A taio i te Galatia 2:20.) A ui ia outou iho: ‘E hinaaro anei au e faaite atoa i to ˈu here ia ˈna?’ E tauturu to outou here ia Iehova ia mau papu i mua i te mau tamataraa e ia faaoromai tamau i te fifi. Maoti te reira, e hinaaro atu â outou e haamori ia Iehova i te mau mahana atoa e e faaite i to outou here ia ˈna.

20. Eaha te tia ia rave a pûpû ai outou i to outou ora ia Iehova e no te aha mea faufaa roa teie faaotiraa?

 ²⁰ Ia tae i te hoê taime, no to outou here ia ˈna, e pûpû outou i to outou ora ia Iehova na roto i te hoê pure taa ê. A na reira ˈi, e fanaˈo outou i teie tiaturiraa faahiahia mau e ora no ˈna e a muri noa ˈtu. Ua pûpû anaˈe outou i to outou ora ia Iehova, ua euhe ïa outou i te tavini ia ˈna i te taime oaoa e i te taime fifi. Hoê noa taime outou e faahiti ai i tera euhe. Auê ïa faaotiraa faufaa mau ta outou e rave! A feruri na, e rave rahi faaotiraa ta outou e rave nei i roto i te oraraa. Tera râ, aita ˈtu e faaotiraa maitai aˈe maori râ te pûpûraa i to outou ora ia Iehova. (Sal. 50:14) E tamata Satani i te haafifi i to outou here ia Iehova e i te tapea ia outou ia tavini ia ˈna. Eiaha roa ˈtu râ e vaiiho ia Satani ia upootia! (Ioba 27:5) Na to outou here rahi ia Iehova e tauturu ia outou ia tapea i ta outou euhe.

21. No te aha e parauhia ˈi e e haamataraa noa te bapetizoraa?

²¹ I muri aˈe i to outou pûpûraa i to outou ora ia Iehova, a faaite i te mau matahiapo i te faaotiraa faufaa ta outou i rave. A haamanaˈo, ma te bapetizo ia outou, o te haamataraa noa teie o ta outou hororaa Kerisetiano. No reira, a haapuai i to outou here ia Iehova i teie nei â. A haamau i te mau fa pae varua ia rahi atu â to outou here ia ˈna. A na reira ˈi, eita e ore e ineine outou no te bapetizoraa. Auê ïa mahana oaoa mau! E haamataraa noa râ. Ia rahi noa ˈtu â ïa to outou here ia Iehova e i ta ˈna Tamaiti mai teie nei e a muri noa ˈtu!